| Library / Tipiṭaka / ཏིཔིཊཀ • Tipiṭaka / མིལིནྡཔཉྷཔཱལི༹ • Milindapañhapāḷi |
༦. པིཎྜཔཱཏམཧཔྥལཔཉྷོ
6. Piṇḍapātamahapphalapañho
༦. ‘‘བྷནྟེ ནཱགསེན, བྷཱསིཏམྤེཏཾ དྷམྨསངྒཱིཏིཀཱརཀེཧི ཐེརེཧི –
6. ‘‘Bhante nāgasena, bhāsitampetaṃ dhammasaṅgītikārakehi therehi –
‘‘‘ཙུནྡསྶ བྷཏྟཾ བྷུཉྫིཏྭཱ, ཀམྨཱརསྶཱཏི མེ སུཏཾ།
‘‘‘Cundassa bhattaṃ bhuñjitvā, kammārassāti me sutaṃ;
‘‘པུན ཙ བྷགཝཏཱ བྷཎིཏཾ ‘དྭེམེ, ཨཱནནྡ, པིཎྜཔཱཏཱ སམསམཕལཱ སམཝིཔཱཀཱ ཨཏིཝིཡ ཨཉྙེཧི པིཎྜཔཱཏེཧི མཧཔྥལཏརཱ ཙ མཧཱནིསཾསཏརཱ ཙ། ཀཏམེ དྭེ? ཡཉྩ པིཎྜཔཱཏཾ པརིབྷུཉྫིཏྭཱ ཏཐཱགཏོ ཨནུཏྟརཾ སམྨཱསམྦོདྷིཾ ཨབྷིསམྦུཛ྄ཛྷི, ཡཉྩ པིཎྜཔཱཏཾ པརིབྷུཉྫིཏྭཱ ཏཐཱགཏོ ཨནུཔཱདིསེསཱཡ ནིབྦཱནདྷཱཏུཡཱ པརིནིབྦཱཡཏི། ཨིམེ དྭེ པིཎྜཔཱཏཱ སམསམཕལཱ སམཝིཔཱཀཱ, ཨཏིཝིཡ ཨཉྙེཧི པིཎྜཔཱཏེཧི མཧཔྥལཏརཱ ཙ མཧཱནིསཾསཏརཱ ཙཱ’ཏི། ཡདི, བྷནྟེ ནཱགསེན, བྷགཝཏོ ཙུནྡསྶ བྷཏྟཾ བྷུཏྟཱཝིསྶ 3 ཁརོ ཨཱབཱདྷོ ཨུཔྤནྣོ, པབཱལ༹ྷཱ ཙ ཝེདནཱ པཝཏྟཱ མཱརཎནྟིཀཱ, ཏེན ཧི ‘དྭེམེ, ཨཱནནྡ, པིཎྜཔཱཏཱ སམསམཕལཱ སམཝིཔཱཀཱ ཨཏིཝིཡ ཨཉྙེཧི པིཎྜཔཱཏེཧི མཧཔྥལཏརཱ ཙ མཧཱནིསཾསཏརཱ ཙཱ’ཏི ཡཾ ཝཙནཾ, ཏཾ མིཙྪཱ། ཡདི དྭེམེ པིཎྜཔཱཏཱ སམསམཕལཱ སམཝིཔཱཀཱ ཨཏིཝིཡ ཨཉྙེཧི པིཎྜཔཱཏེཧི མཧཔྥལཏརཱ ཙ མཧཱནིསཾསཏརཱ ཙ, ཏེན ཧི བྷགཝཏོ ཙུནྡསྶ བྷཏྟཾ བྷུཏྟཱཝིསྶ 4 ཁརོ ཨཱབཱདྷོ ཨུཔྤནྣོ, པབཱལ༹ྷཱ ཙ ཝེདནཱ པཝཏྟཱ མཱརཎནྟིཀཱཏི ཏམྤི ཝཙནཾ མིཙྪཱ། ཀིཾནུ ཁོ, བྷནྟེ ནཱགསེན, སོ པིཎྜཔཱཏོ ཝིསགཏཏཱཡ མཧཔྥལོ, རོགུཔྤཱདཀཏཱཡ མཧཔྥལོ , ཨཱཡུཝིནཱསཀཏཱཡ མཧཔྥལོ, བྷགཝཏོ ཛཱིཝིཏཧརཎཏཱཡ མཧཔྥལོ? ཏཏྠ མེ ཀཱརཎཾ བྲཱུཧི པརཝཱདཱནཾ ནིགྒཧཱཡ, ཨེཏྠཱཡཾ ཛནོ སམྨཱུལ༹ྷོ ལོབྷཝསེན ཨཏིབཧུཾ ཁཱཡིཏེན ལོཧིཏཔཀྑནྡིཀཱ ཨུཔྤནྣཱཏི། ཨཡམྤི ཨུབྷཏོ ཀོཊིཀོ པཉྷོ ཏཝཱནུཔྤཏྟོ, སོ ཏཡཱ ནིབྦཱཧིཏབྦོ’’ཏི།
