| Library / Tipiṭaka / ತಿಪಿಟಕ • Tipiṭaka / ಬುದ್ಧವಂಸಪಾಳಿ • Buddhavaṃsapāḷi |
೨೦. ಫುಸ್ಸಬುದ್ಧವಂಸೋ
20. Phussabuddhavaṃso
೧.
1.
ತತ್ಥೇವ ಮಣ್ಡಕಪ್ಪಮ್ಹಿ, ಅಹು ಸತ್ಥಾ ಅನುತ್ತರೋ।
Tattheva maṇḍakappamhi, ahu satthā anuttaro;
ಅನುಪಮೋ ಅಸಮಸಮೋ, ಫುಸ್ಸೋ ಲೋಕಗ್ಗನಾಯಕೋ॥
Anupamo asamasamo, phusso lokagganāyako.
೨.
2.
ಸೋಪಿ ಸಬ್ಬಂ ತಮಂ ಹನ್ತ್ವಾ, ವಿಜಟೇತ್ವಾ ಮಹಾಜಟಂ।
Sopi sabbaṃ tamaṃ hantvā, vijaṭetvā mahājaṭaṃ;
ಸದೇವಕಂ ತಪ್ಪಯನ್ತೋ, ಅಭಿವಸ್ಸಿ ಅಮತಮ್ಬುನಾ॥
Sadevakaṃ tappayanto, abhivassi amatambunā.
೩.
3.
ಧಮ್ಮಚಕ್ಕಂ ಪವತ್ತೇನ್ತೇ, ಫುಸ್ಸೇ ನಕ್ಖತ್ತಮಙ್ಗಲೇ।
Dhammacakkaṃ pavattente, phusse nakkhattamaṅgale;
ಕೋಟಿಸತಸಹಸ್ಸಾನಂ, ಪಠಮಾಭಿಸಮಯೋ ಅಹು॥
Koṭisatasahassānaṃ, paṭhamābhisamayo ahu.
೪.
4.
ನವುತಿಸತಸಹಸ್ಸಾನಂ , ದುತಿಯಾಭಿಸಮಯೋ ಅಹು।
Navutisatasahassānaṃ , dutiyābhisamayo ahu;
ಅಸೀತಿಸತಸಹಸ್ಸಾನಂ, ತತಿಯಾಭಿಸಮಯೋ ಅಹು॥
Asītisatasahassānaṃ, tatiyābhisamayo ahu.
೫.
5.
ಸನ್ನಿಪಾತಾ ತಯೋ ಆಸುಂ, ಫುಸ್ಸಸ್ಸಾಪಿ ಮಹೇಸಿನೋ।
Sannipātā tayo āsuṃ, phussassāpi mahesino;
ಖೀಣಾಸವಾನಂ ವಿಮಲಾನಂ, ಸನ್ತಚಿತ್ತಾನ ತಾದಿನಂ॥
Khīṇāsavānaṃ vimalānaṃ, santacittāna tādinaṃ.
೬.
6.
ಸಟ್ಠಿಸತಸಹಸ್ಸಾನಂ , ಪಠಮೋ ಆಸಿ ಸಮಾಗಮೋ।
Saṭṭhisatasahassānaṃ , paṭhamo āsi samāgamo;
ಪಞ್ಞಾಸಸತಸಹಸ್ಸಾನಂ, ದುತಿಯೋ ಆಸಿ ಸಮಾಗಮೋ॥
Paññāsasatasahassānaṃ, dutiyo āsi samāgamo.
೭.
7.
ಚತ್ತಾರೀಸಸತಸಹಸ್ಸಾನಂ, ತತಿಯೋ ಆಸಿ ಸಮಾಗಮೋ।
Cattārīsasatasahassānaṃ, tatiyo āsi samāgamo;
ಅನುಪಾದಾ ವಿಮುತ್ತಾನಂ, ವೋಚ್ಛಿನ್ನಪಟಿಸನ್ಧಿನಂ॥
Anupādā vimuttānaṃ, vocchinnapaṭisandhinaṃ.
೮.
8.
ಅಹಂ ತೇನ ಸಮಯೇನ, ವಿಜಿತಾವೀ ನಾಮ ಖತ್ತಿಯೋ।
Ahaṃ tena samayena, vijitāvī nāma khattiyo;
ಛಡ್ಡಯಿತ್ವಾ ಮಹಾರಜ್ಜಂ, ಪಬ್ಬಜಿಂ ತಸ್ಸ ಸನ್ತಿಕೇ॥
Chaḍḍayitvā mahārajjaṃ, pabbajiṃ tassa santike.
೯.
9.
