| Library / Tipiṭaka / ತಿಪಿಟಕ • Tipiṭaka / ಅಪದಾನ-ಅಟ್ಠಕಥಾ • Apadāna-aṭṭhakathā |
೪೦. ಪಿಲಿನ್ದವಚ್ಛವಗ್ಗೋ
40. Pilindavacchavaggo
೧. ಪಿಲಿನ್ದವಚ್ಛತ್ಥೇರಅಪದಾನವಣ್ಣನಾ
1. Pilindavacchattheraapadānavaṇṇanā
ಚತ್ತಾಲೀಸಮವಗ್ಗೇ ಅಪದಾನೇ ನಗರೇ ಹಂಸವತಿಯಾತಿಆದಿಕಂ ಆಯಸ್ಮತೋ ಪಿಲಿನ್ದವಚ್ಛತ್ಥೇರಸ್ಸ ಅಪದಾನಂ। ಅಯಮ್ಪಿ ಪುರಿಮಬುದ್ಧೇಸು ಕತಾಧಿಕಾರೋ ತತ್ಥ ತತ್ಥ ಭವೇ ವಿವಟ್ಟೂಪನಿಸ್ಸಯಾನಿ ಪುಞ್ಞಾನಿ ಉಪಚಿನನ್ತೋ ಪದುಮುತ್ತರಸ್ಸ ಭಗವತೋ ಕಾಲೇ ಹಂಸವತೀನಗರೇ ದೋವಾರಿಕಕುಲೇ ನಿಬ್ಬತ್ತೋ ಮಹದ್ಧನೋ ಮಹಾಭೋಗೋ ಅಹೋಸಿ। ಸೋ ಕೋಟಿಸನ್ನಿಚಿತಧನರಾಸಿಂ ಓಲೋಕೇತ್ವಾ ರಹೋ ನಿಸಿನ್ನೋ ‘‘ಇಮಂ ಸಬ್ಬಧನಂ ಮಯಾ ಸಮ್ಮಾ ಗಹೇತ್ವಾ ಗನ್ತುಂ ವಟ್ಟತೀ’’ತಿ ಚಿನ್ತೇತ್ವಾ ‘‘ಬುದ್ಧಪ್ಪಮುಖಸ್ಸ ಭಿಕ್ಖುಸಙ್ಘಸ್ಸ ಸಬ್ಬಪರಿಕ್ಖಾರದಾನಂ ದಾತುಂ ವಟ್ಟತೀ’’ತಿ ಸನ್ನಿಟ್ಠಾನಂ ಕತ್ವಾ ಛತ್ತಸತಸಹಸ್ಸಂ ಆದಿಂ ಕತ್ವಾ ಸಬ್ಬಪರಿಭೋಗಪರಿಕ್ಖಾರಾನಿಪಿ ಸತಸಹಸ್ಸವಸೇನ ಕಾರೇತ್ವಾ ಪದುಮುತ್ತರಂ ಭಗವನ್ತಂ ನಿಮನ್ತೇತ್ವಾ ಬುದ್ಧಪ್ಪಮುಖಸ್ಸ ಭಿಕ್ಖುಸಙ್ಘಸ್ಸ ಮಹಾದಾನಂ ಅದಾಸಿ। ಏವಂ ಸತ್ತಾಹಂ ದಾನಂ ದತ್ವಾ ಪರಿಯೋಸಾನದಿವಸೇ ನಿಬ್ಬಾನಾಧಿಗಮಂ ಪತ್ಥೇತ್ವಾ ಯಾವಜೀವಂ ಪುಞ್ಞಾನಿ ಕತ್ವಾ ಜೀವಿತಪರಿಯೋಸಾನೇ ದೇವಲೋಕೇ ನಿಬ್ಬತ್ತೋ ಛ ಕಾಮಾವಚರೇ ದಿಬ್ಬಸಮ್ಪತ್ತಿಯೋ ಅನುಭವಿತ್ವಾ ಮನುಸ್ಸೇಸು ಚ ಚಕ್ಕವತ್ತಿಆದಿಸಮ್ಪತ್ತಿಯೋ ಅನುಭವಿತ್ವಾ ಇಮಸ್ಮಿಂ ಬುದ್ಧುಪ್ಪಾದೇ ಬ್ರಾಹ್ಮಣಕುಲೇ ನಿಬ್ಬತ್ತೋ ಸಬ್ಬಸಿಪ್ಪೇಸು ನಿಪ್ಫತ್ತಿಂ ಪತ್ತೋ ಗೋತ್ತವಸೇನ ಪಿಲಿನ್ದವಚ್ಛೋತಿ ಪಾಕಟೋ ಅಹೋಸಿ।
Cattālīsamavagge apadāne nagare haṃsavatiyātiādikaṃ āyasmato pilindavacchattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto padumuttarassa bhagavato kāle haṃsavatīnagare dovārikakule nibbatto mahaddhano mahābhogo ahosi. So koṭisannicitadhanarāsiṃ oloketvā raho nisinno ‘‘imaṃ sabbadhanaṃ mayā sammā gahetvā gantuṃ vaṭṭatī’’ti cintetvā ‘‘buddhappamukhassa bhikkhusaṅghassa sabbaparikkhāradānaṃ dātuṃ vaṭṭatī’’ti sanniṭṭhānaṃ katvā chattasatasahassaṃ ādiṃ katvā sabbaparibhogaparikkhārānipi satasahassavasena kāretvā padumuttaraṃ bhagavantaṃ nimantetvā buddhappamukhassa bhikkhusaṅghassa mahādānaṃ adāsi. Evaṃ sattāhaṃ dānaṃ datvā pariyosānadivase nibbānādhigamaṃ patthetvā yāvajīvaṃ puññāni katvā jīvitapariyosāne devaloke nibbatto cha kāmāvacare dibbasampattiyo anubhavitvā manussesu ca cakkavattiādisampattiyo anubhavitvā imasmiṃ buddhuppāde brāhmaṇakule nibbatto sabbasippesu nipphattiṃ patto gottavasena pilindavacchoti pākaṭo ahosi.
