| Library / Tipiṭaka / திபிடக • Tipiṭaka / சூளவக்³க³பாளி • Cūḷavaggapāḷi |
6. பிண்ட³சாரிகவத்தகதா²
6. Piṇḍacārikavattakathā
365. தேன கோ² பன ஸமயேன பிண்ட³சாரிகா பி⁴க்கூ² து³ன்னிவத்தா² து³ப்பாருதா அனாகப்பஸம்பன்னா பிண்டா³ய சரந்தி, அஸல்லக்கெ²த்வாபி நிவேஸனங் பவிஸந்தி, அஸல்லக்கெ²த்வாபி நிக்க²மந்தி, அதிஸஹஸாபி பவிஸந்தி, அதிஸஹஸாபி நிக்க²மந்தி, அதிதூ³ரேபி திட்ட²ந்தி, அச்சாஸன்னேபி திட்ட²ந்தி, அதிசிரம்பி திட்ட²ந்தி, அதிலஹும்பி நிவத்தந்தி. அஞ்ஞதரோபி பிண்ட³சாரிகோ பி⁴க்கு² அஸல்லக்கெ²த்வா நிவேஸனங் பாவிஸி. ஸோ ச த்³வாரங் மஞ்ஞமானோ அஞ்ஞதரங் ஓவரகங் பாவிஸி. தஸ்மிம்பி ஓவரகே இத்தீ² நக்³கா³ உத்தானா நிபன்னா ஹோதி. அத்³த³ஸா கோ² ஸோ பி⁴க்கு² தங் இத்தி²ங் நக்³க³ங் உத்தானங் நிபன்னங். தி³ஸ்வான – ‘‘நயித³ங் த்³வாரங், ஓவரகங் இத³’’ந்தி தம்ஹா ஓவரகா நிக்க²மி. அத்³த³ஸா கோ² தஸ்ஸா இத்தி²யா ஸாமிகோ தங் இத்தி²ங் நக்³க³ங் உத்தானங் நிபன்னங். தி³ஸ்வான – ‘‘இமினா மே பி⁴க்கு²னா பஜாபதீ தூ³ஸிதா’’தி தங் பி⁴க்கு²ங் க³ஹெத்வா ஆகோடேஸி. அத² கோ² ஸா இத்தீ² தேன ஸத்³தே³ன படிபு³ஜ்ஜி²த்வா தங் புரிஸங் ஏதத³வோச – ‘‘கிஸ்ஸ த்வங், அய்ய, இமங் பி⁴க்கு²ங் ஆகோடேஸீ’’தி? ‘‘இமினாஸி த்வங் பி⁴க்கு²னா தூ³ஸிதா’’தி? ‘‘நாஹங், அய்ய, இமினா பி⁴க்கு²னா தூ³ஸிதா; அகாரகோ ஸோ பி⁴க்கூ²’’தி தங் பி⁴க்கு²ங் முஞ்சாபேஸி. அத² கோ² ஸோ பி⁴க்கு² ஆராமங் க³ந்த்வா பி⁴க்கூ²னங் ஏதமத்த²ங் ஆரோசேஸி. யே தே பி⁴க்கூ² அப்பிச்சா²…பே॰… தே உஜ்ஜா²யந்தி கி²ய்யந்தி விபாசெந்தி – ‘‘கத²ஞ்ஹி நாம பிண்ட³சாரிகா பி⁴க்கூ² து³ன்னிவத்தா² து³ப்பாருதா அனாகப்பஸம்பன்னா பிண்டா³ய சரிஸ்ஸந்தி, அஸல்லக்கெ²த்வாபி நிவேஸனங் பவிஸிஸ்ஸந்தி, அஸல்லக்கெ²த்வாபி நிக்க²மிஸ்ஸந்தி, அதிஸஹஸாபி பவிஸிஸ்ஸந்தி, அதிஸஹஸாபி நிக்க²மிஸ்ஸந்தி, அதிதூ³ரேபி திட்டி²ஸ்ஸந்தி, அச்சாஸன்னேபி திட்டி²ஸ்ஸந்தி, அதிசிரம்பி திட்டி²ஸ்ஸந்தி, அதிலஹும்பி நிவத்திஸ்ஸந்தீ’’தி! அத² கோ² தே பி⁴க்கூ² ப⁴க³வதோ ஏதமத்த²ங் ஆரோசேஸுங்…பே॰… ஸச்சங் கிர, பி⁴க்க²வே…பே॰… ஸச்சங் ப⁴க³வாதி…பே॰… விக³ரஹித்வா…பே॰… த⁴ம்மிங் கத²ங் கத்வா பி⁴க்கூ² ஆமந்தேஸி –
365. Tena kho pana samayena piṇḍacārikā bhikkhū dunnivatthā duppārutā anākappasampannā piṇḍāya caranti, asallakkhetvāpi nivesanaṃ pavisanti, asallakkhetvāpi nikkhamanti, atisahasāpi pavisanti, atisahasāpi nikkhamanti, atidūrepi tiṭṭhanti, accāsannepi tiṭṭhanti, aticirampi tiṭṭhanti, atilahumpi nivattanti. Aññataropi piṇḍacāriko bhikkhu asallakkhetvā nivesanaṃ pāvisi. So ca dvāraṃ maññamāno aññataraṃ ovarakaṃ pāvisi. Tasmimpi ovarake itthī naggā uttānā nipannā hoti. Addasā kho so bhikkhu taṃ itthiṃ naggaṃ uttānaṃ nipannaṃ. Disvāna – ‘‘nayidaṃ dvāraṃ, ovarakaṃ ida’’nti tamhā ovarakā nikkhami. Addasā kho tassā itthiyā sāmiko taṃ itthiṃ naggaṃ uttānaṃ nipannaṃ. Disvāna – ‘‘iminā me bhikkhunā pajāpatī dūsitā’’ti taṃ bhikkhuṃ gahetvā ākoṭesi. Atha kho sā itthī tena saddena paṭibujjhitvā taṃ purisaṃ etadavoca – ‘‘kissa tvaṃ, ayya, imaṃ bhikkhuṃ ākoṭesī’’ti? ‘‘Imināsi tvaṃ bhikkhunā dūsitā’’ti? ‘‘Nāhaṃ, ayya, iminā bhikkhunā dūsitā; akārako so bhikkhū’’ti taṃ bhikkhuṃ muñcāpesi. Atha kho so bhikkhu ārāmaṃ gantvā bhikkhūnaṃ etamatthaṃ ārocesi. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma piṇḍacārikā bhikkhū dunnivatthā duppārutā anākappasampannā piṇḍāya carissanti, asallakkhetvāpi nivesanaṃ pavisissanti, asallakkhetvāpi nikkhamissanti, atisahasāpi pavisissanti, atisahasāpi nikkhamissanti, atidūrepi tiṭṭhissanti, accāsannepi tiṭṭhissanti, aticirampi tiṭṭhissanti, atilahumpi nivattissantī’’ti! Atha kho te bhikkhū bhagavato etamatthaṃ ārocesuṃ…pe… saccaṃ kira, bhikkhave…pe… saccaṃ bhagavāti…pe… vigarahitvā…pe… dhammiṃ kathaṃ katvā bhikkhū āmantesi –
366. ‘‘தேன ஹி, பி⁴க்க²வே, பிண்ட³சாரிகானங் பி⁴க்கூ²னங் வத்தங் பஞ்ஞாபெஸ்ஸாமி யதா² பிண்ட³சாரிகேஹி பி⁴க்கூ²ஹி ஸம்மா வத்திதப்³ப³ங். பிண்ட³சாரிகேன, பி⁴க்க²வே, பி⁴க்கு²னா – ‘இதா³னி கா³மங் பவிஸிஸ்ஸாமீ’தி திமண்ட³லங் படிச்சா²தெ³ந்தேன பரிமண்ட³லங் நிவாஸெத்வா காயப³ந்த⁴னங் ப³ந்தி⁴த்வா ஸகு³ணங் கத்வா ஸங்கா⁴டியோ பாருபித்வா க³ண்டி²கங் படிமுஞ்சித்வா தோ⁴வித்வா பத்தங் க³ஹெத்வா ஸாது⁴கங் அதரமானேன கா³மோ பவிஸிதப்³போ³.
