| Library / Tipiṭaka / ਤਿਪਿਟਕ • Tipiṭaka / ਸਂਯੁਤ੍ਤਨਿਕਾਯ (ਟੀਕਾ) • Saṃyuttanikāya (ṭīkā) |
੩. ਫੇਣਪਿਣ੍ਡੂਪਮਸੁਤ੍ਤવਣ੍ਣਨਾ
3. Pheṇapiṇḍūpamasuttavaṇṇanā
੯੫. ਕੇਨਚਿ ਕਾਰਣੇਨ ਯੁਜ੍ਝਿਤ੍વਾ ਗਹੇਤੁਂ ਨ ਸਕ੍ਕਾਤਿ ਅਯੁਜ੍ਝਾ ਨਾਮ। ਨਿવਤ੍ਤਨਟ੍ਠਾਨੇਤਿ ਉਦਕਪ੍ਪવਾਹਸ੍ਸ ਨਿવਤ੍ਤਿਤਟ੍ਠਾਨੇ।
95. Kenaci kāraṇena yujjhitvā gahetuṃ na sakkāti ayujjhā nāma. Nivattanaṭṭhāneti udakappavāhassa nivattitaṭṭhāne.
ਅਨੁਸੋਤਾਗਮਨੇਤਿ ਅਨੁਸੋਤਂ ਆਗਮਨਹੇਤੁ, ‘‘ਅਨੁਸੋਤਾਗਮਨੇਨਾ’’ਤਿ વਾ ਪਾਠੋ। ਅਨੁਪੁਬ੍ਬੇਨ ਪવਡ੍ਢਿਤ੍વਾਤਿ ਤਤ੍ਥ ਤਤ੍ਥ ਉਟ੍ਠਿਤਾਨਂ ਖੁਦ੍ਦਕਮਹਨ੍ਤਾਨਂ ਫੇਣਪਿਣ੍ਡਾਨਂ ਸਂਸਗ੍ਗੇਨ ਪਕਾਰਤੋ વੁਦ੍ਧਿਂ ਪਤ੍વਾ। ਆવਹੇਯ੍ਯਾਤਿ ਆਨੇਤ੍વਾ વਹੇਯ੍ਯ। ਕਾਰਣੇਨ ਉਪਪਰਿਕ੍ਖੇਯ੍ਯਾਤਿ ਞਾਣੇਨ વੀਮਂਸੇਯ੍ਯ। ‘‘ਸਾਰੋ ਨਾਮ ਕਿਂ ਭવੇਯ੍ਯਾ’’ਤਿ વਤ੍વਾ ਸਬ੍ਬਸੋ ਤਦਭਾવਂ ਦਸ੍ਸੇਨ੍ਤੋ ‘‘વਿਲੀਯਿਤ੍વਾ વਿਦ੍ਧਂਸੇਯ੍ਯੇવਾ’’ਤਿ ਆਹ। ਤੇਨ ਰੂਪਮ੍ਪਿ ਨਿਸ੍ਸਾਰਤਾਯ ਭਿਜ੍ਜਤੇવਾਤਿ ਦਸ੍ਸੇਤਿ। ਯਥਾ ਹਿ ਅਨਿਚ੍ਚਤਾਯ ਅਸਾਰਤਾਸਿਦ੍ਧਿ, ਏવਂ ਅਸਾਰਤਾਯਪਿ ਅਨਿਚ੍ਚਤਾਸਿਦ੍ਧੀਤਿ ਅਨਿਚ੍ਚਤਾਯ ਏવ ਨਿਚ੍ਚਸਾਰਂ ਥਿਰਭਾવਸਾਰਂ ਧੁવਸਾਰਂ ਸਾਮੀਨਿવਾਸੀਕਾਰਕਭੂਤਸ੍ਸ ਅਤ੍ਤਨੋ વਸੇ ਪવਤ੍ਤਨਮ੍ਪੇਤ੍ਥ ਨਤ੍ਥੀਤਿ ਆਹ ‘‘ਰੂਪਮ੍ਪਿ…ਪੇ॰… ਨਿਸ੍ਸਾਰਮੇવਾ’’ਤਿ। ਸੋਤਿ ਫੇਣਪਿਣ੍ਡੋ। ਗਹਿਤੋਪਿ ਉਪਾਯੇਨ ਤਮਤ੍ਥਂ ਨ ਸਾਧੇਤਿ ਅਨਰਹਤ੍ਤਾ। ਅਨੇਕਸਨ੍ਧਿਘਟਿਤੋ ਤਥਾ ਤਥਾ ਘਟਿਤੋ ਹੁਤ੍વਾ।
Anusotāgamaneti anusotaṃ āgamanahetu, ‘‘anusotāgamanenā’’ti vā pāṭho. Anupubbena pavaḍḍhitvāti tattha tattha uṭṭhitānaṃ khuddakamahantānaṃ pheṇapiṇḍānaṃ saṃsaggena pakārato vuddhiṃ patvā. Āvaheyyāti ānetvā vaheyya. Kāraṇena upaparikkheyyāti ñāṇena vīmaṃseyya. ‘‘Sāro nāma kiṃ bhaveyyā’’ti vatvā sabbaso tadabhāvaṃ dassento ‘‘vilīyitvā viddhaṃseyyevā’’ti āha. Tena rūpampi nissāratāya bhijjatevāti