| Library / Tipiṭaka / তিপিটক • Tipiṭaka / অপদান-অট্ঠকথা • Apadāna-aṭṭhakathā |
৩-৮. পিণ্ডোলভারদ্ৰাজত্থেরঅপদানৰণ্ণনা
3-8. Piṇḍolabhāradvājattheraapadānavaṇṇanā
পদুমুত্তরো নাম জিনোতিআদিকং আযস্মতো পিণ্ডোলভারদ্ৰাজস্স অপদানং। অযম্পি পুরিমবুদ্ধেসু কতাধিকারো তত্থ তত্থ ভৰে ৰিৰট্টূপনিস্সযানি পুঞ্ঞানি উপচিনন্তো পদুমুত্তরস্স ভগৰতো কালে সীহযোনিযং নিব্বত্তিত্ৰা পব্বতপাদে গুহাযং ৰিহাসি। ভগৰা তস্স অনুগ্গহং কাতুং গোচরায পক্কন্তকালে তস্স সযনগুহং পৰিসিত্ৰা নিরোধং সমাপজ্জিত্ৰা নিসীদি। সীহো গোচরং গহেত্ৰা নিৰত্তো গুহদ্ৰারে ঠত্ৰা ভগৰন্তং দিস্ৰা হট্ঠতুট্ঠো জলজথলজপুপ্ফেহি পূজং কত্ৰা চিত্তং পসাদেন্তো ভগৰতো আরক্খণত্থায অঞ্ঞে ৰাল়মিগে অপনেতুং তীসু ৰেলাসু সীহনাদং নদন্তো বুদ্ধগতায সতিযা অট্ঠাসি। যথা পঠমদিৰসে, এৰং সত্তাহং পূজেসি। ভগৰা ‘‘সত্তাহচ্চযেন নিরোধা ৰুট্ঠহিত্ৰা ৰট্টিস্সতি ইমস্স এত্তকো উপনিস্সযো’’তি তস্স পস্সন্তস্সেৰ আকাসং পক্খন্দিত্ৰা ৰিহারমেৰ গতো।
Padumuttaronāma jinotiādikaṃ āyasmato piṇḍolabhāradvājassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto padumuttarassa bhagavato kāle sīhayoniyaṃ nibbattitvā pabbatapāde guhāyaṃ vihāsi. Bhagavā tassa anuggahaṃ kātuṃ gocarāya pakkantakāle tassa sayanaguhaṃ pavisitvā nirodhaṃ samāpajjitvā nisīdi. Sīho gocaraṃ gahetvā nivatto guhadvāre ṭhatvā bhagavantaṃ disvā haṭṭhatuṭṭho jalajathalajapupphehi pūjaṃ katvā cittaṃ pasādento bhagavato ārakkhaṇatthāya aññe vāḷamige apanetuṃ tīsu velāsu sīhanādaṃ nadanto buddhagatāya satiyā aṭṭhāsi. Yathā paṭhamadivase, evaṃ sattāhaṃ pūjesi. Bhagavā ‘‘sattāhaccayena nirodhā vuṭṭhahitvā vaṭṭissati imassa ettako upanissayo’’ti tassa passantasseva ākāsaṃ pakkhanditvā vihārameva gato.
