| Library / Tipiṭaka / ਤਿਪਿਟਕ • Tipiṭaka / ਅਪਦਾਨ-ਅਟ੍ਠਕਥਾ • Apadāna-aṭṭhakathā |
੩-੮. ਪਿਣ੍ਡੋਲਭਾਰਦ੍વਾਜਤ੍ਥੇਰਅਪਦਾਨવਣ੍ਣਨਾ
3-8. Piṇḍolabhāradvājattheraapadānavaṇṇanā
ਪਦੁਮੁਤ੍ਤਰੋ ਨਾਮ ਜਿਨੋਤਿਆਦਿਕਂ ਆਯਸ੍ਮਤੋ ਪਿਣ੍ਡੋਲਭਾਰਦ੍વਾਜਸ੍ਸ ਅਪਦਾਨਂ। ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭવੇ વਿવਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਉਪਚਿਨਨ੍ਤੋ ਪਦੁਮੁਤ੍ਤਰਸ੍ਸ ਭਗવਤੋ ਕਾਲੇ ਸੀਹਯੋਨਿਯਂ ਨਿਬ੍ਬਤ੍ਤਿਤ੍વਾ ਪਬ੍ਬਤਪਾਦੇ ਗੁਹਾਯਂ વਿਹਾਸਿ। ਭਗવਾ ਤਸ੍ਸ ਅਨੁਗ੍ਗਹਂ ਕਾਤੁਂ ਗੋਚਰਾਯ ਪਕ੍ਕਨ੍ਤਕਾਲੇ ਤਸ੍ਸ ਸਯਨਗੁਹਂ ਪવਿਸਿਤ੍વਾ ਨਿਰੋਧਂ ਸਮਾਪਜ੍ਜਿਤ੍વਾ ਨਿਸੀਦਿ। ਸੀਹੋ ਗੋਚਰਂ ਗਹੇਤ੍વਾ ਨਿવਤ੍ਤੋ ਗੁਹਦ੍વਾਰੇ ਠਤ੍વਾ ਭਗવਨ੍ਤਂ ਦਿਸ੍વਾ ਹਟ੍ਠਤੁਟ੍ਠੋ ਜਲਜਥਲਜਪੁਪ੍ਫੇਹਿ ਪੂਜਂ ਕਤ੍વਾ ਚਿਤ੍ਤਂ ਪਸਾਦੇਨ੍ਤੋ ਭਗવਤੋ ਆਰਕ੍ਖਣਤ੍ਥਾਯ ਅਞ੍ਞੇ વਾਲ਼ਮਿਗੇ ਅਪਨੇਤੁਂ ਤੀਸੁ વੇਲਾਸੁ ਸੀਹਨਾਦਂ ਨਦਨ੍ਤੋ ਬੁਦ੍ਧਗਤਾਯ ਸਤਿਯਾ ਅਟ੍ਠਾਸਿ। ਯਥਾ ਪਠਮਦਿવਸੇ, ਏવਂ ਸਤ੍ਤਾਹਂ ਪੂਜੇਸਿ। ਭਗવਾ ‘‘ਸਤ੍ਤਾਹਚ੍ਚਯੇਨ ਨਿਰੋਧਾ વੁਟ੍ਠਹਿਤ੍વਾ વਟ੍ਟਿਸ੍ਸਤਿ ਇਮਸ੍ਸ ਏਤ੍ਤਕੋ ਉਪਨਿਸ੍ਸਯੋ’’ਤਿ ਤਸ੍ਸ ਪਸ੍ਸਨ੍ਤਸ੍ਸੇવ ਆਕਾਸਂ ਪਕ੍ਖਨ੍ਦਿਤ੍વਾ વਿਹਾਰਮੇવ ਗਤੋ।
Padumuttaronāma jinotiādikaṃ āyasmato piṇḍolabhāradvājassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto padumuttarassa bhagavato kāle sīhayoniyaṃ nibbattitvā pabbatapāde guhāyaṃ vihāsi. Bhagavā tassa anuggahaṃ kātuṃ gocarāya pakkantakāle tassa sayanaguhaṃ pavisitvā nirodhaṃ samāpajjitvā nisīdi. Sīho gocaraṃ gahetvā nivatto guhadvāre ṭhatvā bhagavantaṃ disvā haṭṭhatuṭṭho jalajathalajapupphehi pūjaṃ katvā cittaṃ pasādento bhagavato ārakkhaṇatthāya aññe vāḷamige apanetuṃ tīsu velāsu sīhanādaṃ nadanto buddhagatāya satiyā aṭṭhāsi. Yathā paṭhamadivase, evaṃ sattāhaṃ pūjesi. Bhagavā ‘‘sattāhaccayena nirodhā vuṭṭhahitvā vaṭṭissati imassa ettako upanissayo’’ti tassa passantasseva ākāsaṃ pakkhanditvā vihārameva gato.