dasseti. Yathā hi aniccatāya asāratāsiddhi, evaṃ asāratāyapi aniccatāsiddhīti aniccatāya eva niccasāraṃ thirabhāvasāraṃ dhuvasāraṃ sāmīnivāsīkārakabhūtassa attano vase pavattanampettha natthīti āha ‘‘rūpampi…pe… nissāramevā’’ti. Soti pheṇapiṇḍo. Gahitopi upāyena tamatthaṃ na sādheti anarahattā. Anekasandhighaṭito tathā tathā ghaṭito hutvā.
ਬ੍ਯਾਮਮਤ੍ਤਮ੍ਪਿ ਏਤਰਹਿ ਮਨੁਸ੍ਸਾਨਂ વਸੇਨ। ਅવਸ੍ਸਮੇવ ਭਿਜ੍ਜਤਿ ਤਰਙ੍ਗਬ੍ਭਾਹਤਂ ਹੁਤ੍વਾ।
Byāmamattampi etarahi manussānaṃ vasena. Avassameva bhijjati taraṅgabbhāhataṃ hutvā.
ਤਸ੍ਮਿਂ ਤਸ੍ਮਿਂ ਉਦਕਬਿਨ੍ਦੁਮ੍ਹਿ ਪਤਿਤੇ। ਉਦਕਤਲਨ੍ਤਿ ਉਦਕਪਿਟ੍ਠਿਂ। ਅਞ੍ਞਤੋ ਪਤਨ੍ਤਂ ਉਦਕਬਿਨ੍ਦੁਂ। ਉਦਕਜਲ੍ਲਨ੍ਤਿ ਸਨ੍ਤਾਨਕਂ ਹੁਤ੍વਾ ਠਿਤਂ ਉਦਕਮਲਂ। ਤਞ੍ਹਿ ਸਂਕਡ੍ਢਿਤ੍વਾ ਤਤੋ ਉਦਕਂ ਪੁਟਂ ਕਰੋਤਿ, ਤਸ੍ਮਿਂ ਪੁਟੇ ਪੁਬ੍ਬੁਲ਼ਸਮਞ੍ਞਾ। વਤ੍ਥੁਨ੍ਤਿ ਚਕ੍ਖਾਦਿવਤ੍ਥੁਂ। ਆਰਮ੍ਮਣਨ੍ਤਿ ਰੂਪਾਦਿਆਰਮ੍ਮਣਂ। ਕਿਲੇਸਜਲ੍ਲਨ੍ਤਿ ਪੁਰਿਮਸਿਦ੍ਧਂ, ਪਟਿਲਬ੍ਭਮਾਨਂ વਾ ਕਿਲੇਸਮਲਂ। ਫਸ੍ਸਸਙ੍ਘਟ੍ਟਨਨ੍ਤਿ ਫਸ੍ਸਸਮੋਧਾਨਂ। ਪੁਬ੍ਬੁਲ਼ਸਦਿਸਾ ਮੁਹੁਤ੍ਤਰਮਣੀਯਤਾਯ। ਯਸ੍ਮਾ ਘਮ੍ਮਕਾਲੇ ਸੂਰਿਯਾਤਪਸਨ੍ਤਾਪਾਭਿਨਿਬ੍ਬਤ੍ਤਰਸ੍ਮਿਜਾਲਨਿਪਾਤੇ ਤਾਦਿਸੇ ਭੂਮਿਪਦੇਸੇ ਇਤੋ ਚਿਤੋ ਸਮੁਗ੍ਗਤવਾਤવੇਗਸਮੁਦ੍ਧਟવਿਰੁਲ਼੍ਹਸਙ੍ਖਾਤੇਸੁ ਪਰਿਬ੍ਭਮਨ੍ਤੇਸੁ ਅਣੁਪਰਮਾਣੁਤਜ੍ਜਾਰਿਪ੍ਪਕਾਰੇਸੁ ਭੂਤਸਙ੍ਘਾਤੇਸੁ ਮਰੀਚਿਸਮਞ੍ਞਾ, ਤਸ੍ਮਾ ਸਬ੍ਬਸੋ ਸਾਰવਿਰਹਿਤਾਤਿ વੁਤ੍ਤਂ ‘‘ਸਞ੍ਞਾਪਿ ਅਸਾਰਕਟ੍ਠੇਨ ਮਰੀਚਿਸਦਿਸਾ’’ਤਿ। ਯਸ੍ਮਾ ਚ ਪਸ੍ਸਨ੍ਤਾਨਂ ਯੇਭੁਯ੍ਯੇਨ ਉਦਕਾਕਾਰੇਨ ਖਾਯਤਿ, ਤਸ੍ਮਾ ‘‘ਗਹੇਤ੍વਾ ਪਿવਿਤੁਂ વਾ’’ਤਿਆਦਿ વੁਤ੍ਤਂ। ਨੀਲਾਦਿਅਨੁਭવਨਤ੍ਥਾਯਾਤਿ ਨੀਲਾਦਿਆਰਮ੍ਮਣਸ੍ਸ ਅਨੁਭવਨਤ੍ਥਾਯ। ਫਨ੍ਦਤੀਤਿ ਫਨ੍ਦਨਾਕਾਰਪ੍ਪਤ੍ਤਾ વਿਯ ਹੋਤਿ ਅਪ੍ਪਹੀਨਤਣ੍ਹਸ੍ਸ ਪੁਗ੍ਗਲਸ੍ਸ। વਿਪ੍ਪਲਮ੍ਭੇਤਿ ਅਪ੍ਪਹੀਨવਿਪਲ੍ਲਾਸਂ ਪੁਗ੍ਗਲਂ। ਤੇਨਾਹ ‘‘ਇਦਂ ਨੀਲਕ’’ਨ੍ਤਿਆਦਿ। ਸਞ੍ਞਾવਿਪਲ੍ਲਾਸਤੋ ਹਿ ਚਿਤ੍ਤવਿਪਲ੍ਲਾਸੋ, ਤਤੋ ਦਿਟ੍ਠਿવਿਪਲ੍ਲਾਸੋਤਿ। વਿਪ੍ਪਲਮ੍ਭਨੇਨਾਤਿ વਿਪ੍ਪਕਾਰવਸੇਨੇવ ਆਰਮ੍ਮਣਸ੍ਸ ਲਮ੍ਭਨੇਨ। વਿਪ੍ਪਕਾਰવਸੇਨ ਹਿ ਏਤਂ ਲਮ੍ਭਨਂ, ਯਦਿਦਂ ਅਨੁਦਕਮੇવ ਉਦਕਂ ਕਤ੍વਾ ਦਸ੍ਸਨਂ ਅਨਗਰਮੇવ ਨਗਰਂ ਕਤ੍વਾ ਗਨ੍ਧਬ੍ਬਨਾਟਕਾਦਿਦਸ੍ਸਨਂ।
