| Library / Tipiṭaka / තිපිටක • Tipiṭaka / මජ්‌ඣිමනිකාය (අට්‌ඨකථා) • Majjhimanikāya (aṭṭhakathā) |
9. පිණ්‌ඩපාතපාරිසුද්‌ධිසුත්‌තවණ්‌ණනා
9. Piṇḍapātapārisuddhisuttavaṇṇanā
438. එවං මෙ සුතන්‌ති පිණ්‌ඩපාතපාරිසුද්‌ධිසුත්‌තං. තත්‌ථ පටිසල්‌ලානාති ඵලසමාපත්‌තිතො.
438.Evaṃme sutanti piṇḍapātapārisuddhisuttaṃ. Tattha paṭisallānāti phalasamāpattito.
විප්‌පසන්‌නානීති ඔකාසවසෙනෙතං වුත්‌තං. ඵලසමාපත්‌තිතො හි වුට්‌ඨිතස්‌ස පඤ්‌චහි පසාදෙහි පතිට්‌ඨිතොකාසො විප්‌පසන්‌නො හොති, ඡවිවණ්‌ණො පරිසුද්‌ධො. තස්‌මා එවමාහ. සුඤ්‌ඤතවිහාරෙනාති සුඤ්‌ඤතඵලසමාපත්‌තිවිහාරෙන. මහාපුරිසවිහාරොති බුද්‌ධපච්‌චෙකබුද්‌ධතථාගතමහාසාවකානං මහාපුරිසානං විහාරො. යෙන චාහං මග්‌ගෙනාතිආදීසු විහාරතො පට්‌ඨාය යාව ගාමස්‌ස ඉන්‌දඛීලා එස පවිට්‌ඨමග්‌ගො නාම, අන්‌තොගාමං පවිසිත්‌වා ගෙහපටිපාටියා චරිත්‌වා යාව නගරද්‌වාරෙන නික්‌ඛමනා එස චරිතබ්‌බපදෙසො නාම, බහි ඉන්‌දඛීලතො පට්‌ඨාය යාව විහාරා එස පටික්‌කන්‌තමග්‌ගො නාම. පටිඝං වාපි චෙතසොති චිත්‌තෙ පටිහඤ්‌ඤනකිලෙසජාතං කිඤ්‌චි අත්‌ථි නත්‌ථීති. අහොරත්‌තානුසික්‌ඛිනාති දිවසඤ්‌ච රත්‌තිඤ්‌ච අනුසික්‌ඛන්‌තෙන.
Vippasannānīti okāsavasenetaṃ vuttaṃ. Phalasamāpattito hi vuṭṭhitassa pañcahi pasādehi patiṭṭhitokāso vippasanno hoti, chavivaṇṇo parisuddho. Tasmā evamāha. Suññatavihārenāti suññataphalasamāpattivihārena. Mahāpurisavihāroti buddhapaccekabuddhatathāgatamahāsāvakānaṃ mahāpurisānaṃ vihāro. Yena cāhaṃ maggenātiādīsu vihārato paṭṭhāya yāva gāmassa indakhīlā esa paviṭṭhamaggo nāma, antogāmaṃ pavisitvā gehapaṭipāṭiyā caritvā yāva nagaradvārena nikkhamanā esa caritabbapadeso nāma, bahi indakhīlato paṭṭhāya yāva vihārā esa paṭikkantamaggo nāma. Paṭighaṃ vāpi cetasoti citte paṭihaññanakilesajātaṃ kiñci atthi natthīti. Ahorattānusikkhināti divasañca rattiñca anusikkhantena.