ਸੀਹੋ ਬੁਦ੍ਧવਿਯੋਗਦੁਕ੍ਖਂ ਅਧਿવਾਸੇਤੁਂ ਅਸਕ੍ਕੋਨ੍ਤੋ ਕਾਲਂ ਕਤ੍વਾ ਹਂਸવਤੀਨਗਰੇ ਮਹਾਭੋਗਕੁਲੇ ਨਿਬ੍ਬਤ੍ਤਿਤ੍વਾ વਯਪ੍ਪਤ੍ਤੋ ਨਗਰવਾਸੀਹਿ ਸਦ੍ਧਿਂ વਿਹਾਰਂ ਗਨ੍ਤ੍વਾ ਸਤ੍ਥੁ ਧਮ੍ਮਦੇਸਨਂ ਸੁਤ੍વਾ ਪਸਨ੍ਨੋ ਸਤ੍ਤਾਹਂ ਬੁਦ੍ਧਪ੍ਪਮੁਖਸ੍ਸ ਭਿਕ੍ਖੁਸਙ੍ਘਸ੍ਸ ਮਹਾਦਾਨਂ ਪવਤ੍ਤੇਤ੍વਾ ਯਾવਜੀવਂ ਪੁਞ੍ਞਾਨਿ ਕਤ੍વਾ ਅਪਰਾਪਰਂ ਦੇવਮਨੁਸ੍ਸੇਸੁ ਸਂਸਰਨ੍ਤੋ ਅਮ੍ਹਾਕਂ ਭਗવਤੋ ਕਾਲੇ ਕੋਸਮ੍ਬਿਯਂ ਰਞ੍ਞੋ ਉਦੇਨਸ੍ਸ ਪੁਰੋਹਿਤਸ੍ਸ ਪੁਤ੍ਤੋ ਹੁਤ੍વਾ ਨਿਬ੍ਬਤ੍ਤਿ। ਭਾਰਦ੍વਾਜੋਤਿਸ੍ਸ ਨਾਮਂ ਅਹੋਸਿ। ਸੋ વਯਪ੍ਪਤੋ ਤਯੋ વੇਦੇ ਉਗ੍ਗਹੇਤ੍વਾ ਪਞ੍ਚ ਮਾਣવਕਸਤਾਨਿ ਮਨ੍ਤੇ વਾਚੇਨ੍ਤੋ ਮਹਗ੍ਘਸਭਾવੇਨ ਅਨਨੁਰੂਪਾਚਾਰਤ੍ਤਾ ਤੇਹਿ ਪਰਿਚ੍ਚਤ੍ਤੋ ਰਾਜਗਹਂ ਗਨ੍ਤ੍વਾ ਭਗવਤੋ ਭਿਕ੍ਖੁਸਙ੍ਘਸ੍ਸ ਚ ਲਾਭਸਕ੍ਕਾਰਂ ਦਿਸ੍વਾ ਸਾਸਨੇ ਪਬ੍ਬਜਿਤ੍વਾ ਭੋਜਨੇ ਅਮਤ੍ਤਞ੍ਞੂ ਹੁਤ੍વਾ વਿਹਰਤਿ। ਸਤ੍ਥਾਰਾ ਉਪਾਯੇਨ ਮਤ੍ਤਞ੍ਞੁਤਾਯ ਪਤਿਟ੍ਠਾਪੇਨ੍ਤੋ વਿਪਸ੍ਸਨਂ ਪਟ੍ਠਪੇਤ੍વਾ ਨਚਿਰਸ੍ਸੇવ ਛਲ਼ਭਿਞ੍ਞੋ ਅਹੋਸਿ। ਛਲ਼ਭਿਞ੍ਞੋ ਪਨ ਹੁਤ੍વਾ ਭਗવਤੋ ਸਮ੍ਮੁਖਾ ‘‘ਯਂ ਸਾવਕੇਹਿ ਪਤ੍ਤਬ੍ਬਂ, ਤਂ ਮਯਾ ਅਨੁਪ੍ਪਤ੍ਤ’’ਨ੍ਤਿ, ਭਿਕ੍ਖੁਸਙ੍ਘੇ ਚ ‘‘ਯਸ੍ਸ ਮਗ੍ਗੇ વਾ ਫਲੇ વਾ ਕਙ੍ਖਾ ਅਤ੍ਥਿ, ਸੋ ਮਂ ਪੁਚ੍ਛਤੂ’’ਤਿ ਸੀਹਨਾਦਂ ਨਦਿ। ਤੇਨ ਤਂ ਭਗવਾ – ‘‘ਏਤਦਗ੍ਗਂ, ਭਿਕ੍ਖવੇ, ਮਮ ਸਾવਕਾਨਂ ਭਿਕ੍ਖੂਨਂ ਸੀਹਨਾਦਿਕਾਨਂ ਯਦਿਦਂ ਪਿਣ੍ਡੋਲਭਾਰਦ੍વਾਜੋ’’ਤਿ (ਅ॰ ਨਿ॰ ੧.੧੮੮, ੧੯੫) ਏਤਦਗ੍ਗੇ ਠਪੇਸਿ।
Sīho buddhaviyogadukkhaṃ adhivāsetuṃ asakkonto kālaṃ katvā haṃsavatīnagare mahābhogakule nibbattitvā vayappatto nagaravāsīhi saddhiṃ vihāraṃ gantvā satthu dhammadesanaṃ sutvā pasanno sattāhaṃ buddhappamukhassa bhikkhusaṅghassa mahādānaṃ pavattetvā yāvajīvaṃ puññāni katvā aparāparaṃ devamanussesu saṃsaranto amhākaṃ bhagavato kāle kosambiyaṃ rañño udenassa purohitassa putto hutvā nibbatti. Bhāradvājotissa nāmaṃ ahosi. So vayappato tayo vede uggahetvā pañca māṇavakasatāni mante vācento mahagghasabhāvena ananurūpācārattā tehi pariccatto rājagahaṃ gantvā bhagavato bhikkhusaṅghassa ca lābhasakkāraṃ disvā sāsane pabbajitvā bhojane amattaññū hutvā viharati. Satthārā upāyena mattaññutāya patiṭṭhāpento vipassanaṃ paṭṭhapetvā nacirasseva chaḷabhiñño ahosi. Chaḷabhiñño pana hutvā bhagavato sammukhā ‘‘yaṃ sāvakehi pattabbaṃ, taṃ mayā anuppatta’’nti, bhikkhusaṅghe ca ‘‘yassa magge vā phale vā kaṅkhā atthi, so maṃ pucchatū’’ti sīhanādaṃ nadi. Tena taṃ bhagavā – ‘‘etadaggaṃ, bhikkhave, mama sāvakānaṃ bhikkhūnaṃ sīhanādikānaṃ yadidaṃ piṇḍolabhāradvājo’’ti (a. ni. 1.188, 195) etadagge ṭhapesi.
