| Library / Tipiṭaka / တိပိဋက • Tipiṭaka / အပဒာန-အဋ္ဌကထာ • Apadāna-aṭṭhakathā |
၄၀. ပိလိန္ဒဝစ္ဆဝဂ္ဂော
40. Pilindavacchavaggo
၁. ပိလိန္ဒဝစ္ဆတ္ထေရအပဒာနဝဏ္ဏနာ
1. Pilindavacchattheraapadānavaṇṇanā
စတ္တာလီသမဝဂ္ဂေ အပဒာနေ နဂရေ ဟံသဝတိယာတိအာဒိကံ အာယသ္မတော ပိလိန္ဒဝစ္ဆတ္ထေရသ္သ အပဒာနံ။ အယမ္ပိ ပုရိမဗုဒ္ဓေသု ကတာဓိကာရော တတ္ထ တတ္ထ ဘဝေ ဝိဝဋ္ဋူပနိသ္သယာနိ ပုညာနိ ဥပစိနန္တော ပဒုမုတ္တရသ္သ ဘဂဝတော ကာလေ ဟံသဝတီနဂရေ ဒောဝာရိကကုလေ နိဗ္ဗတ္တော မဟဒ္ဓနော မဟာဘောဂော အဟောသိ။ သော ကောဋိသန္နိစိတဓနရာသိံ ဩလောကေတ္ဝာ ရဟော နိသိန္နော ‘‘ဣမံ သဗ္ဗဓနံ မယာ သမ္မာ ဂဟေတ္ဝာ ဂန္တုံ ဝဋ္ဋတီ’’တိ စိန္တေတ္ဝာ ‘‘ဗုဒ္ဓပ္ပမုခသ္သ ဘိက္ခုသင္ဃသ္သ သဗ္ဗပရိက္ခာရဒာနံ ဒာတုံ ဝဋ္ဋတီ’’တိ သန္နိဋ္ဌာနံ ကတ္ဝာ ဆတ္တသတသဟသ္သံ အာဒိံ ကတ္ဝာ သဗ္ဗပရိဘောဂပရိက္ခာရာနိပိ သတသဟသ္သဝသေန ကာရေတ္ဝာ ပဒုမုတ္တရံ ဘဂဝန္တံ နိမန္တေတ္ဝာ ဗုဒ္ဓပ္ပမုခသ္သ ဘိက္ခုသင္ဃသ္သ မဟာဒာနံ အဒာသိ။ ဧဝံ သတ္တာဟံ ဒာနံ ဒတ္ဝာ ပရိယောသာနဒိဝသေ နိဗ္ဗာနာဓိဂမံ ပတ္ထေတ္ဝာ ယာဝဇီဝံ ပုညာနိ ကတ္ဝာ ဇီဝိတပရိယောသာနေ ဒေဝလောကေ နိဗ္ဗတ္တော ဆ ကာမာဝစရေ ဒိဗ္ဗသမ္ပတ္တိယော အနုဘဝိတ္ဝာ မနုသ္သေသု စ စက္ကဝတ္တိအာဒိသမ္ပတ္တိယော အနုဘဝိတ္ဝာ ဣမသ္မိံ ဗုဒ္ဓုပ္ပာဒေ ဗ္ရာဟ္မဏကုလေ နိဗ္ဗတ္တော သဗ္ဗသိပ္ပေသု နိပ္ဖတ္တိံ ပတ္တော ဂောတ္တဝသေန ပိလိန္ဒဝစ္ဆောတိ ပာကဋော အဟောသိ။
Cattālīsamavagge apadāne nagare haṃsavatiyātiādikaṃ āyasmato pilindavacchattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto padumuttarassa bhagavato kāle haṃsavatīnagare dovārikakule nibbatto mahaddhano mahābhogo ahosi. So koṭisannicitadhanarāsiṃ oloketvā raho nisinno ‘‘imaṃ sabbadhanaṃ mayā sammā gahetvā gantuṃ vaṭṭatī’’ti cintetvā ‘‘buddhappamukhassa bhikkhusaṅghassa sabbaparikkhāradānaṃ dātuṃ vaṭṭatī’’ti sanniṭṭhānaṃ katvā chattasatasahassaṃ ādiṃ katvā sabbaparibhogaparikkhārānipi satasahassavasena kāretvā padumuttaraṃ bhagavantaṃ nimantetvā buddhappamukhassa bhikkhusaṅghassa mahādānaṃ adāsi. Evaṃ sattāhaṃ dānaṃ datvā pariyosānadivase nibbānādhigamaṃ patthetvā yāvajīvaṃ puññāni katvā jīvitapariyosāne devaloke nibbatto cha kāmāvacare dibbasampattiyo anubhavitvā manussesu ca cakkavattiādisampattiyo anubhavitvā imasmiṃ buddhuppāde brāhmaṇakule nibbatto sabbasippesu nipphattiṃ patto gottavasena pilindavacchoti pākaṭo ahosi.
