| Library / Tipiṭaka / ਤਿਪਿਟਕ • Tipiṭaka / ਉਦਾਨ-ਅਟ੍ਠਕਥਾ • Udāna-aṭṭhakathā |
੬. ਪਿਣ੍ਡੋਲਸੁਤ੍ਤવਣ੍ਣਨਾ
6. Piṇḍolasuttavaṇṇanā
੩੬. ਛਟ੍ਠੇ ਪਿਣ੍ਡੋਲਭਾਰਦ੍વਾਜੋਤਿ ਪਿਣ੍ਡਂ ਉਲਮਾਨੋ ਪਰਿਯੇਸਮਾਨੋ ਪਬ੍ਬਜਿਤੋਤਿ ਪਿਣ੍ਡੋਲੋ। ਸੋ ਕਿਰ ਪਰਿਜਿਣ੍ਣਭੋਗੋ ਬ੍ਰਾਹ੍ਮਣੋ ਹੁਤ੍વਾ ਮਹਨ੍ਤਂ ਭਿਕ੍ਖੁਸਙ੍ਘਸ੍ਸ ਲਾਭਸਕ੍ਕਾਰਂ ਦਿਸ੍વਾ ਪਿਣ੍ਡਤ੍ਥਾਯ ਨਿਕ੍ਖਮਿਤ੍વਾ ਪਬ੍ਬਜਿਤੋ। ਸੋ ਮਹਨ੍ਤਂ ਕਪਲ੍ਲਂ ‘‘ਪਤ੍ਤ’’ਨ੍ਤਿ ਗਹੇਤ੍વਾ ਚਰਤਿ, ਕਪਲ੍ਲਪੂਰਂ ਯਾਗੁਂ ਪਿવਤਿ, ਭਤ੍ਤਂ ਭੁਞ੍ਜਤਿ, ਪੂવਖਜ੍ਜਕਞ੍ਚ ਖਾਦਤਿ। ਅਥਸ੍ਸ ਮਹਗ੍ਘਸਭਾવਂ ਸਤ੍ਥੁ ਆਰੋਚੇਸੁਂ। ਸਤ੍ਥਾ ਤਸ੍ਸ ਪਤ੍ਤਤ੍ਥવਿਕਂ ਨਾਨੁਜਾਨਿ, ਹੇਟ੍ਠਾਮਞ੍ਚੇ ਪਤ੍ਤਂ ਨਿਕ੍ਕੁਜ੍ਜਿਤ੍વਾ ਠਪੇਤਿ, ਸੋ ਠਪੇਨ੍ਤੋਪਿ ਘਂਸੇਨ੍ਤੋવ ਪਣਾਮੇਤ੍વਾ ਠਪੇਤਿ, ਗਣ੍ਹਨ੍ਤੋਪਿ ਘਂਸੇਨ੍ਤੋવ ਆਕਡ੍ਢਿਤ੍વਾ ਗਣ੍ਹਾਤਿ। ਤਂ ਗਚ੍ਛਨ੍ਤੇ ਗਚ੍ਛਨ੍ਤੇ ਕਾਲੇ ਘਂਸਨੇਨ ਪਰਿਕ੍ਖੀਣਂ, ਨਾਲ਼ਿਕੋਦਨਮਤ੍ਤਸ੍ਸੇવ ਗਣ੍ਹਨਕਂ ਜਾਤਂ। ਤਤੋ ਸਤ੍ਥੁ ਆਰੋਚੇਸੁਂ, ਅਥਸ੍ਸ ਸਤ੍ਥਾ ਪਤ੍ਤਤ੍ਥવਿਕਂ ਅਨੁਜਾਨਿ। ਥੇਰੋ ਅਪਰੇਨ ਸਮਯੇਨ ਇਨ੍ਦ੍ਰਿਯਭਾવਨਂ ਭਾવੇਨ੍ਤੋ ਅਗ੍ਗਫਲੇ ਅਰਹਤ੍ਤੇ ਪਤਿਟ੍ਠਾਸਿ। ਇਤਿ ਸੋ ਪੁਬ੍ਬੇ ਸવਿਸੇਸਂ ਪਿਣ੍ਡਤ੍ਥਾਯ ਉਲਤੀਤਿ ਪਿਣ੍ਡੋਲੋ, ਗੋਤ੍ਤੇਨ ਪਨ ਭਾਰਦ੍વਾਜੋਤਿ ਉਭਯਂ ਏਕਤੋ ਕਤ੍વਾ ‘‘ਪਿਣ੍ਡੋਲਭਾਰਦ੍વਾਜੋ’’ਤਿ વੁਚ੍ਚਤਿ।
36. Chaṭṭhe piṇḍolabhāradvājoti piṇḍaṃ ulamāno pariyesamāno pabbajitoti piṇḍolo. So kira parijiṇṇabhogo brāhmaṇo hutvā mahantaṃ bhikkhusaṅghassa lābhasakkāraṃ disvā