| Library / Tipiṭaka / තිපිටක • Tipiṭaka / සංයුත්‌තනිකාය (ටීකා) • Saṃyuttanikāya (ṭīkā) |
8. පිණ්‌ඩසුත්‌තවණ්‌ණනා
8. Piṇḍasuttavaṇṇanā
154. තත්‌ථ තත්‌ථාති තස්‌මිං තස්‌මිං ඤාතිමිත්‌තකුලෙ. පාහුනකානීති පහිතබ්‌බපණ්‌ණාකාරානි. ආගන්‌තුකපණ්‌ණාකාරානීති ආගන්‌තුකානං උපගතානං දාතබ්‌බපණ්‌ණාකාරානි. සයංචරදිවසෙති කුමාරකානඤ්‌ච කුමාරිකානඤ්‌ච සයං අත්‌තනා චරිතබ්‌බඡණදිවසෙ. ඉදානි තමත්‌ථං විත්‌ථාරතො දස්‌සෙන්‌තො ‘‘සමවයජාතිගොත්‌තා’’තිආදිමාහ. සමවයසමජාතිකසමගොත්‌තාති පච්‌චෙකං සම-සද්‌දො යොජෙතබ්‌බො. ගොත්‌තසමතා ච ආවාහවිවාහයොග්‍යතාවසෙන දට්‌ඨබ්‌බා, න එකගොත්‌තතාවසෙන. තතො තතො ගාමතො. අඤ්‌ඤස්‌මිං දාතබ්‌බෙ අසති. ඡණවසෙන පහිණිතුං සම්‌පාදිතං පූවං ඡණපූවං. තාසං සම්‌පත්‌තියාති තාසං දානං ධම්‌මස්‌සවනඤ්‌චාති තස්‌සා දුවිධායපි සම්‌පත්‌තියා.
154.Tattha tatthāti tasmiṃ tasmiṃ ñātimittakule. Pāhunakānīti pahitabbapaṇṇākārāni. Āgantukapaṇṇākārānīti āgantukānaṃ upagatānaṃ dātabbapaṇṇākārāni. Sayaṃcaradivaseti kumārakānañca kumārikānañca sayaṃ attanā caritabbachaṇadivase. Idāni tamatthaṃ vitthārato dassento ‘‘samavayajātigottā’’tiādimāha. Samavayasamajātikasamagottāti paccekaṃ sama-saddo yojetabbo. Gottasamatā ca āvāhavivāhayogyatāvasena daṭṭhabbā, na ekagottatāvasena. Tato tato gāmato. Aññasmiṃ dātabbe asati. Chaṇavasena pahiṇituṃ sampāditaṃ pūvaṃ chaṇapūvaṃ. Tāsaṃ sampattiyāti tāsaṃ dānaṃ dhammassavanañcāti tassā duvidhāyapi sampattiyā.
ඤාණං නාම ආවජ්‌ජනපුබ්‌බකං, තස්‌මා අජානනස්‌ස ‘‘අනාවජ්‌ජනතායා’’ති කාරණං වත්‌වා සෙසකාරණං වදන්‌තො ‘‘බුද්‌ධාන’’න්‌තිආදිමාහ. උපචාරභෙදන්‌ති බුද්‌ධං දිස්‌වා මනුස්‌සෙහි කාතබ්‌බඋපචාරස්‌ස භින්‌දනං. භින්‌දිතුන්‌ති විධමිතුං.
Ñāṇaṃ nāma āvajjanapubbakaṃ, tasmā ajānanassa ‘‘anāvajjanatāyā’’ti kāraṇaṃ vatvā sesakāraṇaṃ vadanto ‘‘buddhāna’’ntiādimāha. Upacārabhedanti buddhaṃ disvā manussehi kātabbaupacārassa bhindanaṃ. Bhinditunti vidhamituṃ.
භගවා පනාති පනසද්‌දො විසෙසත්‌ථජොතකො. තෙන න කෙවලං භගවා උප්‌පණ්‌ඩනං පරිහරන්‌තො තං ගාමං න පුන පාවිසි, අථ ඛො මාරං අනුකම්‌පන්‌තොති ඉදං විසෙසං ජොතෙති.
Bhagavā panāti panasaddo visesatthajotako. Tena na kevalaṃ bhagavā uppaṇḍanaṃ pariharanto taṃ gāmaṃ na puna pāvisi, atha kho māraṃ anukampantoti idaṃ visesaṃ joteti.
ජනෙසීති අපුඤ්‌ඤං ජනෙසි, ජනෙන්‌තො ච යථා තතො ආයතිං ථිරතරං මහන්‌තං දුක්‌ඛං නිප්‌ඵජ්‌ජිස්‌සති, එවං නිප්‌ඵාදෙසි. ආසජ්‌ජනන්‌ති එත්‌ථ නන්‌ති නිපාතමත්‌තං. කිඤ්‌චති මද්‌දති අභිභවතීති කිඤ්‌චනන්‌ති ආහ ‘‘මද්‌දිතුං සමත්‌ථ’’න්‌ති.
Janesīti apuññaṃ janesi, janento ca yathā tato āyatiṃ thirataraṃ mahantaṃ dukkhaṃ nipphajjissati, evaṃ nipphādesi. Āsajjananti ettha nanti nipātamattaṃ. Kiñcati maddati abhibhavatīti kiñcananti āha ‘‘maddituṃ samattha’’nti.
පිණ්‌ඩසුත්‌තවණ්‌ණනා නිට්‌ඨිතා.
Piṇḍasuttavaṇṇanā niṭṭhitā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / සංයුත්‌තනිකාය • Saṃyuttanikāya / 8. පිණ්‌ඩසුත්‌තං • 8. Piṇḍasuttaṃ
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 8. පිණ්‌ඩසුත්‌තවණ්‌ණනා • 8. Piṇḍasuttavaṇṇanā