সীহো বুদ্ধৰিযোগদুক্খং অধিৰাসেতুং অসক্কোন্তো কালং কত্ৰা হংসৰতীনগরে মহাভোগকুলে নিব্বত্তিত্ৰা ৰযপ্পত্তো নগরৰাসীহি সদ্ধিং ৰিহারং গন্ত্ৰা সত্থু ধম্মদেসনং সুত্ৰা পসন্নো সত্তাহং বুদ্ধপ্পমুখস্স ভিক্খুসঙ্ঘস্স মহাদানং পৰত্তেত্ৰা যাৰজীৰং পুঞ্ঞানি কত্ৰা অপরাপরং দেৰমনুস্সেসু সংসরন্তো অম্হাকং ভগৰতো কালে কোসম্বিযং রঞ্ঞো উদেনস্স পুরোহিতস্স পুত্তো হুত্ৰা নিব্বত্তি। ভারদ্ৰাজোতিস্স নামং অহোসি। সো ৰযপ্পতো তযো ৰেদে উগ্গহেত্ৰা পঞ্চ মাণৰকসতানি মন্তে ৰাচেন্তো মহগ্ঘসভাৰেন অননুরূপাচারত্তা তেহি পরিচ্চত্তো রাজগহং গন্ত্ৰা ভগৰতো ভিক্খুসঙ্ঘস্স চ লাভসক্কারং দিস্ৰা সাসনে পব্বজিত্ৰা ভোজনে অমত্তঞ্ঞূ হুত্ৰা ৰিহরতি। সত্থারা উপাযেন মত্তঞ্ঞুতায পতিট্ঠাপেন্তো ৰিপস্সনং পট্ঠপেত্ৰা নচিরস্সেৰ ছল়ভিঞ্ঞো অহোসি। ছল়ভিঞ্ঞো পন হুত্ৰা ভগৰতো সম্মুখা ‘‘যং সাৰকেহি পত্তব্বং, তং মযা অনুপ্পত্ত’’ন্তি, ভিক্খুসঙ্ঘে চ ‘‘যস্স মগ্গে ৰা ফলে ৰা কঙ্খা অত্থি, সো মং পুচ্ছতূ’’তি সীহনাদং নদি। তেন তং ভগৰা – ‘‘এতদগ্গং, ভিক্খৰে, মম সাৰকানং ভিক্খূনং সীহনাদিকানং যদিদং পিণ্ডোলভারদ্ৰাজো’’তি (অ॰ নি॰ ১.১৮৮, ১৯৫) এতদগ্গে ঠপেসি।
Sīho buddhaviyogadukkhaṃ adhivāsetuṃ asakkonto kālaṃ katvā haṃsavatīnagare mahābhogakule nibbattitvā vayappatto nagaravāsīhi saddhiṃ vihāraṃ gantvā satthu dhammadesanaṃ sutvā pasanno sattāhaṃ buddhappamukhassa bhikkhusaṅghassa mahādānaṃ pavattetvā yāvajīvaṃ puññāni katvā aparāparaṃ devamanussesu saṃsaranto amhākaṃ bhagavato kāle kosambiyaṃ rañño udenassa purohitassa putto hutvā nibbatti. Bhāradvājotissa nāmaṃ ahosi. So vayappato tayo vede uggahetvā pañca māṇavakasatāni mante vācento mahagghasabhāvena ananurūpācārattā tehi pariccatto rājagahaṃ gantvā bhagavato bhikkhusaṅghassa ca lābhasakkāraṃ disvā sāsane pabbajitvā bhojane amattaññū hutvā viharati. Satthārā upāyena mattaññutāya patiṭṭhāpento vipassanaṃ paṭṭhapetvā nacirasseva chaḷabhiñño ahosi. Chaḷabhiñño pana hutvā bhagavato sammukhā ‘‘yaṃ sāvakehi pattabbaṃ, taṃ mayā anuppatta’’nti, bhikkhusaṅghe ca ‘‘yassa magge vā phale vā kaṅkhā atthi, so maṃ pucchatū’’ti sīhanādaṃ nadi. Tena taṃ bhagavā – ‘‘etadaggaṃ, bhikkhave, mama sāvakānaṃ bhikkhūnaṃ sīhanādikānaṃ yadidaṃ piṇḍolabhāradvājo’’ti (a. ni. 1.188, 195) etadagge ṭhapesi.
৬১৩. এৰং এতদগ্গং ঠানং পত্ৰা পুব্বে কতপুঞ্ঞসম্ভারং সরিত্ৰা সোমনস্সৰসেন অত্তনো পুঞ্ঞকম্মাপদানং ৰিভাৰেন্তো পদুমুত্তরোতিআদিমাহ। তস্সত্থো হেট্ঠা ৰুত্তোৰ। পুরতো হিমৰন্তস্সাতি হিমালযপব্বততো পুব্বদিসাভাগেতি অত্থো। চিত্তকূটে ৰসী তদাতি যদা অহং সীহো মিগরাজা হুত্ৰা হিমৰন্তপব্বতসমীপে ৰসামি, তদা পদুমুত্তরো নাম সত্থা অনেকেহি চ ওসধেহি, অনেকেহি চ রতনেহি চিত্তৰিচিত্ততায চিত্তকূটে চিত্তপব্বতসিখরে ৰসীতি সম্বন্ধো।
613. Evaṃ etadaggaṃ ṭhānaṃ patvā pubbe katapuññasambhāraṃ saritvā somanassavasena attano puññakammāpadānaṃ vibhāvento padumuttarotiādimāha. Tassattho heṭṭhā vuttova. Purato himavantassāti himālayapabbatato pubbadisābhāgeti attho. Cittakūṭevasī tadāti yadā ahaṃ sīho migarājā hutvā himavantapabbatasamīpe vasāmi, tadā padumuttaro nāma satthā anekehi ca osadhehi, anekehi ca ratanehi cittavicittatāya cittakūṭe cittapabbatasikhare vasīti sambandho.
