| Library / Tipiṭaka / तिपिटक • Tipiṭaka / बुद्धवंसपाळि • Buddhavaṃsapāḷi |
२०. फुस्सबुद्धवंसो
20. Phussabuddhavaṃso
१.
1.
तत्थेव मण्डकप्पम्हि, अहु सत्था अनुत्तरो।
Tattheva maṇḍakappamhi, ahu satthā anuttaro;
अनुपमो असमसमो, फुस्सो लोकग्गनायको॥
Anupamo asamasamo, phusso lokagganāyako.
२.
2.
सोपि सब्बं तमं हन्त्वा, विजटेत्वा महाजटं।
Sopi sabbaṃ tamaṃ hantvā, vijaṭetvā mahājaṭaṃ;
सदेवकं तप्पयन्तो, अभिवस्सि अमतम्बुना॥
Sadevakaṃ tappayanto, abhivassi amatambunā.
३.
3.
धम्मचक्कं पवत्तेन्ते, फुस्से नक्खत्तमङ्गले।
Dhammacakkaṃ pavattente, phusse nakkhattamaṅgale;
कोटिसतसहस्सानं, पठमाभिसमयो अहु॥
Koṭisatasahassānaṃ, paṭhamābhisamayo ahu.
४.
4.
नवुतिसतसहस्सानं , दुतियाभिसमयो अहु।
Navutisatasahassānaṃ , dutiyābhisamayo ahu;
असीतिसतसहस्सानं, ततियाभिसमयो अहु॥
Asītisatasahassānaṃ, tatiyābhisamayo ahu.
५.
5.
सन्निपाता तयो आसुं, फुस्सस्सापि महेसिनो।
Sannipātā tayo āsuṃ, phussassāpi mahesino;
खीणासवानं विमलानं, सन्तचित्तान तादिनं॥
Khīṇāsavānaṃ vimalānaṃ, santacittāna tādinaṃ.
६.
6.
सट्ठिसतसहस्सानं , पठमो आसि समागमो।
Saṭṭhisatasahassānaṃ , paṭhamo āsi samāgamo;
पञ्ञाससतसहस्सानं, दुतियो आसि समागमो॥
Paññāsasatasahassānaṃ, dutiyo āsi samāgamo.
७.
7.
चत्तारीससतसहस्सानं, ततियो आसि समागमो।
Cattārīsasatasahassānaṃ, tatiyo āsi samāgamo;
अनुपादा विमुत्तानं, वोच्छिन्नपटिसन्धिनं॥
Anupādā vimuttānaṃ, vocchinnapaṭisandhinaṃ.
८.
8.
अहं तेन समयेन, विजितावी नाम खत्तियो।
Ahaṃ tena samayena, vijitāvī nāma khattiyo;
छड्डयित्वा महारज्जं, पब्बजिं तस्स सन्तिके॥
Chaḍḍayitvā mahārajjaṃ, pabbajiṃ tassa santike.
९.
9.
सोपि मं बुद्धो ब्याकासि, फुस्सो लोकग्गनायको।
Sopi maṃ buddho byākāsi, phusso lokagganāyako;
‘‘द्वेनवुते इतो कप्पे, अयं बुद्धो भविस्सति॥
‘‘Dvenavute ito kappe, ayaṃ buddho bhavissati.
१०.
10.
‘‘पधानं पदहित्वान…पे॰… हेस्साम सम्मुखा इमं’’॥
‘‘Padhānaṃ padahitvāna…pe… hessāma sammukhā imaṃ’’.
११.
11.
तस्सापि वचनं सुत्वा, भिय्यो चित्तं पसादयिं।
Tassāpi vacanaṃ sutvā, bhiyyo cittaṃ pasādayiṃ;
उत्तरिं वतमधिट्ठासिं, दसपारमिपूरिया॥
Uttariṃ vatamadhiṭṭhāsiṃ, dasapāramipūriyā.
१२.
12.
सुत्तन्तं विनयञ्चापि, नवङ्गं सत्थुसासनं।
Suttantaṃ vinayañcāpi, navaṅgaṃ satthusāsanaṃ;
सब्बं परियापुणित्वा, सोभयिं जिनसासनं॥
Sabbaṃ pariyāpuṇitvā, sobhayiṃ jinasāsanaṃ.
१३.
13.
तत्थप्पमत्तो विहरन्तो, ब्रह्मं भावेत्व भावनं।
Tatthappamatto viharanto, brahmaṃ bhāvetva bhāvanaṃ;
अभिञ्ञासु पारमिं गन्त्वा, ब्रह्मलोकमगञ्छहं॥
Abhiññāsu pāramiṃ gantvā, brahmalokamagañchahaṃ.
