| Library / Tipiṭaka / ཏིཔིཊཀ • Tipiṭaka / ཙཱུལ༹ཝགྒཔཱལི༹ • Cūḷavaggapāḷi |
༦. པིཎྜཙཱརིཀཝཏྟཀཐཱ
6. Piṇḍacārikavattakathā
༣༦༥. ཏེན ཁོ པན སམཡེན པིཎྜཙཱརིཀཱ བྷིཀྑཱུ དུནྣིཝཏྠཱ དུཔྤཱརུཏཱ ཨནཱཀཔྤསམྤནྣཱ པིཎྜཱཡ ཙརནྟི, ཨསལླཀྑེཏྭཱཔི ནིཝེསནཾ པཝིསནྟི, ཨསལླཀྑེཏྭཱཔི ནིཀྑམནྟི, ཨཏིསཧསཱཔི པཝིསནྟི, ཨཏིསཧསཱཔི ནིཀྑམནྟི, ཨཏིདཱུརེཔི ཏིཊྛནྟི, ཨཙྩཱསནྣེཔི ཏིཊྛནྟི, ཨཏིཙིརམྤི ཏིཊྛནྟི, ཨཏིལཧུམྤི ནིཝཏྟནྟི། ཨཉྙཏརོཔི པིཎྜཙཱརིཀོ བྷིཀྑུ ཨསལླཀྑེཏྭཱ ནིཝེསནཾ པཱཝིསི། སོ ཙ དྭཱརཾ མཉྙམཱནོ ཨཉྙཏརཾ ཨོཝརཀཾ པཱཝིསི། ཏསྨིམྤི ཨོཝརཀེ ཨིཏྠཱི ནགྒཱ ཨུཏྟཱནཱ ནིཔནྣཱ ཧོཏི། ཨདྡསཱ ཁོ སོ བྷིཀྑུ ཏཾ ཨིཏྠིཾ ནགྒཾ ཨུཏྟཱནཾ ནིཔནྣཾ། དིསྭཱན – ‘‘ནཡིདཾ དྭཱརཾ, ཨོཝརཀཾ ཨིད’’ནྟི ཏམྷཱ ཨོཝརཀཱ ནིཀྑམི། ཨདྡསཱ ཁོ ཏསྶཱ ཨིཏྠིཡཱ སཱམིཀོ ཏཾ ཨིཏྠིཾ ནགྒཾ ཨུཏྟཱནཾ ནིཔནྣཾ། དིསྭཱན – ‘‘ཨིམིནཱ མེ བྷིཀྑུནཱ པཛཱཔཏཱི དཱུསིཏཱ’’ཏི ཏཾ བྷིཀྑུཾ གཧེཏྭཱ ཨཱཀོཊེསི། ཨཐ ཁོ སཱ ཨིཏྠཱི ཏེན སདྡེན པཊིབུཛ྄ཛྷིཏྭཱ ཏཾ པུརིསཾ ཨེཏདཝོཙ – ‘‘ཀིསྶ ཏྭཾ, ཨཡྻ, ཨིམཾ བྷིཀྑུཾ ཨཱཀོཊེསཱི’’ཏི? ‘‘ཨིམིནཱསི ཏྭཾ བྷིཀྑུནཱ དཱུསིཏཱ’’ཏི? ‘‘ནཱཧཾ, ཨཡྻ, ཨིམིནཱ བྷིཀྑུནཱ དཱུསིཏཱ; ཨཀཱརཀོ སོ བྷིཀྑཱུ’’ཏི ཏཾ བྷིཀྑུཾ མུཉྩཱཔེསི། ཨཐ ཁོ སོ བྷིཀྑུ ཨཱརཱམཾ གནྟྭཱ བྷིཀྑཱུནཾ ཨེཏམཏྠཾ ཨཱརོཙེསི། ཡེ ཏེ བྷིཀྑཱུ ཨཔྤིཙྪཱ…པེ॰… ཏེ ཨུཛ྄ཛྷཱཡནྟི ཁིཡྻནྟི ཝིཔཱཙེནྟི – ‘‘ཀཐཉྷི ནཱམ པིཎྜཙཱརིཀཱ བྷིཀྑཱུ དུནྣིཝཏྠཱ དུཔྤཱརུཏཱ ཨནཱཀཔྤསམྤནྣཱ པིཎྜཱཡ ཙརིསྶནྟི, ཨསལླཀྑེཏྭཱཔི ནིཝེསནཾ པཝིསིསྶནྟི, ཨསལླཀྑེཏྭཱཔི ནིཀྑམིསྶནྟི, ཨཏིསཧསཱཔི པཝིསིསྶནྟི, ཨཏིསཧསཱཔི ནིཀྑམིསྶནྟི, ཨཏིདཱུརེཔི ཏིཊྛིསྶནྟི, ཨཙྩཱསནྣེཔི ཏིཊྛིསྶནྟི, ཨཏིཙིརམྤི ཏིཊྛིསྶནྟི, ཨཏིལཧུམྤི ནིཝཏྟིསྶནྟཱི’’ཏི! ཨཐ ཁོ ཏེ བྷིཀྑཱུ བྷགཝཏོ ཨེཏམཏྠཾ ཨཱརོཙེསུཾ…པེ॰… སཙྩཾ ཀིར, བྷིཀྑཝེ…པེ॰… སཙྩཾ བྷགཝཱཏི…པེ॰… ཝིགརཧིཏྭཱ…པེ॰… དྷམྨིཾ ཀཐཾ ཀཏྭཱ བྷིཀྑཱུ ཨཱམནྟེསི –
