| Library / Tipiṭaka / তিপিটক • Tipiṭaka / ধম্মসঙ্গণী-মূলটীকা • Dhammasaṅgaṇī-mūlaṭīkā |
ধম্মুদ্দেসৰারকথা
Dhammuddesavārakathā
ফস্সপঞ্চমকরাসিৰণ্ণনা
Phassapañcamakarāsivaṇṇanā
আচরিযানন্তি রেৰতাচরিযস্স। ন পনেতং সারতো দট্ঠব্বং। ন হি ফস্সাদীনং কামাৰচরাদিভাৰদস্সনত্থং ইদমারদ্ধং, কিন্তু তস্মিং সমযে ফস্সাদিসভাৰদস্সনত্থন্তি।
Ācariyānanti revatācariyassa. Na panetaṃ sārato daṭṭhabbaṃ. Na hi phassādīnaṃ kāmāvacarādibhāvadassanatthaṃ idamāraddhaṃ, kintu tasmiṃ samaye phassādisabhāvadassanatthanti.
চিত্তস্স পঠমাভিনিপাতত্তাতি সব্বে চেতসিকা চিত্তাযত্তা চিত্তকিরিযাভাৰেন ৰুচ্চন্তীতি ফস্সো ‘‘চিত্তস্স পঠমাভিনিপাতো’’তি ৰুত্তো। কামং উপ্পন্নফস্সো পুগ্গলো চিত্তচেতসিকরাসি ৰা আরম্মণেন ফুট্ঠো ফস্সসহজাতায ৰেদনায তংসমকালমেৰ ৰেদেতি, ফস্সো পন ওভাসস্স পদীপো ৰিয ৰেদনাদীনং পচ্চযৰিসেসো হোতীতি পুরিমকালো ৰিয ৰুত্তো। গোপানসীনং উপরি তিরিযং ঠপিতকট্ঠং পক্খপাসো। কট্ঠদ্ৰযাদি ৰিয একদেসেন একপস্সেন অনল্লীযমানোপি রূপেন সহ ফস্সস্স সামঞ্ঞং অনল্লীযমানং সঙ্ঘট্টনমেৰ, ন ৰিসযভাৰো, সঙ্ঘট্টনঞ্চ ফস্সস্স চিত্তারম্মণানং সন্নিপতনভাৰো এৰ। ৰত্থারম্মণসন্নিপাতেন সম্পজ্জতীতি সঙ্ঘট্টনসম্পত্তিকো ফস্সো। পাণিদ্ৰযস্স সন্নিপাতো ৰিয চিত্তারম্মণসন্নিপাতো ফস্সো চিত্তস্স আরম্মণে সন্নিপতিতপ্পৰত্তিযা পচ্চযো হোতীতি কিচ্চট্ঠেনেৰ রসেন সঙ্ঘট্টনরসো। তথা পচ্চযভাৰো হি তস্স ফস্সস্স সঙ্ঘট্টনকিচ্চন্তি। যথা হি পাণিযা পাণিম্হি সঙ্ঘট্টনং তব্বিসেসভূতা রূপধম্মা, এৰং চিত্তস্স আরম্মণে সঙ্ঘট্টনং তব্বিসেসভূতো একো চেতসিকধম্মো দট্ঠব্বো। চিত্তেযেৰাতি এতেন চেতসিকসভাৰতং ৰত্থারম্মণেহি অসংসট্ঠং সঙ্ঘট্টনং ৰেদনায দস্সেতি, ন পন ৰত্থুনিস্সযতং পটিক্খিপতি। তস্স ফস্সস্স কারণভূতো তদনুরূপো সমন্নাহারো তজ্জাসমন্নাহারো। ইন্দ্রিযস্স তদভিমুখভাৰো আৰজ্জনায চ আরম্মণকরণং ৰিসযস্স পরিক্খততা অভিসঙ্খততা ৰিঞ্ঞাণস্স ৰিসযভাৰকরণন্তি অত্থো।
Cittassa paṭhamābhinipātattāti sabbe cetasikā cittāyattā cittakiriyābhāvena vuccantīti phasso ‘‘cittassa paṭhamābhinipāto’’ti vutto. Kāmaṃ uppannaphasso puggalo cittacetasikarāsi vā ārammaṇena phuṭṭho phassasahajātāya vedanāya taṃsamakālameva vedeti, phasso pana obhāsassa padīpo viya vedanādīnaṃ paccayaviseso hotīti purimakālo viya vutto. Gopānasīnaṃ upari tiriyaṃ ṭhapitakaṭṭhaṃ pakkhapāso. Kaṭṭhadvayādi viya ekadesena ekapassena anallīyamānopi rūpena saha phassassa sāmaññaṃ anallīyamānaṃ saṅghaṭṭanameva, na visayabhāvo, saṅghaṭṭanañca phassassa cittārammaṇānaṃ sannipatanabhāvo eva. Vatthārammaṇasannipātena sampajjatīti saṅghaṭṭanasampattiko phasso. Pāṇidvayassa sannipāto viya cittārammaṇasannipāto phasso cittassa ārammaṇe sannipatitappavattiyā paccayo hotīti kiccaṭṭheneva rasena saṅghaṭṭanaraso. Tathā paccayabhāvo hi tassa phassassa saṅghaṭṭanakiccanti. Yathā hi pāṇiyā pāṇimhi saṅghaṭṭanaṃ tabbisesabhūtā rūpadhammā, evaṃ cittassa ārammaṇe saṅghaṭṭanaṃ tabbisesabhūto eko cetasikadhammo daṭṭhabbo. Citteyevāti etena cetasikasabhāvataṃ vatthārammaṇehi asaṃsaṭṭhaṃ saṅghaṭṭanaṃ vedanāya dasseti, na pana vatthunissayataṃ paṭikkhipati. Tassa phassassa kāraṇabhūto tadanurūpo samannāhāro tajjāsamannāhāro. Indriyassa tadabhimukhabhāvo āvajjanāya ca ārammaṇakaraṇaṃ visayassa parikkhatatā abhisaṅkhatatā viññāṇassa visayabhāvakaraṇanti attho.
সুখৰেদনাযমেৰ লব্ভতি অস্সাদভাৰতোতি অধিপ্পাযো। ৰিস্সৰিতাযাতি অরহতায। অনেকত্থত্তা হি ধাতূনং অরহত্থো ৰিপুব্বো সুসদ্দো। ৰিস্সৰং ৰা সজনং ৰসিতা কামকারিতা ৰিস্সৰিতা। আরম্মণরসেকদেসমেৰ অনুভৰন্তীতি ইদং ফুসনাদিকিচ্চং একদেসানুভৰনমিৰ হোতীতি কত্ৰা ৰুত্তং। ৰেদযিতসভাৰো এৰ হি অনুভৰনন্তি। ফুসনাদিভাৰেন ৰা আরম্মণগ্গহণং একদেসানুভৰনং, ৰেদযিতভাৰেন গহণং যথাকামং সব্বানুভৰনং। এৰং সভাৰানেৰ তানি গহণানীতি ন ৰেদনায ৰিয ফস্সাদীনম্পি যথাসককিচ্চকরণেন সামিভাৰানুভৰনং চোদেতব্বং। অযং ইধাতি এতেন পঞ্চসু ৰেদনাসু ইমস্মিং চিত্তে অধিপ্পেতং সোমনস্সৰেদনং ৰদতি, তস্মা অসোমনস্সৰেদনং অপনেত্ৰা গহিতায সোমনস্সৰেদনায সমানা ইট্ঠাকারসম্ভোগরসতা ৰুত্তাতি ৰেদিতব্বা।
Sukhavedanāyameva labbhati assādabhāvatoti adhippāyo. Vissavitāyāti arahatāya. Anekatthattā hi dhātūnaṃ arahattho vipubbo susaddo. Vissavaṃ vā sajanaṃ vasitā kāmakāritā vissavitā. Ārammaṇarasekadesameva anubhavantīti idaṃ phusanādikiccaṃ ekadesānubhavanamiva hotīti katvā vuttaṃ. Vedayitasabhāvo eva hi anubhavananti. Phusanādibhāvena vā ārammaṇaggahaṇaṃ ekadesānubhavanaṃ, vedayitabhāvena gahaṇaṃ yathākāmaṃ sabbānubhavanaṃ. Evaṃ sabhāvāneva tāni gahaṇānīti na vedanāya viya phassādīnampi yathāsakakiccakaraṇena sāmibhāvānubhavanaṃ codetabbaṃ. Ayaṃ idhāti etena pañcasu vedanāsu imasmiṃ citte adhippetaṃ somanassavedanaṃ vadati, tasmā asomanassavedanaṃ apanetvā gahitāya somanassavedanāya samānā iṭṭhākārasambhogarasatā vuttāti veditabbā.
