| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
8. பிண்ட³ஸுத்தவண்ணனா
8. Piṇḍasuttavaṇṇanā
154. அட்ட²மே பாஹுனகானி ப⁴வந்தீதி ததா²ரூபே நக்க²த்தே தத்த² தத்த² பேஸேதப்³பா³னி பாஹுனகானி ப⁴வந்தி, ஆக³ந்துகபண்ணாகாரதா³னானி வா. ஸயங்சரணதி³வஸே ஸமவயஜாதிகொ³த்தா குமாரகா ததோ ததோ ஸன்னிபதந்தி. குமாரிகாயோபி அத்தனோ அத்தனோ விப⁴வானுரூபேன அலங்கதா தஹங் தஹங் விசரந்தி. தத்ர குமாரிகாயோபி யதா²ருசிகானங் குமாரகானங் பண்ணாகாரங் பேஸெந்தி, குமாரகாபி குமாரிகானங் அஞ்ஞஸ்மிங் அஸதி அந்தமஸோ மாலாகு³ளேனபி பரிக்கி²பந்தி. அன்வாவிட்டா²தி அனு ஆவிட்டா². தங்தி³வஸங் கிர பஞ்சஸதா குமாரிகாயோ உய்யானகீளங் க³ச்ச²ந்தியோ படிபதே² ஸத்தா²ரங் தி³ஸ்வா ச²ணபூவங் த³தெ³ய்யுங். ஸத்தா² தாஸங் தா³னானுமோத³னத்த²ங் பகிண்ணகத⁴ம்மதே³ஸனங் தே³ஸெய்ய, தே³ஸனாபரியோஸானே ஸப்³பா³பி ஸோதாபத்திப²லே பதிட்ட²ஹெய்யுங். மாரோ தாஸங் ஸம்பத்தியா அந்தராயங் கரிஸ்ஸாமீதி அன்வாவிஸி. பாளியங் பன மா ஸமணோ கோ³தமோ பிண்ட³மலத்தா²தி எத்தகங்யேவ வுத்தந்தி.
154. Aṭṭhame pāhunakāni bhavantīti tathārūpe nakkhatte tattha tattha pesetabbāni pāhunakāni bhavanti, āgantukapaṇṇākāradānāni vā. Sayaṃcaraṇadivase samavayajātigottā kumārakā tato tato sannipatanti. Kumārikāyopi attano attano vibhavānurūpena alaṅkatā tahaṃ tahaṃ vicaranti. Tatra kumārikāyopi yathārucikānaṃ kumārakānaṃ paṇṇākāraṃ pesenti, kumārakāpi kumārikānaṃ aññasmiṃ asati antamaso mālāguḷenapi parikkhipanti. Anvāviṭṭhāti anu āviṭṭhā. Taṃdivasaṃ kira pañcasatā kumārikāyo uyyānakīḷaṃ gacchantiyo paṭipathe satthāraṃ disvā chaṇapūvaṃ dadeyyuṃ. Satthā tāsaṃ dānānumodanatthaṃ pakiṇṇakadhammadesanaṃ deseyya, desanāpariyosāne sabbāpi sotāpattiphale patiṭṭhaheyyuṃ. Māro tāsaṃ sampattiyā antarāyaṃ karissāmīti anvāvisi. Pāḷiyaṃ pana mā samaṇo gotamo piṇḍamalatthāti ettakaṃyeva vuttanti.
கிங் பன ஸத்தா² மாராவட்டனங் அஜானித்வா பவிட்டோ²தி? ஆம அஜானித்வா. கஸ்மா? அனாவஜ்ஜனதாய. பு³த்³தா⁴னஞ்ஹி – ‘‘அஸுகட்டா²னே ப⁴த்தங் லபி⁴ஸ்ஸாம, ந லபி⁴ஸ்ஸாமா’’தி ஆவஜ்ஜனங் ந அனநுச்ச²விகங். பவிட்டோ² பன மனுஸ்ஸானங் உபசாரபே⁴த³ங் தி³ஸ்வா, ‘‘கிங் இத³’’ந்தி? ஆவஜ்ஜெந்தோ ஞத்வா, ‘‘ஆமிஸத்த²ங் மாராவட்டனங் பி⁴ந்தி³துங் அனநுச்ச²விக’’ந்தி அபி⁴ந்தி³த்வாவ நிக்க²ந்தோ.