365. Tena kho pana samayena piṇḍacārikā bhikkhū dunnivatthā duppārutā anākappasampannā piṇḍāya caranti, asallakkhetvāpi nivesanaṃ pavisanti, asallakkhetvāpi nikkhamanti, atisahasāpi pavisanti, atisahasāpi nikkhamanti, atidūrepi tiṭṭhanti, accāsannepi tiṭṭhanti, aticirampi tiṭṭhanti, atilahumpi nivattanti. Aññataropi piṇḍacāriko bhikkhu asallakkhetvā nivesanaṃ pāvisi. So ca dvāraṃ maññamāno aññataraṃ ovarakaṃ pāvisi. Tasmimpi ovarake itthī naggā uttānā nipannā hoti. Addasā kho so bhikkhu taṃ itthiṃ naggaṃ uttānaṃ nipannaṃ. Disvāna – ‘‘nayidaṃ dvāraṃ, ovarakaṃ ida’’nti tamhā ovarakā nikkhami. Addasā kho tassā itthiyā sāmiko taṃ itthiṃ naggaṃ uttānaṃ nipannaṃ. Disvāna – ‘‘iminā me bhikkhunā pajāpatī dūsitā’’ti taṃ bhikkhuṃ gahetvā ākoṭesi. Atha kho sā itthī tena saddena paṭibujjhitvā taṃ purisaṃ etadavoca – ‘‘kissa tvaṃ, ayya, imaṃ bhikkhuṃ ākoṭesī’’ti? ‘‘Imināsi tvaṃ bhikkhunā dūsitā’’ti? ‘‘Nāhaṃ, ayya, iminā bhikkhunā dūsitā; akārako so bhikkhū’’ti taṃ bhikkhuṃ muñcāpesi. Atha kho so bhikkhu ārāmaṃ gantvā bhikkhūnaṃ etamatthaṃ ārocesi. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma piṇḍacārikā bhikkhū dunnivatthā duppārutā anākappasampannā piṇḍāya carissanti, asallakkhetvāpi nivesanaṃ pavisissanti, asallakkhetvāpi nikkhamissanti, atisahasāpi pavisissanti, atisahasāpi nikkhamissanti, atidūrepi tiṭṭhissanti, accāsannepi tiṭṭhissanti, aticirampi tiṭṭhissanti, atilahumpi nivattissantī’’ti! Atha kho te bhikkhū bhagavato etamatthaṃ ārocesuṃ…pe… saccaṃ kira, bhikkhave…pe… saccaṃ bhagavāti…pe… vigarahitvā…pe… dhammiṃ kathaṃ katvā bhikkhū āmantesi –