Tasmiṃ tasmiṃ udakabindumhi patite. Udakatalanti udakapiṭṭhiṃ. Aññato patantaṃ udakabinduṃ. Udakajallanti santānakaṃ hutvā ṭhitaṃ udakamalaṃ. Tañhi saṃkaḍḍhitvā tato udakaṃ puṭaṃ karoti, tasmiṃ puṭe pubbuḷasamaññā. Vatthunti cakkhādivatthuṃ. Ārammaṇanti rūpādiārammaṇaṃ. Kilesajallanti purimasiddhaṃ, paṭilabbhamānaṃ vā kilesamalaṃ. Phassasaṅghaṭṭananti phassasamodhānaṃ. Pubbuḷasadisā muhuttaramaṇīyatāya. Yasmā ghammakāle sūriyātapasantāpābhinibbattarasmijālanipāte tādise bhūmipadese ito cito samuggatavātavegasamuddhaṭaviruḷhasaṅkhātesu paribbhamantesu aṇuparamāṇutajjārippakāresu bhūtasaṅghātesu marīcisamaññā, tasmā sabbaso sāravirahitāti vuttaṃ ‘‘saññāpi asārakaṭṭhena marīcisadisā’’ti. Yasmā ca passantānaṃ yebhuyyena udakākārena khāyati, tasmā ‘‘gahetvā pivituṃ vā’’tiādi vuttaṃ. Nīlādianubhavanatthāyāti nīlādiārammaṇassa anubhavanatthāya. Phandatīti phandanākārappattā viya hoti appahīnataṇhassa puggalassa. Vippalambheti appahīnavipallāsaṃ puggalaṃ. Tenāha ‘‘idaṃ nīlaka’’ntiādi. Saññāvipallāsato hi cittavipallāso, tato diṭṭhivipallāsoti. Vippalambhanenāti vippakāravaseneva ārammaṇassa lambhanena. Vippakāravasena hi etaṃ lambhanaṃ, yadidaṃ anudakameva udakaṃ katvā dassanaṃ anagarameva nagaraṃ katvā gandhabbanāṭakādidassanaṃ.
