| Library / Tipiṭaka / တိပိဋက • Tipiṭaka / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) |
၈. ပိဏ္ဍသုတ္တဝဏ္ဏနာ
8. Piṇḍasuttavaṇṇanā
၁၅၄. အဋ္ဌမေ ပာဟုနကာနိ ဘဝန္တီတိ တထာရူပေ နက္ခတ္တေ တတ္ထ တတ္ထ ပေသေတဗ္ဗာနိ ပာဟုနကာနိ ဘဝန္တိ, အာဂန္တုကပဏ္ဏာကာရဒာနာနိ ဝာ။ သယံစရဏဒိဝသေ သမဝယဇာတိဂောတ္တာ ကုမာရကာ တတော တတော သန္နိပတန္တိ။ ကုမာရိကာယောပိ အတ္တနော အတ္တနော ဝိဘဝာနုရူပေန အလင္ကတာ တဟံ တဟံ ဝိစရန္တိ။ တတ္ရ ကုမာရိကာယောပိ ယထာရုစိကာနံ ကုမာရကာနံ ပဏ္ဏာကာရံ ပေသေန္တိ, ကုမာရကာပိ ကုမာရိကာနံ အညသ္မိံ အသတိ အန္တမသော မာလာဂုဠေနပိ ပရိက္ခိပန္တိ။ အန္ဝာဝိဋ္ဌာတိ အနု အာဝိဋ္ဌာ။ တံဒိဝသံ ကိရ ပဉ္စသတာ ကုမာရိကာယော ဥယ္ယာနကီဠံ ဂစ္ဆန္တိယော ပဋိပထေ သတ္ထာရံ ဒိသ္ဝာ ဆဏပူဝံ ဒဒေယ္ယုံ။ သတ္ထာ တာသံ ဒာနာနုမောဒနတ္ထံ ပကိဏ္ဏကဓမ္မဒေသနံ ဒေသေယ္ယ, ဒေသနာပရိယောသာနေ သဗ္ဗာပိ သောတာပတ္တိဖလေ ပတိဋ္ဌဟေယ္ယုံ။ မာရော တာသံ သမ္ပတ္တိယာ အန္တရာယံ ကရိသ္သာမီတိ အန္ဝာဝိသိ။ ပာဠိယံ ပန မာ သမဏော ဂောတမော ပိဏ္ဍမလတ္ထာတိ ဧတ္တကံယေဝ ဝုတ္တန္တိ။
154. Aṭṭhame pāhunakāni bhavantīti tathārūpe nakkhatte tattha tattha pesetabbāni pāhunakāni bhavanti, āgantukapaṇṇākāradānāni vā. Sayaṃcaraṇadivase samavayajātigottā kumārakā tato tato sannipatanti. Kumārikāyopi attano attano vibhavānurūpena alaṅkatā tahaṃ tahaṃ vicaranti. Tatra kumārikāyopi yathārucikānaṃ kumārakānaṃ paṇṇākāraṃ pesenti, kumārakāpi kumārikānaṃ aññasmiṃ asati antamaso mālāguḷenapi parikkhipanti. Anvāviṭṭhāti anu āviṭṭhā. Taṃdivasaṃ kira pañcasatā kumārikāyo uyyānakīḷaṃ gacchantiyo paṭipathe satthāraṃ disvā chaṇapūvaṃ dadeyyuṃ. Satthā tāsaṃ dānānumodanatthaṃ pakiṇṇakadhammadesanaṃ deseyya, desanāpariyosāne sabbāpi sotāpattiphale patiṭṭhaheyyuṃ. Māro tāsaṃ sampattiyā antarāyaṃ karissāmīti anvāvisi. Pāḷiyaṃ pana mā samaṇo gotamo piṇḍamalatthāti ettakaṃyeva vuttanti.
ကိံ ပန သတ္ထာ မာရာဝဋ္ဋနံ အဇာနိတ္ဝာ ပဝိဋ္ဌောတိ? အာမ အဇာနိတ္ဝာ။ ကသ္မာ? အနာဝဇ္ဇနတာယ။ ဗုဒ္ဓာနဉ္ဟိ – ‘‘အသုကဋ္ဌာနေ ဘတ္တံ လဘိသ္သာမ, န လဘိသ္သာမာ’’တိ အာဝဇ္ဇနံ န အနနုစ္ဆဝိကံ။ ပဝိဋ္ဌော ပန မနုသ္သာနံ ဥပစာရဘေဒံ ဒိသ္ဝာ, ‘‘ကိံ ဣဒ’’န္တိ? အာဝဇ္ဇေန္တော ဉတ္ဝာ, ‘‘အာမိသတ္ထံ မာရာဝဋ္ဋနံ ဘိန္ဒိတုံ အနနုစ္ဆဝိက’’န္တိ အဘိန္ဒိတ္ဝာဝ နိက္ခန္တော။
Kiṃ pana satthā mārāvaṭṭanaṃ ajānitvā paviṭṭhoti? Āma ajānitvā. Kasmā? Anāvajjanatāya. Buddhānañhi – ‘‘asukaṭṭhāne bhattaṃ labhissāma, na labhissāmā’’ti āvajjanaṃ na ananucchavikaṃ. Paviṭṭho pana manussānaṃ upacārabhedaṃ disvā, ‘‘kiṃ ida’’nti? Āvajjento ñatvā, ‘‘āmisatthaṃ mārāvaṭṭanaṃ bhindituṃ ananucchavika’’nti abhinditvāva nikkhanto.
ဥပသင္ကမီတိ အမိတ္တဝိဇယေန ဝိယ တုဋ္ဌော သကလဂာမေ ကဋစ္ဆုမတ္တမ္ပိ ဘတ္တံ အလဘိတ္ဝာ ဂာမတော နိက္ခမန္တံ ဘဂဝန္တံ ဂာမိယမနုသ္သဝေသေန ဥပသင္ကမိ။ တထာဟံ ကရိသ္သာမီတိ ဣဒံ သော မုသာ ဘာသတိ။ ဧဝံ ကိရသ္သ အဟောသိ – ‘‘မယာ ဧဝံ ဝုတ္တေ ပုန ပဝိသိသ္သတိ, အထ နံ ဂာမဒာရကာ ‘သကလဂာမေ စရိတ္ဝာ ကဋစ္ဆုဘိက္ခမ္ပိ အလဘိတ္ဝာ ဂာမတော နိက္ခမ္မ ပုန ပဝိဋ္ဌောသီ’တိအာဒီနိ ဝတ္ဝာ ဥပ္ပဏ္ဍေသ္သန္တီ’’တိ။ ဘဂဝာ ပန – ‘‘သစာယံ မံ ဧဝံ ဝိဟေဌေသ္သတိ မုဒ္ဓမသ္သေဝ သတ္တဓာ ဖလိသ္သတီ’’တိ တသ္မိံ အနုကမ္ပာယ အပဝိသိတ္ဝာ ဂာထာဒ္ဝယမာဟ။
Upasaṅkamīti amittavijayena viya tuṭṭho sakalagāme kaṭacchumattampi bhattaṃ alabhitvā gāmato nikkhamantaṃ bhagavantaṃ gāmiyamanussavesena upasaṅkami. Tathāhaṃ karissāmīti idaṃ so musā bhāsati. Evaṃ kirassa ahosi – ‘‘mayā evaṃ vutte puna pavisissati, atha naṃ gāmadārakā ‘sakalagāme caritvā kaṭacchubhikkhampi alabhitvā gāmato nikkhamma puna paviṭṭhosī’tiādīni vatvā uppaṇḍessantī’’ti. Bhagavā pana – ‘‘sacāyaṃ maṃ evaṃ viheṭhessati muddhamasseva sattadhā phalissatī’’ti tasmiṃ anukampāya apavisitvā gāthādvayamāha.
တတ္ထ ပသဝီတိ ဇနေသိ နိပ္ဖာဒေသိ။ အာသဇ္ဇာတိ အာသာဒေတ္ဝာ ဃဋ္ဋေတ္ဝာ။ န မေ ပာပံ ဝိပစ္စတီတိ မမ ပာပံ န ပစ္စတိ။ နိပ္ဖလံ ဧတန္တိ ကိံ နု တ္ဝံ ဧဝံ မညသိ? မာ ဧဝံ မညိ, အတ္ထိ တယာ ကတသ္သ ပာပသ္သ ဖလန္တိ ဒီပေတိ။ ကိဉ္စနန္တိ မဒ္ဒိတုံ သမတ္ထံ ရာဂကိဉ္စနာဒိ ကိလေသဇာတံ။ အာဘသ္သရာ ယထာတိ ယထာ အာဘသ္သရာ ဒေဝာ သပ္ပီတိကဇ္ဈာနေန ယာပေန္တာ ပီတိဘက္ခာ နာမ ဟောန္တိ, ဧဝံ ဘဝိသ္သာမာတိ။ အဋ္ဌမံ။
Tattha pasavīti janesi nipphādesi. Āsajjāti āsādetvā ghaṭṭetvā. Na me pāpaṃ vipaccatīti mama pāpaṃ na paccati. Nipphalaṃ etanti kiṃ nu tvaṃ evaṃ maññasi? Mā evaṃ maññi, atthi tayā katassa pāpassa phalanti dīpeti. Kiñcananti maddituṃ samatthaṃ rāgakiñcanādi kilesajātaṃ. Ābhassarā yathāti yathā ābhassarā devā sappītikajjhānena yāpentā pītibhakkhā nāma honti, evaṃ bhavissāmāti. Aṭṭhamaṃ.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / သံယုတ္တနိကာယ • Saṃyuttanikāya / ၈. ပိဏ္ဍသုတ္တံ • 8. Piṇḍasuttaṃ
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / သံယုတ္တနိကာယ (ဋီကာ) • Saṃyuttanikāya (ṭīkā) / ၈. ပိဏ္ဍသုတ္တဝဏ္ဏနာ • 8. Piṇḍasuttavaṇṇanā
