| Library / Tipiṭaka / திபிடக • Tipiṭaka / அபதா³ன-அட்ட²கதா² • Apadāna-aṭṭhakathā |
3-8. பிண்டோ³லபா⁴ரத்³வாஜத்தே²ரஅபதா³னவண்ணனா
3-8. Piṇḍolabhāradvājattheraapadānavaṇṇanā
பது³முத்தரோ நாம ஜினோதிஆதி³கங் ஆயஸ்மதோ பிண்டோ³லபா⁴ரத்³வாஜஸ்ஸ அபதா³னங். அயம்பி புரிமபு³த்³தே⁴ஸு கதாதி⁴காரோ தத்த² தத்த² ப⁴வே விவட்டூபனிஸ்ஸயானி புஞ்ஞானி உபசினந்தோ பது³முத்தரஸ்ஸ ப⁴க³வதோ காலே ஸீஹயோனியங் நிப்³ப³த்தித்வா பப்³ப³தபாதே³ கு³ஹாயங் விஹாஸி. ப⁴க³வா தஸ்ஸ அனுக்³க³ஹங் காதுங் கோ³சராய பக்கந்தகாலே தஸ்ஸ ஸயனகு³ஹங் பவிஸித்வா நிரோத⁴ங் ஸமாபஜ்ஜித்வா நிஸீதி³. ஸீஹோ கோ³சரங் க³ஹெத்வா நிவத்தோ கு³ஹத்³வாரே ட²த்வா ப⁴க³வந்தங் தி³ஸ்வா ஹட்ட²துட்டோ² ஜலஜத²லஜபுப்பே²ஹி பூஜங் கத்வா சித்தங் பஸாதெ³ந்தோ ப⁴க³வதோ ஆரக்க²ணத்தா²ய அஞ்ஞே வாளமிகே³ அபனேதுங் தீஸு வேலாஸு ஸீஹனாத³ங் நத³ந்தோ பு³த்³த⁴க³தாய ஸதியா அட்டா²ஸி. யதா² பட²மதி³வஸே, ஏவங் ஸத்தாஹங் பூஜேஸி. ப⁴க³வா ‘‘ஸத்தாஹச்சயேன நிரோதா⁴ வுட்ட²ஹித்வா வட்டிஸ்ஸதி இமஸ்ஸ எத்தகோ உபனிஸ்ஸயோ’’தி தஸ்ஸ பஸ்ஸந்தஸ்ஸேவ ஆகாஸங் பக்க²ந்தி³த்வா விஹாரமேவ க³தோ.
Padumuttaronāma jinotiādikaṃ āyasmato piṇḍolabhāradvājassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto padumuttarassa bhagavato kāle sīhayoniyaṃ nibbattitvā pabbatapāde guhāyaṃ vihāsi. Bhagavā tassa anuggahaṃ kātuṃ gocarāya pakkantakāle tassa sayanaguhaṃ pavisitvā nirodhaṃ samāpajjitvā nisīdi. Sīho gocaraṃ gahetvā nivatto guhadvāre ṭhatvā bhagavantaṃ disvā haṭṭhatuṭṭho jalajathalajapupphehi pūjaṃ katvā cittaṃ pasādento bhagavato ārakkhaṇatthāya aññe vāḷamige apanetuṃ tīsu velāsu sīhanādaṃ nadanto buddhagatāya satiyā aṭṭhāsi. Yathā paṭhamadivase, evaṃ sattāhaṃ pūjesi. Bhagavā ‘‘sattāhaccayena nirodhā vuṭṭhahitvā vaṭṭissati imassa ettako upanissayo’’ti tassa passantasseva ākāsaṃ pakkhanditvā vihārameva gato.
