| Library / Tipiṭaka / ਤਿਪਿਟਕ • Tipiṭaka / ਸਂਯੁਤ੍ਤਨਿਕਾਯ (ਟੀਕਾ) • Saṃyuttanikāya (ṭīkā) |
੮. ਪਿਣ੍ਡਸੁਤ੍ਤવਣ੍ਣਨਾ
8. Piṇḍasuttavaṇṇanā
੧੫੪. ਤਤ੍ਥ ਤਤ੍ਥਾਤਿ ਤਸ੍ਮਿਂ ਤਸ੍ਮਿਂ ਞਾਤਿਮਿਤ੍ਤਕੁਲੇ। ਪਾਹੁਨਕਾਨੀਤਿ ਪਹਿਤਬ੍ਬਪਣ੍ਣਾਕਾਰਾਨਿ। ਆਗਨ੍ਤੁਕਪਣ੍ਣਾਕਾਰਾਨੀਤਿ ਆਗਨ੍ਤੁਕਾਨਂ ਉਪਗਤਾਨਂ ਦਾਤਬ੍ਬਪਣ੍ਣਾਕਾਰਾਨਿ। ਸਯਂਚਰਦਿવਸੇਤਿ ਕੁਮਾਰਕਾਨਞ੍ਚ ਕੁਮਾਰਿਕਾਨਞ੍ਚ ਸਯਂ ਅਤ੍ਤਨਾ ਚਰਿਤਬ੍ਬਛਣਦਿવਸੇ। ਇਦਾਨਿ ਤਮਤ੍ਥਂ વਿਤ੍ਥਾਰਤੋ ਦਸ੍ਸੇਨ੍ਤੋ ‘‘ਸਮવਯਜਾਤਿਗੋਤ੍ਤਾ’’ਤਿਆਦਿਮਾਹ। ਸਮવਯਸਮਜਾਤਿਕਸਮਗੋਤ੍ਤਾਤਿ ਪਚ੍ਚੇਕਂ ਸਮ-ਸਦ੍ਦੋ ਯੋਜੇਤਬ੍ਬੋ। ਗੋਤ੍ਤਸਮਤਾ ਚ ਆવਾਹવਿવਾਹਯੋਗ੍ਯਤਾવਸੇਨ ਦਟ੍ਠਬ੍ਬਾ, ਨ ਏਕਗੋਤ੍ਤਤਾવਸੇਨ। ਤਤੋ ਤਤੋ ਗਾਮਤੋ। ਅਞ੍ਞਸ੍ਮਿਂ ਦਾਤਬ੍ਬੇ ਅਸਤਿ। ਛਣવਸੇਨ ਪਹਿਣਿਤੁਂ ਸਮ੍ਪਾਦਿਤਂ ਪੂવਂ ਛਣਪੂવਂ। ਤਾਸਂ ਸਮ੍ਪਤ੍ਤਿਯਾਤਿ ਤਾਸਂ ਦਾਨਂ ਧਮ੍ਮਸ੍ਸવਨਞ੍ਚਾਤਿ ਤਸ੍ਸਾ ਦੁવਿਧਾਯਪਿ ਸਮ੍ਪਤ੍ਤਿਯਾ।
154.Tattha tatthāti tasmiṃ tasmiṃ ñātimittakule. Pāhunakānīti pahitabbapaṇṇākārāni. Āgantukapaṇṇākārānīti āgantukānaṃ upagatānaṃ dātabbapaṇṇākārāni. Sayaṃcaradivaseti kumārakānañca kumārikānañca sayaṃ attanā caritabbachaṇadivase. Idāni tamatthaṃ vitthārato dassento ‘‘samavayajātigottā’’tiādimāha. Samavayasamajātikasamagottāti paccekaṃ sama-saddo yojetabbo. Gottasamatā ca āvāhavivāhayogyatāvasena daṭṭhabbā, na ekagottatāvasena. Tato tato gāmato. Aññasmiṃ dātabbe asati. Chaṇavasena pahiṇituṃ sampāditaṃ pūvaṃ chaṇapūvaṃ. Tāsaṃ sampattiyāti tāsaṃ dānaṃ dhammassavanañcāti tassā duvidhāyapi sampattiyā.