৬১৪. অভীতরূপো তত্থাসিন্তি অভীতসভাৰো নিব্ভযসভাৰো মিগরাজা তত্থ আসিং অহোসিন্তি অত্থো। চতুক্কমোতি চতূহি দিসাহি কমো গন্তুং সমত্থো। যস্স সদ্দং সুণিত্ৰানাতি যস্স মিগরঞ্ঞো সীহনাদং সুত্ৰা বহুজ্জনা বহুসত্তা ৰিক্খম্ভন্তি ৰিসেসেন খম্ভন্তি ভাযন্তি।
614.Abhītarūpo tatthāsinti abhītasabhāvo nibbhayasabhāvo migarājā tattha āsiṃ ahosinti attho. Catukkamoti catūhi disāhi kamo gantuṃ samattho. Yassa saddaṃ suṇitvānāti yassa migarañño sīhanādaṃ sutvā bahujjanā bahusattā vikkhambhanti visesena khambhanti bhāyanti.
৬১৫. সুফুল্লং পদুমং গয্হাতি ভগৰতি পসাদেন সুপুপ্ফিতপদুমপুপ্ফং ডংসিত্ৰা। নরাসভং নরানং আসভং উত্তমং সেট্ঠং সম্বুদ্ধং উপগচ্ছিং, সমীপং অগমিন্তি অত্থো। ৰুট্ঠিতস্স সমাধিম্হাতি নিরোধসমাপত্তিতো ৰুট্ঠিতস্স বুদ্ধস্স তং পুপ্ফং অভিরোপযিং পূজেসিন্তি অত্থো।
615.Suphullaṃ padumaṃ gayhāti bhagavati pasādena supupphitapadumapupphaṃ ḍaṃsitvā. Narāsabhaṃ narānaṃ āsabhaṃ uttamaṃ seṭṭhaṃ sambuddhaṃ upagacchiṃ, samīpaṃ agaminti attho. Vuṭṭhitassa samādhimhāti nirodhasamāpattito vuṭṭhitassa buddhassa taṃ pupphaṃ abhiropayiṃ pūjesinti attho.
৬১৬. চতুদ্দিসং নমস্সিত্ৰাতি চতূসু দিসাসু নমস্সিত্ৰা সকং চিত্তং অত্তনো চিত্তং পসাদেত্ৰা আদরেন পতিট্ঠপেত্ৰা সীহনাদং অভীতনাদং অনদিং ঘোসেসিন্তি অত্থো।
616.Catuddisaṃ namassitvāti catūsu disāsu namassitvā sakaṃ cittaṃ attano cittaṃ pasādetvā ādarena patiṭṭhapetvā sīhanādaṃ abhītanādaṃ anadiṃ ghosesinti attho.
৬১৭. ততো বুদ্ধেন দিন্নব্যাকরণং পকাসেন্তো পদুমুত্তরোতিআদিমাহ। তং উত্তানত্থমেৰ।
617. Tato buddhena dinnabyākaraṇaṃ pakāsento padumuttarotiādimāha. Taṃ uttānatthameva.
৬১৮. ৰদতং সেট্ঠোতি ‘‘মযং বুদ্ধা, মযং বুদ্ধা’’তি ৰদন্তানং অঞ্ঞতিত্থিযানং সেট্ঠো উত্তমো বুদ্ধো আগতোতি সম্বন্ধো। তস্স আগতস্স ভগৰতো তং ধম্মং সোস্সাম সুণিস্সামাতি অত্থো।
618.Vadataṃ seṭṭhoti ‘‘mayaṃ buddhā, mayaṃ buddhā’’ti vadantānaṃ aññatitthiyānaṃ seṭṭho uttamo buddho āgatoti sambandho. Tassa āgatassa bhagavato taṃ dhammaṃ sossāma suṇissāmāti attho.
