Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā)

    5. பா²ஸுவிஹாரஸுத்தவண்ணனா

    5. Phāsuvihārasuttavaṇṇanā

    105. பஞ்சமே மெத்தா ஏதஸ்ஸ அத்தீ²தி மெத்தங், தங்ஸமுட்டா²னங் காயகம்மங் மெத்தங் காயகம்மங். ஏஸ நயோ ஸேஸத்³வயேபி. ஆவீதி பகாஸனங். பகாஸபா⁴வோ செத்த² யங் உத்³தி³ஸ்ஸ தங் காயகம்மங் கரீயதி, தஸ்ஸ ஸம்முக²பா⁴வதோதி ஆஹ ‘‘ஸம்முகா²’’தி. ரஹோதி அப்பகாஸங். அப்பகாஸதா ச யங் உத்³தி³ஸ்ஸ தங் காயகம்மங் கரீயதி, தஸ்ஸ அபச்சக்க²பா⁴வதோதி ஆஹ ‘‘பரம்முகா²’’தி. இமானி மெத்தகாயகம்மாதீ³னி பி⁴க்கூ²னங் வஸேன ஆக³தானி தேஸங் ஸெட்ட²பரிஸபா⁴வதோ, கி³ஹீஸுபி லப்³ப⁴ந்தியேவ. பி⁴க்கூ²னஞ்ஹி மெத்தசித்தேன ஆபி⁴ஸமாசாரிகபூரணங் மெத்தங் காயகம்மங் நாம . கி³ஹீனங் சேதியவந்த³னத்தா²ய போ³தி⁴வந்த³னத்தா²ய ஸங்க⁴னிமந்தனத்தா²ய க³மனங் கா³மங் பிண்டா³ய பவிட்டே² பி⁴க்கூ² தி³ஸ்வா பச்சுக்³க³மனங் பத்தப்படிக்³க³ஹணங் ஆஸனபஞ்ஞாபனங் அனுக³மனந்தி ஏவமாதி³கங் மெத்தங் காயகம்மங் நாம. பி⁴க்கூ²னங் மெத்தசித்தேன ஆசாரபஞ்ஞத்திஸிக்கா²பனங் கம்மட்டா²னகத²னங் த⁴ம்மதே³ஸனா தேபிடகம்பி பு³த்³த⁴வசனங் மெத்தங் வசீகம்மங் நாம. கி³ஹீனங் ‘‘சேதியவந்த³னாய க³ச்சா²ம, போ³தி⁴வந்த³னாய க³ச்சா²ம, த⁴ம்மஸ்ஸவனங் கரிஸ்ஸாம, தீ³பமாலங் புப்ப²பூஜங் கரிஸ்ஸாம, தீணி ஸுசரிதானி ஸமாதா³ய வத்திஸ்ஸாம, ஸலாகப⁴த்தாதீ³னி த³ஸ்ஸாம, வஸ்ஸாவாஸிகங் த³ஸ்ஸாம, அஜ்ஜ ஸங்க⁴ஸ்ஸ சத்தாரோ பச்சயே த³ஸ்ஸாம, ஸங்க⁴ங் நிமந்தெத்வா கா²த³னீயாதீ³னி ஸங்வித³ஹத², ஆஸனானி பஞ்ஞபேத², பானீயங் உபட்ட²பேத², ஸங்க⁴ங் பச்சுக்³க³ந்த்வா ஆனேத², பஞ்ஞத்தாஸனே நிஸீதா³பேத², ச²ந்த³ஜாதா உஸ்ஸாஹஜாதா வெய்யாவச்சங் கரோதா²’’திஆதி³கத²னகாலே மெத்தங் வசீகம்மங் நாம. பி⁴க்கூ²னங் பாதோவ உட்டா²ய ஸரீரப்படிஜக்³க³னங் கத்வா சேதியங்க³ணங் க³ந்த்வா வத்தாதீ³னி கத்வா விவித்தஸேனாஸனே நிஸீதி³த்வா ‘‘இமஸ்மிங் விஹாரே பி⁴க்கூ² ஸுகீ² ஹொந்து அவேரா அப்³யாபஜ்ஜா’’தி சிந்தனங் மெத்தங் மனோகம்மங் நாம, கி³ஹீனங் ‘‘அய்யா ஸுகீ² ஹொந்து அவேரா அப்³யாபஜ்ஜா’’தி சிந்தனங் மெத்தங் மனோகம்மங் நாம.

    105. Pañcame mettā etassa atthīti mettaṃ, taṃsamuṭṭhānaṃ kāyakammaṃ mettaṃ kāyakammaṃ. Esa nayo sesadvayepi. Āvīti pakāsanaṃ. Pakāsabhāvo cettha yaṃ uddissa taṃ kāyakammaṃ karīyati, tassa sammukhabhāvatoti āha ‘‘sammukhā’’ti. Rahoti appakāsaṃ. Appakāsatā ca yaṃ uddissa taṃ kāyakammaṃ karīyati, tassa apaccakkhabhāvatoti āha ‘‘parammukhā’’ti. Imāni mettakāyakammādīni bhikkhūnaṃ vasena āgatāni tesaṃ seṭṭhaparisabhāvato, gihīsupi labbhantiyeva. Bhikkhūnañhi mettacittena ābhisamācārikapūraṇaṃ mettaṃ kāyakammaṃ nāma . Gihīnaṃ cetiyavandanatthāya bodhivandanatthāya saṅghanimantanatthāya gamanaṃ gāmaṃ piṇḍāya paviṭṭhe bhikkhū disvā paccuggamanaṃ pattappaṭiggahaṇaṃ āsanapaññāpanaṃ anugamananti evamādikaṃ mettaṃ kāyakammaṃ nāma. Bhikkhūnaṃ mettacittena ācārapaññattisikkhāpanaṃ kammaṭṭhānakathanaṃ dhammadesanā tepiṭakampi buddhavacanaṃ mettaṃ vacīkammaṃ nāma. Gihīnaṃ ‘‘cetiyavandanāya gacchāma, bodhivandanāya gacchāma, dhammassavanaṃ karissāma, dīpamālaṃ pupphapūjaṃ karissāma, tīṇi sucaritāni samādāya vattissāma, salākabhattādīni dassāma, vassāvāsikaṃ dassāma, ajja saṅghassa cattāro paccaye dassāma, saṅghaṃ nimantetvā khādanīyādīni saṃvidahatha, āsanāni paññapetha, pānīyaṃ upaṭṭhapetha, saṅghaṃ paccuggantvā ānetha, paññattāsane nisīdāpetha, chandajātā ussāhajātā veyyāvaccaṃ karothā’’tiādikathanakāle mettaṃ vacīkammaṃ nāma. Bhikkhūnaṃ pātova uṭṭhāya sarīrappaṭijagganaṃ katvā cetiyaṅgaṇaṃ gantvā vattādīni katvā vivittasenāsane nisīditvā ‘‘imasmiṃ vihāre bhikkhū sukhī hontu averā abyāpajjā’’ti cintanaṃ mettaṃ manokammaṃ nāma, gihīnaṃ ‘‘ayyā sukhī hontu averā abyāpajjā’’ti cintanaṃ mettaṃ manokammaṃ nāma.

    தத்த² நவகானங் சீவரகம்மாதீ³ஸு ஸஹாயபா⁴வக³மனங் ஸம்முகா² காயகம்மங் நாம, தே²ரானங் பன பாத³தோ⁴வனஸிஞ்சனபீ³ஜனதா³னாதி³பே⁴த³ம்பி ஸப்³ப³ங் ஸாமீசிகம்மங் ஸம்முகா² காயகம்மங் நாம, உப⁴யேஹிபி து³ன்னிக்கி²த்தானங் தா³ருப⁴ண்டா³தீ³னங் தேஸு அவஞ்ஞங் அகத்வா அத்தனா து³ன்னிக்கி²த்தானங் விய படிஸாமனங் பரம்முகா² மெத்தங் காயகம்மங் நாம. ‘‘தே³வத்தே²ரோ திஸ்ஸத்தே²ரோ’’தி வுத்தங் ஏவங் பக்³க³ய்ஹவசனங் ஸம்முகா² மெத்தங் வசீகம்மங் நாம, விஹாரே அஸந்தங் பன படிபுச்ச²ந்தஸ்ஸ ‘‘குஹிங் அம்ஹாகங் தே³வத்தே²ரோ, குஹிங் அம்ஹாகங் திஸ்ஸத்தே²ரோ, கதா³ நு கோ² ஆக³மிஸ்ஸதீ’’தி ஏவங் பியவசனங் பரம்முகா² மெத்தங் வசீகம்மங் நாம. மெத்தாஸினேஹஸினித்³தா⁴னி பன நயனானி உம்மீலெத்வா பஸன்னேன முகே²ன ஓலோகனங் ஸம்முகா² மெத்தங் மனோகம்மங் நாம, ‘‘தே³வத்தே²ரோ திஸ்ஸத்தே²ரோ அரோகோ³ ஹோது அப்³யாபஜ்ஜோ’’தி ஸமன்னாஹரணங் பரம்முகா² மெத்தங் மனோகம்மங் நாம. காமஞ்செத்த² மெத்தாஸினேஹஸினித்³தா⁴னங் நயனானங் உம்மீலனங், பஸன்னேன முகே²ன ஓலோகனஞ்ச மெத்தங் காயகம்மமேவ. யஸ்ஸ பன சித்தஸ்ஸ வஸேன நயனானங் மெத்தாஸினேஹஸினித்³த⁴தா, முக²ஸ்ஸ ச பஸன்னதா, தங் ஸந்தா⁴ய வுத்தங் ‘‘மெத்தங் மனோகம்மங் நாமா’’தி. ஸமாதி⁴ஸங்வத்தனப்பயோஜனானி ஸமாதி⁴ஸங்வத்தனிகானி.