নিমিত্তেন পুনসঞ্জাননকিচ্চা পচ্চাভিঞ্ঞাণরসা। পুনসঞ্জাননস্স পচ্চযো পুনসঞ্জাননপচ্চযো, তদেৰ নিমিত্তং পুন…পে॰… নিমিত্তং, তস্স করণং পুন…পে॰… করণং। পুনসঞ্জাননপচ্চযভূতং ৰা নিমিত্তকরণং পুন…পে॰… করণং, তদস্সা কিচ্চন্তি অত্থো। পুনসঞ্জাননপচ্চযনিমিত্তকরণং নিমিত্তকারিকায নিমিত্তেন সঞ্জানন্তিযা চ সব্বায সঞ্ঞায সমানং ৰেদিতব্বং। ঞাণমেৰ অনুৰত্ততি, তস্মা অভিনিৰেসকারিকা ৰিপরীতগ্গাহিকা চ ন হোতীতি অধিপ্পাযো। এতেনুপাযেন সমাধিসম্পযুত্তায অচিরট্ঠানতা চ ন হোতীতি দট্ঠব্বা।
Nimittena punasañjānanakiccā paccābhiññāṇarasā. Punasañjānanassa paccayo punasañjānanapaccayo, tadeva nimittaṃ puna…pe… nimittaṃ, tassa karaṇaṃ puna…pe… karaṇaṃ. Punasañjānanapaccayabhūtaṃ vā nimittakaraṇaṃ puna…pe… karaṇaṃ, tadassā kiccanti attho. Punasañjānanapaccayanimittakaraṇaṃ nimittakārikāya nimittena sañjānantiyā ca sabbāya saññāya samānaṃ veditabbaṃ. Ñāṇameva anuvattati, tasmā abhinivesakārikā viparītaggāhikā ca na hotīti adhippāyo. Etenupāyena samādhisampayuttāya aciraṭṭhānatā ca na hotīti daṭṭhabbā.
অভিসন্দহতীতি পবন্ধতি পৰত্তেতি। চেতনাভাৰো ব্যাপারভাৰো। দিগুণুস্সাহাতি ন দিগুণং ৰীরিযযোগং সন্ধায ৰুত্তং, অত্তনো এৰ পন ব্যাপারকিচ্চস্স মহন্তভাৰং দীপেতি। উস্সাহনভাৰেনাতি আদরভাৰেন। সা হি সযং আদরভূতা সম্পযুত্তে আদরযতীতি।
Abhisandahatīti pabandhati pavatteti. Cetanābhāvo byāpārabhāvo. Diguṇussāhāti na diguṇaṃ vīriyayogaṃ sandhāya vuttaṃ, attano eva pana byāpārakiccassa mahantabhāvaṃ dīpeti. Ussāhanabhāvenāti ādarabhāvena. Sā hi sayaṃ ādarabhūtā sampayutte ādarayatīti.
ৰিজাননং আরম্মণস্স উপলদ্ধি। সন্দহনং চিত্তন্তরস্স অনুপ্পবন্ধনং। চক্খুনা হি দিট্ঠন্তি চক্খুনা দট্ঠব্বং। যথা ‘‘দিট্ঠং সুতং মুতং ৰিঞ্ঞাত’’ন্তি দট্ঠব্বাদি ৰুচ্চতি, এৰমিধাপি ৰেদিতব্বং। চক্খুনা হীতিআদীসু চক্খুনা…পে॰… মনসা দ্ৰারেনাতি অত্থো। নগরগুত্তিকস্স ৰিয চিত্তস্স আরম্মণৰিভাৰনমত্তং উপধারণমত্তং উপলদ্ধিমত্তং কিচ্চং, আরম্মণপটিৰেধনপচ্চাভিঞ্ঞাণাদি পন কিচ্চং পঞ্ঞাসঞ্ঞাদীনন্তি ৰেদিতব্বং। পুরিমনিদ্দিট্ঠন্তি সমযৰৰত্থানে নিদ্দিট্ঠং। ভাৰেন্তো ৰিয ন ন উপ্পজ্জতি, কিন্তু উপ্পজ্জতীতি দস্সেতুং ‘‘চিত্তং হোতী’’তি ৰুত্তন্তি এতং হোতি-সদ্দস্স উপ্পজ্জতি-সদ্দস্স চ সমানত্থত্তে সতি যুজ্জেয্য, তদত্থত্তে চ তত্থ উপ্পন্নং হোতীতি ন ৰুচ্চেয্য। ন হি যুত্তং উপ্পন্নং উপ্পজ্জতীতি ৰত্তুং। চিত্তস্স চ উপ্পন্নতা