| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
10. ඵස්‌සමූලකසුත්‌තං
10. Phassamūlakasuttaṃ
258. ‘‘තිස්‌සො ඉමා, භික්‌ඛවෙ, වෙදනා ඵස්‌සජා ඵස්‌සමූලකා ඵස්‌සනිදානා ඵස්‌සපච්‌චයා. කතමා තිස්‌සො? සුඛා වෙදනා, දුක්‌ඛා වෙදනා, අදුක්‌ඛමසුඛා වෙදනා. සුඛවෙදනියං, භික්‌ඛවෙ, ඵස්‌සං පටිච්‌ච උප්‌පජ්‌ජති සුඛා වෙදනා. තස්‌සෙව සුඛවෙදනියස්‌ස ඵස්‌සස්‌ස නිරොධා, යං තජ්‌ජං වෙදයිතං සුඛවෙදනියං ඵස්‌සං පටිච්‌ච උප්‌පන්‌නා සුඛා වෙදනා, සා නිරුජ්‌ඣති, සා වූපසම්‌මති. දුක්‌ඛවෙදනියං, භික්‌ඛවෙ, ඵස්‌සං පටිච්‌ච උප්‌පජ්‌ජති දුක්‌ඛා වෙදනා. තස්‌සෙව දුක්‌ඛවෙදනියස්‌ස ඵස්‌සස්‌ස නිරොධා, යං තජ්‌ජං වෙදයිතං දුක්‌ඛවෙදනියං ඵස්‌සං පටිච්‌ච උප්‌පන්‌නා දුක්‌ඛා වෙදනා, සා නිරුජ්‌ඣති, සා වූපසම්‌මති. අදුක්‌ඛමසුඛවෙදනියං, භික්‌ඛවෙ, ඵස්‌සං පටිච්‌ච උප්‌පජ්‌ජති අදුක්‌ඛමසුඛා වෙදනා. තස්‌සෙව අදුක්‌ඛමසුඛවෙදනියස්‌ස ඵස්‌සස්‌ස නිරොධා, යං තජ්‌ජං වෙදයිතං අදුක්‌ඛමසුඛවෙදනියං ඵස්‌සං පටිච්‌ච උප්‌පන්‌නා අදුක්‌ඛමසුඛා වෙදනා, සා නිරුජ්‌ඣති, සා වූපසම්‌මති. සෙය්‍යථාපි , භික්‌ඛවෙ, ද්‌වින්‌නං කට්‌ඨානං සඞ්‌ඝට්‌ටනසමොධානා 1 උස්‌මා ජායති, තෙජො අභිනිබ්‌බත්‌තති. තෙසංයෙව කට්‌ඨානං නානාභාවා විනික්‌ඛෙපා, යා තජ්‌ජා උස්‌මා, සා නිරුජ්‌ඣති, සා වූපසම්‌මති. එවමෙව ඛො, භික්‌ඛවෙ, ඉමා තිස්‌සො වෙදනා ඵස්‌සජා ඵස්‌සමූලකා ඵස්‌සනිදානා ඵස්‌සපච්‌චයා. තජ්‌ජං ඵස්‌සං පටිච්‌ච තජ්‌ජා වෙදනා උප්‌පජ්‌ජන්‌ති. තජ්‌ජස්‌ස ඵස්‌සස්‌ස නිරොධා තජ්‌ජා වෙදනා නිරුජ්‌ඣන්‌තී’’ති. දසමං.
258. ‘‘Tisso imā, bhikkhave, vedanā phassajā phassamūlakā phassanidānā phassapaccayā. Katamā tisso? Sukhā vedanā, dukkhā vedanā, adukkhamasukhā vedanā. Sukhavedaniyaṃ, bhikkhave, phassaṃ paṭicca uppajjati sukhā vedanā. Tasseva sukhavedaniyassa phassassa nirodhā, yaṃ tajjaṃ vedayitaṃ sukhavedaniyaṃ phassaṃ paṭicca uppannā sukhā vedanā, sā nirujjhati, sā vūpasammati. Dukkhavedaniyaṃ, bhikkhave, phassaṃ paṭicca uppajjati dukkhā vedanā. Tasseva dukkhavedaniyassa phassassa nirodhā, yaṃ tajjaṃ vedayitaṃ dukkhavedaniyaṃ phassaṃ paṭicca uppannā dukkhā vedanā, sā nirujjhati, sā vūpasammati. Adukkhamasukhavedaniyaṃ, bhikkhave, phassaṃ paṭicca uppajjati adukkhamasukhā vedanā. Tasseva adukkhamasukhavedaniyassa phassassa nirodhā, yaṃ tajjaṃ vedayitaṃ adukkhamasukhavedaniyaṃ phassaṃ paṭicca uppannā adukkhamasukhā vedanā, sā nirujjhati, sā vūpasammati. Seyyathāpi , bhikkhave, dvinnaṃ kaṭṭhānaṃ saṅghaṭṭanasamodhānā 2 usmā jāyati, tejo abhinibbattati. Tesaṃyeva kaṭṭhānaṃ nānābhāvā vinikkhepā, yā tajjā usmā, sā nirujjhati, sā vūpasammati. Evameva kho, bhikkhave, imā tisso vedanā phassajā phassamūlakā phassanidānā phassapaccayā. Tajjaṃ phassaṃ paṭicca tajjā vedanā uppajjanti. Tajjassa phassassa nirodhā tajjā vedanā nirujjhantī’’ti. Dasamaṃ.
සගාථාවග්‌ගො පඨමො .
Sagāthāvaggo paṭhamo .
තස්‌සුද්‌දානං –
Tassuddānaṃ –
සමාධි සුඛං පහානෙන, පාතාලං දට්‌ඨබ්‌බෙන ච;
Samādhi sukhaṃ pahānena, pātālaṃ daṭṭhabbena ca;
සල්‌ලෙන චෙව ගෙලඤ්‌ඤා, අනිච්‌ච ඵස්‌සමූලකාති.
Sallena ceva gelaññā, anicca phassamūlakāti.
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 10. ඵස්‌සමූලකසුත්‌තවණ්‌ණනා • 10. Phassamūlakasuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 10. ඵස්‌සමූලකසුත්‌තවණ්‌ණනා • 10. Phassamūlakasuttavaṇṇanā