440. පහීනා නු ඛො මෙ පඤ්‌ච කාමගුණාතිආදීසු එකභික්‌ඛුස්‌ස පච්‌චවෙක්‌ඛණා නානා, නානාභික්‌ඛූනං පච්‌චවෙක්‌ඛණා නානාති. කථං? එකො හි භික්‌ඛු පච්‌ඡාභත්‌තං පිණ්‌ඩපාතපටික්‌කන්‌තො පත්‌තචීවරං පටිසාමෙත්‌වා විවිත්‌තොකාසෙ නිසින්‌නො පච්‌චවෙක්‌ඛති ‘‘පහීනා නු ඛො මෙ පඤ්‌චකාමගුණා’’ති. සො ‘‘අප්‌පහීනා’’ති ඤත්‌වා වීරියං පග්‌ගය්‌හ අනාගාමිමග්‌ගෙන පඤ්‌චකාමගුණිකරාගං සමුග්‌ඝාටෙත්‌වා මග්‌ගානන්‌තරං ඵලං ඵලානන්‌තරං මග්‌ගං තතො වුට්‌ඨාය පච්‌චවෙක්‌ඛන්‌තො ‘‘පහීනා’’ති පජානාති. නීවරණාදීසුපි එසෙව නයො. එතෙසං පන අරහත්‌තමග්‌ගෙන පහානාදීනි හොන්‌ති, එවං එකභික්‌ඛුස්‌ස නානාපච්‌චවෙක්‌ඛණා හොති. එතාසු පන පච්‌චවෙක්‌ඛණාසු අඤ්‌ඤො භික්‌ඛු එකං පච්‌චවෙක්‌ඛණං පච්‌චවෙක්‌ඛති, අඤ්‌ඤො එකන්‌ති එවං නානාභික්‌ඛූනං නානාපච්‌චවෙක්‌ඛණා හොති. සෙසං සබ්‌බත්‌ථ උත්‌තානමෙවාති.
440.Pahīnā nu kho me pañca kāmaguṇātiādīsu ekabhikkhussa paccavekkhaṇā nānā, nānābhikkhūnaṃ paccavekkhaṇā nānāti. Kathaṃ? Eko hi bhikkhu pacchābhattaṃ piṇḍapātapaṭikkanto pattacīvaraṃ paṭisāmetvā vivittokāse nisinno paccavekkhati ‘‘pahīnā nu kho me pañcakāmaguṇā’’ti. So ‘‘appahīnā’’ti ñatvā vīriyaṃ paggayha anāgāmimaggena pañcakāmaguṇikarāgaṃ samugghāṭetvā maggānantaraṃ phalaṃ phalānantaraṃ maggaṃ tato vuṭṭhāya paccavekkhanto ‘‘pahīnā’’ti pajānāti. Nīvaraṇādīsupi eseva nayo. Etesaṃ pana arahattamaggena pahānādīni honti, evaṃ ekabhikkhussa nānāpaccavekkhaṇā hoti. Etāsu pana paccavekkhaṇāsu añño bhikkhu ekaṃ paccavekkhaṇaṃ paccavekkhati, añño ekanti evaṃ nānābhikkhūnaṃ nānāpaccavekkhaṇā hoti. Sesaṃ sabbattha uttānamevāti.
පපඤ්‌චසූදනියා මජ්‌ඣිමනිකායට්‌ඨකථාය
Papañcasūdaniyā majjhimanikāyaṭṭhakathāya
පිණ්‌ඩපාතපාරිසුද්‌ධිසුත්‌තවණ්‌ණනා නිට්‌ඨිතා.
Piṇḍapātapārisuddhisuttavaṇṇanā niṭṭhitā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / මජ්‌ඣිමනිකාය • Majjhimanikāya / 9. පිණ්‌ඩපාතපාරිසුද්‌ධිසුත්‌තං • 9. Piṇḍapātapārisuddhisuttaṃ
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / මජ්‌ඣිමනිකාය (ටීකා) • Majjhimanikāya (ṭīkā) / 9. පිණ්‌ඩපාතපාරිසුද්‌ධිසුත්‌තවණ්‌ණනා • 9. Piṇḍapātapārisuddhisuttavaṇṇanā
