| Library / Tipiṭaka / ತಿಪಿಟಕ • Tipiṭaka / ಉದಾನಪಾಳಿ • Udānapāḷi |
೮. ಪಿಣ್ಡಪಾತಿಕಸುತ್ತಂ
8. Piṇḍapātikasuttaṃ
೨೮. ಏವಂ ಮೇ ಸುತಂ – ಏಕಂ ಸಮಯಂ ಭಗವಾ ಸಾವತ್ಥಿಯಂ ವಿಹರತಿ ಜೇತವನೇ ಅನಾಥಪಿಣ್ಡಿಕಸ್ಸ ಆರಾಮೇ। ತೇನ ಖೋ ಪನ ಸಮಯೇನ ಸಮ್ಬಹುಲಾನಂ ಭಿಕ್ಖೂನಂ ಪಚ್ಛಾಭತ್ತಂ ಪಿಣ್ಡಪಾತಪಟಿಕ್ಕನ್ತಾನಂ ಕರೇರಿಮಣ್ಡಲಮಾಳೇ ಸನ್ನಿಸಿನ್ನಾನಂ ಸನ್ನಿಪತಿತಾನಂ ಅಯಮನ್ತರಾಕಥಾ ಉದಪಾದಿ –
28. Evaṃ me sutaṃ – ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena sambahulānaṃ bhikkhūnaṃ pacchābhattaṃ piṇḍapātapaṭikkantānaṃ karerimaṇḍalamāḷe sannisinnānaṃ sannipatitānaṃ ayamantarākathā udapādi –
‘‘ಪಿಣ್ಡಪಾತಿಕೋ, ಆವುಸೋ, ಭಿಕ್ಖು ಪಿಣ್ಡಾಯ ಚರನ್ತೋ ಲಭತಿ ಕಾಲೇನ ಕಾಲಂ ಮನಾಪಿಕೇ ಚಕ್ಖುನಾ ರೂಪೇ ಪಸ್ಸಿತುಂ, ಲಭತಿ ಕಾಲೇನ ಕಾಲಂ ಮನಾಪಿಕೇ ಸೋತೇನ ಸದ್ದೇ ಸೋತುಂ, ಲಭತಿ ಕಾಲೇನ ಕಾಲಂ ಮನಾಪಿಕೇ ಘಾನೇನ ಗನ್ಧೇ ಘಾಯಿತುಂ, ಲಭತಿ ಕಾಲೇನ ಕಾಲಂ ಮನಾಪಿಕೇ ಜಿವ್ಹಾಯ ರಸೇ ಸಾಯಿತುಂ, ಲಭತಿ ಕಾಲೇನ ಕಾಲಂ ಮನಾಪಿಕೇ ಕಾಯೇನ ಫೋಟ್ಠಬ್ಬೇ ಫುಸಿತುಂ। ಪಿಣ್ಡಪಾತಿಕೋ, ಆವುಸೋ, ಭಿಕ್ಖು ಸಕ್ಕತೋ ಗರುಕತೋ ಮಾನಿತೋ ಪೂಜಿತೋ ಅಪಚಿತೋ ಪಿಣ್ಡಾಯ ಚರತಿ। ಹನ್ದಾವುಸೋ, ಮಯಮ್ಪಿ ಪಿಣ್ಡಪಾತಿಕಾ ಹೋಮ। ಮಯಮ್ಪಿ ಲಚ್ಛಾಮ ಕಾಲೇನ ಕಾಲಂ ಮನಾಪಿಕೇ ಚಕ್ಖುನಾ ರೂಪೇ ಪಸ್ಸಿತುಂ, ಮಯಮ್ಪಿ ಲಚ್ಛಾಮ ಕಾಲೇನ ಕಾಲಂ ಮನಾಪಿಕೇ ಸೋತೇನ ಸದ್ದೇ ಸೋತುಂ, ಮಯಮ್ಪಿ ಲಚ್ಛಾಮ ಕಾಲೇನ ಕಾಲಂ ಮನಾಪಿಕೇ ಘಾನೇನ ಗನ್ಧೇ ಘಾಯಿತುಂ, ಮಯಮ್ಪಿ ಲಚ್ಛಾಮ ಕಾಲೇನ ಕಾಲಂ ಮನಾಪಿಕೇ ಜಿವ್ಹಾಯ ರಸೇ ಸಾಯಿತುಂ, ಮಯಮ್ಪಿ ಲಚ್ಛಾಮ ಕಾಲೇನ ಕಾಲಂ ಮನಾಪಿಕೇ ಕಾಯೇನ ಫೋಟ್ಠಬ್ಬೇ ಫುಸಿತುಂ; ಮಯಮ್ಪಿ ಸಕ್ಕತಾ ಗರುಕತಾ ಮಾನಿತಾ ಪೂಜಿತಾ ಅಪಚಿತಾ ಪಿಣ್ಡಾಯ ಚರಿಸ್ಸಾಮಾ’’ತಿ। ಅಯಞ್ಚರಹಿ ತೇಸಂ ಭಿಕ್ಖೂನಂ ಅನ್ತರಾಕಥಾ ಹೋತಿ ವಿಪ್ಪಕತಾ।
