| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
১০. ফস্সমূলকসুত্তং
10. Phassamūlakasuttaṃ
২৫৮. ‘‘তিস্সো ইমা, ভিক্খৰে, ৰেদনা ফস্সজা ফস্সমূলকা ফস্সনিদানা ফস্সপচ্চযা। কতমা তিস্সো? সুখা ৰেদনা, দুক্খা ৰেদনা, অদুক্খমসুখা ৰেদনা। সুখৰেদনিযং, ভিক্খৰে, ফস্সং পটিচ্চ উপ্পজ্জতি সুখা ৰেদনা। তস্সেৰ সুখৰেদনিযস্স ফস্সস্স নিরোধা, যং তজ্জং ৰেদযিতং সুখৰেদনিযং ফস্সং পটিচ্চ উপ্পন্না সুখা ৰেদনা, সা নিরুজ্ঝতি, সা ৰূপসম্মতি। দুক্খৰেদনিযং, ভিক্খৰে, ফস্সং পটিচ্চ উপ্পজ্জতি দুক্খা ৰেদনা। তস্সেৰ দুক্খৰেদনিযস্স ফস্সস্স নিরোধা, যং তজ্জং ৰেদযিতং দুক্খৰেদনিযং ফস্সং পটিচ্চ উপ্পন্না দুক্খা ৰেদনা, সা নিরুজ্ঝতি, সা ৰূপসম্মতি। অদুক্খমসুখৰেদনিযং, ভিক্খৰে, ফস্সং পটিচ্চ উপ্পজ্জতি অদুক্খমসুখা ৰেদনা। তস্সেৰ অদুক্খমসুখৰেদনিযস্স ফস্সস্স নিরোধা, যং তজ্জং ৰেদযিতং অদুক্খমসুখৰেদনিযং ফস্সং পটিচ্চ উপ্পন্না অদুক্খমসুখা ৰেদনা, সা নিরুজ্ঝতি, সা ৰূপসম্মতি। সেয্যথাপি , ভিক্খৰে, দ্ৰিন্নং কট্ঠানং সঙ্ঘট্টনসমোধানা 1 উস্মা জাযতি, তেজো অভিনিব্বত্ততি। তেসংযেৰ কট্ঠানং নানাভাৰা ৰিনিক্খেপা, যা তজ্জা উস্মা, সা নিরুজ্ঝতি, সা ৰূপসম্মতি। এৰমেৰ খো, ভিক্খৰে, ইমা তিস্সো ৰেদনা ফস্সজা ফস্সমূলকা ফস্সনিদানা ফস্সপচ্চযা। তজ্জং ফস্সং পটিচ্চ তজ্জা ৰেদনা উপ্পজ্জন্তি। তজ্জস্স ফস্সস্স নিরোধা তজ্জা ৰেদনা নিরুজ্ঝন্তী’’তি। দসমং।
258. ‘‘Tisso imā, bhikkhave, vedanā phassajā phassamūlakā phassanidānā phassapaccayā. Katamā tisso? Sukhā vedanā, dukkhā vedanā, adukkhamasukhā vedanā. Sukhavedaniyaṃ, bhikkhave, phassaṃ paṭicca uppajjati sukhā vedanā. Tasseva sukhavedaniyassa phassassa nirodhā, yaṃ tajjaṃ vedayitaṃ sukhavedaniyaṃ phassaṃ paṭicca uppannā sukhā vedanā, sā nirujjhati, sā vūpasammati. Dukkhavedaniyaṃ, bhikkhave, phassaṃ paṭicca uppajjati dukkhā vedanā. Tasseva dukkhavedaniyassa phassassa nirodhā, yaṃ tajjaṃ vedayitaṃ dukkhavedaniyaṃ phassaṃ paṭicca uppannā dukkhā vedanā, sā nirujjhati, sā vūpasammati. Adukkhamasukhavedaniyaṃ, bhikkhave, phassaṃ paṭicca uppajjati adukkhamasukhā vedanā. Tasseva adukkhamasukhavedaniyassa phassassa nirodhā, yaṃ tajjaṃ vedayitaṃ adukkhamasukhavedaniyaṃ phassaṃ paṭicca uppannā adukkhamasukhā vedanā, sā nirujjhati, sā vūpasammati. Seyyathāpi , bhikkhave, dvinnaṃ kaṭṭhānaṃ saṅghaṭṭanasamodhānā 2 usmā jāyati, tejo abhinibbattati. Tesaṃyeva kaṭṭhānaṃ nānābhāvā vinikkhepā, yā tajjā usmā, sā nirujjhati, sā vūpasammati. Evameva kho, bhikkhave, imā tisso vedanā phassajā phassamūlakā phassanidānā phassapaccayā. Tajjaṃ phassaṃ paṭicca tajjā vedanā uppajjanti. Tajjassa phassassa nirodhā tajjā vedanā nirujjhantī’’ti. Dasamaṃ.
সগাথাৰগ্গো পঠমো ।
Sagāthāvaggo paṭhamo .
তস্সুদ্দানং –
Tassuddānaṃ –
সমাধি সুখং পহানেন, পাতালং দট্ঠব্বেন চ।
Samādhi sukhaṃ pahānena, pātālaṃ daṭṭhabbena ca;
সল্লেন চেৰ গেলঞ্ঞা, অনিচ্চ ফস্সমূলকাতি॥
Sallena ceva gelaññā, anicca phassamūlakāti.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ১০. ফস্সমূলকসুত্তৰণ্ণনা • 10. Phassamūlakasuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ১০. ফস্সমূলকসুত্তৰণ্ণনা • 10. Phassamūlakasuttavaṇṇanā