༣༦༦. ‘‘ཏེན ཧི, བྷིཀྑཝེ, པིཎྜཙཱརིཀཱནཾ བྷིཀྑཱུནཾ ཝཏྟཾ པཉྙཱཔེསྶཱམི ཡཐཱ པིཎྜཙཱརིཀེཧི བྷིཀྑཱུཧི སམྨཱ ཝཏྟིཏབྦཾ། པིཎྜཙཱརིཀེན, བྷིཀྑཝེ, བྷིཀྑུནཱ – ‘ཨིདཱནི གཱམཾ པཝིསིསྶཱམཱི’ཏི ཏིམཎྜལཾ པཊིཙྪཱདེནྟེན པརིམཎྜལཾ ནིཝཱསེཏྭཱ ཀཱཡབནྡྷནཾ བནྡྷིཏྭཱ སགུཎཾ ཀཏྭཱ སངྒྷཱཊིཡོ པཱརུཔིཏྭཱ གཎྛིཀཾ པཊིམུཉྩིཏྭཱ དྷོཝིཏྭཱ པཏྟཾ གཧེཏྭཱ སཱདྷུཀཾ ཨཏརམཱནེན གཱམོ པཝིསིཏབྦོ།
366. ‘‘Tena hi, bhikkhave, piṇḍacārikānaṃ bhikkhūnaṃ vattaṃ paññāpessāmi yathā piṇḍacārikehi bhikkhūhi sammā vattitabbaṃ. Piṇḍacārikena, bhikkhave, bhikkhunā – ‘idāni gāmaṃ pavisissāmī’ti timaṇḍalaṃ paṭicchādentena parimaṇḍalaṃ nivāsetvā kāyabandhanaṃ bandhitvā saguṇaṃ katvā saṅghāṭiyo pārupitvā gaṇṭhikaṃ paṭimuñcitvā dhovitvā pattaṃ gahetvā sādhukaṃ ataramānena gāmo pavisitabbo.
‘‘སུཔྤཊིཙྪནྣེན ཨནྟརགྷརེ གནྟབྦཾ ། སུསཾཝུཏེན ཨནྟརགྷརེ གནྟབྦཾ། ཨོཀྑིཏྟཙཀྑུནཱ ཨནྟརགྷརེ གནྟབྦཾ། ན ཨུཀྑིཏྟཀཱཡ ཨནྟརགྷརེ གནྟབྦཾ། ན ཨུཛྫགྒྷིཀཱཡ ཨནྟརགྷརེ གནྟབྦཾ། ཨཔྤསདྡེན ཨནྟརགྷརེ གནྟབྦཾ། ན ཀཱཡཔྤཙཱལཀཾ ཨནྟརགྷརེ གནྟབྦཾ། ན བཱཧུཔྤཙཱལཀཾ ཨནྟརགྷརེ གནྟབྦཾ། ན སཱིསཔྤཙཱལཀཾ ཨནྟརགྷརེ གནྟབྦཾ། ན ཁམྦྷཀཏེན ཨནྟརགྷརེ གནྟབྦཾ། ན ཨོགུཎྛིཏེན ཨནྟརགྷརེ གནྟབྦཾ། ན ཨུཀྐུཊིཀཱཡ ཨནྟརགྷརེ གནྟབྦཾ།
‘‘Suppaṭicchannena antaraghare gantabbaṃ . Susaṃvutena antaraghare gantabbaṃ. Okkhittacakkhunā antaraghare gantabbaṃ. Na ukkhittakāya antaraghare gantabbaṃ. Na ujjagghikāya antaraghare gantabbaṃ. Appasaddena antaraghare gantabbaṃ. Na kāyappacālakaṃ antaraghare gantabbaṃ. Na bāhuppacālakaṃ antaraghare gantabbaṃ. Na sīsappacālakaṃ antaraghare gantabbaṃ. Na khambhakatena antaraghare gantabbaṃ. Na oguṇṭhitena antaraghare gantabbaṃ. Na ukkuṭikāya antaraghare gantabbaṃ.