ਕੁਕ੍ਕੁਕਂ વੁਚ੍ਚਤਿ ਕਦਲਿਕ੍ਖਨ੍ਧਸ੍ਸ ਸਬ੍ਬਪਤ੍ਤવਟ੍ਟੀਨਂ ਅਬ੍ਭਨ੍ਤਰੇ ਦਣ੍ਡਕਨ੍ਤਿ ਆਹ ‘‘ਅਕੁਕ੍ਕੁਕਜਾਤਨ੍ਤਿ ਅਨ੍ਤੋ ਅਸਞ੍ਜਾਤਘਨਦਣ੍ਡਕ’’ਨ੍ਤਿ। ਨ ਤਥਾ ਹੋਤੀਤਿ ਯਦਤ੍ਥਾਯ ਉਪਨੀਤਂ, ਤਦਤ੍ਥਾਯ ਨ ਹੋਤਿ। ਨਾਨਾਲਕ੍ਖਣੋਤਿ ਨਾਨਾਸਭਾવੋ। ਸਙ੍ਖਾਰਕ੍ਖਨ੍ਧੋવਾਤਿ ਏਕੋ ਸਙ੍ਖਾਰਕ੍ਖਨ੍ਧੋਤ੍વੇવ વੁਚ੍ਚਤਿ।
Kukkukaṃ vuccati kadalikkhandhassa sabbapattavaṭṭīnaṃ abbhantare daṇḍakanti āha ‘‘akukkukajātanti anto asañjātaghanadaṇḍaka’’nti. Na tathā hotīti yadatthāya upanītaṃ, tadatthāya na hoti. Nānālakkhaṇoti nānāsabhāvo. Saṅkhārakkhandhovāti eko saṅkhārakkhandhotveva vuccati.
ਅਸ੍ਸਾਤਿ ਪੁਰਿਸਸ੍ਸ। ਅਪਗਤਪਟਲਪਿਲ਼ਕਨ੍ਤਿ ਅਪਗਤਪਟਲਦੋਸਞ੍ਚੇવ ਅਪਗਤਪਿਲ਼ਕਦੋਸਞ੍ਚ। ਅਸਾਰਭਾવਦਸ੍ਸਨਸਮਤ੍ਥਨ੍ਤਿ ਅਸਾਰਸ੍ਸ ਅਸਾਰਭਾવਦਸ੍ਸਨਸਮਤ੍ਥਂ। ਇਤ੍ਤਰਾਤਿ ਪਰਿਤ੍ਤਕਾਲਾ, ਨ ਚਿਰਟ੍ਠਿਤਿਕਾ। ਤੇਨਾਹ ‘‘ਲਹੁਪਚ੍ਚੁਪਟ੍ਠਾਨਾ’’ਤਿ। ਅਞ੍ਞਦੇવ ਚ ਆਗਮਨਕਾਲੇ ਚਿਤ੍ਤਨ੍ਤਿ ਇਦਞ੍ਚ ਓਲ਼ਾਰਿਕવਸੇਨੇવ વੁਤ੍ਤਂ। ਤਥਾ ਹਿ ਏਕਚ੍ਛਰਕ੍ਖਣੇ ਅਨੇਕਕੋਟਿਸਤਸਹਸ੍ਸਸਙ੍ਖਾਨਿ ਚਿਤ੍ਤਾਨਿ ਉਪ੍ਪਜ੍ਜਿਤ੍વਾ ਨਿਰੁਜ੍ਝਨ੍ਤਿ। ਮਾਯਾਯ ਦਸ੍ਸਿਤਂ ਰੂਪਂ ਮਾਯਾਤਿ વੁਤ੍ਤਂ। ਯਂਕਿਞ੍ਚਿਦੇવ ਕਪਾਲਿਟ੍ਠਕਪਾਸਾਣવਾਲਿਕਾਦਿਂ। વਞ੍ਚੇਤੀਤਿ ਅਸੁવਣ੍ਣਮੇવ ਸੁવਣ੍ਣਨ੍ਤਿ, ਅਮੁਤ੍ਤਮੇવ ਮੁਤ੍ਤਾਤਿਆਦਿਨਾ વਞ੍ਚੇਤਿ। ਨਨੁ ਚ ਸਞ੍ਞਾਪਿ ਮਰੀਚਿ વਿਯ વਿਪ੍ਪਲਮ੍ਭੇਤਿ વਞ੍ਚੇਤਿ, ਇਦਮ੍ਪਿ વਿਞ੍ਞਾਣਂ ਮਾਯਾ વਿਯ વਞ੍ਚੇਤੀਤਿ ਕੋ ਇਮੇਸਂ વਿਸੇਸੋਤਿ? વਚਨਤ੍ਥੋ ਨੇਸਂ ਸਾਧਾਰਣੋ। ਤਥਾਪਿ ਸਞ੍ਞਾ ਅਨੁਦਕਂਯੇવ ਉਦਕਂ ਕਤ੍વਾ ਗਾਹਾਪੇਨ੍ਤੀ, ਅਪੁਰਿਸਞ੍ਞੇવ ਪੁਰਿਸਂ ਕਤ੍વਾ ਗਾਹਾਪੇਨ੍ਤੀ વਿਪ੍ਪਲਮ੍ਭਨવਸੇਨ ਅਪ੍ਪવਿਸਯਾ, વਿਞ੍ਞਾਣਂ ਪਨ ਯਂ ਕਿਞ੍ਚਿ ਅਤਂਸਭਾવਂ ਤਂ ਕਤ੍વਾ ਦਸ੍ਸੇਨ੍ਤੀ ਮਾਯਾ વਿਯ ਮਹਾવਿਸਯਾ। ਤੇਨਾਹ ‘‘ਯਂਕਿਞ੍ਚਿਦੇવਾ’’ਤਿਆਦਿ। ਏવਮ੍ਪੀਤਿ ਅਤਿવਿਯ ਲਹੁਪਰਿવਤ੍ਤਿਭਾવੇਨਪਿ ਮਾਯਾਸਦਿਸਨ੍ਤਿ।
Assāti purisassa. Apagatapaṭalapiḷakanti apagatapaṭaladosañceva apagatapiḷakadosañca. Asārabhāvadassanasamatthanti asārassa asārabhāvadassanasamatthaṃ. Ittarāti parittakālā, na ciraṭṭhitikā. Tenāha ‘‘lahupaccupaṭṭhānā’’ti. Aññadeva ca āgamanakāle cittanti idañca oḷārikavaseneva vuttaṃ. Tathā hi ekaccharakkhaṇe anekakoṭisatasahassasaṅkhāni cittāni uppajjitvā nirujjhanti. Māyāya dassitaṃ rūpaṃ māyāti vuttaṃ. Yaṃkiñcideva kapāliṭṭhakapāsāṇavālikādiṃ. Vañcetīti asuvaṇṇameva suvaṇṇanti, amuttameva muttātiādinā vañceti. Nanu ca saññāpi marīci viya vippalambheti vañceti, idampi viññāṇaṃ māyā viya vañcetīti ko imesaṃ visesoti? Vacanattho nesaṃ sādhāraṇo. Tathāpi saññā anudakaṃyeva udakaṃ katvā gāhāpentī, apurisaññeva purisaṃ katvā gāhāpentī vippalambhanavasena appavisayā, viññāṇaṃ pana yaṃ kiñci ataṃsabhāvaṃ taṃ katvā dassentī māyā viya mahāvisayā. Tenāha ‘‘yaṃkiñcidevā’’tiādi. Evampīti ativiya lahuparivattibhāvenapi māyāsadisanti.