၁. သော ဧကဒိဝသံ သတ္ထု သန္တိကေ ဓမ္မဒေသနံ သုတ္ဝာ ပဋိလဒ္ဓသဒ္ဓော ပဗ္ဗဇိတ္ဝာ နစိရသ္သေဝ အရဟာ ဟုတ္ဝာ အတ္တနော ပုဗ္ဗကမ္မံ သရိတ္ဝာ သောမနသ္သဇာတော ဥဒာနဝသေန တံ ပကာသေန္တော နဂရေ ဟံသဝတိယာတိအာဒိမာဟ။ တသ္သတ္ထော ဟေဋ္ဌာ ဝုတ္တောဝ။ အာသိံ ဒောဝာရိကော အဟန္တိ အဟံ ဟံသဝတီနဂရေ ရညော ဂေဟဒ္ဝာရေ ဒ္ဝာရပာလကော အာသိံ အဟောသိန္တိ အတ္ထော။ အက္ခောဘံ အမိတံ ဘောဂန္တိ ရညော ဝလ္လဘတ္တာ အညေဟိ ခောဘေတုံ စာလေတုံ အသက္ကုဏေယ္ယံ အမိတံ အပရိမာဏဘောဂံ ဓနံ မမ ဃရေ သန္နိစိတံ ရာသီကတံ အဟောသီတိ အတ္ထော။
1. So ekadivasaṃ satthu santike dhammadesanaṃ sutvā paṭiladdhasaddho pabbajitvā nacirasseva arahā hutvā attano pubbakammaṃ saritvā somanassajāto udānavasena taṃ pakāsento nagare haṃsavatiyātiādimāha. Tassattho heṭṭhā vuttova. Āsiṃ dovāriko ahanti ahaṃ haṃsavatīnagare rañño gehadvāre dvārapālako āsiṃ ahosinti attho. Akkhobhaṃ amitaṃ bhoganti rañño vallabhattā aññehi khobhetuṃ cāletuṃ asakkuṇeyyaṃ amitaṃ aparimāṇabhogaṃ dhanaṃ mama ghare sannicitaṃ rāsīkataṃ ahosīti attho.
၃. ဗဟူ မေဓိဂတာ ဘောဂာတိ အနေကာ ဘောဂာ မေ မယာ အဓိဂတာ ပတ္တာ ပဋိလဒ္ဓာတိ အတ္ထော ။ သတ္ထဝာသိအာဒီနံ ပရိက္ခာရာနံ နာမာနိ နယာနုယောဂေန သုဝိညေယ္ယာနိ။ ပရိက္ခာရဒာနာနိသံသာနိ စ သုဝိညေယ္ယာနေဝာတိ။
3.Bahū medhigatā bhogāti anekā bhogā me mayā adhigatā pattā paṭiladdhāti attho . Satthavāsiādīnaṃ parikkhārānaṃ nāmāni nayānuyogena suviññeyyāni. Parikkhāradānānisaṃsāni ca suviññeyyānevāti.
ပိလိန္ဒဝစ္ဆတ္ထေရအပဒာနဝဏ္ဏနာ သမတ္တာ။
Pilindavacchattheraapadānavaṇṇanā samattā.
ဒုတိယတတိယစတုတ္ထပဉ္စမာပဒာနာနိ ဥတ္တာနာနေဝာတိ။
Dutiyatatiyacatutthapañcamāpadānāni uttānānevāti.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / ခုဒ္ဒကနိကာယ • Khuddakanikāya / အပဒာနပာဠိ • Apadānapāḷi / ၁. ပိလိန္ဒဝစ္ဆတ္ထေရအပဒာနံ • 1. Pilindavacchattheraapadānaṃ