‘‘Piṇḍapātiko, āvuso, bhikkhu piṇḍāya caranto labhati kālena kālaṃ manāpike cakkhunā rūpe passituṃ, labhati kālena kālaṃ manāpike sotena sadde sotuṃ, labhati kālena kālaṃ manāpike ghānena gandhe ghāyituṃ, labhati kālena kālaṃ manāpike jivhāya rase sāyituṃ, labhati kālena kālaṃ manāpike kāyena phoṭṭhabbe phusituṃ. Piṇḍapātiko, āvuso, bhikkhu sakkato garukato mānito pūjito apacito piṇḍāya carati. Handāvuso, mayampi piṇḍapātikā homa. Mayampi lacchāma kālena kālaṃ manāpike cakkhunā rūpe passituṃ, mayampi lacchāma kālena kālaṃ manāpike sotena sadde sotuṃ, mayampi lacchāma kālena kālaṃ manāpike ghānena gandhe ghāyituṃ, mayampi lacchāma kālena kālaṃ manāpike jivhāya rase sāyituṃ, mayampi lacchāma kālena kālaṃ manāpike kāyena phoṭṭhabbe phusituṃ; mayampi sakkatā garukatā mānitā pūjitā apacitā piṇḍāya carissāmā’’ti. Ayañcarahi tesaṃ bhikkhūnaṃ antarākathā hoti vippakatā.
ಅಥ ಖೋ ಭಗವಾ ಸಾಯನ್ಹಸಮಯಂ ಪಟಿಸಲ್ಲಾನಾ ವುಟ್ಠಿತೋ ಯೇನ ಕರೇರಿಮಣ್ಡಲಮಾಳೋ ತೇನುಪಸಙ್ಕಮಿ; ಉಪಸಙ್ಕಮಿತ್ವಾ ಪಞ್ಞತ್ತೇ ಆಸನೇ ನಿಸೀದಿ। ನಿಸಜ್ಜ ಖೋ ಭಗವಾ ಭಿಕ್ಖೂ ಆಮನ್ತೇಸಿ – ‘‘ಕಾಯ ನುತ್ಥ, ಭಿಕ್ಖವೇ, ಏತರಹಿ ಕಥಾಯ ಸನ್ನಿಸಿನ್ನಾ, ಕಾ ಚ ಪನ ವೋ ಅನ್ತರಾಕಥಾ ವಿಪ್ಪಕತಾ’’ತಿ?