१४.
14.
कासिकं नाम नगरं, जयसेनो नाम खत्तियो।
Kāsikaṃ nāma nagaraṃ, jayaseno nāma khattiyo;
सिरिमा नाम जनिका, फुस्सस्सापि महेसिनो॥
Sirimā nāma janikā, phussassāpi mahesino.
१५.
15.
नववस्ससहस्सानि, अगारं अज्झ सो वसि।
Navavassasahassāni, agāraṃ ajjha so vasi;
गरुळपक्ख हंस सुवण्णभारा, तयो पासादमुत्तमा॥
Garuḷapakkha haṃsa suvaṇṇabhārā, tayo pāsādamuttamā.
१६.
16.
तिंसइत्थिसहस्सानि, नारियो समलङ्कता।
Tiṃsaitthisahassāni, nāriyo samalaṅkatā;
किसागोतमी नाम नारी, अनूपमो नाम अत्रजो॥
Kisāgotamī nāma nārī, anūpamo nāma atrajo.
१७.
17.
निमित्ते चतुरो दिस्वा, हत्थियानेन निक्खमि।
Nimitte caturo disvā, hatthiyānena nikkhami;
छमासं पधानचारं, अचरी पुरिसुत्तमो॥
Chamāsaṃ padhānacāraṃ, acarī purisuttamo.
१८.
18.
ब्रह्मुना याचितो सन्तो, फुस्सो लोकग्गनायको।
Brahmunā yācito santo, phusso lokagganāyako;
वत्ति चक्कं महावीरो, मिगदाये नरुत्तमो॥
Vatti cakkaṃ mahāvīro, migadāye naruttamo.
१९.
19.
सुरक्खितो धम्मसेनो, अहेसुं अग्गसावका।
Surakkhito dhammaseno, ahesuṃ aggasāvakā;
सभियो नामुपट्ठाको, फुस्सस्सापि महेसिनो॥
Sabhiyo nāmupaṭṭhāko, phussassāpi mahesino.
२०.
20.
चाला च उपचाला च, अहेसुं अग्गसाविका।
Cālā ca upacālā ca, ahesuṃ aggasāvikā;
बोधि तस्स भगवतो, आमण्डोति पवुच्चति॥
Bodhi tassa bhagavato, āmaṇḍoti pavuccati.
२१.
21.
धनञ्चयो विसाखो च, अहेसुं अग्गुपट्ठका।
Dhanañcayo visākho ca, ahesuṃ aggupaṭṭhakā;
पदुमा चेव नागा च, अहेसुं अग्गुपट्ठिका॥
Padumā ceva nāgā ca, ahesuṃ aggupaṭṭhikā.
२२.
22.
अट्ठपण्णासरतनं , सोपि अच्चुग्गतो मुनि।
Aṭṭhapaṇṇāsaratanaṃ , sopi accuggato muni;
सोभते सतरंसीव, उळुराजाव पूरितो॥
Sobhate sataraṃsīva, uḷurājāva pūrito.
२३.
23.
नवुतिवस्ससहस्सानि, आयु विज्जति तावदे।
Navutivassasahassāni, āyu vijjati tāvade;
तावता तिट्ठमानो सो, तारेसि जनतं बहुं॥
Tāvatā tiṭṭhamāno so, tāresi janataṃ bahuṃ.
२४.
24.
ओवदित्वा बहू सत्ते, सन्तारेत्वा बहू जने।
Ovaditvā bahū satte, santāretvā bahū jane;
सोपि सत्था अतुलयसो, निब्बुतो सो ससावको॥
Sopi satthā atulayaso, nibbuto so sasāvako.
२५.
25.
फुस्सो जिनवरो सत्था, सेनारामम्हि निब्बुतो।
Phusso jinavaro satthā, senārāmamhi nibbuto;
धातुवित्थारिकं आसि, तेसु तेसु पदेसतोति॥
Dhātuvitthārikaṃ āsi, tesu tesu padesatoti.
फुस्सस्स भगवतो वंसो अट्ठारसमो।
Phussassa bhagavato vaṃso aṭṭhārasamo.
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / बुद्धवंस-अट्ठकथा • Buddhavaṃsa-aṭṭhakathā / २०. फुस्सबुद्धवंसवण्णना • 20. Phussabuddhavaṃsavaṇṇanā