piṇḍatthāya nikkhamitvā pabbajito. So mahantaṃ kapallaṃ ‘‘patta’’nti gahetvā carati, kapallapūraṃ yāguṃ pivati, bhattaṃ bhuñjati, pūvakhajjakañca khādati. Athassa mahagghasabhāvaṃ satthu ārocesuṃ. Satthā tassa pattatthavikaṃ nānujāni, heṭṭhāmañce pattaṃ nikkujjitvā ṭhapeti, so ṭhapentopi ghaṃsentova paṇāmetvā ṭhapeti, gaṇhantopi ghaṃsentova ākaḍḍhitvā gaṇhāti. Taṃ gacchante gacchante kāle ghaṃsanena parikkhīṇaṃ, nāḷikodanamattasseva gaṇhanakaṃ jātaṃ. Tato satthu ārocesuṃ, athassa satthā pattatthavikaṃ anujāni. Thero aparena samayena indriyabhāvanaṃ bhāvento aggaphale arahatte patiṭṭhāsi. Iti so pubbe savisesaṃ piṇḍatthāya ulatīti piṇḍolo, gottena pana bhāradvājoti ubhayaṃ ekato katvā ‘‘piṇḍolabhāradvājo’’ti vuccati.
ਆਰਞ੍ਞਕੋਤਿ ਗਾਮਨ੍ਤਸੇਨਾਸਨਪਟਿਕ੍ਖਿਪਨੇਨ ਅਰਞ੍ਞੇ ਨਿવਾਸੋ ਅਸ੍ਸਾਤਿ ਆਰਞ੍ਞਕੋ, ਆਰਞ੍ਞਕਧੁਤਙ੍ਗਂ ਸਮਾਦਾਯ વਤ੍ਤਨ੍ਤਸ੍ਸੇਤਂ ਨਾਮਂ। ਤਥਾ ਭਿਕ੍ਖਾਸਙ੍ਖਾਤਾਨਂ ਆਮਿਸਪਿਣ੍ਡਾਨਂ ਪਾਤੋ ਪਿਣ੍ਡਪਾਤੋ, ਪਰੇਹਿ ਦਿਨ੍ਨਾਨਂ ਪਿਣ੍ਡਾਨਂ ਪਤ੍ਤੇ ਨਿਪਤਨਨ੍ਤਿ ਅਤ੍ਥੋ। ਪਿਣ੍ਡਪਾਤਂ ਉਞ੍ਛਤਿ ਤਂ ਤਂ ਕੁਲਂ ਉਪਸਙ੍ਕਮਨ੍ਤੋ ਗવੇਸਤੀਤਿ ਪਿਣ੍ਡਪਾਤਿਕੋ, ਪਿਣ੍ਡਾਯ વਾ ਪਤਿਤੁਂ ਚਰਿਤੁਂ વਤਮੇਤਸ੍ਸਾਤਿ ਪਿਣ੍ਡਪਾਤੀ, ਪਿਣ੍ਡਪਾਤੀਯੇવ ਪਿਣ੍ਡਪਾਤਿਕੋ। ਸਙ੍ਕਾਰਕੂਟਾਦੀਸੁ ਪਂਸੂਨਂ ਉਪਰਿ ਠਿਤਤ੍ਤਾ ਅਬ੍ਭੁਗ੍ਗਤਟ੍ਠੇਨ ਪਂਸੁਕੂਲਂ વਿਯਾਤਿ ਪਂਸੁਕੂਲਂ, ਪਂਸੁ વਿਯ વਾ ਕੁਚ੍ਛਿਤਭਾવਂ ਉਲਤਿ ਗਚ੍ਛਤੀਤਿ ਪਂਸੁਕੂਲਂ, ਪਂਸੁਕੂਲਸ੍ਸ ਧਾਰਣਂ ਪਂਸੁਕੂਲਂ, ਤਂ ਸੀਲਂ ਏਤਸ੍ਸਾਤਿ ਪਂਸੁਕੂਲਿਕੋ। ਸਙ੍ਘਾਟਿਉਤ੍ਤਰਾਸਙ੍ਗਅਨ੍ਤਰવਾਸਕਸਙ੍ਖਾਤਾਨਿ ਤੀਣਿ ਚੀવਰਾਨਿ ਤਿਚੀવਰਂ, ਤਿਚੀવਰਸ੍ਸ ਧਾਰਣਂ ਤਿਚੀવਰਂ, ਤਂ ਸੀਲਂ ਏਤਸ੍ਸਾਤਿ ਤੇਚੀવਰਿਕੋ। ਅਪ੍ਪਿਚ੍ਛੋਤਿਆਦੀਨਂ ਪਦਾਨਂ ਅਤ੍ਥੋ ਹੇਟ੍ਠਾ વੁਤ੍ਤੋਯੇવ।
Āraññakoti gāmantasenāsanapaṭikkhipanena araññe nivāso assāti āraññako, āraññakadhutaṅgaṃ samādāya vattantassetaṃ nāmaṃ. Tathā bhikkhāsaṅkhātānaṃ āmisapiṇḍānaṃ pāto piṇḍapāto, parehi dinnānaṃ piṇḍānaṃ patte nipatananti attho. Piṇḍapātaṃ uñchati taṃ taṃ kulaṃ upasaṅkamanto gavesatīti piṇḍapātiko, piṇḍāya vā patituṃ carituṃ vatametassāti piṇḍapātī, piṇḍapātīyeva piṇḍapātiko. Saṅkārakūṭādīsu paṃsūnaṃ upari ṭhitattā abbhuggataṭṭhena paṃsukūlaṃ viyāti paṃsukūlaṃ, paṃsu viya vā kucchitabhāvaṃ ulati gacchatīti paṃsukūlaṃ, paṃsukūlassa dhāraṇaṃ paṃsukūlaṃ, taṃ sīlaṃ etassāti paṃsukūliko. Saṅghāṭiuttarāsaṅgaantaravāsakasaṅkhātāni tīṇi cīvarāni ticīvaraṃ, ticīvarassa dhāraṇaṃ ticīvaraṃ, taṃ sīlaṃ etassāti tecīvariko. Appicchotiādīnaṃ padānaṃ attho heṭṭhā vuttoyeva.
