| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
৮. পিণ্ডসুত্তং
8. Piṇḍasuttaṃ
১৫৪. একং সমযং ভগৰা মগধেসু ৰিহরতি পঞ্চসালাযং ব্রাহ্মণগামে। তেন খো পন সমযেন পঞ্চসালাযং ব্রাহ্মণগামে কুমারিকানং পাহুনকানি ভৰন্তি। অথ খো ভগৰা পুব্বণ্হসমযং নিৰাসেত্ৰা পত্তচীৰরমাদায পঞ্চসালং ব্রাহ্মণগামং পিণ্ডায পাৰিসি। তেন খো পন সমযেন পঞ্চসালেয্যকা ব্রাহ্মণগহপতিকা মারেন পাপিমতা অন্ৰাৰিট্ঠা ভৰন্তি – মা সমণো গোতমো পিণ্ডমলত্থাতি।
154. Ekaṃ samayaṃ bhagavā magadhesu viharati pañcasālāyaṃ brāhmaṇagāme. Tena kho pana samayena pañcasālāyaṃ brāhmaṇagāme kumārikānaṃ pāhunakāni bhavanti. Atha kho bhagavā pubbaṇhasamayaṃ nivāsetvā pattacīvaramādāya pañcasālaṃ brāhmaṇagāmaṃ piṇḍāya pāvisi. Tena kho pana samayena pañcasāleyyakā brāhmaṇagahapatikā mārena pāpimatā anvāviṭṭhā bhavanti – mā samaṇo gotamo piṇḍamalatthāti.
অথ খো ভগৰা যথাধোতেন পত্তেন পঞ্চসালং ব্রাহ্মণগামং পিণ্ডায পাৰিসি তথাধোতেন 1 পত্তেন পটিক্কমি। অথ খো মারো পাপিমা যেন ভগৰা তেনুপসঙ্কমি; উপসঙ্কমিত্ৰা ভগৰন্তং এতদৰোচ – ‘‘অপি ত্ৰং, সমণ, পিণ্ডমলত্থা’’তি? ‘‘তথা নু ত্ৰং, পাপিম, অকাসি যথাহং পিণ্ডং ন লভেয্য’’ন্তি। ‘‘তেন হি, ভন্তে, ভগৰা দুতিযম্পি পঞ্চসালং ব্রাহ্মণগামং পিণ্ডায পৰিসতু। তথাহং করিস্সামি যথা ভগৰা পিণ্ডং লচ্ছতী’’তি।
Atha kho bhagavā yathādhotena pattena pañcasālaṃ brāhmaṇagāmaṃ piṇḍāya pāvisi tathādhotena 2 pattena paṭikkami. Atha kho māro pāpimā yena bhagavā tenupasaṅkami; upasaṅkamitvā bhagavantaṃ etadavoca – ‘‘api tvaṃ, samaṇa, piṇḍamalatthā’’ti? ‘‘Tathā nu tvaṃ, pāpima, akāsi yathāhaṃ piṇḍaṃ na labheyya’’nti. ‘‘Tena hi, bhante, bhagavā dutiyampi pañcasālaṃ brāhmaṇagāmaṃ piṇḍāya pavisatu. Tathāhaṃ karissāmi yathā bhagavā piṇḍaṃ lacchatī’’ti.
‘‘অপুঞ্ঞং পসৰি মারো, আসজ্জ নং তথাগতং।
‘‘Apuññaṃ pasavi māro, āsajja naṃ tathāgataṃ;
কিং নু মঞ্ঞসি পাপিম, ন মে পাপং ৰিপচ্চতি॥
Kiṃ nu maññasi pāpima, na me pāpaṃ vipaccati.
‘‘সুসুখং ৰত জীৰাম, যেসং নো নত্থি কিঞ্চনং।
‘‘Susukhaṃ vata jīvāma, yesaṃ no natthi kiñcanaṃ;
পীতিভক্খা ভৰিস্সাম, দেৰা আভস্সরা যথা’’তি॥
Pītibhakkhā bhavissāma, devā ābhassarā yathā’’ti.
অথ খো মারো পাপিমা ‘‘জানাতি মং ভগৰা, জানাতি মং সুগতো’’তি দুক্খী দুম্মনো তত্থেৰন্তরধাযীতি।
Atha kho māro pāpimā ‘‘jānāti maṃ bhagavā, jānāti maṃ sugato’’ti dukkhī dummano tatthevantaradhāyīti.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৮. পিণ্ডসুত্তৰণ্ণনা • 8. Piṇḍasuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ৮. পিণ্ডসুত্তৰণ্ণনা • 8. Piṇḍasuttavaṇṇanā
