| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
8. පිණ්‌ඩසුත්‌තං
8. Piṇḍasuttaṃ
154. එකං සමයං භගවා මගධෙසු විහරති පඤ්‌චසාලායං බ්‍රාහ්‌මණගාමෙ. තෙන ඛො පන සමයෙන පඤ්‌චසාලායං බ්‍රාහ්‌මණගාමෙ කුමාරිකානං පාහුනකානි භවන්‌ති. අථ ඛො භගවා පුබ්‌බණ්‌හසමයං නිවාසෙත්‌වා පත්‌තචීවරමාදාය පඤ්‌චසාලං බ්‍රාහ්‌මණගාමං පිණ්‌ඩාය පාවිසි. තෙන ඛො පන සමයෙන පඤ්‌චසාලෙය්‍යකා බ්‍රාහ්‌මණගහපතිකා මාරෙන පාපිමතා අන්‌වාවිට්‌ඨා භවන්‌ති – මා සමණො ගොතමො පිණ්‌ඩමලත්‌ථාති.
154. Ekaṃ samayaṃ bhagavā magadhesu viharati pañcasālāyaṃ brāhmaṇagāme. Tena kho pana samayena pañcasālāyaṃ brāhmaṇagāme kumārikānaṃ pāhunakāni bhavanti. Atha kho bhagavā pubbaṇhasamayaṃ nivāsetvā pattacīvaramādāya pañcasālaṃ brāhmaṇagāmaṃ piṇḍāya pāvisi. Tena kho pana samayena pañcasāleyyakā brāhmaṇagahapatikā mārena pāpimatā anvāviṭṭhā bhavanti – mā samaṇo gotamo piṇḍamalatthāti.
අථ ඛො භගවා යථාධොතෙන පත්‌තෙන පඤ්‌චසාලං බ්‍රාහ්‌මණගාමං පිණ්‌ඩාය පාවිසි තථාධොතෙන 1 පත්‌තෙන පටික්‌කමි. අථ ඛො මාරො පාපිමා යෙන භගවා තෙනුපසඞ්‌කමි; උපසඞ්‌කමිත්‌වා භගවන්‌තං එතදවොච – ‘‘අපි ත්‌වං, සමණ, පිණ්‌ඩමලත්‌ථා’’ති? ‘‘තථා නු ත්‌වං, පාපිම, අකාසි යථාහං පිණ්‌ඩං න ලභෙය්‍ය’’න්‌ති. ‘‘තෙන හි, භන්‌තෙ, භගවා දුතියම්‌පි පඤ්‌චසාලං බ්‍රාහ්‌මණගාමං පිණ්‌ඩාය පවිසතු. තථාහං කරිස්‌සාමි යථා භගවා පිණ්‌ඩං ලච්‌ඡතී’’ති.
Atha kho bhagavā yathādhotena pattena pañcasālaṃ brāhmaṇagāmaṃ piṇḍāya pāvisi tathādhotena 2 pattena paṭikkami. Atha kho māro pāpimā yena bhagavā tenupasaṅkami; upasaṅkamitvā bhagavantaṃ etadavoca – ‘‘api tvaṃ, samaṇa, piṇḍamalatthā’’ti? ‘‘Tathā nu tvaṃ, pāpima, akāsi yathāhaṃ piṇḍaṃ na labheyya’’nti. ‘‘Tena hi, bhante, bhagavā dutiyampi pañcasālaṃ brāhmaṇagāmaṃ piṇḍāya pavisatu. Tathāhaṃ karissāmi yathā bhagavā piṇḍaṃ lacchatī’’ti.
‘‘අපුඤ්‌ඤං පසවි මාරො, ආසජ්‌ජ නං තථාගතං;
‘‘Apuññaṃ pasavi māro, āsajja naṃ tathāgataṃ;
කිං නු මඤ්‌ඤසි පාපිම, න මෙ පාපං විපච්‌චති.
Kiṃ nu maññasi pāpima, na me pāpaṃ vipaccati.
‘‘සුසුඛං වත ජීවාම, යෙසං නො නත්‌ථි කිඤ්‌චනං;
‘‘Susukhaṃ vata jīvāma, yesaṃ no natthi kiñcanaṃ;
පීතිභක්‌ඛා භවිස්‌සාම, දෙවා ආභස්‌සරා යථා’’ති.
Pītibhakkhā bhavissāma, devā ābhassarā yathā’’ti.
අථ ඛො මාරො පාපිමා ‘‘ජානාති මං භගවා, ජානාති මං සුගතො’’ති දුක්‌ඛී දුම්‌මනො තත්‌ථෙවන්‌තරධායීති.
Atha kho māro pāpimā ‘‘jānāti maṃ bhagavā, jānāti maṃ sugato’’ti dukkhī dummano tatthevantaradhāyīti.
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 8. පිණ්‌ඩසුත්‌තවණ්‌ණනා • 8. Piṇḍasuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 8. පිණ්‌ඩසුත්‌තවණ්‌ණනා • 8. Piṇḍasuttavaṇṇanā