‘‘Puna ca bhagavatā bhaṇitaṃ ‘dveme, ānanda, piṇḍapātā samasamaphalā samavipākā ativiya aññehi piṇḍapātehi mahapphalatarā ca mahānisaṃsatarā ca. Katame dve? Yañca piṇḍapātaṃ paribhuñjitvā tathāgato anuttaraṃ sammāsambodhiṃ abhisambujjhi, yañca piṇḍapātaṃ paribhuñjitvā tathāgato anupādisesāya nibbānadhātuyā parinibbāyati. Ime dve piṇḍapātā samasamaphalā samavipākā, ativiya aññehi piṇḍapātehi mahapphalatarā ca mahānisaṃsatarā cā’ti. Yadi, bhante nāgasena, bhagavato cundassa bhattaṃ bhuttāvissa 5 kharo ābādho uppanno, pabāḷhā ca vedanā pavattā māraṇantikā, tena hi ‘dveme, ānanda, piṇḍapātā samasamaphalā samavipākā ativiya aññehi piṇḍapātehi mahapphalatarā ca mahānisaṃsatarā cā’ti yaṃ vacanaṃ, taṃ micchā. Yadi dveme piṇḍapātā samasamaphalā samavipākā ativiya aññehi piṇḍapātehi mahapphalatarā ca mahānisaṃsatarā ca, tena hi bhagavato cundassa bhattaṃ bhuttāvissa 6 kharo ābādho uppanno, pabāḷhā ca vedanā pavattā māraṇantikāti tampi vacanaṃ micchā. Kiṃnu kho, bhante nāgasena, so piṇḍapāto visagatatāya mahapphalo, roguppādakatāya mahapphalo , āyuvināsakatāya mahapphalo, bhagavato jīvitaharaṇatāya mahapphalo? Tattha me kāraṇaṃ brūhi paravādānaṃ niggahāya, etthāyaṃ jano sammūḷho lobhavasena atibahuṃ khāyitena lohitapakkhandikā uppannāti. Ayampi ubhato koṭiko pañho tavānuppatto, so tayā nibbāhitabbo’’ti.
‘‘བྷཱསིཏམྤེཏཾ, མཧཱརཱཛ, དྷམྨསངྒཱིཏིཀཱརཀེཧི ཐེརེཧི –
‘‘Bhāsitampetaṃ, mahārāja, dhammasaṅgītikārakehi therehi –
‘‘‘ཙུནྡསྶ བྷཏྟཾ བྷུཉྫིཏྭཱ, ཀམྨཱརསྶཱཏི མེ སུཏཾ།
‘‘‘Cundassa bhattaṃ bhuñjitvā, kammārassāti me sutaṃ;
ཨཱབཱདྷཾ སམྥུསཱི དྷཱིརོ, པབཱལ༹ྷཾ མཱརཎནྟིཀ’ནྟི༎
Ābādhaṃ samphusī dhīro, pabāḷhaṃ māraṇantika’nti.
‘‘བྷགཝཏཱ ཙ བྷཎིཏཾ ‘དྭེམེ, ཨཱནནྡ, པིཎྜཔཱཏཱ སམསམཕལཱ སམཝིཔཱཀཱ ཨཏིཝིཡ ཨཉྙེཧི པིཎྜཔཱཏེཧི མཧཔྥལཏརཱ ཙ མཧཱནིསཾསཏརཱ ཙ། ཀཏམེ དྭེ? ཡཉྩ པིཎྜཔཱཏཾ པརིབྷུཉྫིཏྭཱ ཏཐཱགཏོ ཨནུཏྟརཾ སམྨཱསམྦོདྷིཾ ཨབྷིསམྦུཛ྄ཛྷི, ཡཉྩ པིཎྜཔཱཏཾ པརིབྷུཉྫིཏྭཱ ཏཐཱགཏོ ཨནུཔཱདིསེསཱཡ ནིབྦཱནདྷཱཏུཡཱ པརིནིབྦཱཡཏི 7, ཨིམེ དྭེ པིཎྜཔཱཏཱ སམསམཕལཱ སམཝིཔཱཀཱ, ཨཏིཝིཡ ཨཉྙེཧི པིཎྜཔཱཏེཧི མཧཔྥལཏརཱ ཙ མཧཱནིསཾསཏརཱ ཙཱ’ཏི།
‘‘Bhagavatā ca bhaṇitaṃ ‘dveme, ānanda, piṇḍapātā samasamaphalā samavipākā ativiya aññehi piṇḍapātehi mahapphalatarā ca mahānisaṃsatarā ca. Katame dve? Yañca piṇḍapātaṃ paribhuñjitvā tathāgato anuttaraṃ sammāsambodhiṃ abhisambujjhi, yañca piṇḍapātaṃ paribhuñjitvā tathāgato anupādisesāya nibbānadhātuyā parinibbāyati 8, ime dve piṇḍapātā samasamaphalā samavipākā, ativiya aññehi piṇḍapātehi mahapphalatarā ca mahānisaṃsatarā cā’ti.
‘‘སོ པན པིཎྜཔཱཏོ བཧུགུཎོ ཨནེཀཱནིསཾསོ། དེཝཏཱ, མཧཱརཱཛ, ཧཊྛཱ པསནྣམཱནསཱ ‘ཨཡཾ བྷགཝཏོ པཙྪིམོ པིཎྜཔཱཏོ’ཏི དིབྦཾ ཨོཛཾ སཱུཀརམདྡཝེ ཨཱཀིརིཾསུ། ཏཉྩ པན སམྨཱཔཱཀཾ ལཧུཔཱཀཾ 9 མནུཉྙཾ བཧུརསཾ ཛཊྛརགྒིཏེཛསྶ ཧིཏཾ། ན, མཧཱརཱཛ, ཏཏོནིདཱནཾ བྷགཝཏོ ཀོཙི ཨནུཔྤནྣོ རོགོ ཨུཔྤནྣོ, ཨཔི ཙ, མཧཱརཱཛ, བྷགཝཏོ པཀཏིདུབྦལེ སརཱིརེ ཁཱིཎེ ཨཱཡུསངྑཱརེ ཨུཔྤནྣོ རོགོ བྷིཡྻོ ཨབྷིཝཌྜྷི།
‘‘So pana piṇḍapāto bahuguṇo anekānisaṃso. Devatā, mahārāja, haṭṭhā pasannamānasā ‘ayaṃ bhagavato pacchimo piṇḍapāto’ti dibbaṃ ojaṃ sūkaramaddave ākiriṃsu. Tañca pana sammāpākaṃ lahupākaṃ 10 manuññaṃ bahurasaṃ jaṭṭharaggitejassa hitaṃ. Na, mahārāja, tatonidānaṃ bhagavato koci anuppanno rogo uppanno, api ca, mahārāja, bhagavato pakatidubbale sarīre khīṇe āyusaṅkhāre uppanno rogo bhiyyo abhivaḍḍhi.
‘‘ཡཐཱ, མཧཱརཱཛ, པཀཏིཡཱ ཛལམཱནོ ཨགྒི ཨཉྙསྨིཾ ཨུཔཱདཱནེ དིནྣེ བྷིཡྻོ པཛྫལཏི, ཨེཝམེཝ ཁོ, མཧཱརཱཛ, བྷགཝཏོ པཀཏིདུབྦལེ སརཱིརེ ཁཱིཎེ ཨཱཡུསངྑཱརེ ཨུཔྤནྣོ རོགོ བྷིཡྻོ ཨབྷིཝཌྜྷི།
‘‘Yathā, mahārāja, pakatiyā jalamāno aggi aññasmiṃ upādāne dinne bhiyyo pajjalati, evameva kho, mahārāja, bhagavato pakatidubbale sarīre khīṇe āyusaṅkhāre uppanno rogo bhiyyo abhivaḍḍhi.