ಸೋಪಿ ಮಂ ಬುದ್ಧೋ ಬ್ಯಾಕಾಸಿ, ಫುಸ್ಸೋ ಲೋಕಗ್ಗನಾಯಕೋ।
Sopi maṃ buddho byākāsi, phusso lokagganāyako;
‘‘ದ್ವೇನವುತೇ ಇತೋ ಕಪ್ಪೇ, ಅಯಂ ಬುದ್ಧೋ ಭವಿಸ್ಸತಿ॥
‘‘Dvenavute ito kappe, ayaṃ buddho bhavissati.
೧೦.
10.
‘‘ಪಧಾನಂ ಪದಹಿತ್ವಾನ…ಪೇ॰… ಹೇಸ್ಸಾಮ ಸಮ್ಮುಖಾ ಇಮಂ’’॥
‘‘Padhānaṃ padahitvāna…pe… hessāma sammukhā imaṃ’’.
೧೧.
11.
ತಸ್ಸಾಪಿ ವಚನಂ ಸುತ್ವಾ, ಭಿಯ್ಯೋ ಚಿತ್ತಂ ಪಸಾದಯಿಂ।
Tassāpi vacanaṃ sutvā, bhiyyo cittaṃ pasādayiṃ;
ಉತ್ತರಿಂ ವತಮಧಿಟ್ಠಾಸಿಂ, ದಸಪಾರಮಿಪೂರಿಯಾ॥
Uttariṃ vatamadhiṭṭhāsiṃ, dasapāramipūriyā.
೧೨.
12.
ಸುತ್ತನ್ತಂ ವಿನಯಞ್ಚಾಪಿ, ನವಙ್ಗಂ ಸತ್ಥುಸಾಸನಂ।
Suttantaṃ vinayañcāpi, navaṅgaṃ satthusāsanaṃ;
ಸಬ್ಬಂ ಪರಿಯಾಪುಣಿತ್ವಾ, ಸೋಭಯಿಂ ಜಿನಸಾಸನಂ॥
Sabbaṃ pariyāpuṇitvā, sobhayiṃ jinasāsanaṃ.
೧೩.
13.
ತತ್ಥಪ್ಪಮತ್ತೋ ವಿಹರನ್ತೋ, ಬ್ರಹ್ಮಂ ಭಾವೇತ್ವ ಭಾವನಂ।
Tatthappamatto viharanto, brahmaṃ bhāvetva bhāvanaṃ;
ಅಭಿಞ್ಞಾಸು ಪಾರಮಿಂ ಗನ್ತ್ವಾ, ಬ್ರಹ್ಮಲೋಕಮಗಞ್ಛಹಂ॥
Abhiññāsu pāramiṃ gantvā, brahmalokamagañchahaṃ.
೧೪.
14.
ಕಾಸಿಕಂ ನಾಮ ನಗರಂ, ಜಯಸೇನೋ ನಾಮ ಖತ್ತಿಯೋ।
Kāsikaṃ nāma nagaraṃ, jayaseno nāma khattiyo;
ಸಿರಿಮಾ ನಾಮ ಜನಿಕಾ, ಫುಸ್ಸಸ್ಸಾಪಿ ಮಹೇಸಿನೋ॥
Sirimā nāma janikā, phussassāpi mahesino.
೧೫.
15.
ನವವಸ್ಸಸಹಸ್ಸಾನಿ, ಅಗಾರಂ ಅಜ್ಝ ಸೋ ವಸಿ।
Navavassasahassāni, agāraṃ ajjha so vasi;
ಗರುಳಪಕ್ಖ ಹಂಸ ಸುವಣ್ಣಭಾರಾ, ತಯೋ ಪಾಸಾದಮುತ್ತಮಾ॥
Garuḷapakkha haṃsa suvaṇṇabhārā, tayo pāsādamuttamā.
೧೬.
16.
ತಿಂಸಇತ್ಥಿಸಹಸ್ಸಾನಿ, ನಾರಿಯೋ ಸಮಲಙ್ಕತಾ।
Tiṃsaitthisahassāni, nāriyo samalaṅkatā;
ಕಿಸಾಗೋತಮೀ ನಾಮ ನಾರೀ, ಅನೂಪಮೋ ನಾಮ ಅತ್ರಜೋ॥
Kisāgotamī nāma nārī, anūpamo nāma atrajo.
೧೭.
17.
ನಿಮಿತ್ತೇ ಚತುರೋ ದಿಸ್ವಾ, ಹತ್ಥಿಯಾನೇನ ನಿಕ್ಖಮಿ।
Nimitte caturo disvā, hatthiyānena nikkhami;
ಛಮಾಸಂ ಪಧಾನಚಾರಂ, ಅಚರೀ ಪುರಿಸುತ್ತಮೋ॥
Chamāsaṃ padhānacāraṃ, acarī purisuttamo.
೧೮.
18.