Kiṃ pana satthā mārāvaṭṭanaṃ ajānitvā paviṭṭhoti? Āma ajānitvā. Kasmā? Anāvajjanatāya. Buddhānañhi – ‘‘asukaṭṭhāne bhattaṃ labhissāma, na labhissāmā’’ti āvajjanaṃ na ananucchavikaṃ. Paviṭṭho pana manussānaṃ upacārabhedaṃ disvā, ‘‘kiṃ ida’’nti? Āvajjento ñatvā, ‘‘āmisatthaṃ mārāvaṭṭanaṃ bhindituṃ ananucchavika’’nti abhinditvāva nikkhanto.
உபஸங்கமீதி அமித்தவிஜயேன விய துட்டோ² ஸகலகா³மே கடச்சு²மத்தம்பி ப⁴த்தங் அலபி⁴த்வா கா³மதோ நிக்க²மந்தங் ப⁴க³வந்தங் கா³மியமனுஸ்ஸவேஸேன உபஸங்கமி. ததா²ஹங் கரிஸ்ஸாமீதி இத³ங் ஸோ முஸா பா⁴ஸதி. ஏவங் கிரஸ்ஸ அஹோஸி – ‘‘மயா ஏவங் வுத்தே புன பவிஸிஸ்ஸதி, அத² நங் கா³மதா³ரகா ‘ஸகலகா³மே சரித்வா கடச்சு²பி⁴க்க²ம்பி அலபி⁴த்வா கா³மதோ நிக்க²ம்ம புன பவிட்டோ²ஸீ’திஆதீ³னி வத்வா உப்பண்டெ³ஸ்ஸந்தீ’’தி. ப⁴க³வா பன – ‘‘ஸசாயங் மங் ஏவங் விஹேடெ²ஸ்ஸதி முத்³த⁴மஸ்ஸேவ ஸத்ததா⁴ ப²லிஸ்ஸதீ’’தி தஸ்மிங் அனுகம்பாய அபவிஸித்வா கா³தா²த்³வயமாஹ.
Upasaṅkamīti amittavijayena viya tuṭṭho sakalagāme kaṭacchumattampi bhattaṃ alabhitvā gāmato nikkhamantaṃ bhagavantaṃ gāmiyamanussavesena upasaṅkami. Tathāhaṃ karissāmīti idaṃ so musā bhāsati. Evaṃ kirassa ahosi – ‘‘mayā evaṃ vutte puna pavisissati, atha naṃ gāmadārakā ‘sakalagāme caritvā kaṭacchubhikkhampi alabhitvā gāmato nikkhamma puna paviṭṭhosī’tiādīni vatvā uppaṇḍessantī’’ti. Bhagavā pana – ‘‘sacāyaṃ maṃ evaṃ viheṭhessati muddhamasseva sattadhā phalissatī’’ti tasmiṃ anukampāya apavisitvā gāthādvayamāha.
தத்த² பஸவீதி ஜனேஸி நிப்பா²தே³ஸி. ஆஸஜ்ஜாதி ஆஸாதெ³த்வா க⁴ட்டெத்வா. ந மே பாபங் விபச்சதீதி மம பாபங் ந பச்சதி. நிப்ப²லங் ஏதந்தி கிங் நு த்வங் ஏவங் மஞ்ஞஸி? மா ஏவங் மஞ்ஞி, அத்தி² தயா கதஸ்ஸ பாபஸ்ஸ ப²லந்தி தீ³பேதி. கிஞ்சனந்தி மத்³தி³துங் ஸமத்த²ங் ராக³கிஞ்சனாதி³ கிலேஸஜாதங். ஆப⁴ஸ்ஸரா யதா²தி யதா² ஆப⁴ஸ்ஸரா தே³வா ஸப்பீதிகஜ்ஜா²னேன யாபெந்தா பீதிப⁴க்கா² நாம ஹொந்தி, ஏவங் ப⁴விஸ்ஸாமாதி. அட்ட²மங்.
Tattha pasavīti janesi nipphādesi. Āsajjāti āsādetvā ghaṭṭetvā. Na me pāpaṃ vipaccatīti mama pāpaṃ na paccati. Nipphalaṃ etanti kiṃ nu tvaṃ evaṃ maññasi? Mā evaṃ maññi, atthi tayā katassa pāpassa phalanti dīpeti. Kiñcananti maddituṃ samatthaṃ rāgakiñcanādi kilesajātaṃ. Ābhassarā yathāti yathā ābhassarā devā sappītikajjhānena yāpentā pītibhakkhā nāma honti, evaṃ bhavissāmāti. Aṭṭhamaṃ.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 8. பிண்ட³ஸுத்தங் • 8. Piṇḍasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 8. பிண்ட³ஸுத்தவண்ணனா • 8. Piṇḍasuttavaṇṇanā