‘‘ཡཐཱ ཝཱ པན, མཧཱརཱཛ, སོཏོ པཀཏིཡཱ སནྡམཱནོ ཨབྷིཝུཊྛེ མཧཱམེགྷེ བྷིཡྻོ མཧོགྷོ ཨུདཀཝཱཧཀོ ཧོཏི, ཨེཝམེཝ ཁོ, མཧཱརཱཛ, བྷགཝཏོ པཀཏིདུབྦལེ སརཱིརེ ཁཱིཎེ ཨཱཡུསངྑཱརེ ཨུཔྤནྣོ རོགོ བྷིཡྻོ ཨབྷིཝཌྜྷི།
‘‘Yathā vā pana, mahārāja, soto pakatiyā sandamāno abhivuṭṭhe mahāmeghe bhiyyo mahogho udakavāhako hoti, evameva kho, mahārāja, bhagavato pakatidubbale sarīre khīṇe āyusaṅkhāre uppanno rogo bhiyyo abhivaḍḍhi.
‘‘ཡཐཱ ཝཱ པན, མཧཱརཱཛ, པཀཏིཡཱ ཨབྷིསནྣདྷཱཏུ ཀུཙྪི ཨཉྙསྨིཾ ཨཛ྄ཛྷོཧརིཏེ བྷིཡྻོ ཨཱཡམེཡྻ 11, ཨེཝམེཝ ཁོ, མཧཱརཱཛ, བྷགཝཏོ པཀཏིདུབྦལེ སརཱིརེ ཁཱིཎེ ཨཱཡུསངྑཱརེ ཨུཔྤནྣོ རོགོ བྷིཡྻོ ཨབྷིཝཌྜྷི, ནཏྠི, མཧཱརཱཛ, ཏསྨིཾ པིཎྜཔཱཏེ དོསོ, ན ཙ ཏསྶ སཀྐཱ དོསཾ ཨཱརོཔེཏུ’’ནྟི།
‘‘Yathā vā pana, mahārāja, pakatiyā abhisannadhātu kucchi aññasmiṃ ajjhoharite bhiyyo āyameyya 12, evameva kho, mahārāja, bhagavato pakatidubbale sarīre khīṇe āyusaṅkhāre uppanno rogo bhiyyo abhivaḍḍhi, natthi, mahārāja, tasmiṃ piṇḍapāte doso, na ca tassa sakkā dosaṃ āropetu’’nti.
‘‘བྷནྟེ ནཱགསེན, ཀེན ཀཱརཎེན ཏེ དྭེ པིཎྜཔཱཏཱ སམསམཕལཱ སམཝིཔཱཀཱ ཨཏིཝིཡ ཨཉྙེཧི པིཎྜཔཱཏེཧི མཧཔྥལཏརཱ ཙ མཧཱནིསཾསཏརཱ ཙཱ’’ཏི? ‘‘དྷམྨཱནུམཛྫནསམཱཔཏྟིཝསེན, མཧཱརཱཛ, ཏེ དྭེ པིཎྜཔཱཏཱ སམསམཕལཱ སམཝིཔཱཀཱ ཨཏིཝིཡ ཨཉྙེཧི པིཎྜཔཱཏེཧི མཧཔྥལཏརཱ ཙ མཧཱནིསཾསཏརཱ ཙཱ’’ཏི།
‘‘Bhante nāgasena, kena kāraṇena te dve piṇḍapātā samasamaphalā samavipākā ativiya aññehi piṇḍapātehi mahapphalatarā ca mahānisaṃsatarā cā’’ti? ‘‘Dhammānumajjanasamāpattivasena, mahārāja, te dve piṇḍapātā samasamaphalā samavipākā ativiya aññehi piṇḍapātehi mahapphalatarā ca mahānisaṃsatarā cā’’ti.