৬১৯. তেসং হাসপরেতানন্তি হাসেহি সোমনস্সেহি পরেতানং অভিভূতানং সমন্নাগতানং তেসং দেৰমনুস্সানং। লোকনাযকোতি লোকস্স নাযকো সগ্গমোক্খসম্পাপকো মম সদ্দং ময্হং সীহনাদং পকিত্তেসি পকাসেসি কথেসি, দীঘদস্সী অনাগতকালদস্সী মহামুনি মুনীনমন্তরে মহন্তো মুনি। সেসগাথা সুৰিঞ্ঞেয্যমেৰ।
619.Tesaṃhāsaparetānanti hāsehi somanassehi paretānaṃ abhibhūtānaṃ samannāgatānaṃ tesaṃ devamanussānaṃ. Lokanāyakoti lokassa nāyako saggamokkhasampāpako mama saddaṃ mayhaṃ sīhanādaṃ pakittesi pakāsesi kathesi, dīghadassī anāgatakāladassī mahāmuni munīnamantare mahanto muni. Sesagāthā suviññeyyameva.
৬২২. নামেন পদুমো নাম চক্কৰত্তী হুত্ৰা চতুসট্ঠিযা জাতিযা ইস্সরিযং ইস্সরভাৰং রজ্জং কারযিস্সতীতি অত্থো।
622. Nāmena padumo nāma cakkavattī hutvā catusaṭṭhiyā jātiyā issariyaṃ issarabhāvaṃ rajjaṃ kārayissatīti attho.
৬২৩. কপ্পসতসহস্সম্হীতি সাম্যত্থে ভুম্মৰচনং, কপ্পসতসহস্সানং পরিযোসানেতি অত্থো।
623.Kappasatasahassamhīti sāmyatthe bhummavacanaṃ, kappasatasahassānaṃ pariyosāneti attho.
৬২৪. পকাসিতে পাৰচনেতি তেন গোতমেন ভগৰতা পিটকত্তযে পকাসিতে দেসিতেতি অত্থো। ব্রহ্মবন্ধু ভৰিস্সতীতি তদা গোতমস্স ভগৰতো কালে অযং সীহো মিগরাজা ব্রাহ্মণকুলে নিব্বত্তিস্সতীতি অত্থো। ব্রহ্মঞ্ঞা অভিনিক্খম্মাতি ব্রাহ্মণকুলতো নিক্খমিত্ৰা তস্স ভগৰতো সাসনে পব্বজিস্সতীতি সম্বন্ধো।
624.Pakāsite pāvacaneti tena gotamena bhagavatā piṭakattaye pakāsite desiteti attho. Brahmabandhu bhavissatīti tadā gotamassa bhagavato kāle ayaṃ sīho migarājā brāhmaṇakule nibbattissatīti attho. Brahmaññā abhinikkhammāti brāhmaṇakulato nikkhamitvā tassa bhagavato sāsane pabbajissatīti sambandho.
৬২৫. পধানপহিতত্তোতি ৰীরিযকরণত্থং পেসিতচিত্তো। উপধিসঙ্খাতানং কিলেসানং অভাৰেন নিরুপধি। কিলেসদরথানং অভাৰেন উপসন্তো। সব্বাসৰে সকলাসৰে পরিঞ্ঞায পহায অনাসৰো নিক্কিলেসো নিব্বাযিস্সতি খন্ধপরিনিব্বানেন নিব্বুতো ভৰিস্সতীতি অত্থো।
625.Padhānapahitattoti vīriyakaraṇatthaṃ pesitacitto. Upadhisaṅkhātānaṃ kilesānaṃ abhāvena nirupadhi. Kilesadarathānaṃ abhāvena upasanto. Sabbāsave sakalāsave pariññāya pahāya anāsavo nikkileso nibbāyissati khandhaparinibbānena nibbuto bhavissatīti attho.
৬২৬. ৰিজনে পন্তসেয্যম্হীতি জনসম্বাধরহিতে দূরারঞ্ঞসেনাসনেতি অত্থো। ৰাল়মিগসমাকুলেতি কাল়সীহাদীহি চণ্ডমিগসঙ্গেহি আকুলে সংকিণ্ণেতি অত্থো। সেসং ৰুত্তত্থমেৰাতি।
626.Vijane pantaseyyamhīti janasambādharahite dūrāraññasenāsaneti attho. Vāḷamigasamākuleti kāḷasīhādīhi caṇḍamigasaṅgehi ākule saṃkiṇṇeti attho. Sesaṃ vuttatthamevāti.
পিণ্ডোলভারদ্ৰাজত্থেরঅপদানৰণ্ণনা সমত্তা।
Piṇḍolabhāradvājattheraapadānavaṇṇanā samattā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / অপদানপাল়ি • Apadānapāḷi / ৩-৮. পিণ্ডোলভারদ্ৰাজত্থেরঅপদানং • 3-8. Piṇḍolabhāradvājattheraapadānaṃ