ஸீஹோ பு³த்³த⁴வியோக³து³க்க²ங் அதி⁴வாஸேதுங் அஸக்கொந்தோ காலங் கத்வா ஹங்ஸவதீனக³ரே மஹாபோ⁴க³குலே நிப்³ப³த்தித்வா வயப்பத்தோ நக³ரவாஸீஹி ஸத்³தி⁴ங் விஹாரங் க³ந்த்வா ஸத்து² த⁴ம்மதே³ஸனங் ஸுத்வா பஸன்னோ ஸத்தாஹங் பு³த்³த⁴ப்பமுக²ஸ்ஸ பி⁴க்கு²ஸங்க⁴ஸ்ஸ மஹாதா³னங் பவத்தெத்வா யாவஜீவங் புஞ்ஞானி கத்வா அபராபரங் தே³வமனுஸ்ஸேஸு ஸங்ஸரந்தோ அம்ஹாகங் ப⁴க³வதோ காலே கோஸம்பி³யங் ரஞ்ஞோ உதே³னஸ்ஸ புரோஹிதஸ்ஸ புத்தோ ஹுத்வா நிப்³ப³த்தி. பா⁴ரத்³வாஜோதிஸ்ஸ நாமங் அஹோஸி. ஸோ வயப்பதோ தயோ வேதே³ உக்³க³ஹெத்வா பஞ்ச மாணவகஸதானி மந்தே வாசெந்தோ மஹக்³க⁴ஸபா⁴வேன அனநுரூபாசாரத்தா தேஹி பரிச்சத்தோ ராஜக³ஹங் க³ந்த்வா ப⁴க³வதோ பி⁴க்கு²ஸங்க⁴ஸ்ஸ ச லாப⁴ஸக்காரங் தி³ஸ்வா ஸாஸனே பப்³ப³ஜித்வா போ⁴ஜனே அமத்தஞ்ஞூ ஹுத்வா விஹரதி. ஸத்தா²ரா உபாயேன மத்தஞ்ஞுதாய பதிட்டா²பெந்தோ விபஸ்ஸனங் பட்ட²பெத்வா நசிரஸ்ஸேவ ச²ளபி⁴ஞ்ஞோ அஹோஸி. ச²ளபி⁴ஞ்ஞோ பன ஹுத்வா ப⁴க³வதோ ஸம்முகா² ‘‘யங் ஸாவகேஹி பத்தப்³ப³ங், தங் மயா அனுப்பத்த’’ந்தி, பி⁴க்கு²ஸங்கே⁴ ச ‘‘யஸ்ஸ மக்³கே³ வா ப²லே வா கங்கா² அத்தி², ஸோ மங் புச்ச²தூ’’தி ஸீஹனாத³ங் நதி³. தேன தங் ப⁴க³வா – ‘‘ஏதத³க்³க³ங், பி⁴க்க²வே, மம ஸாவகானங் பி⁴க்கூ²னங் ஸீஹனாதி³கானங் யதி³த³ங் பிண்டோ³லபா⁴ரத்³வாஜோ’’தி (அ॰ நி॰ 1.188, 195) ஏதத³க்³கே³ ட²பேஸி.
Sīho buddhaviyogadukkhaṃ adhivāsetuṃ asakkonto kālaṃ katvā haṃsavatīnagare mahābhogakule nibbattitvā vayappatto nagaravāsīhi saddhiṃ vihāraṃ gantvā satthu dhammadesanaṃ sutvā pasanno sattāhaṃ buddhappamukhassa bhikkhusaṅghassa mahādānaṃ pavattetvā yāvajīvaṃ puññāni katvā aparāparaṃ devamanussesu saṃsaranto amhākaṃ bhagavato kāle kosambiyaṃ rañño udenassa purohitassa putto hutvā nibbatti. Bhāradvājotissa nāmaṃ ahosi. So vayappato tayo vede uggahetvā pañca māṇavakasatāni mante vācento mahagghasabhāvena ananurūpācārattā tehi pariccatto rājagahaṃ gantvā bhagavato bhikkhusaṅghassa ca lābhasakkāraṃ disvā sāsane pabbajitvā bhojane amattaññū hutvā viharati. Satthārā upāyena mattaññutāya patiṭṭhāpento vipassanaṃ paṭṭhapetvā nacirasseva chaḷabhiñño ahosi. Chaḷabhiñño pana hutvā bhagavato sammukhā ‘‘yaṃ sāvakehi pattabbaṃ, taṃ mayā anuppatta’’nti, bhikkhusaṅghe ca ‘‘yassa magge vā phale vā kaṅkhā atthi, so maṃ pucchatū’’ti sīhanādaṃ nadi. Tena taṃ bhagavā – ‘‘etadaggaṃ, bhikkhave, mama sāvakānaṃ bhikkhūnaṃ sīhanādikānaṃ yadidaṃ piṇḍolabhāradvājo’’ti (a. ni. 1.188, 195) etadagge ṭhapesi.
613. ஏவங் ஏதத³க்³க³ங் டா²னங் பத்வா புப்³பே³ கதபுஞ்ஞஸம்பா⁴ரங் ஸரித்வா ஸோமனஸ்ஸவஸேன அத்தனோ புஞ்ஞகம்மாபதா³னங் விபா⁴வெந்தோ பது³முத்தரோதிஆதி³மாஹ. தஸ்ஸத்தோ² ஹெட்டா² வுத்தோவ. புரதோ ஹிமவந்தஸ்ஸாதி ஹிமாலயபப்³ப³ததோ புப்³ப³தி³ஸாபா⁴கே³தி அத்தோ². சித்தகூடே வஸீ ததா³தி யதா³ அஹங் ஸீஹோ மிக³ராஜா ஹுத்வா ஹிமவந்தபப்³ப³தஸமீபே வஸாமி, ததா³ பது³முத்தரோ நாம ஸத்தா² அனேகேஹி ச ஓஸதே⁴ஹி, அனேகேஹி ச ரதனேஹி சித்தவிசித்ததாய சித்தகூடே சித்தபப்³ப³தஸிக²ரே வஸீதி ஸம்ப³ந்தோ⁴.
613. Evaṃ etadaggaṃ ṭhānaṃ patvā pubbe katapuññasambhāraṃ saritvā somanassavasena attano puññakammāpadānaṃ vibhāvento padumuttarotiādimāha. Tassattho heṭṭhā vuttova. Purato himavantassāti himālayapabbatato pubbadisābhāgeti attho. Cittakūṭevasī tadāti yadā ahaṃ sīho migarājā hutvā himavantapabbatasamīpe vasāmi, tadā padumuttaro nāma satthā anekehi ca osadhehi, anekehi ca ratanehi cittavicittatāya cittakūṭe cittapabbatasikhare vasīti sambandho.
614. அபீ⁴தரூபோ தத்தா²ஸிந்தி அபீ⁴தஸபா⁴வோ நிப்³ப⁴யஸபா⁴வோ மிக³ராஜா தத்த² ஆஸிங் அஹோஸிந்தி அத்தோ². சதுக்கமோதி சதூஹி தி³ஸாஹி கமோ க³ந்துங் ஸமத்தோ². யஸ்ஸ ஸத்³த³ங் ஸுணித்வானாதி யஸ்ஸ மிக³ரஞ்ஞோ ஸீஹனாத³ங் ஸுத்வா ப³ஹுஜ்ஜனா ப³ஹுஸத்தா விக்க²ம்ப⁴ந்தி விஸேஸேன க²ம்ப⁴ந்தி பா⁴யந்தி.
614.Abhītarūpo tatthāsinti abhītasabhāvo nibbhayasabhāvo migarājā tattha āsiṃ ahosinti attho. Catukkamoti catūhi disāhi kamo gantuṃ samattho. Yassa saddaṃ suṇitvānāti yassa migarañño sīhanādaṃ sutvā bahujjanā bahusattā vikkhambhanti visesena khambhanti bhāyanti.
615. ஸுபு²ல்லங் பது³மங் க³ய்ஹாதி ப⁴க³வதி பஸாதே³ன ஸுபுப்பி²தபது³மபுப்ப²ங் ட³ங்ஸித்வா. நராஸப⁴ங் நரானங் ஆஸப⁴ங் உத்தமங் ஸெட்ட²ங் ஸம்பு³த்³த⁴ங் உபக³ச்சி²ங், ஸமீபங் அக³மிந்தி அத்தோ². வுட்டி²தஸ்ஸ ஸமாதி⁴ம்ஹாதி நிரோத⁴ஸமாபத்திதோ வுட்டி²தஸ்ஸ பு³த்³த⁴ஸ்ஸ தங் புப்ப²ங் அபி⁴ரோபயிங் பூஜேஸிந்தி அத்தோ².
615.Suphullaṃ padumaṃ gayhāti bhagavati pasādena supupphitapadumapupphaṃ ḍaṃsitvā. Narāsabhaṃ narānaṃ āsabhaṃ uttamaṃ seṭṭhaṃ sambuddhaṃ upagacchiṃ, samīpaṃ agaminti attho. Vuṭṭhitassa samādhimhāti nirodhasamāpattito vuṭṭhitassa buddhassa taṃ pupphaṃ abhiropayiṃ pūjesinti attho.
616. சதுத்³தி³ஸங் நமஸ்ஸித்வாதி சதூஸு தி³ஸாஸு நமஸ்ஸித்வா ஸகங் சித்தங் அத்தனோ சித்தங் பஸாதெ³த்வா ஆத³ரேன பதிட்ட²பெத்வா ஸீஹனாத³ங் அபீ⁴தனாத³ங் அனதி³ங் கோ⁴ஸேஸிந்தி அத்தோ².
616.Catuddisaṃ namassitvāti catūsu disāsu namassitvā sakaṃ cittaṃ attano cittaṃ pasādetvā ādarena patiṭṭhapetvā sīhanādaṃ abhītanādaṃ anadiṃ ghosesinti attho.
617. ததோ பு³த்³தே⁴ன தி³ன்னப்³யாகரணங் பகாஸெந்தோ பது³முத்தரோதிஆதி³மாஹ. தங் உத்தானத்த²மேவ.
617. Tato buddhena dinnabyākaraṇaṃ pakāsento padumuttarotiādimāha. Taṃ uttānatthameva.
618. வத³தங் ஸெட்டோ²தி ‘‘மயங் பு³த்³தா⁴, மயங் பு³த்³தா⁴’’தி வத³ந்தானங் அஞ்ஞதித்தி²யானங் ஸெட்டோ² உத்தமோ பு³த்³தோ⁴ ஆக³தோதி ஸம்ப³ந்தோ⁴. தஸ்ஸ ஆக³தஸ்ஸ ப⁴க³வதோ தங் த⁴ம்மங் ஸொஸ்ஸாம ஸுணிஸ்ஸாமாதி அத்தோ².
618.Vadataṃ seṭṭhoti ‘‘mayaṃ buddhā, mayaṃ buddhā’’ti vadantānaṃ aññatitthiyānaṃ seṭṭho uttamo buddho āgatoti sambandho. Tassa āgatassa bhagavato taṃ dhammaṃ sossāma suṇissāmāti attho.
619. தேஸங் ஹாஸபரேதானந்தி ஹாஸேஹி ஸோமனஸ்ஸேஹி பரேதானங் அபி⁴பூ⁴தானங் ஸமன்னாக³தானங் தேஸங் தே³வமனுஸ்ஸானங். லோகனாயகோதி லோகஸ்ஸ நாயகோ ஸக்³க³மொக்க²ஸம்பாபகோ மம ஸத்³த³ங் மய்ஹங் ஸீஹனாத³ங் பகித்தேஸி பகாஸேஸி கதே²ஸி, தீ³க⁴த³ஸ்ஸீ அனாக³தகாலத³ஸ்ஸீ மஹாமுனி முனீனமந்தரே மஹந்தோ முனி. ஸேஸகா³தா² ஸுவிஞ்ஞெய்யமேவ.
619.Tesaṃhāsaparetānanti hāsehi somanassehi paretānaṃ abhibhūtānaṃ samannāgatānaṃ tesaṃ devamanussānaṃ. Lokanāyakoti lokassa nāyako saggamokkhasampāpako mama saddaṃ mayhaṃ sīhanādaṃ pakittesi pakāsesi kathesi, dīghadassī anāgatakāladassī mahāmuni munīnamantare mahanto muni. Sesagāthā suviññeyyameva.
622. நாமேன பது³மோ நாம சக்கவத்தீ ஹுத்வா சதுஸட்டி²யா ஜாதியா இஸ்ஸரியங் இஸ்ஸரபா⁴வங் ரஜ்ஜங் காரயிஸ்ஸதீதி அத்தோ².
622. Nāmena padumo nāma cakkavattī hutvā catusaṭṭhiyā jātiyā issariyaṃ issarabhāvaṃ rajjaṃ kārayissatīti attho.
623. கப்பஸதஸஹஸ்ஸம்ஹீதி ஸாம்யத்தே² பு⁴ம்மவசனங், கப்பஸதஸஹஸ்ஸானங் பரியோஸானேதி அத்தோ².
623.Kappasatasahassamhīti sāmyatthe bhummavacanaṃ, kappasatasahassānaṃ pariyosāneti attho.
624. பகாஸிதே பாவசனேதி தேன கோ³தமேன ப⁴க³வதா பிடகத்தயே பகாஸிதே தே³ஸிதேதி அத்தோ². ப்³ரஹ்மப³ந்து⁴ ப⁴விஸ்ஸதீதி ததா³ கோ³தமஸ்ஸ ப⁴க³வதோ காலே அயங் ஸீஹோ மிக³ராஜா ப்³ராஹ்மணகுலே நிப்³ப³த்திஸ்ஸதீதி அத்தோ². ப்³ரஹ்மஞ்ஞா அபி⁴னிக்க²ம்மாதி ப்³ராஹ்மணகுலதோ நிக்க²மித்வா தஸ்ஸ ப⁴க³வதோ ஸாஸனே பப்³ப³ஜிஸ்ஸதீதி ஸம்ப³ந்தோ⁴.
624.Pakāsite pāvacaneti tena gotamena bhagavatā piṭakattaye pakāsite desiteti attho. Brahmabandhu bhavissatīti tadā gotamassa bhagavato kāle ayaṃ sīho migarājā brāhmaṇakule nibbattissatīti attho. Brahmaññā abhinikkhammāti brāhmaṇakulato nikkhamitvā tassa bhagavato sāsane pabbajissatīti sambandho.
625. பதா⁴னபஹிதத்தோதி வீரியகரணத்த²ங் பேஸிதசித்தோ. உபதி⁴ஸங்கா²தானங் கிலேஸானங் அபா⁴வேன நிருபதி⁴. கிலேஸத³ரதா²னங் அபா⁴வேன உபஸந்தோ. ஸப்³பா³ஸவே ஸகலாஸவே பரிஞ்ஞாய பஹாய அனாஸவோ நிக்கிலேஸோ நிப்³பா³யிஸ்ஸதி க²ந்த⁴பரினிப்³பா³னேன நிப்³பு³தோ ப⁴விஸ்ஸதீதி அத்தோ².
625.Padhānapahitattoti vīriyakaraṇatthaṃ pesitacitto. Upadhisaṅkhātānaṃ kilesānaṃ abhāvena nirupadhi. Kilesadarathānaṃ abhāvena upasanto. Sabbāsave sakalāsave pariññāya pahāya anāsavo nikkileso nibbāyissati khandhaparinibbānena nibbuto bhavissatīti attho.
626. விஜனே பந்தஸெய்யம்ஹீதி ஜனஸம்பா³த⁴ரஹிதே தூ³ராரஞ்ஞஸேனாஸனேதி அத்தோ². வாளமிக³ஸமாகுலேதி காளஸீஹாதீ³ஹி சண்ட³மிக³ஸங்கே³ஹி ஆகுலே ஸங்கிண்ணேதி அத்தோ². ஸேஸங் வுத்தத்த²மேவாதி.
626.Vijane pantaseyyamhīti janasambādharahite dūrāraññasenāsaneti attho. Vāḷamigasamākuleti kāḷasīhādīhi caṇḍamigasaṅgehi ākule saṃkiṇṇeti attho. Sesaṃ vuttatthamevāti.
பிண்டோ³லபா⁴ரத்³வாஜத்தே²ரஅபதா³னவண்ணனா ஸமத்தா.
Piṇḍolabhāradvājattheraapadānavaṇṇanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / அபதா³னபாளி • Apadānapāḷi / 3-8. பிண்டோ³லபா⁴ரத்³வாஜத்தே²ரஅபதா³னங் • 3-8. Piṇḍolabhāradvājattheraapadānaṃ