Atha kho bhagavā sāyanhasamayaṃ paṭisallānā vuṭṭhito yena karerimaṇḍalamāḷo tenupasaṅkami; upasaṅkamitvā paññatte āsane nisīdi. Nisajja kho bhagavā bhikkhū āmantesi – ‘‘kāya nuttha, bhikkhave, etarahi kathāya sannisinnā, kā ca pana vo antarākathā vippakatā’’ti?
‘‘ಇಧ, ಭನ್ತೇ, ಅಮ್ಹಾಕಂ ಪಚ್ಛಾಭತ್ತಂ ಪಿಣ್ಡಪಾತಪಟಿಕ್ಕನ್ತಾನಂ ಕರೇರಿಮಣ್ಡಲಮಾಳೇ ಸನ್ನಿಸಿನ್ನಾನಂ ಸನ್ನಿಪತಿತಾನಂ ಅಯಮನ್ತರಾಕಥಾ ಉದಪಾದಿ –
‘‘Idha, bhante, amhākaṃ pacchābhattaṃ piṇḍapātapaṭikkantānaṃ karerimaṇḍalamāḷe sannisinnānaṃ sannipatitānaṃ ayamantarākathā udapādi –
‘ಪಿಣ್ಡಪಾತಿಕೋ, ಆವುಸೋ, ಭಿಕ್ಖು ಪಿಣ್ಡಾಯ ಚರನ್ತೋ ಲಭತಿ ಕಾಲೇನ ಕಾಲಂ ಮನಾಪಿಕೇ ಚಕ್ಖುನಾ ರೂಪೇ ಪಸ್ಸಿತುಂ, ಲಭತಿ ಕಾಲೇನ ಕಾಲಂ ಮನಾಪಿಕೇ ಸೋತೇನ ಸದ್ದೇ ಸೋತುಂ, ಲಭತಿ ಕಾಲೇನ ಕಾಲಂ ಮನಾಪಿಕೇ ಘಾನೇನ ಗನ್ಧೇ ಘಾಯಿತುಂ, ಲಭತಿ ಕಾಲೇನ ಕಾಲಂ ಮನಾಪಿಕೇ ಜಿವ್ಹಾಯ ರಸೇ ಸಾಯಿತುಂ, ಲಭತಿ ಕಾಲೇನ ಕಾಲಂ ಮನಾಪಿಕೇ ಕಾಯೇನ ಫೋಟ್ಠಬ್ಬೇ ಫುಸಿತುಂ। ಪಿಣ್ಡಪಾತಿಕೋ, ಆವುಸೋ, ಭಿಕ್ಖು ಸಕ್ಕತೋ ಗರುಕತೋ ಮಾನಿತೋ ಪೂಜಿತೋ ಅಪಚಿತೋ ಪಿಣ್ಡಾಯ ಚರತಿ। ಹನ್ದಾವುಸೋ, ಮಯಮ್ಪಿ ಪಿಣ್ಡಪಾತಿಕಾ ಹೋಮ। ಮಯಮ್ಪಿ ಲಚ್ಛಾಮ ಕಾಲೇನ ಕಾಲಂ ಮನಾಪಿಕೇ ಚಕ್ಖುನಾ ರೂಪೇ ಪಸ್ಸಿತುಂ…ಪೇ॰… ಕಾಯೇನ ಫೋಟ್ಠಬ್ಬೇ ಫುಸಿತುಂ। ಮಯಮ್ಪಿ ಸಕ್ಕತಾ ಗರುಕತಾ ಮಾನಿತಾ ಪೂಜಿತಾ ಅಪಚಿತಾ ಪಿಣ್ಡಾಯ ಚರಿಸ್ಸಾಮಾ’ತಿ। ಅಯಂ ಖೋ ನೋ, ಭನ್ತೇ, ಅನ್ತರಾಕಥಾ ವಿಪ್ಪಕತಾ, ಅಥ ಭಗವಾ ಅನುಪ್ಪತ್ತೋ’’ತಿ।
‘Piṇḍapātiko, āvuso, bhikkhu piṇḍāya caranto labhati kālena kālaṃ manāpike cakkhunā rūpe passituṃ, labhati kālena kālaṃ manāpike sotena sadde sotuṃ, labhati kālena kālaṃ manāpike ghānena gandhe ghāyituṃ, labhati kālena kālaṃ manāpike jivhāya rase sāyituṃ, labhati kālena kālaṃ manāpike kāyena phoṭṭhabbe phusituṃ. Piṇḍapātiko, āvuso, bhikkhu sakkato garukato mānito pūjito apacito piṇḍāya carati. Handāvuso, mayampi piṇḍapātikā homa. Mayampi lacchāma kālena kālaṃ manāpike cakkhunā rūpe passituṃ…pe… kāyena phoṭṭhabbe phusituṃ. Mayampi sakkatā garukatā mānitā pūjitā apacitā piṇḍāya carissāmā’ti. Ayaṃ kho no, bhante, antarākathā vippakatā, atha bhagavā anuppatto’’ti.