    Tattha navakānaṃ cīvarakammādīsu sahāyabhāvagamanaṃ sammukhā kāyakammaṃ nāma, therānaṃ pana pādadhovanasiñcanabījanadānādibhedampi sabbaṃ sāmīcikammaṃ sammukhā kāyakammaṃ nāma, ubhayehipi dunnikkhittānaṃ dārubhaṇḍādīnaṃ tesu avaññaṃ akatvā attanā dunnikkhittānaṃ viya paṭisāmanaṃ parammukhā mettaṃ kāyakammaṃ nāma. ‘‘Devatthero tissatthero’’ti vuttaṃ evaṃ paggayhavacanaṃ sammukhā mettaṃ vacīkammaṃ nāma, vihāre asantaṃ pana paṭipucchantassa ‘‘kuhiṃ amhākaṃ devatthero, kuhiṃ amhākaṃ tissatthero, kadā nu kho āgamissatī’’ti evaṃ piyavacanaṃ parammukhā mettaṃ vacīkammaṃ nāma. Mettāsinehasiniddhāni pana nayanāni ummīletvā pasannena mukhena olokanaṃ sammukhā mettaṃ manokammaṃ nāma, ‘‘devatthero tissatthero arogo hotu abyāpajjo’’ti samannāharaṇaṃ parammukhā mettaṃ manokammaṃ nāma. Kāmañcettha mettāsinehasiniddhānaṃ nayanānaṃ ummīlanaṃ, pasannena mukhena olokanañca mettaṃ kāyakammameva. Yassa pana cittassa vasena nayanānaṃ mettāsinehasiniddhatā, mukhassa ca pasannatā, taṃ sandhāya vuttaṃ ‘‘mettaṃ manokammaṃ nāmā’’ti. Samādhisaṃvattanappayojanāni samādhisaṃvattanikāni.

    ஸமானஸீலதங் க³தோதி தேஸு தேஸு தி³ஸாபா⁴கே³ஸு விஹரந்தேஹி பி⁴க்கூ²ஹி ஸத்³தி⁴ங் ஸமானஸீலதங் க³தோ. யாயந்தி யா அயங் மய்ஹஞ்சேவ தும்ஹாகஞ்ச பச்சக்க²பூ⁴தா. தி³ட்டீ²தி ஸம்மாதி³ட்டி². அரியாதி நித்³தோ³ஸா. நிய்யாதீதி வட்டது³க்க²தோ நிஸ்ஸரதி நிக்³க³ச்ச²தி. ஸயங் நிய்யந்தீயேவ ஹி தங்ஸமங்கி³புக்³க³லங் வட்டது³க்க²தோ நிய்யாபேதீதி வுச்சதி. யா ஸத்து² அனுஸிட்டி², தங் கரோதீதி தக்கரோ , தஸ்ஸ, யதா²னுஸிட்ட²ங் படிபஜ்ஜகஸ்ஸாதி அத்தோ². து³க்க²க்க²யாயாதி ஸப்³ப³து³க்க²க்க²யத்த²ங். தி³ட்டி²ஸாமஞ்ஞக³தோதி ஸமானதி³ட்டி²பா⁴வங் உபக³தோ.

    Samānasīlataṃgatoti tesu tesu disābhāgesu viharantehi bhikkhūhi saddhiṃ samānasīlataṃ gato. Yāyanti yā ayaṃ mayhañceva tumhākañca paccakkhabhūtā. Diṭṭhīti sammādiṭṭhi. Ariyāti niddosā. Niyyātīti vaṭṭadukkhato nissarati niggacchati. Sayaṃ niyyantīyeva hi taṃsamaṅgipuggalaṃ vaṭṭadukkhato niyyāpetīti vuccati. Yā satthu anusiṭṭhi, taṃ karotīti takkaro, tassa, yathānusiṭṭhaṃ paṭipajjakassāti attho. Dukkhakkhayāyāti sabbadukkhakkhayatthaṃ. Diṭṭhisāmaññagatoti samānadiṭṭhibhāvaṃ upagato.

    பா²ஸுவிஹாரஸுத்தவண்ணனா நிட்டி²தா.

    Phāsuvihārasuttavaṇṇanā niṭṭhitā.







    Related texts:



    திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 5. பா²ஸுவிஹாரஸுத்தங் • 5. Phāsuvihārasuttaṃ

    அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 5. பா²ஸுவிஹாரஸுத்தவண்ணனா • 5. Phāsuvihārasuttavaṇṇanā


    © 1991-2023 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact