| Library / Tipiṭaka / ತಿಪಿಟಕ • Tipiṭaka / ಮಜ್ಝಿಮನಿಕಾಯ (ಅಟ್ಠಕಥಾ) • Majjhimanikāya (aṭṭhakathā) |
೯. ಪಿಣ್ಡಪಾತಪಾರಿಸುದ್ಧಿಸುತ್ತವಣ್ಣನಾ
9. Piṇḍapātapārisuddhisuttavaṇṇanā
೪೩೮. ಏವಂ ಮೇ ಸುತನ್ತಿ ಪಿಣ್ಡಪಾತಪಾರಿಸುದ್ಧಿಸುತ್ತಂ। ತತ್ಥ ಪಟಿಸಲ್ಲಾನಾತಿ ಫಲಸಮಾಪತ್ತಿತೋ।
438.Evaṃme sutanti piṇḍapātapārisuddhisuttaṃ. Tattha paṭisallānāti phalasamāpattito.
ವಿಪ್ಪಸನ್ನಾನೀತಿ ಓಕಾಸವಸೇನೇತಂ ವುತ್ತಂ। ಫಲಸಮಾಪತ್ತಿತೋ ಹಿ ವುಟ್ಠಿತಸ್ಸ ಪಞ್ಚಹಿ ಪಸಾದೇಹಿ ಪತಿಟ್ಠಿತೋಕಾಸೋ ವಿಪ್ಪಸನ್ನೋ ಹೋತಿ, ಛವಿವಣ್ಣೋ ಪರಿಸುದ್ಧೋ। ತಸ್ಮಾ ಏವಮಾಹ। ಸುಞ್ಞತವಿಹಾರೇನಾತಿ ಸುಞ್ಞತಫಲಸಮಾಪತ್ತಿವಿಹಾರೇನ। ಮಹಾಪುರಿಸವಿಹಾರೋತಿ ಬುದ್ಧಪಚ್ಚೇಕಬುದ್ಧತಥಾಗತಮಹಾಸಾವಕಾನಂ ಮಹಾಪುರಿಸಾನಂ ವಿಹಾರೋ। ಯೇನ ಚಾಹಂ ಮಗ್ಗೇನಾತಿಆದೀಸು ವಿಹಾರತೋ ಪಟ್ಠಾಯ ಯಾವ ಗಾಮಸ್ಸ ಇನ್ದಖೀಲಾ ಏಸ ಪವಿಟ್ಠಮಗ್ಗೋ ನಾಮ, ಅನ್ತೋಗಾಮಂ ಪವಿಸಿತ್ವಾ ಗೇಹಪಟಿಪಾಟಿಯಾ ಚರಿತ್ವಾ ಯಾವ ನಗರದ್ವಾರೇನ ನಿಕ್ಖಮನಾ ಏಸ ಚರಿತಬ್ಬಪದೇಸೋ ನಾಮ, ಬಹಿ ಇನ್ದಖೀಲತೋ ಪಟ್ಠಾಯ ಯಾವ ವಿಹಾರಾ ಏಸ ಪಟಿಕ್ಕನ್ತಮಗ್ಗೋ ನಾಮ। ಪಟಿಘಂ ವಾಪಿ ಚೇತಸೋತಿ ಚಿತ್ತೇ ಪಟಿಹಞ್ಞನಕಿಲೇಸಜಾತಂ ಕಿಞ್ಚಿ ಅತ್ಥಿ ನತ್ಥೀತಿ। ಅಹೋರತ್ತಾನುಸಿಕ್ಖಿನಾತಿ ದಿವಸಞ್ಚ ರತ್ತಿಞ್ಚ ಅನುಸಿಕ್ಖನ್ತೇನ।
Vippasannānīti okāsavasenetaṃ vuttaṃ. Phalasamāpattito hi vuṭṭhitassa pañcahi pasādehi patiṭṭhitokāso vippasanno hoti, chavivaṇṇo parisuddho. Tasmā evamāha. Suññatavihārenāti suññataphalasamāpattivihārena. Mahāpurisavihāroti buddhapaccekabuddhatathāgatamahāsāvakānaṃ mahāpurisānaṃ vihāro. Yena cāhaṃ maggenātiādīsu vihārato paṭṭhāya yāva gāmassa indakhīlā esa paviṭṭhamaggo nāma, antogāmaṃ pavisitvā gehapaṭipāṭiyā caritvā yāva nagaradvārena nikkhamanā esa caritabbapadeso nāma, bahi indakhīlato paṭṭhāya yāva vihārā esa paṭikkantamaggo nāma. Paṭighaṃ vāpi cetasoti citte paṭihaññanakilesajātaṃ kiñci atthi natthīti. Ahorattānusikkhināti divasañca rattiñca anusikkhantena.