‘‘ནིཝེསནཾ པཝིསནྟེན སལླཀྑེཏབྦཾ – ‘ཨིམིནཱ པཝིསིསྶཱམི, ཨིམིནཱ ནིཀྑམིསྶཱམཱི’ཏི། ནཱཏིསཧསཱ པཝིསིཏབྦཾ། ནཱཏིསཧསཱ ནིཀྑམིཏབྦཾ། ནཱཏིདཱུརེ ཋཱཏབྦཾ། ནཱཙྩཱསནྣེ ཋཱཏབྦཾ། ནཱཏིཙིརཾ ཋཱཏབྦཾ། ནཱཏིལཧུཾ ནིཝཏྟིཏབྦཾ། ཋིཏཀེན སལླཀྑེཏབྦཾ – ‘བྷིཀྑཾ དཱཏུཀཱམཱ ཝཱ ཨདཱཏུཀཱམཱ ཝཱ’ཏི། སཙེ ཀམྨཾ ཝཱ ནིཀྑིཔཏི, ཨཱསནཱ ཝཱ ཝུཊྛཱཏི, ཀཊཙྪུཾ ཝཱ པརཱམསཏི, བྷཱཛནཾ ཝཱ པརཱམསཏི, ཋཔེཏི 1 ཝཱ – དཱཏུཀཱམསྶཱཏི 2 ཋཱཏབྦཾ། བྷིཀྑཱཡ དིཡྻམཱནཱཡ ཝཱམེན ཧཏྠེན སངྒྷཱཊིཾ ཨུཙྩཱརེཏྭཱ དཀྑིཎེན ཧཏྠེན པཏྟཾ པཎཱམེཏྭཱ ཨུབྷོཧི ཧཏྠེཧི པཏྟཾ པཊིགྒཧེཏྭཱ བྷིཀྑཱ པཊིགྒཧེཏབྦཱ། ན ཙ བྷིཀྑཱདཱཡིཀཱཡ མུཁཾ ཨུལློཀེཏབྦཾ 3། སལླཀྑེཏབྦཾ – ‘སཱུཔཾ དཱཏུཀཱམཱ ཝཱ ཨདཱཏུཀཱམཱ ཝཱ’ཏི། སཙེ ཀཊཙྪུཾ ཝཱ པརཱམསཏི, བྷཱཛནཾ ཝཱ པརཱམསཏི, ཋཔེཏི ཝཱ – དཱཏུཀཱམསྶཱཏི ཋཱཏབྦཾ། བྷིཀྑཱཡ དིནྣཱཡ སངྒྷཱཊིཡཱ པཏྟཾ པཊིཙྪཱདེཏྭཱ སཱདྷུཀཾ ཨཏརམཱནེན ནིཝཏྟིཏབྦཾ།
‘‘Nivesanaṃ pavisantena sallakkhetabbaṃ – ‘iminā pavisissāmi, iminā nikkhamissāmī’ti. Nātisahasā pavisitabbaṃ. Nātisahasā nikkhamitabbaṃ. Nātidūre ṭhātabbaṃ. Nāccāsanne ṭhātabbaṃ. Nāticiraṃ ṭhātabbaṃ. Nātilahuṃ nivattitabbaṃ. Ṭhitakena sallakkhetabbaṃ – ‘bhikkhaṃ dātukāmā vā adātukāmā vā’ti. Sace kammaṃ vā nikkhipati, āsanā vā vuṭṭhāti, kaṭacchuṃ vā parāmasati, bhājanaṃ vā parāmasati, ṭhapeti 4 vā – dātukāmassāti 5 ṭhātabbaṃ. Bhikkhāya diyyamānāya vāmena hatthena saṅghāṭiṃ uccāretvā dakkhiṇena hatthena pattaṃ paṇāmetvā ubhohi hatthehi pattaṃ paṭiggahetvā bhikkhā paṭiggahetabbā. Na ca bhikkhādāyikāya mukhaṃ ulloketabbaṃ 6. Sallakkhetabbaṃ – ‘sūpaṃ dātukāmā vā adātukāmā vā’ti. Sace kaṭacchuṃ vā parāmasati, bhājanaṃ vā parāmasati, ṭhapeti vā – dātukāmassāti ṭhātabbaṃ. Bhikkhāya dinnāya saṅghāṭiyā pattaṃ paṭicchādetvā sādhukaṃ ataramānena nivattitabbaṃ.