੬੧੩. ਏવਂ ਏਤਦਗ੍ਗਂ ਠਾਨਂ ਪਤ੍વਾ ਪੁਬ੍ਬੇ ਕਤਪੁਞ੍ਞਸਮ੍ਭਾਰਂ ਸਰਿਤ੍વਾ ਸੋਮਨਸ੍ਸવਸੇਨ ਅਤ੍ਤਨੋ ਪੁਞ੍ਞਕਮ੍ਮਾਪਦਾਨਂ વਿਭਾવੇਨ੍ਤੋ ਪਦੁਮੁਤ੍ਤਰੋਤਿਆਦਿਮਾਹ। ਤਸ੍ਸਤ੍ਥੋ ਹੇਟ੍ਠਾ વੁਤ੍ਤੋવ। ਪੁਰਤੋ ਹਿਮવਨ੍ਤਸ੍ਸਾਤਿ ਹਿਮਾਲਯਪਬ੍ਬਤਤੋ ਪੁਬ੍ਬਦਿਸਾਭਾਗੇਤਿ ਅਤ੍ਥੋ। ਚਿਤ੍ਤਕੂਟੇ વਸੀ ਤਦਾਤਿ ਯਦਾ ਅਹਂ ਸੀਹੋ ਮਿਗਰਾਜਾ ਹੁਤ੍વਾ ਹਿਮવਨ੍ਤਪਬ੍ਬਤਸਮੀਪੇ વਸਾਮਿ, ਤਦਾ ਪਦੁਮੁਤ੍ਤਰੋ ਨਾਮ ਸਤ੍ਥਾ ਅਨੇਕੇਹਿ ਚ ਓਸਧੇਹਿ, ਅਨੇਕੇਹਿ ਚ ਰਤਨੇਹਿ ਚਿਤ੍ਤવਿਚਿਤ੍ਤਤਾਯ ਚਿਤ੍ਤਕੂਟੇ ਚਿਤ੍ਤਪਬ੍ਬਤਸਿਖਰੇ વਸੀਤਿ ਸਮ੍ਬਨ੍ਧੋ।
613. Evaṃ etadaggaṃ ṭhānaṃ patvā pubbe katapuññasambhāraṃ saritvā somanassavasena attano puññakammāpadānaṃ vibhāvento padumuttarotiādimāha. Tassattho heṭṭhā vuttova. Purato himavantassāti himālayapabbatato pubbadisābhāgeti attho. Cittakūṭevasī tadāti yadā ahaṃ sīho migarājā hutvā himavantapabbatasamīpe vasāmi, tadā padumuttaro nāma satthā anekehi ca osadhehi, anekehi ca ratanehi cittavicittatāya cittakūṭe cittapabbatasikhare vasīti sambandho.
੬੧੪. ਅਭੀਤਰੂਪੋ ਤਤ੍ਥਾਸਿਨ੍ਤਿ ਅਭੀਤਸਭਾવੋ ਨਿਬ੍ਭਯਸਭਾવੋ ਮਿਗਰਾਜਾ ਤਤ੍ਥ ਆਸਿਂ ਅਹੋਸਿਨ੍ਤਿ ਅਤ੍ਥੋ। ਚਤੁਕ੍ਕਮੋਤਿ ਚਤੂਹਿ ਦਿਸਾਹਿ ਕਮੋ ਗਨ੍ਤੁਂ ਸਮਤ੍ਥੋ। ਯਸ੍ਸ ਸਦ੍ਦਂ ਸੁਣਿਤ੍વਾਨਾਤਿ ਯਸ੍ਸ ਮਿਗਰਞ੍ਞੋ ਸੀਹਨਾਦਂ ਸੁਤ੍વਾ ਬਹੁਜ੍ਜਨਾ ਬਹੁਸਤ੍ਤਾ વਿਕ੍ਖਮ੍ਭਨ੍ਤਿ વਿਸੇਸੇਨ ਖਮ੍ਭਨ੍ਤਿ ਭਾਯਨ੍ਤਿ।
614.Abhītarūpo tatthāsinti abhītasabhāvo nibbhayasabhāvo migarājā tattha āsiṃ ahosinti attho. Catukkamoti catūhi disāhi kamo gantuṃ samattho. Yassa saddaṃ suṇitvānāti yassa migarañño sīhanādaṃ sutvā bahujjanā bahusattā vikkhambhanti visesena khambhanti bhāyanti.
੬੧੫. ਸੁਫੁਲ੍ਲਂ ਪਦੁਮਂ ਗਯ੍ਹਾਤਿ ਭਗવਤਿ ਪਸਾਦੇਨ ਸੁਪੁਪ੍ਫਿਤਪਦੁਮਪੁਪ੍ਫਂ ਡਂਸਿਤ੍વਾ। ਨਰਾਸਭਂ ਨਰਾਨਂ ਆਸਭਂ ਉਤ੍ਤਮਂ ਸੇਟ੍ਠਂ ਸਮ੍ਬੁਦ੍ਧਂ ਉਪਗਚ੍ਛਿਂ, ਸਮੀਪਂ ਅਗਮਿਨ੍ਤਿ ਅਤ੍ਥੋ। વੁਟ੍ਠਿਤਸ੍ਸ ਸਮਾਧਿਮ੍ਹਾਤਿ ਨਿਰੋਧਸਮਾਪਤ੍ਤਿਤੋ વੁਟ੍ਠਿਤਸ੍ਸ ਬੁਦ੍ਧਸ੍ਸ ਤਂ ਪੁਪ੍ਫਂ ਅਭਿਰੋਪਯਿਂ ਪੂਜੇਸਿਨ੍ਤਿ ਅਤ੍ਥੋ।
615.Suphullaṃ padumaṃ gayhāti bhagavati pasādena supupphitapadumapupphaṃ ḍaṃsitvā. Narāsabhaṃ narānaṃ āsabhaṃ uttamaṃ seṭṭhaṃ sambuddhaṃ upagacchiṃ, samīpaṃ agaminti attho. Vuṭṭhitassa samādhimhāti nirodhasamāpattito vuṭṭhitassa buddhassa taṃ pupphaṃ abhiropayiṃ pūjesinti attho.
੬੧੬. ਚਤੁਦ੍ਦਿਸਂ ਨਮਸ੍ਸਿਤ੍વਾਤਿ ਚਤੂਸੁ ਦਿਸਾਸੁ ਨਮਸ੍ਸਿਤ੍વਾ ਸਕਂ ਚਿਤ੍ਤਂ ਅਤ੍ਤਨੋ ਚਿਤ੍ਤਂ ਪਸਾਦੇਤ੍વਾ ਆਦਰੇਨ ਪਤਿਟ੍ਠਪੇਤ੍વਾ ਸੀਹਨਾਦਂ ਅਭੀਤਨਾਦਂ ਅਨਦਿਂ ਘੋਸੇਸਿਨ੍ਤਿ ਅਤ੍ਥੋ।
616.Catuddisaṃ namassitvāti catūsu disāsu namassitvā sakaṃ cittaṃ attano cittaṃ pasādetvā ādarena patiṭṭhapetvā sīhanādaṃ abhītanādaṃ anadiṃ ghosesinti attho.
੬੧੭. ਤਤੋ ਬੁਦ੍ਧੇਨ ਦਿਨ੍ਨਬ੍ਯਾਕਰਣਂ ਪਕਾਸੇਨ੍ਤੋ ਪਦੁਮੁਤ੍ਤਰੋਤਿਆਦਿਮਾਹ। ਤਂ ਉਤ੍ਤਾਨਤ੍ਥਮੇવ।
617. Tato buddhena dinnabyākaraṇaṃ pakāsento padumuttarotiādimāha. Taṃ uttānatthameva.
੬੧੮. વਦਤਂ ਸੇਟ੍ਠੋਤਿ ‘‘ਮਯਂ ਬੁਦ੍ਧਾ, ਮਯਂ ਬੁਦ੍ਧਾ’’ਤਿ વਦਨ੍ਤਾਨਂ ਅਞ੍ਞਤਿਤ੍ਥਿਯਾਨਂ ਸੇਟ੍ਠੋ ਉਤ੍ਤਮੋ ਬੁਦ੍ਧੋ ਆਗਤੋਤਿ ਸਮ੍ਬਨ੍ਧੋ। ਤਸ੍ਸ ਆਗਤਸ੍ਸ ਭਗવਤੋ ਤਂ ਧਮ੍ਮਂ ਸੋਸ੍ਸਾਮ ਸੁਣਿਸ੍ਸਾਮਾਤਿ ਅਤ੍ਥੋ।
618.Vadataṃ seṭṭhoti ‘‘mayaṃ buddhā, mayaṃ buddhā’’ti vadantānaṃ aññatitthiyānaṃ seṭṭho uttamo buddho āgatoti sambandho. Tassa āgatassa bhagavato taṃ dhammaṃ sossāma suṇissāmāti attho.