ਞਾਣਂ ਨਾਮ ਆવਜ੍ਜਨਪੁਬ੍ਬਕਂ, ਤਸ੍ਮਾ ਅਜਾਨਨਸ੍ਸ ‘‘ਅਨਾવਜ੍ਜਨਤਾਯਾ’’ਤਿ ਕਾਰਣਂ વਤ੍વਾ ਸੇਸਕਾਰਣਂ વਦਨ੍ਤੋ ‘‘ਬੁਦ੍ਧਾਨ’’ਨ੍ਤਿਆਦਿਮਾਹ। ਉਪਚਾਰਭੇਦਨ੍ਤਿ ਬੁਦ੍ਧਂ ਦਿਸ੍વਾ ਮਨੁਸ੍ਸੇਹਿ ਕਾਤਬ੍ਬਉਪਚਾਰਸ੍ਸ ਭਿਨ੍ਦਨਂ। ਭਿਨ੍ਦਿਤੁਨ੍ਤਿ વਿਧਮਿਤੁਂ।
Ñāṇaṃ nāma āvajjanapubbakaṃ, tasmā ajānanassa ‘‘anāvajjanatāyā’’ti kāraṇaṃ vatvā sesakāraṇaṃ vadanto ‘‘buddhāna’’ntiādimāha. Upacārabhedanti buddhaṃ disvā manussehi kātabbaupacārassa bhindanaṃ. Bhinditunti vidhamituṃ.
ਭਗવਾ ਪਨਾਤਿ ਪਨਸਦ੍ਦੋ વਿਸੇਸਤ੍ਥਜੋਤਕੋ। ਤੇਨ ਨ ਕੇવਲਂ ਭਗવਾ ਉਪ੍ਪਣ੍ਡਨਂ ਪਰਿਹਰਨ੍ਤੋ ਤਂ ਗਾਮਂ ਨ ਪੁਨ ਪਾવਿਸਿ, ਅਥ ਖੋ ਮਾਰਂ ਅਨੁਕਮ੍ਪਨ੍ਤੋਤਿ ਇਦਂ વਿਸੇਸਂ ਜੋਤੇਤਿ।
Bhagavā panāti panasaddo visesatthajotako. Tena na kevalaṃ bhagavā uppaṇḍanaṃ pariharanto taṃ gāmaṃ na puna pāvisi, atha kho māraṃ anukampantoti idaṃ visesaṃ joteti.
ਜਨੇਸੀਤਿ ਅਪੁਞ੍ਞਂ ਜਨੇਸਿ, ਜਨੇਨ੍ਤੋ ਚ ਯਥਾ ਤਤੋ ਆਯਤਿਂ ਥਿਰਤਰਂ ਮਹਨ੍ਤਂ ਦੁਕ੍ਖਂ ਨਿਪ੍ਫਜ੍ਜਿਸ੍ਸਤਿ, ਏવਂ ਨਿਪ੍ਫਾਦੇਸਿ। ਆਸਜ੍ਜਨਨ੍ਤਿ ਏਤ੍ਥ ਨਨ੍ਤਿ ਨਿਪਾਤਮਤ੍ਤਂ। ਕਿਞ੍ਚਤਿ ਮਦ੍ਦਤਿ ਅਭਿਭવਤੀਤਿ ਕਿਞ੍ਚਨਨ੍ਤਿ ਆਹ ‘‘ਮਦ੍ਦਿਤੁਂ ਸਮਤ੍ਥ’’ਨ੍ਤਿ।
Janesīti apuññaṃ janesi, janento ca yathā tato āyatiṃ thirataraṃ mahantaṃ dukkhaṃ nipphajjissati, evaṃ nipphādesi. Āsajjananti ettha nanti nipātamattaṃ. Kiñcati maddati abhibhavatīti kiñcananti āha ‘‘maddituṃ samattha’’nti.
ਪਿਣ੍ਡਸੁਤ੍ਤવਣ੍ਣਨਾ ਨਿਟ੍ਠਿਤਾ।
Piṇḍasuttavaṇṇanā niṭṭhitā.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਸੁਤ੍ਤਪਿਟਕ • Suttapiṭaka / ਸਂਯੁਤ੍ਤਨਿਕਾਯ • Saṃyuttanikāya / ੮. ਪਿਣ੍ਡਸੁਤ੍ਤਂ • 8. Piṇḍasuttaṃ
ਅਟ੍ਠਕਥਾ • Aṭṭhakathā / ਸੁਤ੍ਤਪਿਟਕ (ਅਟ੍ਠਕਥਾ) • Suttapiṭaka (aṭṭhakathā) / ਸਂਯੁਤ੍ਤਨਿਕਾਯ (ਅਟ੍ਠਕਥਾ) • Saṃyuttanikāya (aṭṭhakathā) / ੮. ਪਿਣ੍ਡਸੁਤ੍ਤવਣ੍ਣਨਾ • 8. Piṇḍasuttavaṇṇanā