ಬ್ರಹ್ಮುನಾ ಯಾಚಿತೋ ಸನ್ತೋ, ಫುಸ್ಸೋ ಲೋಕಗ್ಗನಾಯಕೋ।
Brahmunā yācito santo, phusso lokagganāyako;
ವತ್ತಿ ಚಕ್ಕಂ ಮಹಾವೀರೋ, ಮಿಗದಾಯೇ ನರುತ್ತಮೋ॥
Vatti cakkaṃ mahāvīro, migadāye naruttamo.
೧೯.
19.
ಸುರಕ್ಖಿತೋ ಧಮ್ಮಸೇನೋ, ಅಹೇಸುಂ ಅಗ್ಗಸಾವಕಾ।
Surakkhito dhammaseno, ahesuṃ aggasāvakā;
ಸಭಿಯೋ ನಾಮುಪಟ್ಠಾಕೋ, ಫುಸ್ಸಸ್ಸಾಪಿ ಮಹೇಸಿನೋ॥
Sabhiyo nāmupaṭṭhāko, phussassāpi mahesino.
೨೦.
20.
ಚಾಲಾ ಚ ಉಪಚಾಲಾ ಚ, ಅಹೇಸುಂ ಅಗ್ಗಸಾವಿಕಾ।
Cālā ca upacālā ca, ahesuṃ aggasāvikā;
ಬೋಧಿ ತಸ್ಸ ಭಗವತೋ, ಆಮಣ್ಡೋತಿ ಪವುಚ್ಚತಿ॥
Bodhi tassa bhagavato, āmaṇḍoti pavuccati.
೨೧.
21.
ಧನಞ್ಚಯೋ ವಿಸಾಖೋ ಚ, ಅಹೇಸುಂ ಅಗ್ಗುಪಟ್ಠಕಾ।
Dhanañcayo visākho ca, ahesuṃ aggupaṭṭhakā;
ಪದುಮಾ ಚೇವ ನಾಗಾ ಚ, ಅಹೇಸುಂ ಅಗ್ಗುಪಟ್ಠಿಕಾ॥
Padumā ceva nāgā ca, ahesuṃ aggupaṭṭhikā.
೨೨.
22.
ಅಟ್ಠಪಣ್ಣಾಸರತನಂ , ಸೋಪಿ ಅಚ್ಚುಗ್ಗತೋ ಮುನಿ।
Aṭṭhapaṇṇāsaratanaṃ , sopi accuggato muni;
ಸೋಭತೇ ಸತರಂಸೀವ, ಉಳುರಾಜಾವ ಪೂರಿತೋ॥
Sobhate sataraṃsīva, uḷurājāva pūrito.
೨೩.
23.
ನವುತಿವಸ್ಸಸಹಸ್ಸಾನಿ, ಆಯು ವಿಜ್ಜತಿ ತಾವದೇ।
Navutivassasahassāni, āyu vijjati tāvade;
ತಾವತಾ ತಿಟ್ಠಮಾನೋ ಸೋ, ತಾರೇಸಿ ಜನತಂ ಬಹುಂ॥
Tāvatā tiṭṭhamāno so, tāresi janataṃ bahuṃ.
೨೪.
24.
ಓವದಿತ್ವಾ ಬಹೂ ಸತ್ತೇ, ಸನ್ತಾರೇತ್ವಾ ಬಹೂ ಜನೇ।
Ovaditvā bahū satte, santāretvā bahū jane;
ಸೋಪಿ ಸತ್ಥಾ ಅತುಲಯಸೋ, ನಿಬ್ಬುತೋ ಸೋ ಸಸಾವಕೋ॥
Sopi satthā atulayaso, nibbuto so sasāvako.
೨೫.
25.
ಫುಸ್ಸೋ ಜಿನವರೋ ಸತ್ಥಾ, ಸೇನಾರಾಮಮ್ಹಿ ನಿಬ್ಬುತೋ।
Phusso jinavaro satthā, senārāmamhi nibbuto;
ಧಾತುವಿತ್ಥಾರಿಕಂ ಆಸಿ, ತೇಸು ತೇಸು ಪದೇಸತೋತಿ॥
Dhātuvitthārikaṃ āsi, tesu tesu padesatoti.
ಫುಸ್ಸಸ್ಸ ಭಗವತೋ ವಂಸೋ ಅಟ್ಠಾರಸಮೋ।
Phussassa bhagavato vaṃso aṭṭhārasamo.
Related texts:
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಖುದ್ದಕನಿಕಾಯ (ಅಟ್ಠಕಥಾ) • Khuddakanikāya (aṭṭhakathā) / ಬುದ್ಧವಂಸ-ಅಟ್ಠಕಥಾ • Buddhavaṃsa-aṭṭhakathā / ೨೦. ಫುಸ್ಸಬುದ್ಧವಂಸವಣ್ಣನಾ • 20. Phussabuddhavaṃsavaṇṇanā