‘‘སུཔྤཊིཙྪནྣེན ཨནྟརགྷརེ གནྟབྦཾ། སུསཾཝུཏེན ཨནྟརགྷརེ གནྟབྦཾ། ཨོཀྑིཏྟཙཀྑུནཱ ཨནྟརགྷརེ གནྟབྦཾ། ན ཨུཀྑིཏྟཀཱཡ ཨནྟརགྷརེ གནྟབྦཾ། ན ཨུཛྫགྒྷིཀཱཡ ཨནྟརགྷརེ གནྟབྦཾ། ཨཔྤསདྡེན ཨནྟརགྷརེ གནྟབྦཾ། ན ཀཱཡཔྤཙཱལཀཾ ཨནྟརགྷརེ གནྟབྦཾ། ན བཱཧུཔྤཙཱལཀཾ ཨནྟརགྷརེ གནྟབྦཾ། ན སཱིསཔྤཙཱལཀཾ ཨནྟརགྷརེ གནྟབྦཾ། ན ཁམྦྷཀཏེན ཨནྟརགྷརེ གནྟབྦཾ། ན ཨོགུཎྛིཏེན ཨནྟརགྷརེ གནྟབྦཾ། ན ཨུཀྐུཊིཀཱཡ ཨནྟརགྷརེ གནྟབྦཾ། ཡོ པཋམཾ གཱམཏོ པིཎྜཱཡ པཊིཀྐམཏི, ཏེན ཨཱསནཾ པཉྙཔེཏབྦཾ, པཱདོདཀཾ པཱདཔཱིཋཾ པཱདཀཐལིཀཾ ཨུཔནིཀྑིཔིཏབྦཾ, ཨཝཀྐཱརཔཱཏི དྷོཝིཏྭཱ ཨུཔཊྛཱཔེཏབྦཱ, པཱནཱིཡཾ པརིབྷོཛནཱིཡཾ ཨུཔཊྛཱཔེཏབྦཾ། ཡོ པཙྪཱ གཱམཏོ པིཎྜཱཡ པཊིཀྐམཏི, སཙེ ཧོཏི བྷུཏྟཱཝསེསོ, སཙེ ཨཱཀངྑཏི, བྷུཉྫིཏབྦཾ ། ནོ ཙེ ཨཱཀངྑཏི, ཨཔྤཧརིཏེ ཝཱ ཚཌྜེཏབྦཾ, ཨཔྤཱཎཀེ ཝཱ ཨུདཀེ ཨོཔིལཱཔེཏབྦཾ། ཏེན ཨཱསནཾ ཨུདྡྷརིཏབྦཾ, པཱདོདཀཾ པཱདཔཱིཋཾ པཱདཀཐལིཀཾ པཊིསཱམེཏབྦཾ, ཨཝཀྐཱརཔཱཏི དྷོཝིཏྭཱ པཊིསཱམེཏབྦཱ, པཱནཱིཡཾ པརིབྷོཛནཱིཡཾ པཊིསཱམེཏབྦཾ , བྷཏྟགྒཾ སམྨཛྫིཏབྦཾ། ཡོ པསྶཏི པཱནཱིཡགྷཊཾ ཝཱ པརིབྷོཛནཱིཡགྷཊཾ ཝཱ ཝཙྩགྷཊཾ ཝཱ རིཏྟཾ ཏུཙྪཾ ཏེན ཨུཔཊྛཱཔེཏབྦཾ། སཙསྶ ཧོཏི ཨཝིསཡ྄ཧཾ, ཧཏྠཝིཀཱརེན དུཏིཡཾ ཨཱམནྟེཏྭཱ ཧཏྠཝིལངྒྷཀེན ཨུཔཊྛཱཔེཏབྦཾ, ན ཙ ཏཔྤཙྩཡཱ ཝཱཙཱ བྷིནྡིཏབྦཱ། ཨིདཾ ཁོ, བྷིཀྑཝེ, པིཎྜཙཱརིཀཱནཾ བྷིཀྑཱུནཾ ཝཏྟཾ ཡཐཱ པིཎྜཙཱརིཀེཧི བྷིཀྑཱུཧི སམྨཱ ཝཏྟིཏབྦ’’ནྟི།
‘‘Suppaṭicchannena antaraghare gantabbaṃ. Susaṃvutena antaraghare gantabbaṃ. Okkhittacakkhunā antaraghare gantabbaṃ. Na ukkhittakāya antaraghare gantabbaṃ. Na ujjagghikāya antaraghare gantabbaṃ. Appasaddena antaraghare gantabbaṃ. Na kāyappacālakaṃ antaraghare gantabbaṃ. Na bāhuppacālakaṃ antaraghare gantabbaṃ. Na sīsappacālakaṃ antaraghare gantabbaṃ. Na khambhakatena antaraghare gantabbaṃ. Na oguṇṭhitena antaraghare gantabbaṃ. Na