‘‘བྷནྟེ ནཱགསེན, ཀཏམེསཾ དྷམྨཱནཾ ཨནུམཛྫནསམཱཔཏྟིཝསེན ཏེ དྭེ པིཎྜཔཱཏཱ སམསམཕལཱ སམཝིཔཱཀཱ ཨཏིཝིཡ ཨཉྙེཧི པིཎྜཔཱཏེཧི མཧཔྥལཏརཱ ཙ མཧཱནིསཾསཏརཱ ཙཱ’’ཏི? ‘‘ནཝནྣཾ, མཧཱརཱཛ, ཨནུཔུབྦཝིཧཱརསམཱཔཏྟཱིནཾ ཨནུལོམཔྤཊིལོམསམཱཔཛྫནཝསེན ཏེ དྭེ པིཎྜཔཱཏཱ སམསམཕལཱ སམཝིཔཱཀཱ ཨཏིཝིཡ ཨཉྙེཧི པིཎྜཔཱཏེཧི མཧཔྥལཏརཱ ཙ མཧཱནིསཾསཏརཱ ཙཱ’’ཏི།
‘‘Bhante nāgasena, katamesaṃ dhammānaṃ anumajjanasamāpattivasena te dve piṇḍapātā samasamaphalā samavipākā ativiya aññehi piṇḍapātehi mahapphalatarā ca mahānisaṃsatarā cā’’ti? ‘‘Navannaṃ, mahārāja, anupubbavihārasamāpattīnaṃ anulomappaṭilomasamāpajjanavasena te dve piṇḍapātā samasamaphalā samavipākā ativiya aññehi piṇḍapātehi mahapphalatarā ca mahānisaṃsatarā cā’’ti.
‘‘བྷནྟེ ནཱགསེན, དྭཱིསུ ཡེཝ དིཝསེསུ ཨདྷིམཏྟཾ ཏཐཱགཏོ ནཝཱནུཔུབྦཝིཧཱརསམཱཔཏྟིཡོ ཨནུལོམཔྤཊིལོམཾ སམཱཔཛྫཱི’’ཏི? ‘‘ཨཱམ, མཧཱརཱཛཱ’’ཏི། ‘‘ཨཙྪརིཡཾ, བྷནྟེ ནཱགསེན, ཨབྦྷུཏཾ བྷནྟེ ནཱགསེན། ཡཾ ཨིམསྨིཾ བུདྡྷཀྑེཏྟེ ཨསདིསཾ པརམདཱནཾ, ཏམྤི ཨིམེཧི དྭཱིཧི པིཎྜཔཱཏེཧི ཨགཎིཏཾ། ཨཙྪརིཡཾ, བྷནྟེ ནཱགསེན, ཨབྦྷུཏཾ, བྷནྟེ ནཱགསེན། ཡཱཝ མཧནྟཱ ནཝཱནུཔུབྦཝིཧཱརསམཱཔཏྟིཡོ, ཡཏྲ ཧི ནཱམ ནཝཱནུཔུབྦཝིཧཱརསམཱཔཏྟིཝསེན དཱནཾ མཧཔྥལཏརཾ ཧོཏི མཧཱནིསཾསཏརཉྩ། སཱདྷུ, བྷནྟེ ནཱགསེན, ཨེཝམེཏཾ ཏཐཱ སམྤཊིཙྪཱམཱི’’ཏི།
‘‘Bhante nāgasena, dvīsu yeva divasesu adhimattaṃ tathāgato navānupubbavihārasamāpattiyo anulomappaṭilomaṃ samāpajjī’’ti? ‘‘Āma, mahārājā’’ti. ‘‘Acchariyaṃ, bhante nāgasena, abbhutaṃ bhante nāgasena. Yaṃ imasmiṃ buddhakkhette asadisaṃ paramadānaṃ, tampi imehi dvīhi piṇḍapātehi agaṇitaṃ. Acchariyaṃ, bhante nāgasena, abbhutaṃ, bhante nāgasena. Yāva mahantā navānupubbavihārasamāpattiyo, yatra hi nāma navānupubbavihārasamāpattivasena dānaṃ mahapphalataraṃ hoti mahānisaṃsatarañca. Sādhu, bhante nāgasena, evametaṃ tathā sampaṭicchāmī’’ti.
པིཎྜཔཱཏམཧཔྥལཔཉྷོ ཚཊྛོ།
Piṇḍapātamahapphalapañho chaṭṭho.
Footnotes:
