| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
৯. পিণ্ডোলভারদ্ৰাজসুত্তং
9. Piṇḍolabhāradvājasuttaṃ
৫১৯. এৰং মে সুতং – একং সমযং ভগৰা কোসম্বিযং ৰিহরতি ঘোসিতারামে। তেন খো পন সমযেন আযস্মতা পিণ্ডোলভারদ্ৰাজেন অঞ্ঞা ব্যাকতা হোতি – ‘‘খীণা জাতি, ৰুসিতং ব্রহ্মচরিযং, কতং করণীযং , নাপরং ইত্থত্তাযাতি পজানামী’’তি। অথ খো সম্বহুলা ভিক্খূ যেন ভগৰা তেনুপসঙ্কমিংসু; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদিংসু। একমন্তং নিসিন্না খো তে ভিক্খূ ভগৰন্তং এতদৰোচুং –
519. Evaṃ me sutaṃ – ekaṃ samayaṃ bhagavā kosambiyaṃ viharati ghositārāme. Tena kho pana samayena āyasmatā piṇḍolabhāradvājena aññā byākatā hoti – ‘‘khīṇā jāti, vusitaṃ brahmacariyaṃ, kataṃ karaṇīyaṃ , nāparaṃ itthattāyāti pajānāmī’’ti. Atha kho sambahulā bhikkhū yena bhagavā tenupasaṅkamiṃsu; upasaṅkamitvā bhagavantaṃ abhivādetvā ekamantaṃ nisīdiṃsu. Ekamantaṃ nisinnā kho te bhikkhū bhagavantaṃ etadavocuṃ –
‘‘আযস্মতা, ভন্তে, পিণ্ডোলভারদ্ৰাজেন অঞ্ঞা ব্যাকতা – ‘খীণা জাতি, ৰুসিতং ব্রহ্মচরিযং, কতং করণীযং, নাপরং ইত্থত্তাযা’তি পজানামীতি। কিং নু খো, ভন্তে, অত্থৰসং সম্পস্সমানেন আযস্মতা পিণ্ডোলভারদ্ৰাজেন অঞ্ঞা ব্যাকতা – ‘খীণা জাতি, ৰুসিতং ব্রহ্মচরিযং, কতং করণীযং, নাপরং ইত্থত্তাযা’তি পজানামী’’তি?
‘‘Āyasmatā, bhante, piṇḍolabhāradvājena aññā byākatā – ‘khīṇā jāti, vusitaṃ brahmacariyaṃ, kataṃ karaṇīyaṃ, nāparaṃ itthattāyā’ti pajānāmīti. Kiṃ nu kho, bhante, atthavasaṃ sampassamānena āyasmatā piṇḍolabhāradvājena aññā byākatā – ‘khīṇā jāti, vusitaṃ brahmacariyaṃ, kataṃ karaṇīyaṃ, nāparaṃ itthattāyā’ti pajānāmī’’ti?
‘‘তিণ্ণন্নং খো, ভিক্খৰে, ইন্দ্রিযানং ভাৰিতত্তা বহুলীকতত্তা পিণ্ডোলভারদ্ৰাজেন ভিক্খুনা অঞ্ঞা ব্যাকতা – ‘খীণা জাতি, ৰুসিতং ব্রহ্মচরিযং, কতং করণীযং, নাপরং ইত্থত্তাযা’তি পজানামীতি। কতমেসং তিণ্ণন্নং? সতিন্দ্রিযস্স, সমাধিন্দ্রিযস্স, পঞ্ঞিন্দ্রিযস্স – ইমেসং খো, ভিক্খৰে, তিণ্ণন্নং ইন্দ্রিযানং ভাৰিতত্তা বহুলীকতত্তা পিণ্ডোলভারদ্ৰাজেন ভিক্খুনা অঞ্ঞা ব্যাকতা – ‘খীণা জাতি, ৰুসিতং ব্রহ্মচরিযং, কতং করণীযং, নাপরং ইত্থত্তাযা’তি পজানামীতি। ইমানি চ, ভিক্খৰে, তীণিন্দ্রিযানি কিমন্তানি? খযন্তানি। কিস্স খযন্তানি? জাতিজরামরণস্স। ‘জাতিজরামরণং খয’ন্তি খো, ভিক্খৰে, সম্পস্সমানেন পিণ্ডোলভারদ্ৰাজেন ভিক্খুনা অঞ্ঞা ব্যাকতা – ‘খীণা জাতি, ৰুসিতং ব্রহ্মচরিযং, কতং করণীযং, নাপরং ইত্থত্তাযা’তি পজানামী’’তি। নৰমং।
‘‘Tiṇṇannaṃ kho, bhikkhave, indriyānaṃ bhāvitattā bahulīkatattā piṇḍolabhāradvājena bhikkhunā aññā byākatā – ‘khīṇā jāti, vusitaṃ brahmacariyaṃ, kataṃ karaṇīyaṃ, nāparaṃ itthattāyā’ti pajānāmīti. Katamesaṃ tiṇṇannaṃ? Satindriyassa, samādhindriyassa, paññindriyassa – imesaṃ kho, bhikkhave, tiṇṇannaṃ indriyānaṃ bhāvitattā bahulīkatattā piṇḍolabhāradvājena bhikkhunā aññā byākatā – ‘khīṇā jāti, vusitaṃ brahmacariyaṃ, kataṃ karaṇīyaṃ, nāparaṃ itthattāyā’ti pajānāmīti. Imāni ca, bhikkhave, tīṇindriyāni kimantāni? Khayantāni. Kissa khayantāni? Jātijarāmaraṇassa. ‘Jātijarāmaraṇaṃ khaya’nti kho, bhikkhave, sampassamānena piṇḍolabhāradvājena bhikkhunā aññā byākatā – ‘khīṇā jāti, vusitaṃ brahmacariyaṃ, kataṃ karaṇīyaṃ, nāparaṃ itthattāyā’ti pajānāmī’’ti. Navamaṃ.