೪೪೦. ಪಹೀನಾ ನು ಖೋ ಮೇ ಪಞ್ಚ ಕಾಮಗುಣಾತಿಆದೀಸು ಏಕಭಿಕ್ಖುಸ್ಸ ಪಚ್ಚವೇಕ್ಖಣಾ ನಾನಾ, ನಾನಾಭಿಕ್ಖೂನಂ ಪಚ್ಚವೇಕ್ಖಣಾ ನಾನಾತಿ। ಕಥಂ? ಏಕೋ ಹಿ ಭಿಕ್ಖು ಪಚ್ಛಾಭತ್ತಂ ಪಿಣ್ಡಪಾತಪಟಿಕ್ಕನ್ತೋ ಪತ್ತಚೀವರಂ ಪಟಿಸಾಮೇತ್ವಾ ವಿವಿತ್ತೋಕಾಸೇ ನಿಸಿನ್ನೋ ಪಚ್ಚವೇಕ್ಖತಿ ‘‘ಪಹೀನಾ ನು ಖೋ ಮೇ ಪಞ್ಚಕಾಮಗುಣಾ’’ತಿ। ಸೋ ‘‘ಅಪ್ಪಹೀನಾ’’ತಿ ಞತ್ವಾ ವೀರಿಯಂ ಪಗ್ಗಯ್ಹ ಅನಾಗಾಮಿಮಗ್ಗೇನ ಪಞ್ಚಕಾಮಗುಣಿಕರಾಗಂ ಸಮುಗ್ಘಾಟೇತ್ವಾ ಮಗ್ಗಾನನ್ತರಂ ಫಲಂ ಫಲಾನನ್ತರಂ ಮಗ್ಗಂ ತತೋ ವುಟ್ಠಾಯ ಪಚ್ಚವೇಕ್ಖನ್ತೋ ‘‘ಪಹೀನಾ’’ತಿ ಪಜಾನಾತಿ। ನೀವರಣಾದೀಸುಪಿ ಏಸೇವ ನಯೋ। ಏತೇಸಂ ಪನ ಅರಹತ್ತಮಗ್ಗೇನ ಪಹಾನಾದೀನಿ ಹೋನ್ತಿ, ಏವಂ ಏಕಭಿಕ್ಖುಸ್ಸ ನಾನಾಪಚ್ಚವೇಕ್ಖಣಾ ಹೋತಿ। ಏತಾಸು ಪನ ಪಚ್ಚವೇಕ್ಖಣಾಸು ಅಞ್ಞೋ ಭಿಕ್ಖು ಏಕಂ ಪಚ್ಚವೇಕ್ಖಣಂ ಪಚ್ಚವೇಕ್ಖತಿ, ಅಞ್ಞೋ ಏಕನ್ತಿ ಏವಂ ನಾನಾಭಿಕ್ಖೂನಂ ನಾನಾಪಚ್ಚವೇಕ್ಖಣಾ ಹೋತಿ। ಸೇಸಂ ಸಬ್ಬತ್ಥ ಉತ್ತಾನಮೇವಾತಿ।
440.Pahīnā nu kho me pañca kāmaguṇātiādīsu ekabhikkhussa paccavekkhaṇā nānā, nānābhikkhūnaṃ paccavekkhaṇā nānāti. Kathaṃ? Eko hi bhikkhu pacchābhattaṃ piṇḍapātapaṭikkanto pattacīvaraṃ paṭisāmetvā vivittokāse nisinno paccavekkhati ‘‘pahīnā nu kho me pañcakāmaguṇā’’ti. So ‘‘appahīnā’’ti ñatvā vīriyaṃ paggayha anāgāmimaggena pañcakāmaguṇikarāgaṃ samugghāṭetvā maggānantaraṃ phalaṃ phalānantaraṃ maggaṃ tato vuṭṭhāya paccavekkhanto ‘‘pahīnā’’ti pajānāti. Nīvaraṇādīsupi eseva nayo. Etesaṃ pana arahattamaggena pahānādīni honti, evaṃ ekabhikkhussa nānāpaccavekkhaṇā hoti. Etāsu pana paccavekkhaṇāsu añño bhikkhu ekaṃ paccavekkhaṇaṃ paccavekkhati, añño ekanti evaṃ nānābhikkhūnaṃ nānāpaccavekkhaṇā hoti. Sesaṃ sabbattha uttānamevāti.
ಪಪಞ್ಚಸೂದನಿಯಾ ಮಜ್ಝಿಮನಿಕಾಯಟ್ಠಕಥಾಯ
Papañcasūdaniyā majjhimanikāyaṭṭhakathāya
ಪಿಣ್ಡಪಾತಪಾರಿಸುದ್ಧಿಸುತ್ತವಣ್ಣನಾ ನಿಟ್ಠಿತಾ।
Piṇḍapātapārisuddhisuttavaṇṇanā niṭṭhitā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಮಜ್ಝಿಮನಿಕಾಯ • Majjhimanikāya / ೯. ಪಿಣ್ಡಪಾತಪಾರಿಸುದ್ಧಿಸುತ್ತಂ • 9. Piṇḍapātapārisuddhisuttaṃ
ಟೀಕಾ • Tīkā / ಸುತ್ತಪಿಟಕ (ಟೀಕಾ) • Suttapiṭaka (ṭīkā) / ಮಜ್ಝಿಮನಿಕಾಯ (ಟೀಕಾ) • Majjhimanikāya (ṭīkā) / ೯. ಪಿಣ್ಡಪಾತಪಾರಿಸುದ್ಧಿಸುತ್ತವಣ್ಣನಾ • 9. Piṇḍapātapārisuddhisuttavaṇṇanā