ukkuṭikāya antaraghare gantabbaṃ. Yo paṭhamaṃ gāmato piṇḍāya paṭikkamati, tena āsanaṃ paññapetabbaṃ, pādodakaṃ pādapīṭhaṃ pādakathalikaṃ upanikkhipitabbaṃ, avakkārapāti dhovitvā upaṭṭhāpetabbā, pānīyaṃ paribhojanīyaṃ upaṭṭhāpetabbaṃ. Yo pacchā gāmato piṇḍāya paṭikkamati, sace hoti bhuttāvaseso, sace ākaṅkhati, bhuñjitabbaṃ . No ce ākaṅkhati, appaharite vā chaḍḍetabbaṃ, appāṇake vā udake opilāpetabbaṃ. Tena āsanaṃ uddharitabbaṃ, pādodakaṃ pādapīṭhaṃ pādakathalikaṃ paṭisāmetabbaṃ, avakkārapāti dhovitvā paṭisāmetabbā, pānīyaṃ paribhojanīyaṃ paṭisāmetabbaṃ , bhattaggaṃ sammajjitabbaṃ. Yo passati pānīyaghaṭaṃ vā paribhojanīyaghaṭaṃ vā vaccaghaṭaṃ vā rittaṃ tucchaṃ tena upaṭṭhāpetabbaṃ. Sacassa hoti avisayhaṃ, hatthavikārena dutiyaṃ āmantetvā hatthavilaṅghakena upaṭṭhāpetabbaṃ, na ca tappaccayā vācā bhinditabbā. Idaṃ kho, bhikkhave, piṇḍacārikānaṃ bhikkhūnaṃ vattaṃ yathā piṇḍacārikehi bhikkhūhi sammā vattitabba’’nti.
Footnotes:
Related texts:
ཨཊྛཀཐཱ • Aṭṭhakathā / ཝིནཡཔིཊཀ (ཨཊྛཀཐཱ) • Vinayapiṭaka (aṭṭhakathā) / ཙཱུལ༹ཝགྒ-ཨཊྛཀཐཱ • Cūḷavagga-aṭṭhakathā / པིཎྜཙཱརིཀཝཏྟཀཐཱ • Piṇḍacārikavattakathā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / སཱརཏྠདཱིཔནཱི-ཊཱིཀཱ • Sāratthadīpanī-ṭīkā / པིཎྜཙཱརིཀཝཏྟཀཐཱཝཎྞནཱ • Piṇḍacārikavattakathāvaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝིམཏིཝིནོདནཱི-ཊཱིཀཱ • Vimativinodanī-ṭīkā / པིཎྜཙཱརིཀཝཏྟཀཐཱདིཝཎྞནཱ • Piṇḍacārikavattakathādivaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / པཱཙིཏྱཱདིཡོཛནཱཔཱལི༹ • Pācityādiyojanāpāḷi / ༦. པིཎྜཙཱརིཀཝཏྟཀཐཱ • 6. Piṇḍacārikavattakathā