ਦੇਸਿਤਾਤਿ ਏવਂ ਦੇਸਿਤਾ ਫੇਣਪਿਣ੍ਡਾਦਿਉਪਮਾਹਿ।
Desitāti evaṃ desitā pheṇapiṇḍādiupamāhi.
ਭੂਰਿ વੁਚ੍ਚਤਿ ਪਥવੀ, ਸਣ੍ਹਟ੍ਠੇਨ વਿਪੁਲਟ੍ਠੇਨ ਚ ਭੂਰਿਸਦਿਸਪਞ੍ਞਤਾਯ ਭੂਰਿਪਞ੍ਞੋ। ਤੇਨਾਹ ‘‘ਸਣ੍ਹਪਞ੍ਞੇਨ ਚੇવਾ’’ਤਿਆਦਿ। ਕਿਮਿਗਣਾਦੀਨਨ੍ਤਿ ਆਦਿ-ਸਦ੍ਦੇਨ ਅਨੇਕਗਿਜ੍ਝਾਦਿਕੇ ਸਙ੍ਗਣ੍ਹਾਤਿ। ਪવੇਣੀਤਿ ਧਮ੍ਮਪਬਨ੍ਧੋ। ਬਾਲਲਾਪਿਨੀ ‘‘ਅਹਂ ਮਮਾ’’ਤਿਆਦਿਨਾ। ਸੇਸਧਾਤੁਯੋ ਗਹੇਤ੍વਾવ ਭਿਜ੍ਜਤਿ ਏਕੁਪ੍ਪਾਦੇਕਨਿਰੋਧਤ੍ਤਾ, વਤ੍ਥੁਰੂਪਨਿਸ੍ਸਯਪਚ੍ਚਯਤ੍ਤਾ ‘‘ਅਯ’’ਨ੍ਤਿ ਨ વਿਸੁਂ ਗਹਿਤਂ। વਧਭਾવਤੋਤਿ વਧਸ੍ਸ ਮਰਣਸ੍ਸ ਅਤ੍ਥਿਭਾવਤੋ। ਸਰਣਨ੍ਤਿ ਪਟਿਸਰਣਂ।
Bhūri vuccati pathavī, saṇhaṭṭhena vipulaṭṭhena ca bhūrisadisapaññatāya bhūripañño. Tenāha ‘‘saṇhapaññena cevā’’tiādi. Kimigaṇādīnanti ādi-saddena anekagijjhādike saṅgaṇhāti. Paveṇīti dhammapabandho. Bālalāpinī ‘‘ahaṃ mamā’’tiādinā. Sesadhātuyo gahetvāva bhijjati ekuppādekanirodhattā, vatthurūpanissayapaccayattā ‘‘aya’’nti na visuṃ gahitaṃ. Vadhabhāvatoti vadhassa maraṇassa atthibhāvato. Saraṇanti paṭisaraṇaṃ.
ਫੇਣਪਿਣ੍ਡੂਪਮਸੁਤ੍ਤવਣ੍ਣਨਾ ਨਿਟ੍ਠਿਤਾ।
Pheṇapiṇḍūpamasuttavaṇṇanā niṭṭhitā.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਸੁਤ੍ਤਪਿਟਕ • Suttapiṭaka / ਸਂਯੁਤ੍ਤਨਿਕਾਯ • Saṃyuttanikāya / ੩. ਫੇਣਪਿਣ੍ਡੂਪਮਸੁਤ੍ਤਂ • 3. Pheṇapiṇḍūpamasuttaṃ
ਅਟ੍ਠਕਥਾ • Aṭṭhakathā / ਸੁਤ੍ਤਪਿਟਕ (ਅਟ੍ਠਕਥਾ) • Suttapiṭaka (aṭṭhakathā) / ਸਂਯੁਤ੍ਤਨਿਕਾਯ (ਅਟ੍ਠਕਥਾ) • Saṃyuttanikāya (aṭṭhakathā) / ੩. ਫੇਣਪਿਣ੍ਡੂਪਮਸੁਤ੍ਤવਣ੍ਣਨਾ • 3. Pheṇapiṇḍūpamasuttavaṇṇanā
