| Library / Tipiṭaka / திபிடக • Tipiṭaka / அபதா³ன-அட்ட²கதா² • Apadāna-aṭṭhakathā |
40. பிலிந்த³வச்ச²வக்³கோ³
40. Pilindavacchavaggo
1. பிலிந்த³வச்ச²த்தே²ரஅபதா³னவண்ணனா
1. Pilindavacchattheraapadānavaṇṇanā
சத்தாலீஸமவக்³கே³ அபதா³னே நக³ரே ஹங்ஸவதியாதிஆதி³கங் ஆயஸ்மதோ பிலிந்த³வச்ச²த்தே²ரஸ்ஸ அபதா³னங். அயம்பி புரிமபு³த்³தே⁴ஸு கதாதி⁴காரோ தத்த² தத்த² ப⁴வே விவட்டூபனிஸ்ஸயானி புஞ்ஞானி உபசினந்தோ பது³முத்தரஸ்ஸ ப⁴க³வதோ காலே ஹங்ஸவதீனக³ரே தோ³வாரிககுலே நிப்³ப³த்தோ மஹத்³த⁴னோ மஹாபோ⁴கோ³ அஹோஸி. ஸோ கோடிஸன்னிசிதத⁴னராஸிங் ஓலோகெத்வா ரஹோ நிஸின்னோ ‘‘இமங் ஸப்³ப³த⁴னங் மயா ஸம்மா க³ஹெத்வா க³ந்துங் வட்டதீ’’தி சிந்தெத்வா ‘‘பு³த்³த⁴ப்பமுக²ஸ்ஸ பி⁴க்கு²ஸங்க⁴ஸ்ஸ ஸப்³ப³பரிக்கா²ரதா³னங் தா³துங் வட்டதீ’’தி ஸன்னிட்டா²னங் கத்வா ச²த்தஸதஸஹஸ்ஸங் ஆதி³ங் கத்வா ஸப்³ப³பரிபோ⁴க³பரிக்கா²ரானிபி ஸதஸஹஸ்ஸவஸேன காரெத்வா பது³முத்தரங் ப⁴க³வந்தங் நிமந்தெத்வா பு³த்³த⁴ப்பமுக²ஸ்ஸ பி⁴க்கு²ஸங்க⁴ஸ்ஸ மஹாதா³னங் அதா³ஸி. ஏவங் ஸத்தாஹங் தா³னங் த³த்வா பரியோஸானதி³வஸே நிப்³பா³னாதி⁴க³மங் பத்தெ²த்வா யாவஜீவங் புஞ்ஞானி கத்வா ஜீவிதபரியோஸானே தே³வலோகே நிப்³ப³த்தோ ச² காமாவசரே தி³ப்³ப³ஸம்பத்தியோ அனுப⁴வித்வா மனுஸ்ஸேஸு ச சக்கவத்திஆதி³ஸம்பத்தியோ அனுப⁴வித்வா இமஸ்மிங் பு³த்³து⁴ப்பாதே³ ப்³ராஹ்மணகுலே நிப்³ப³த்தோ ஸப்³ப³ஸிப்பேஸு நிப்ப²த்திங் பத்தோ கொ³த்தவஸேன பிலிந்த³வச்சோ²தி பாகடோ அஹோஸி.
Cattālīsamavagge apadāne nagare haṃsavatiyātiādikaṃ āyasmato pilindavacchattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto padumuttarassa bhagavato kāle haṃsavatīnagare dovārikakule nibbatto mahaddhano mahābhogo ahosi. So koṭisannicitadhanarāsiṃ oloketvā raho nisinno ‘‘imaṃ sabbadhanaṃ mayā sammā gahetvā gantuṃ vaṭṭatī’’ti cintetvā ‘‘buddhappamukhassa bhikkhusaṅghassa sabbaparikkhāradānaṃ dātuṃ vaṭṭatī’’ti sanniṭṭhānaṃ katvā chattasatasahassaṃ ādiṃ katvā sabbaparibhogaparikkhārānipi satasahassavasena kāretvā padumuttaraṃ bhagavantaṃ nimantetvā buddhappamukhassa bhikkhusaṅghassa mahādānaṃ adāsi. Evaṃ sattāhaṃ dānaṃ datvā pariyosānadivase nibbānādhigamaṃ patthetvā yāvajīvaṃ puññāni katvā jīvitapariyosāne devaloke nibbatto cha kāmāvacare dibbasampattiyo anubhavitvā manussesu ca cakkavattiādisampattiyo anubhavitvā imasmiṃ buddhuppāde brāhmaṇakule nibbatto sabbasippesu nipphattiṃ patto gottavasena pilindavacchoti pākaṭo ahosi.