੬੧੯. ਤੇਸਂ ਹਾਸਪਰੇਤਾਨਨ੍ਤਿ ਹਾਸੇਹਿ ਸੋਮਨਸ੍ਸੇਹਿ ਪਰੇਤਾਨਂ ਅਭਿਭੂਤਾਨਂ ਸਮਨ੍ਨਾਗਤਾਨਂ ਤੇਸਂ ਦੇવਮਨੁਸ੍ਸਾਨਂ। ਲੋਕਨਾਯਕੋਤਿ ਲੋਕਸ੍ਸ ਨਾਯਕੋ ਸਗ੍ਗਮੋਕ੍ਖਸਮ੍ਪਾਪਕੋ ਮਮ ਸਦ੍ਦਂ ਮਯ੍ਹਂ ਸੀਹਨਾਦਂ ਪਕਿਤ੍ਤੇਸਿ ਪਕਾਸੇਸਿ ਕਥੇਸਿ, ਦੀਘਦਸ੍ਸੀ ਅਨਾਗਤਕਾਲਦਸ੍ਸੀ ਮਹਾਮੁਨਿ ਮੁਨੀਨਮਨ੍ਤਰੇ ਮਹਨ੍ਤੋ ਮੁਨਿ। ਸੇਸਗਾਥਾ ਸੁવਿਞ੍ਞੇਯ੍ਯਮੇવ।
619.Tesaṃhāsaparetānanti hāsehi somanassehi paretānaṃ abhibhūtānaṃ samannāgatānaṃ tesaṃ devamanussānaṃ. Lokanāyakoti lokassa nāyako saggamokkhasampāpako mama saddaṃ mayhaṃ sīhanādaṃ pakittesi pakāsesi kathesi, dīghadassī anāgatakāladassī mahāmuni munīnamantare mahanto muni. Sesagāthā suviññeyyameva.
੬੨੨. ਨਾਮੇਨ ਪਦੁਮੋ ਨਾਮ ਚਕ੍ਕવਤ੍ਤੀ ਹੁਤ੍વਾ ਚਤੁਸਟ੍ਠਿਯਾ ਜਾਤਿਯਾ ਇਸ੍ਸਰਿਯਂ ਇਸ੍ਸਰਭਾવਂ ਰਜ੍ਜਂ ਕਾਰਯਿਸ੍ਸਤੀਤਿ ਅਤ੍ਥੋ।
622. Nāmena padumo nāma cakkavattī hutvā catusaṭṭhiyā jātiyā issariyaṃ issarabhāvaṃ rajjaṃ kārayissatīti attho.
੬੨੩. ਕਪ੍ਪਸਤਸਹਸ੍ਸਮ੍ਹੀਤਿ ਸਾਮ੍ਯਤ੍ਥੇ ਭੁਮ੍ਮવਚਨਂ, ਕਪ੍ਪਸਤਸਹਸ੍ਸਾਨਂ ਪਰਿਯੋਸਾਨੇਤਿ ਅਤ੍ਥੋ।
623.Kappasatasahassamhīti sāmyatthe bhummavacanaṃ, kappasatasahassānaṃ pariyosāneti attho.
੬੨੪. ਪਕਾਸਿਤੇ ਪਾવਚਨੇਤਿ ਤੇਨ ਗੋਤਮੇਨ ਭਗવਤਾ ਪਿਟਕਤ੍ਤਯੇ ਪਕਾਸਿਤੇ ਦੇਸਿਤੇਤਿ ਅਤ੍ਥੋ। ਬ੍ਰਹ੍ਮਬਨ੍ਧੁ ਭવਿਸ੍ਸਤੀਤਿ ਤਦਾ ਗੋਤਮਸ੍ਸ ਭਗવਤੋ ਕਾਲੇ ਅਯਂ ਸੀਹੋ ਮਿਗਰਾਜਾ ਬ੍ਰਾਹ੍ਮਣਕੁਲੇ ਨਿਬ੍ਬਤ੍ਤਿਸ੍ਸਤੀਤਿ ਅਤ੍ਥੋ। ਬ੍ਰਹ੍ਮਞ੍ਞਾ ਅਭਿਨਿਕ੍ਖਮ੍ਮਾਤਿ ਬ੍ਰਾਹ੍ਮਣਕੁਲਤੋ ਨਿਕ੍ਖਮਿਤ੍વਾ ਤਸ੍ਸ ਭਗવਤੋ ਸਾਸਨੇ ਪਬ੍ਬਜਿਸ੍ਸਤੀਤਿ ਸਮ੍ਬਨ੍ਧੋ।
624.Pakāsite pāvacaneti tena gotamena bhagavatā piṭakattaye pakāsite desiteti attho. Brahmabandhu bhavissatīti tadā gotamassa bhagavato kāle ayaṃ sīho migarājā brāhmaṇakule nibbattissatīti attho. Brahmaññā abhinikkhammāti brāhmaṇakulato nikkhamitvā tassa bhagavato sāsane pabbajissatīti sambandho.
