| Library / Tipiṭaka / തിപിടക • Tipiṭaka / സംയുത്തനികായ (ടീകാ) • Saṃyuttanikāya (ṭīkā) |
൨. ഫുസതിസുത്തവണ്ണനാ
2. Phusatisuttavaṇṇanā
൨൨. കമ്മം അഫുസന്തന്തി കമ്മഫസ്സം അഫുസന്തം, കമ്മം അകരോന്തന്തി അത്ഥോ. വിപാകോ ന ഫുസതീതി വിപാകഫസ്സോ ന ഫുസതി, വിപാകോ ന ഉപ്പജ്ജതേവ കാരണസ്സ അഭാവതോ. ഏവം ബ്യതിരേകമുഖേന കമ്മവട്ടേന വിപാകവട്ടം സമ്ബന്ധം കത്വാ അത്ഥം വത്വാ ഇദാനി കേവലം കമ്മവട്ടവസേന അത്ഥം വദന്തോ ‘‘കമ്മമേവാ’’തിആദിമാഹ. തത്ഥ നാകരോതോ കരിയതീതി കമ്മം അകുബ്ബതോ ന കയിരതി, അനഭിസന്ധികതകമ്മം നാമ നത്ഥീതി അത്ഥോ. ഇദാനി തമേവത്ഥം അന്വയതോ ദസ്സേതും ‘‘ഫുസന്തഞ്ചാ’’തിആദി വുത്തം. തത്ഥ തതോതി ഫുസനഹേതു. സേസം വുത്തനയമേവ. വുത്തമേവത്ഥം സകാരണം കത്വാ പരിവേഠിതവസേന വിഭൂതം കത്വാ ദസ്സേതും ‘‘തസ്മാ ഫുസന്ത’’ന്തിആദി വുത്തം. ധമ്മതാതി കാരകസ്സേവ കമ്മവിപാകാനുബന്ധോ, നാകാരകസ്സാതി അയം കമ്മവിപാകാനം സഭാവോ.
22.Kammaṃ aphusantanti kammaphassaṃ aphusantaṃ, kammaṃ akarontanti attho. Vipāko na phusatīti vipākaphasso na phusati, vipāko na uppajjateva kāraṇassa abhāvato. Evaṃ byatirekamukhena kammavaṭṭena vipākavaṭṭaṃ sambandhaṃ katvā atthaṃ vatvā idāni kevalaṃ kammavaṭṭavasena atthaṃ vadanto ‘‘kammamevā’’tiādimāha. Tattha nākaroto kariyatīti kammaṃ akubbato na kayirati, anabhisandhikatakammaṃ nāma natthīti attho. Idāni tamevatthaṃ anvayato dassetuṃ ‘‘phusantañcā’’tiādi vuttaṃ. Tattha tatoti phusanahetu. Sesaṃ vuttanayameva. Vuttamevatthaṃ sakāraṇaṃ katvā pariveṭhitavasena vibhūtaṃ katvā dassetuṃ ‘‘tasmā phusanta’’ntiādi vuttaṃ. Dhammatāti kārakasseva kammavipākānubandho, nākārakassāti ayaṃ kammavipākānaṃ sabhāvo.
പച്ചേതി ഉപഗച്ഛതി അനുബന്ധതി. പാപന്തി പാപകം കമ്മം ഫലഞ്ച. അയഞ്ച അത്ഥോ അരഞ്ഞേ ലുദ്ദകസ്സ ഉയ്യോജനായ സുനഖേഹി പരിവാരിയമാനസ്സ ഭിക്ഖുനോ ഭയേന രുക്ഖം ആരുള്ഹസ്സ ചീവരേ ലുദ്ദസ്സ ഉപരി പതിതേ തസ്സ സുനഖേഹി ഖാദിത്വാ മാരിതവത്ഥുനാ ദീപേതബ്ബോതി.
Pacceti upagacchati anubandhati. Pāpanti pāpakaṃ kammaṃ phalañca. Ayañca attho araññe luddakassa uyyojanāya sunakhehi parivāriyamānassa bhikkhuno bhayena rukkhaṃ āruḷhassa cīvare luddassa upari patite tassa sunakhehi khāditvā māritavatthunā dīpetabboti.
ഫുസതിസുത്തവണ്ണനാ നിട്ഠിതാ.
Phusatisuttavaṇṇanā niṭṭhitā.
Related texts:
തിപിടക (മൂല) • Tipiṭaka (Mūla) / സുത്തപിടക • Suttapiṭaka / സംയുത്തനികായ • Saṃyuttanikāya / ൨. ഫുസതിസുത്തം • 2. Phusatisuttaṃ
അട്ഠകഥാ • Aṭṭhakathā / സുത്തപിടക (അട്ഠകഥാ) • Suttapiṭaka (aṭṭhakathā) / സംയുത്തനികായ (അട്ഠകഥാ) • Saṃyuttanikāya (aṭṭhakathā) / ൨. ഫുസതിസുത്തവണ്ണനാ • 2. Phusatisuttavaṇṇanā
