| Library / Tipiṭaka / තිපිටක • Tipiṭaka / අපදාන-අට්‌ඨකථා • Apadāna-aṭṭhakathā |
40. පිලින්‌දවච්‌ඡවග්‌ගො
40. Pilindavacchavaggo
1. පිලින්‌දවච්‌ඡත්‌ථෙරඅපදානවණ්‌ණනා
1. Pilindavacchattheraapadānavaṇṇanā
චත්‌තාලීසමවග්‌ගෙ අපදානෙ නගරෙ හංසවතියාතිආදිකං ආයස්‌මතො පිලින්‌දවච්‌ඡත්‌ථෙරස්‌ස අපදානං. අයම්‌පි පුරිමබුද්‌ධෙසු කතාධිකාරො තත්‌ථ තත්‌ථ භවෙ විවට්‌ටූපනිස්‌සයානි පුඤ්‌ඤානි උපචිනන්‌තො පදුමුත්‌තරස්‌ස භගවතො කාලෙ හංසවතීනගරෙ දොවාරිකකුලෙ නිබ්‌බත්‌තො මහද්‌ධනො මහාභොගො අහොසි. සො කොටිසන්‌නිචිතධනරාසිං ඔලොකෙත්‌වා රහො නිසින්‌නො ‘‘ඉමං සබ්‌බධනං මයා සම්‌මා ගහෙත්‌වා ගන්‌තුං වට්‌ටතී’’ති චින්‌තෙත්‌වා ‘‘බුද්‌ධප්‌පමුඛස්‌ස භික්‌ඛුසඞ්‌ඝස්‌ස සබ්‌බපරික්‌ඛාරදානං දාතුං වට්‌ටතී’’ති සන්‌නිට්‌ඨානං කත්‌වා ඡත්‌තසතසහස්‌සං ආදිං කත්‌වා සබ්‌බපරිභොගපරික්‌ඛාරානිපි සතසහස්‌සවසෙන කාරෙත්‌වා පදුමුත්‌තරං භගවන්‌තං නිමන්‌තෙත්‌වා බුද්‌ධප්‌පමුඛස්‌ස භික්‌ඛුසඞ්‌ඝස්‌ස මහාදානං අදාසි. එවං සත්‌තාහං දානං දත්‌වා පරියොසානදිවසෙ නිබ්‌බානාධිගමං පත්‌ථෙත්‌වා යාවජීවං පුඤ්‌ඤානි කත්‌වා ජීවිතපරියොසානෙ දෙවලොකෙ නිබ්‌බත්‌තො ඡ කාමාවචරෙ දිබ්‌බසම්‌පත්‌තියො අනුභවිත්‌වා මනුස්‌සෙසු ච චක්‌කවත්‌තිආදිසම්‌පත්‌තියො අනුභවිත්‌වා ඉමස්‌මිං බුද්‌ධුප්‌පාදෙ බ්‍රාහ්‌මණකුලෙ නිබ්‌බත්‌තො සබ්‌බසිප්‌පෙසු නිප්‌ඵත්‌තිං පත්‌තො ගොත්‌තවසෙන පිලින්‌දවච්‌ඡොති පාකටො අහොසි.
Cattālīsamavagge apadāne nagare haṃsavatiyātiādikaṃ āyasmato pilindavacchattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto padumuttarassa bhagavato kāle haṃsavatīnagare dovārikakule nibbatto mahaddhano mahābhogo ahosi. So koṭisannicitadhanarāsiṃ oloketvā raho nisinno ‘‘imaṃ sabbadhanaṃ mayā sammā gahetvā gantuṃ vaṭṭatī’’ti cintetvā ‘‘buddhappamukhassa bhikkhusaṅghassa sabbaparikkhāradānaṃ dātuṃ vaṭṭatī’’ti sanniṭṭhānaṃ katvā chattasatasahassaṃ ādiṃ katvā sabbaparibhogaparikkhārānipi satasahassavasena kāretvā padumuttaraṃ bhagavantaṃ nimantetvā buddhappamukhassa bhikkhusaṅghassa mahādānaṃ adāsi. Evaṃ sattāhaṃ dānaṃ datvā pariyosānadivase nibbānādhigamaṃ patthetvā yāvajīvaṃ puññāni katvā jīvitapariyosāne devaloke nibbatto cha kāmāvacare dibbasampattiyo anubhavitvā manussesu ca cakkavattiādisampattiyo anubhavitvā imasmiṃ buddhuppāde brāhmaṇakule nibbatto sabbasippesu nipphattiṃ patto gottavasena pilindavacchoti pākaṭo ahosi.
1. සො එකදිවසං සත්‌ථු සන්‌තිකෙ ධම්‌මදෙසනං සුත්‌වා පටිලද්‌ධසද්‌ධො පබ්‌බජිත්‌වා නචිරස්‌සෙව අරහා හුත්‌වා අත්‌තනො පුබ්‌බකම්‌මං සරිත්‌වා සොමනස්‌සජාතො උදානවසෙන තං පකාසෙන්‌තො නගරෙ හංසවතියාතිආදිමාහ. තස්‌සත්‌ථො හෙට්‌ඨා වුත්‌තොව. ආසිං දොවාරිකො අහන්‌ති අහං හංසවතීනගරෙ රඤ්‌ඤො ගෙහද්‌වාරෙ ද්‌වාරපාලකො ආසිං අහොසින්‌ති අත්‌ථො. අක්‌ඛොභං අමිතං භොගන්‌ති රඤ්‌ඤො වල්‌ලභත්‌තා අඤ්‌ඤෙහි ඛොභෙතුං චාලෙතුං අසක්‌කුණෙය්‍යං අමිතං අපරිමාණභොගං ධනං මම ඝරෙ සන්‌නිචිතං රාසීකතං අහොසීති අත්‌ථො.
1. So ekadivasaṃ satthu santike dhammadesanaṃ sutvā paṭiladdhasaddho pabbajitvā nacirasseva arahā hutvā attano pubbakammaṃ saritvā somanassajāto udānavasena taṃ pakāsento nagare haṃsavatiyātiādimāha. Tassattho heṭṭhā vuttova. Āsiṃ dovāriko ahanti ahaṃ haṃsavatīnagare rañño gehadvāre dvārapālako āsiṃ ahosinti attho. Akkhobhaṃ amitaṃ bhoganti rañño vallabhattā aññehi khobhetuṃ cāletuṃ asakkuṇeyyaṃ amitaṃ aparimāṇabhogaṃ dhanaṃ mama ghare sannicitaṃ rāsīkataṃ ahosīti attho.
3. බහූ මෙධිගතා භොගාති අනෙකා භොගා මෙ මයා අධිගතා පත්‌තා පටිලද්‌ධාති අත්‌ථො . සත්‌ථවාසිආදීනං පරික්‌ඛාරානං නාමානි නයානුයොගෙන සුවිඤ්‌ඤෙය්‍යානි. පරික්‌ඛාරදානානිසංසානි ච සුවිඤ්‌ඤෙය්‍යානෙවාති.
3.Bahū medhigatā bhogāti anekā bhogā me mayā adhigatā pattā paṭiladdhāti attho . Satthavāsiādīnaṃ parikkhārānaṃ nāmāni nayānuyogena suviññeyyāni. Parikkhāradānānisaṃsāni ca suviññeyyānevāti.
පිලින්‌දවච්‌ඡත්‌ථෙරඅපදානවණ්‌ණනා සමත්‌තා.
Pilindavacchattheraapadānavaṇṇanā samattā.
දුතියතතියචතුත්‌ථපඤ්‌චමාපදානානි උත්‌තානානෙවාති.
Dutiyatatiyacatutthapañcamāpadānāni uttānānevāti.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / ඛුද්‌දකනිකාය • Khuddakanikāya / අපදානපාළි • Apadānapāḷi / 1. පිලින්‌දවච්‌ඡත්‌ථෙරඅපදානං • 1. Pilindavacchattheraapadānaṃ
