| Library / Tipiṭaka / திபிடக • Tipiṭaka / மஜ்ஜி²மனிகாய (டீகா) • Majjhimanikāya (ṭīkā) |
9. பிண்ட³பாதபாரிஸுத்³தி⁴ஸுத்தவண்ணனா
9. Piṇḍapātapārisuddhisuttavaṇṇanā
438. த⁴ம்மஸேனாபதினோ படிஸல்லீயனஸ்ஸ அதி⁴ப்பேதத்தா, உபரி ச பாளியங், ‘‘ஸுஞ்ஞதாவிஹாரேன கோ² அஹங், ப⁴ந்தே, ஏதரஹி ப³ஹுலங் விஹராமீ’’தி (ம॰ நி॰ 3.438) வுத்தத்தா ‘‘படிஸல்லானாதி ப²லஸமாபத்திதோ’’தி ஆஹ.
438. Dhammasenāpatino paṭisallīyanassa adhippetattā, upari ca pāḷiyaṃ, ‘‘suññatāvihārena kho ahaṃ, bhante, etarahi bahulaṃ viharāmī’’ti (ma. ni. 3.438) vuttattā ‘‘paṭisallānāti phalasamāpattito’’ti āha.
விப்பஸன்னானீதி விஸேஸதோ பஸன்னானி. ஓகாஸவஸேனாதி இந்த்³ரியானங் பதிட்டி²தோகாஸவஸேன. நனு தானி இந்த்³ரியானி ஸபா⁴வதோ விப்பஸன்னானி ஹொந்தீதி? ஸச்சங் ஹொந்தி. ந ஹித³ங் தாதி³ஸங் பஸன்னதங் ஸந்தா⁴ய வுத்தங், இத³ங் பன ஸந்தபணீதஸமாபத்திஸமுட்டி²தானங் பச்சுபட்டி²தானங் சித்தஜரூபானங் வஸேன ஸேஸதிஸந்ததிரூபானங் ஸெட்ட²தரங் பணீதபா⁴வாபத்திங் ஸந்தா⁴ய வுத்தங். ப²லஸமாபத்திதோதி ஸுஞ்ஞதானுபஸ்ஸனாவஸேன ஸமாபன்னப²லஸமாபத்திதோ. மஹந்தானங் பு³த்³தா⁴தீ³னங் புரிஸானங் விஹாரோ மஹாபுரிஸவிஹாரோ. தேனாஹ – ‘‘பு³த்³த⁴…பே॰… விஹாரோ’’தி. விஹாரதோ பட்டா²யாதி பரிக்கி²த்தே ச விஹாரே பரிக்கே²பதோ பட்டா²ய, அபரிக்கி²த்தே ச பரிக்கே²பாரஹட்டா²னதோ பட்டா²ய. கேசி பன ‘‘விஹாரப்³ப⁴ந்தரதோ பட்டா²யா’’தி வத³ந்தி. யாவ கா³மஸ்ஸ இந்த³கீ²லாதி கா³மஸ்ஸ அப்³ப⁴ந்தரிந்த³கீ²லோ. கே³ஹபடிபாடியாசரித்வாதி பிண்டா³ய சரித்வா. யாவ நக³ரத்³வாரேன நிக்க²மனாதி நக³ரத்³வாரேன யாவ நிக்க²மனபதே³ஸா. யாவ விஹாராதி யாவ விஹாரப்³ப⁴ந்தரா. படிக்கந்தமக்³கோ³தி நிவத்தனமக்³கோ³. ஆரம்மணே படிஹஞ்ஞனாகாரேன பவத்தமானம்பி படிக⁴ஸம்பயுத்தங் சித்தே படிஹனந்தங் விய பவத்ததீதி ஆஹ – ‘‘சித்தே படிஹஞ்ஞனகிலேஸஜாத’’ந்தி. தி³வஸஞ்ச ரத்திஞ்ச அனுஸிக்க²ந்தேனாதி ஏதங்யேவ ராகா³தி³ப்பஹாயினிங் ஸம்மாபடிபத்திங் தி³வா ச ரத்திஞ்ச அனு அனு ஸிக்க²ந்தேன உபரூபரி வட்³டெ⁴ந்தேன.
Vippasannānīti visesato pasannāni. Okāsavasenāti indriyānaṃ patiṭṭhitokāsavasena. Nanu tāni indriyāni sabhāvato vippasannāni hontīti? Saccaṃ honti. Na hidaṃ tādisaṃ pasannataṃ sandhāya vuttaṃ, idaṃ pana santapaṇītasamāpattisamuṭṭhitānaṃ paccupaṭṭhitānaṃ cittajarūpānaṃ vasena sesatisantatirūpānaṃ seṭṭhataraṃ paṇītabhāvāpattiṃ sandhāya vuttaṃ. Phalasamāpattitoti suññatānupassanāvasena samāpannaphalasamāpattito. Mahantānaṃ buddhādīnaṃ purisānaṃ vihāro mahāpurisavihāro. Tenāha – ‘‘buddha…pe… vihāro’’ti. Vihārato paṭṭhāyāti parikkhitte ca vihāre parikkhepato paṭṭhāya, aparikkhitte ca parikkhepārahaṭṭhānato paṭṭhāya. Keci pana ‘‘vihārabbhantarato paṭṭhāyā’’ti vadanti. Yāva gāmassa indakhīlāti gāmassa abbhantarindakhīlo. Gehapaṭipāṭiyācaritvāti piṇḍāya caritvā. Yāva nagaradvārena nikkhamanāti nagaradvārena yāva nikkhamanapadesā. Yāva vihārāti yāva vihārabbhantarā. Paṭikkantamaggoti nivattanamaggo. Ārammaṇe paṭihaññanākārena pavattamānampi paṭighasampayuttaṃ citte paṭihanantaṃ viya pavattatīti āha – ‘‘citte paṭihaññanakilesajāta’’nti. Divasañca rattiñca anusikkhantenāti etaṃyeva rāgādippahāyiniṃ sammāpaṭipattiṃ divā ca rattiñca anu anu sikkhantena uparūpari vaḍḍhentena.
440. பஹீனா நு கோ² மே பஞ்ச காமகு³ணாதி எத்த² காமகு³ணப்பஹானங் நாம தப்படிப³த்³த⁴ச²ந்த³ராக³ப்பஹானங். ததா² ஹி வுத்தங் – ‘‘திட்ட²ந்தி சித்ரானி ததே²வ லோகே, அதெ²த்த² தீ⁴ரா வினயந்தி ச²ந்த³’’ந்தி. ஏகபி⁴க்கு²ஸ்ஸ பச்சவெக்க²ணா நானாதி ஏகஸ்ஸேவ பி⁴க்கு²னோ, ‘‘பஹீனா நு கோ² மே பஞ்ச காமகு³ணா’’திஆதி³னா பாளியங் ஆக³தா நானாபச்சவெக்க²ணா ஹொந்தி. நானாபி⁴க்கூ²னந்தி விஸுங் விஸுங் அனேகேஸங் பி⁴க்கூ²னங். பச்சவெக்க²ணா நானாதி வுத்தனானாபச்சவெக்க²ணா. இதா³னி தமேவ ஸங்கே²பதோ வுத்தமத்த²ங் வித்தா²ரதோ த³ஸ்ஸேதுங், ‘‘கத²’’ந்திஆதி³ வுத்தங். தத்த² ‘‘பச்சவெக்க²தீ’’தி வுத்தங், கத²ங் பன பச்சவெக்க²தீதி ஆஹ ‘‘பஹீனா நு கோ²’’திஆதி³. வீரியங் பக்³க³ய்ஹாதி சதுப்³பி³த⁴ஸம்மப்பதா⁴னவீரியங் ஆரபி⁴த்வா விபஸ்ஸனங் வட்³டி⁴த்வா. மக்³கா³னந்தரங் அனாகா³மிப²லங் பத்வாதி வசனஸேஸோ. ப²லானந்தரங் மக்³க³ந்தி தஸ்மிங் அனாகா³மிமக்³கே³ டி²தோ ப²லஸமாபத்திதோ வுட்டா²ய அக்³க³மக்³க³த்தா²ய விபஸ்ஸனங் ஆரபி⁴த்வா தஸ்மிங்யேவ ஆஸனே ந சிரேனேவ விபஸ்ஸனங் உஸ்ஸுக்காபெத்வா அரஹத்தமக்³க³ங் க³ண்ஹந்தோ நிரோத⁴த⁴ம்மானுப்பத்தியா விபஸ்ஸனாபரிவாஸாபா⁴வதோ ப²லானந்தரங் மக்³க³ப்பத்தோ நாம ஹோதீதி கத்வா.
440.Pahīnā nu kho me pañca kāmaguṇāti ettha kāmaguṇappahānaṃ nāma tappaṭibaddhachandarāgappahānaṃ. Tathā hi vuttaṃ – ‘‘tiṭṭhanti citrāni tatheva loke, athettha dhīrā vinayanti chanda’’nti. Ekabhikkhussa paccavekkhaṇā nānāti ekasseva bhikkhuno, ‘‘pahīnā nu kho me pañca kāmaguṇā’’tiādinā pāḷiyaṃ āgatā nānāpaccavekkhaṇā honti. Nānābhikkhūnanti visuṃ visuṃ anekesaṃ bhikkhūnaṃ. Paccavekkhaṇā nānāti vuttanānāpaccavekkhaṇā. Idāni tameva saṅkhepato vuttamatthaṃ vitthārato dassetuṃ, ‘‘katha’’ntiādi vuttaṃ. Tattha ‘‘paccavekkhatī’’ti vuttaṃ, kathaṃ pana paccavekkhatīti āha ‘‘pahīnā nu kho’’tiādi. Vīriyaṃ paggayhāti catubbidhasammappadhānavīriyaṃ ārabhitvā vipassanaṃ vaḍḍhitvā. Maggānantaraṃ anāgāmiphalaṃ patvāti vacanaseso. Phalānantaraṃ magganti tasmiṃ anāgāmimagge ṭhito phalasamāpattito vuṭṭhāya aggamaggatthāya vipassanaṃ ārabhitvā tasmiṃyeva āsane na cireneva vipassanaṃ ussukkāpetvā arahattamaggaṃ gaṇhanto nirodhadhammānuppattiyā vipassanāparivāsābhāvato phalānantaraṃ maggappatto nāma hotīti katvā.
ததோ வுட்டா²யாதி மக்³கா³னந்தரப²லதோ வுட்டா²ய. மக்³கா³னந்தரதோ ஹி வுட்டி²தோ மக்³க³தோ வுட்டி²தோ விய ஹோதீதி ததா² வுத்தங். ‘‘ப²லானந்தரங் மக்³க³’’ந்தி எத்த² ப²லங் அனந்தரங் ஏதஸ்ஸாதி ப²லானந்தரங். ‘‘ப²லானந்தரங் மக்³க³’’ந்தி பத³த்³வயேனபி அனாகா³மிமக்³க³ப²லானி சேவ வத³தீதி ஏவமெத்த² அத்தோ² த³ட்ட²ப்³போ³. நீவரணாதீ³ஸுபி ஏஸேவ நயோதி எத்த², ‘‘பஹீனா நு கோ² மே பஞ்ச நீவரணா’’திஆதி³னா யோஜனா வேதி³தப்³பா³. ஏதேஸந்தி எத்த² ஏதேஸங் நீவரணபஞ்சுபாதா³னக்க²ந்த⁴ஸதிபட்டா²னாதீ³னங். பஹானாதீ³னீதி பஹானபரிஞ்ஞாபா⁴வனாஸச்சி²கிரியா. நானாபச்சவெக்க²ணா ஹோதீதி தா பச்சவெக்க²ணா நானாதி அதி⁴ப்பாயோ. ஏதாஸு பன பச்சவெக்க²ணாஸூதி ஏதாஸு காமகு³ணபச்சவெக்க²ணாதீ³ஸு த்³வாத³ஸஸு பச்சவெக்க²ணாஸு. ஏகங் பச்சவெக்க²ணங் பச்சவெக்க²தி த்³வாத³ஸஸு நயேஸு ஏகேனேவ கிச்சஸித்³தி⁴தோ. அஞ்ஞோ பி⁴க்கு². ஏகந்தி அஞ்ஞங் பச்சவெக்க²தி. அஞ்ஞத்தோ² ஹி அயங் ஏகஸத்³தோ³ ‘‘இத்தே²கே’’திஆதீ³ஸு (ம॰ நி॰ 3.21, 27) வியாதி. நானாபி⁴க்கூ²னங் பன ஏகா பச்சவெக்க²ணா, நானாபி⁴க்கூ²னங் நானாபச்சவெக்க²ணாதி ஏவங் சதுக்கபச்சவெக்க²ணம்பி எத்த² ஸம்ப⁴வதி. இமஸ்ஸ பன த்³வயஸ்ஸ வஸேன அபி⁴ஸமயோ நத்தீ²தி தது³ப⁴யங் அட்ட²கதா²யங் ந உத்³த⁴டங். ஸேஸங் ஸுவிஞ்ஞெய்யமேவ.
Tato vuṭṭhāyāti maggānantaraphalato vuṭṭhāya. Maggānantarato hi vuṭṭhito maggato vuṭṭhito viya hotīti tathā vuttaṃ. ‘‘Phalānantaraṃ magga’’nti ettha phalaṃ anantaraṃ etassāti phalānantaraṃ. ‘‘Phalānantaraṃ magga’’nti padadvayenapi anāgāmimaggaphalāni ceva vadatīti evamettha attho daṭṭhabbo. Nīvaraṇādīsupi eseva nayoti ettha, ‘‘pahīnā nu kho me pañca nīvaraṇā’’tiādinā yojanā veditabbā. Etesanti ettha etesaṃ nīvaraṇapañcupādānakkhandhasatipaṭṭhānādīnaṃ. Pahānādīnīti pahānapariññābhāvanāsacchikiriyā. Nānāpaccavekkhaṇā hotīti tā paccavekkhaṇā nānāti adhippāyo. Etāsu pana paccavekkhaṇāsūti etāsu kāmaguṇapaccavekkhaṇādīsu dvādasasu paccavekkhaṇāsu. Ekaṃ paccavekkhaṇaṃ paccavekkhati dvādasasu nayesu ekeneva kiccasiddhito. Añño bhikkhu. Ekanti aññaṃ paccavekkhati. Aññattho hi ayaṃ ekasaddo ‘‘ittheke’’tiādīsu (ma. ni. 3.21, 27) viyāti. Nānābhikkhūnaṃ pana ekā paccavekkhaṇā, nānābhikkhūnaṃ nānāpaccavekkhaṇāti evaṃ catukkapaccavekkhaṇampi ettha sambhavati. Imassa pana dvayassa vasena abhisamayo natthīti tadubhayaṃ aṭṭhakathāyaṃ na uddhaṭaṃ. Sesaṃ suviññeyyameva.
பிண்ட³பாதபாரிஸுத்³தி⁴ஸுத்தவண்ணனாய லீனத்த²ப்பகாஸனா ஸமத்தா.
Piṇḍapātapārisuddhisuttavaṇṇanāya līnatthappakāsanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / மஜ்ஜி²மனிகாய • Majjhimanikāya / 9. பிண்ட³பாதபாரிஸுத்³தி⁴ஸுத்தங் • 9. Piṇḍapātapārisuddhisuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / மஜ்ஜி²மனிகாய (அட்ட²கதா²) • Majjhimanikāya (aṭṭhakathā) / 9. பிண்ட³பாதபாரிஸுத்³தி⁴ஸுத்தவண்ணனா • 9. Piṇḍapātapārisuddhisuttavaṇṇanā