366. ‘‘Tena hi, bhikkhave, piṇḍacārikānaṃ bhikkhūnaṃ vattaṃ paññāpessāmi yathā piṇḍacārikehi bhikkhūhi sammā vattitabbaṃ. Piṇḍacārikena, bhikkhave, bhikkhunā – ‘idāni gāmaṃ pavisissāmī’ti timaṇḍalaṃ paṭicchādentena parimaṇḍalaṃ nivāsetvā kāyabandhanaṃ bandhitvā saguṇaṃ katvā saṅghāṭiyo pārupitvā gaṇṭhikaṃ paṭimuñcitvā dhovitvā pattaṃ gahetvā sādhukaṃ ataramānena gāmo pavisitabbo.
‘‘ஸுப்படிச்ச²ன்னேன அந்தரக⁴ரே க³ந்தப்³ப³ங் . ஸுஸங்வுதேன அந்தரக⁴ரே க³ந்தப்³ப³ங். ஒக்கி²த்தசக்கு²னா அந்தரக⁴ரே க³ந்தப்³ப³ங். ந உக்கி²த்தகாய அந்தரக⁴ரே க³ந்தப்³ப³ங். ந உஜ்ஜக்³கி⁴காய அந்தரக⁴ரே க³ந்தப்³ப³ங். அப்பஸத்³தே³ன அந்தரக⁴ரே க³ந்தப்³ப³ங். ந காயப்பசாலகங் அந்தரக⁴ரே க³ந்தப்³ப³ங். ந பா³ஹுப்பசாலகங் அந்தரக⁴ரே க³ந்தப்³ப³ங். ந ஸீஸப்பசாலகங் அந்தரக⁴ரே க³ந்தப்³ப³ங். ந க²ம்ப⁴கதேன அந்தரக⁴ரே க³ந்தப்³ப³ங். ந ஓகு³ண்டி²தேன அந்தரக⁴ரே க³ந்தப்³ப³ங். ந உக்குடிகாய அந்தரக⁴ரே க³ந்தப்³ப³ங்.
‘‘Suppaṭicchannena antaraghare gantabbaṃ . Susaṃvutena antaraghare gantabbaṃ. Okkhittacakkhunā antaraghare gantabbaṃ. Na ukkhittakāya antaraghare gantabbaṃ. Na ujjagghikāya antaraghare gantabbaṃ. Appasaddena antaraghare gantabbaṃ. Na kāyappacālakaṃ antaraghare gantabbaṃ. Na bāhuppacālakaṃ antaraghare gantabbaṃ. Na sīsappacālakaṃ antaraghare gantabbaṃ. Na khambhakatena antaraghare gantabbaṃ. Na oguṇṭhitena antaraghare gantabbaṃ. Na ukkuṭikāya antaraghare gantabbaṃ.
‘‘நிவேஸனங் பவிஸந்தேன ஸல்லக்கே²தப்³ப³ங் – ‘இமினா பவிஸிஸ்ஸாமி, இமினா நிக்க²மிஸ்ஸாமீ’தி. நாதிஸஹஸா பவிஸிதப்³ப³ங். நாதிஸஹஸா நிக்க²மிதப்³ப³ங். நாதிதூ³ரே டா²தப்³ப³ங். நாச்சாஸன்னே டா²தப்³ப³ங். நாதிசிரங் டா²தப்³ப³ங். நாதிலஹுங் நிவத்திதப்³ப³ங். டி²தகேன ஸல்லக்கே²தப்³ப³ங் – ‘பி⁴க்க²ங் தா³துகாமா வா அதா³துகாமா வா’தி. ஸசே கம்மங் வா நிக்கி²பதி, ஆஸனா வா வுட்டா²தி, கடச்சு²ங் வா பராமஸதி, பா⁴ஜனங் வா பராமஸதி, ட²பேதி 1 வா – தா³துகாமஸ்ஸாதி 2 டா²தப்³ப³ங். பி⁴க்கா²ய தி³ய்யமானாய வாமேன ஹத்தே²ன ஸங்கா⁴டிங் உச்சாரெத்வா த³க்கி²ணேன ஹத்தே²ன பத்தங் பணாமெத்வா உபோ⁴ஹி ஹத்தே²ஹி பத்தங் படிக்³க³ஹெத்வா பி⁴க்கா² படிக்³க³ஹேதப்³பா³. ந ச பி⁴க்கா²தா³யிகாய முக²ங் உல்லோகேதப்³ப³ங் 3. ஸல்லக்கே²தப்³ப³ங் – ‘ஸூபங் தா³துகாமா வா அதா³துகாமா வா’தி. ஸசே கடச்சு²ங் வா பராமஸதி, பா⁴ஜனங் வா பராமஸதி, ட²பேதி வா – தா³துகாமஸ்ஸாதி டா²தப்³ப³ங். பி⁴க்கா²ய தி³ன்னாய ஸங்கா⁴டியா பத்தங் படிச்சா²தெ³த்வா ஸாது⁴கங் அதரமானேன நிவத்திதப்³ப³ங்.