1. ஸோ ஏகதி³வஸங் ஸத்து² ஸந்திகே த⁴ம்மதே³ஸனங் ஸுத்வா படிலத்³த⁴ஸத்³தோ⁴ பப்³ப³ஜித்வா நசிரஸ்ஸேவ அரஹா ஹுத்வா அத்தனோ புப்³ப³கம்மங் ஸரித்வா ஸோமனஸ்ஸஜாதோ உதா³னவஸேன தங் பகாஸெந்தோ நக³ரே ஹங்ஸவதியாதிஆதி³மாஹ. தஸ்ஸத்தோ² ஹெட்டா² வுத்தோவ. ஆஸிங் தோ³வாரிகோ அஹந்தி அஹங் ஹங்ஸவதீனக³ரே ரஞ்ஞோ கே³ஹத்³வாரே த்³வாரபாலகோ ஆஸிங் அஹோஸிந்தி அத்தோ². அக்கோ²ப⁴ங் அமிதங் போ⁴க³ந்தி ரஞ்ஞோ வல்லப⁴த்தா அஞ்ஞேஹி கோ²பே⁴துங் சாலேதுங் அஸக்குணெய்யங் அமிதங் அபரிமாணபோ⁴க³ங் த⁴னங் மம க⁴ரே ஸன்னிசிதங் ராஸீகதங் அஹோஸீதி அத்தோ².
1. So ekadivasaṃ satthu santike dhammadesanaṃ sutvā paṭiladdhasaddho pabbajitvā nacirasseva arahā hutvā attano pubbakammaṃ saritvā somanassajāto udānavasena taṃ pakāsento nagare haṃsavatiyātiādimāha. Tassattho heṭṭhā vuttova. Āsiṃ dovāriko ahanti ahaṃ haṃsavatīnagare rañño gehadvāre dvārapālako āsiṃ ahosinti attho. Akkhobhaṃ amitaṃ bhoganti rañño vallabhattā aññehi khobhetuṃ cāletuṃ asakkuṇeyyaṃ amitaṃ aparimāṇabhogaṃ dhanaṃ mama ghare sannicitaṃ rāsīkataṃ ahosīti attho.
3. ப³ஹூ மேதி⁴க³தா போ⁴கா³தி அனேகா போ⁴கா³ மே மயா அதி⁴க³தா பத்தா படிலத்³தா⁴தி அத்தோ² . ஸத்த²வாஸிஆதீ³னங் பரிக்கா²ரானங் நாமானி நயானுயோகே³ன ஸுவிஞ்ஞெய்யானி. பரிக்கா²ரதா³னானிஸங்ஸானி ச ஸுவிஞ்ஞெய்யானேவாதி.
3.Bahū medhigatā bhogāti anekā bhogā me mayā adhigatā pattā paṭiladdhāti attho . Satthavāsiādīnaṃ parikkhārānaṃ nāmāni nayānuyogena suviññeyyāni. Parikkhāradānānisaṃsāni ca suviññeyyānevāti.
பிலிந்த³வச்ச²த்தே²ரஅபதா³னவண்ணனா ஸமத்தா.
Pilindavacchattheraapadānavaṇṇanā samattā.
து³தியததியசதுத்த²பஞ்சமாபதா³னானி உத்தானானேவாதி.
Dutiyatatiyacatutthapañcamāpadānāni uttānānevāti.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / அபதா³னபாளி • Apadānapāḷi / 1. பிலிந்த³வச்ச²த்தே²ரஅபதா³னங் • 1. Pilindavacchattheraapadānaṃ