‘‘ನ ಖ್ವೇತಂ, ಭಿಕ್ಖವೇ, ತುಮ್ಹಾಕಂ ಪತಿರೂಪಂ ಕುಲಪುತ್ತಾನಂ ಸದ್ಧಾ ಅಗಾರಸ್ಮಾ ಅನಗಾರಿಯಂ ಪಬ್ಬಜಿತಾನಂ ಯಂ ತುಮ್ಹೇ ಏವರೂಪಿಂ ಕಥಂ ಕಥೇಯ್ಯಾಥ। ಸನ್ನಿಪತಿತಾನಂ ವೋ, ಭಿಕ್ಖವೇ, ದ್ವಯಂ ಕರಣೀಯಂ – ಧಮ್ಮೀ ವಾ ಕಥಾ ಅರಿಯೋ ವಾ ತುಣ್ಹೀಭಾವೋ’’ತಿ।
‘‘Na khvetaṃ, bhikkhave, tumhākaṃ patirūpaṃ kulaputtānaṃ saddhā agārasmā anagāriyaṃ pabbajitānaṃ yaṃ tumhe evarūpiṃ kathaṃ katheyyātha. Sannipatitānaṃ vo, bhikkhave, dvayaṃ karaṇīyaṃ – dhammī vā kathā ariyo vā tuṇhībhāvo’’ti.
ಅಥ ಖೋ ಭಗವಾ ಏತಮತ್ಥಂ ವಿದಿತ್ವಾ ತಾಯಂ ವೇಲಾಯಂ ಇಮಂ ಉದಾನಂ ಉದಾನೇಸಿ –
Atha kho bhagavā etamatthaṃ viditvā tāyaṃ velāyaṃ imaṃ udānaṃ udānesi –
‘‘ಪಿಣ್ಡಪಾತಿಕಸ್ಸ ಭಿಕ್ಖುನೋ,
‘‘Piṇḍapātikassa bhikkhuno,
ಅತ್ತಭರಸ್ಸ ಅನಞ್ಞಪೋಸಿನೋ।
Attabharassa anaññaposino;
ದೇವಾ ಪಿಹಯನ್ತಿ ತಾದಿನೋ,
Devā pihayanti tādino,
ನೋ ಚೇ ಸದ್ದಸಿಲೋಕನಿಸ್ಸಿತೋ’’ತಿ॥ ಅಟ್ಠಮಂ।
No ce saddasilokanissito’’ti. aṭṭhamaṃ;
Related texts:
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಖುದ್ದಕನಿಕಾಯ (ಅಟ್ಠಕಥಾ) • Khuddakanikāya (aṭṭhakathā) / ಉದಾನ-ಅಟ್ಠಕಥಾ • Udāna-aṭṭhakathā / ೮. ಪಿಣ್ಡಪಾತಿಕಸುತ್ತವಣ್ಣನಾ • 8. Piṇḍapātikasuttavaṇṇanā