‘‘Nivesanaṃ pavisantena sallakkhetabbaṃ – ‘iminā pavisissāmi, iminā nikkhamissāmī’ti. Nātisahasā pavisitabbaṃ. Nātisahasā nikkhamitabbaṃ. Nātidūre ṭhātabbaṃ. Nāccāsanne ṭhātabbaṃ. Nāticiraṃ ṭhātabbaṃ. Nātilahuṃ nivattitabbaṃ. Ṭhitakena sallakkhetabbaṃ – ‘bhikkhaṃ dātukāmā vā adātukāmā vā’ti. Sace kammaṃ vā nikkhipati, āsanā vā vuṭṭhāti, kaṭacchuṃ vā parāmasati, bhājanaṃ vā parāmasati, ṭhapeti 4 vā – dātukāmassāti 5 ṭhātabbaṃ. Bhikkhāya diyyamānāya vāmena hatthena saṅghāṭiṃ uccāretvā dakkhiṇena hatthena pattaṃ paṇāmetvā ubhohi hatthehi pattaṃ paṭiggahetvā bhikkhā paṭiggahetabbā. Na ca bhikkhādāyikāya mukhaṃ ulloketabbaṃ 6. Sallakkhetabbaṃ – ‘sūpaṃ dātukāmā vā adātukāmā vā’ti. Sace kaṭacchuṃ vā parāmasati, bhājanaṃ vā parāmasati, ṭhapeti vā – dātukāmassāti ṭhātabbaṃ. Bhikkhāya dinnāya saṅghāṭiyā pattaṃ paṭicchādetvā sādhukaṃ ataramānena nivattitabbaṃ.
‘‘ஸுப்படிச்ச²ன்னேன அந்தரக⁴ரே க³ந்தப்³ப³ங். ஸுஸங்வுதேன அந்தரக⁴ரே க³ந்தப்³ப³ங். ஒக்கி²த்தசக்கு²னா அந்தரக⁴ரே க³ந்தப்³ப³ங். ந உக்கி²த்தகாய அந்தரக⁴ரே க³ந்தப்³ப³ங். ந உஜ்ஜக்³கி⁴காய அந்தரக⁴ரே க³ந்தப்³ப³ங். அப்பஸத்³தே³ன அந்தரக⁴ரே க³ந்தப்³ப³ங். ந காயப்பசாலகங் அந்தரக⁴ரே க³ந்தப்³ப³ங். ந பா³ஹுப்பசாலகங் அந்தரக⁴ரே க³ந்தப்³ப³ங். ந ஸீஸப்பசாலகங் அந்தரக⁴ரே க³ந்தப்³ப³ங். ந க²ம்ப⁴கதேன அந்தரக⁴ரே க³ந்தப்³ப³ங். ந ஓகு³ண்டி²தேன அந்தரக⁴ரே க³ந்தப்³ப³ங். ந உக்குடிகாய அந்தரக⁴ரே க³ந்தப்³ப³ங். யோ பட²மங் கா³மதோ பிண்டா³ய படிக்கமதி, தேன ஆஸனங் பஞ்ஞபேதப்³ப³ங், பாதோ³த³கங் பாத³பீட²ங் பாத³கத²லிகங் உபனிக்கி²பிதப்³ப³ங், அவக்காரபாதி தோ⁴வித்வா உபட்டா²பேதப்³பா³, பானீயங் பரிபோ⁴ஜனீயங் உபட்டா²பேதப்³ப³ங். யோ பச்சா² கா³மதோ பிண்டா³ய படிக்கமதி, ஸசே ஹோதி பு⁴த்தாவஸேஸோ, ஸசே ஆகங்க²தி, பு⁴ஞ்ஜிதப்³ப³ங் . நோ சே ஆகங்க²தி, அப்பஹரிதே வா ச²ட்³டே³தப்³ப³ங், அப்பாணகே வா உத³கே ஓபிலாபேதப்³ப³ங். தேன ஆஸனங் உத்³த⁴ரிதப்³ப³ங், பாதோ³த³கங் பாத³பீட²ங் பாத³கத²லிகங் படிஸாமேதப்³ப³ங், அவக்காரபாதி தோ⁴வித்வா படிஸாமேதப்³பா³, பானீயங் பரிபோ⁴ஜனீயங் படிஸாமேதப்³ப³ங் , ப⁴த்தக்³க³ங் ஸம்மஜ்ஜிதப்³ப³ங். யோ பஸ்ஸதி பானீயக⁴டங் வா பரிபோ⁴ஜனீயக⁴டங் வா வச்சக⁴டங் வா ரித்தங் துச்ச²ங் தேன உபட்டா²பேதப்³ப³ங். ஸசஸ்ஸ ஹோதி அவிஸய்ஹங், ஹத்த²விகாரேன து³தியங் ஆமந்தெத்வா ஹத்த²விலங்க⁴கேன உபட்டா²பேதப்³ப³ங், ந ச தப்பச்சயா வாசா பி⁴ந்தி³தப்³பா³. இத³ங் கோ², பி⁴க்க²வே, பிண்ட³சாரிகானங் பி⁴க்கூ²னங் வத்தங் யதா² பிண்ட³சாரிகேஹி பி⁴க்கூ²ஹி ஸம்மா வத்திதப்³ப³’’ந்தி.