੬੨੫. ਪਧਾਨਪਹਿਤਤ੍ਤੋਤਿ વੀਰਿਯਕਰਣਤ੍ਥਂ ਪੇਸਿਤਚਿਤ੍ਤੋ। ਉਪਧਿਸਙ੍ਖਾਤਾਨਂ ਕਿਲੇਸਾਨਂ ਅਭਾવੇਨ ਨਿਰੁਪਧਿ। ਕਿਲੇਸਦਰਥਾਨਂ ਅਭਾવੇਨ ਉਪਸਨ੍ਤੋ। ਸਬ੍ਬਾਸવੇ ਸਕਲਾਸવੇ ਪਰਿਞ੍ਞਾਯ ਪਹਾਯ ਅਨਾਸવੋ ਨਿਕ੍ਕਿਲੇਸੋ ਨਿਬ੍ਬਾਯਿਸ੍ਸਤਿ ਖਨ੍ਧਪਰਿਨਿਬ੍ਬਾਨੇਨ ਨਿਬ੍ਬੁਤੋ ਭવਿਸ੍ਸਤੀਤਿ ਅਤ੍ਥੋ।
625.Padhānapahitattoti vīriyakaraṇatthaṃ pesitacitto. Upadhisaṅkhātānaṃ kilesānaṃ abhāvena nirupadhi. Kilesadarathānaṃ abhāvena upasanto. Sabbāsave sakalāsave pariññāya pahāya anāsavo nikkileso nibbāyissati khandhaparinibbānena nibbuto bhavissatīti attho.
੬੨੬. વਿਜਨੇ ਪਨ੍ਤਸੇਯ੍ਯਮ੍ਹੀਤਿ ਜਨਸਮ੍ਬਾਧਰਹਿਤੇ ਦੂਰਾਰਞ੍ਞਸੇਨਾਸਨੇਤਿ ਅਤ੍ਥੋ। વਾਲ਼ਮਿਗਸਮਾਕੁਲੇਤਿ ਕਾਲ਼ਸੀਹਾਦੀਹਿ ਚਣ੍ਡਮਿਗਸਙ੍ਗੇਹਿ ਆਕੁਲੇ ਸਂਕਿਣ੍ਣੇਤਿ ਅਤ੍ਥੋ। ਸੇਸਂ વੁਤ੍ਤਤ੍ਥਮੇવਾਤਿ।
626.Vijane pantaseyyamhīti janasambādharahite dūrāraññasenāsaneti attho. Vāḷamigasamākuleti kāḷasīhādīhi caṇḍamigasaṅgehi ākule saṃkiṇṇeti attho. Sesaṃ vuttatthamevāti.
ਪਿਣ੍ਡੋਲਭਾਰਦ੍વਾਜਤ੍ਥੇਰਅਪਦਾਨવਣ੍ਣਨਾ ਸਮਤ੍ਤਾ।
Piṇḍolabhāradvājattheraapadānavaṇṇanā samattā.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਸੁਤ੍ਤਪਿਟਕ • Suttapiṭaka / ਖੁਦ੍ਦਕਨਿਕਾਯ • Khuddakanikāya / ਅਪਦਾਨਪਾਲ਼ਿ • Apadānapāḷi / ੩-੮. ਪਿਣ੍ਡੋਲਭਾਰਦ੍વਾਜਤ੍ਥੇਰਅਪਦਾਨਂ • 3-8. Piṇḍolabhāradvājattheraapadānaṃ