೧. ಸೋ ಏಕದಿವಸಂ ಸತ್ಥು ಸನ್ತಿಕೇ ಧಮ್ಮದೇಸನಂ ಸುತ್ವಾ ಪಟಿಲದ್ಧಸದ್ಧೋ ಪಬ್ಬಜಿತ್ವಾ ನಚಿರಸ್ಸೇವ ಅರಹಾ ಹುತ್ವಾ ಅತ್ತನೋ ಪುಬ್ಬಕಮ್ಮಂ ಸರಿತ್ವಾ ಸೋಮನಸ್ಸಜಾತೋ ಉದಾನವಸೇನ ತಂ ಪಕಾಸೇನ್ತೋ ನಗರೇ ಹಂಸವತಿಯಾತಿಆದಿಮಾಹ। ತಸ್ಸತ್ಥೋ ಹೇಟ್ಠಾ ವುತ್ತೋವ। ಆಸಿಂ ದೋವಾರಿಕೋ ಅಹನ್ತಿ ಅಹಂ ಹಂಸವತೀನಗರೇ ರಞ್ಞೋ ಗೇಹದ್ವಾರೇ ದ್ವಾರಪಾಲಕೋ ಆಸಿಂ ಅಹೋಸಿನ್ತಿ ಅತ್ಥೋ। ಅಕ್ಖೋಭಂ ಅಮಿತಂ ಭೋಗನ್ತಿ ರಞ್ಞೋ ವಲ್ಲಭತ್ತಾ ಅಞ್ಞೇಹಿ ಖೋಭೇತುಂ ಚಾಲೇತುಂ ಅಸಕ್ಕುಣೇಯ್ಯಂ ಅಮಿತಂ ಅಪರಿಮಾಣಭೋಗಂ ಧನಂ ಮಮ ಘರೇ ಸನ್ನಿಚಿತಂ ರಾಸೀಕತಂ ಅಹೋಸೀತಿ ಅತ್ಥೋ।
1. So ekadivasaṃ satthu santike dhammadesanaṃ sutvā paṭiladdhasaddho pabbajitvā nacirasseva arahā hutvā attano pubbakammaṃ saritvā somanassajāto udānavasena taṃ pakāsento nagare haṃsavatiyātiādimāha. Tassattho heṭṭhā vuttova. Āsiṃ dovāriko ahanti ahaṃ haṃsavatīnagare rañño gehadvāre dvārapālako āsiṃ ahosinti attho. Akkhobhaṃ amitaṃ bhoganti rañño vallabhattā aññehi khobhetuṃ cāletuṃ asakkuṇeyyaṃ amitaṃ aparimāṇabhogaṃ dhanaṃ mama ghare sannicitaṃ rāsīkataṃ ahosīti attho.
೩. ಬಹೂ ಮೇಧಿಗತಾ ಭೋಗಾತಿ ಅನೇಕಾ ಭೋಗಾ ಮೇ ಮಯಾ ಅಧಿಗತಾ ಪತ್ತಾ ಪಟಿಲದ್ಧಾತಿ ಅತ್ಥೋ । ಸತ್ಥವಾಸಿಆದೀನಂ ಪರಿಕ್ಖಾರಾನಂ ನಾಮಾನಿ ನಯಾನುಯೋಗೇನ ಸುವಿಞ್ಞೇಯ್ಯಾನಿ। ಪರಿಕ್ಖಾರದಾನಾನಿಸಂಸಾನಿ ಚ ಸುವಿಞ್ಞೇಯ್ಯಾನೇವಾತಿ।
3.Bahū medhigatā bhogāti anekā bhogā me mayā adhigatā pattā paṭiladdhāti attho . Satthavāsiādīnaṃ parikkhārānaṃ nāmāni nayānuyogena suviññeyyāni. Parikkhāradānānisaṃsāni ca suviññeyyānevāti.
ಪಿಲಿನ್ದವಚ್ಛತ್ಥೇರಅಪದಾನವಣ್ಣನಾ ಸಮತ್ತಾ।
Pilindavacchattheraapadānavaṇṇanā samattā.
ದುತಿಯತತಿಯಚತುತ್ಥಪಞ್ಚಮಾಪದಾನಾನಿ ಉತ್ತಾನಾನೇವಾತಿ।
Dutiyatatiyacatutthapañcamāpadānāni uttānānevāti.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಖುದ್ದಕನಿಕಾಯ • Khuddakanikāya / ಅಪದಾನಪಾಳಿ • Apadānapāḷi / ೧. ಪಿಲಿನ್ದವಚ್ಛತ್ಥೇರಅಪದಾನಂ • 1. Pilindavacchattheraapadānaṃ