‘‘Suppaṭicchannena antaraghare gantabbaṃ. Susaṃvutena antaraghare gantabbaṃ. Okkhittacakkhunā antaraghare gantabbaṃ. Na ukkhittakāya antaraghare gantabbaṃ. Na ujjagghikāya antaraghare gantabbaṃ. Appasaddena antaraghare gantabbaṃ. Na kāyappacālakaṃ antaraghare gantabbaṃ. Na bāhuppacālakaṃ antaraghare gantabbaṃ. Na sīsappacālakaṃ antaraghare gantabbaṃ. Na khambhakatena antaraghare gantabbaṃ. Na oguṇṭhitena antaraghare gantabbaṃ. Na ukkuṭikāya antaraghare gantabbaṃ. Yo paṭhamaṃ gāmato piṇḍāya paṭikkamati, tena āsanaṃ paññapetabbaṃ, pādodakaṃ pādapīṭhaṃ pādakathalikaṃ upanikkhipitabbaṃ, avakkārapāti dhovitvā upaṭṭhāpetabbā, pānīyaṃ paribhojanīyaṃ upaṭṭhāpetabbaṃ. Yo pacchā gāmato piṇḍāya paṭikkamati, sace hoti bhuttāvaseso, sace ākaṅkhati, bhuñjitabbaṃ . No ce ākaṅkhati, appaharite vā chaḍḍetabbaṃ, appāṇake vā udake opilāpetabbaṃ. Tena āsanaṃ uddharitabbaṃ, pādodakaṃ pādapīṭhaṃ pādakathalikaṃ paṭisāmetabbaṃ, avakkārapāti dhovitvā paṭisāmetabbā, pānīyaṃ paribhojanīyaṃ paṭisāmetabbaṃ , bhattaggaṃ sammajjitabbaṃ. Yo passati pānīyaghaṭaṃ vā paribhojanīyaghaṭaṃ vā vaccaghaṭaṃ vā rittaṃ tucchaṃ tena upaṭṭhāpetabbaṃ. Sacassa hoti avisayhaṃ, hatthavikārena dutiyaṃ āmantetvā hatthavilaṅghakena upaṭṭhāpetabbaṃ, na ca tappaccayā vācā bhinditabbā. Idaṃ kho, bhikkhave, piṇḍacārikānaṃ bhikkhūnaṃ vattaṃ yathā piṇḍacārikehi bhikkhūhi sammā vattitabba’’nti.
Footnotes:
Related texts:
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / சூளவக்³க³-அட்ட²கதா² • Cūḷavagga-aṭṭhakathā / பிண்ட³சாரிகவத்தகதா² • Piṇḍacārikavattakathā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / பிண்ட³சாரிகவத்தகதா²வண்ணனா • Piṇḍacārikavattakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / பிண்ட³சாரிகவத்தகதா²தி³வண்ணனா • Piṇḍacārikavattakathādivaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 6. பிண்ட³சாரிகவத்தகதா² • 6. Piṇḍacārikavattakathā