সমযৰৰত্থানে ৰুত্তা এৰাতি কিং তস্স পুন উপ্পত্তিদস্সনেন। যেন চ সমযৰৰত্থানং কতং, তস্স নিদ্দেসো ন ন সক্কা কাতুন্তি কিং তং নিদ্দেসত্থং উদ্দেসেন দুতিযেন, নিদ্দেসেনেৰ চ ফস্সাদীহি চ অঞ্ঞত্তং চিত্তস্স সিজ্ঝতীতি কিং তদত্থেন পুন ৰচনেন, অঞ্ঞপ্পযোজনত্তা পন পুরিমস্স চিত্তৰচনস্স পচ্ছিমং ৰুত্তং। পুরিমঞ্হি সমযৰৰত্থানত্থমেৰ ৰুত্তং, ন ৰৰত্থিতসমযে ৰিজ্জমানধম্মদস্সনত্থং, ইতরঞ্চ তস্মিং সমযে ৰিজ্জমানধম্মদস্সনত্থং ৰুত্তং, ন সমযৰৰত্থানত্থং, ন চ অঞ্ঞদত্থং ৰচনং অঞ্ঞদত্থং ৰদতি, ন চ লেসেন ৰুত্তোতি কত্ৰা মহাকারুণিকো অত্থং পাকটং ন করোতীতি।
Vijānanaṃ ārammaṇassa upaladdhi. Sandahanaṃ cittantarassa anuppabandhanaṃ. Cakkhunā hi diṭṭhanti cakkhunā daṭṭhabbaṃ. Yathā ‘‘diṭṭhaṃ sutaṃ mutaṃ viññāta’’nti daṭṭhabbādi vuccati, evamidhāpi veditabbaṃ. Cakkhunā hītiādīsu cakkhunā…pe… manasā dvārenāti attho. Nagaraguttikassa viya cittassa ārammaṇavibhāvanamattaṃ upadhāraṇamattaṃ upaladdhimattaṃ kiccaṃ, ārammaṇapaṭivedhanapaccābhiññāṇādi pana kiccaṃ paññāsaññādīnanti veditabbaṃ. Purimaniddiṭṭhanti samayavavatthāne niddiṭṭhaṃ. Bhāvento viya na na uppajjati, kintu uppajjatīti dassetuṃ ‘‘cittaṃ hotī’’ti vuttanti etaṃ hoti-saddassa uppajjati-saddassa ca samānatthatte sati yujjeyya, tadatthatte ca tattha uppannaṃ hotīti na vucceyya. Na hi yuttaṃ uppannaṃ uppajjatīti vattuṃ. Cittassa ca uppannatā samayavavatthāne vuttā evāti kiṃ tassa puna uppattidassanena. Yena ca samayavavatthānaṃ kataṃ, tassa niddeso na na sakkā kātunti kiṃ taṃ niddesatthaṃ uddesena dutiyena, niddeseneva ca phassādīhi ca aññattaṃ cittassa sijjhatīti kiṃ tadatthena puna vacanena, aññappayojanattā pana purimassa cittavacanassa pacchimaṃ vuttaṃ. Purimañhi samayavavatthānatthameva vuttaṃ, na vavatthitasamaye vijjamānadhammadassanatthaṃ, itarañca tasmiṃ samaye vijjamānadhammadassanatthaṃ vuttaṃ, na samayavavatthānatthaṃ, na ca aññadatthaṃ vacanaṃ aññadatthaṃ vadati, na ca lesena vuttoti katvā mahākāruṇiko atthaṃ pākaṭaṃ na karotīti.
ফস্সপঞ্চমকরাসিৰণ্ণনা নিট্ঠিতা।
Phassapañcamakarāsivaṇṇanā niṭṭhitā.
Related texts:
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / ধম্মসঙ্গণী-অনুটীকা • Dhammasaṅgaṇī-anuṭīkā / ফস্সপঞ্চমকরাসিৰণ্ণনা • Phassapañcamakarāsivaṇṇanā