ਧੁਤવਾਦੋਤਿ ਧੁਤੋ વੁਚ੍ਚਤਿ ਧੁਤਕਿਲੇਸੋ ਪੁਗ੍ਗਲੋ, ਕਿਲੇਸਧੁਨਨਕਧਮ੍ਮੋ વਾ। ਤਤ੍ਥ ਅਤ੍ਥਿ ਧੁਤੋ, ਨ ਧੁਤવਾਦੋ, ਅਤ੍ਥਿ ਨ ਧੁਤੋ, ਧੁਤવਾਦੋ, ਅਤ੍ਥਿ ਨੇવ ਧੁਤੋ, ਨ ਧੁਤવਾਦੋ, ਅਤ੍ਥਿ ਧੁਤੋ ਚੇવ, ਧੁਤવਾਦੋ ਚਾਤਿ ਇਦਂ ਚਤੁਕ੍ਕਂ વੇਦਿਤਬ੍ਬਂ। ਤੇਸੁ ਯੋ ਸਯਂ ਧੁਤਧਮ੍ਮੇ ਸਮਾਦਾਯ વਤ੍ਤਤਿ, ਨ ਪਰਂ ਤਦਤ੍ਥਾਯ ਸਮਾਦਪੇਤਿ, ਅਯਂ ਪਠਮੋ। ਯੋ ਪਨ ਸਯਂ ਨ ਧੁਤਧਮ੍ਮੇ ਸਮਾਦਾਯ વਤ੍ਤਤਿ, ਪਰਂ ਸਮਾਦਪੇਤਿ, ਅਯਂ ਦੁਤਿਯੋ। ਯੋ ਉਭਯਰਹਿਤੋ, ਅਯਂ ਤਤਿਯੋ। ਯੋ ਪਨ ਉਭਯਸਮ੍ਪਨ੍ਨੋ, ਅਯਂ ਚਤੁਤ੍ਥੋ। ਏવਰੂਪੋ ਚ ਆਯਸ੍ਮਾ ਪਿਣ੍ਡੋਲਭਾਰਦ੍વਾਜੋਤਿ। ਤੇਨ વੁਤ੍ਤਂ ‘‘ਧੁਤવਾਦੋ’’ਤਿ। ਏਕਦੇਸਸਰੂਪੇਕਸੇਸવਸੇਨ ਹਿ ਅਯਂ ਨਿਦ੍ਦੇਸੋ ਯਥਾ ਤਂ ‘‘ਨਾਮਰੂਪ’’ਨ੍ਤਿ।
Dhutavādoti dhuto vuccati dhutakileso puggalo, kilesadhunanakadhammo vā. Tattha atthi dhuto, na dhutavādo, atthi na dhuto, dhutavādo, atthi neva dhuto, na dhutavādo, atthi dhuto ceva, dhutavādo cāti idaṃ catukkaṃ veditabbaṃ. Tesu yo sayaṃ dhutadhamme samādāya vattati, na paraṃ tadatthāya samādapeti, ayaṃ paṭhamo. Yo pana sayaṃ na dhutadhamme samādāya vattati, paraṃ samādapeti, ayaṃ dutiyo. Yo ubhayarahito, ayaṃ tatiyo. Yo pana ubhayasampanno, ayaṃ catuttho. Evarūpo ca āyasmā piṇḍolabhāradvājoti. Tena vuttaṃ ‘‘dhutavādo’’ti. Ekadesasarūpekasesavasena hi ayaṃ niddeso yathā taṃ ‘‘nāmarūpa’’nti.
ਅਧਿਚਿਤ੍ਤਮਨੁਯੁਤ੍ਤੋਤਿ ਏਤ੍ਥ ਅਟ੍ਠਸਮਾਪਤ੍ਤਿਸਮ੍ਪਯੋਗਤੋ ਅਰਹਤ੍ਤਫਲਸਮਾਪਤ੍ਤਿਸਮ੍ਪਯੋਗਤੋ વਾ ਚਿਤ੍ਤਸ੍ਸ ਅਧਿਚਿਤ੍ਤਭਾવੋ વੇਦਿਤਬ੍ਬੋ, ਇਧ ਪਨ ‘‘ਅਰਹਤ੍ਤਫਲਚਿਤ੍ਤ’’ਨ੍ਤਿ વਦਨ੍ਤਿ। ਤਂਤਂਸਮਾਪਤ੍ਤੀਸੁ ਸਮਾਧਿ ਏવ ਅਧਿਚਿਤ੍ਤਂ, ਇਧ ਪਨ ਅਰਹਤ੍ਤਫਲਸਮਾਧਿ વੇਦਿਤਬ੍ਬੋ। ਕੇਚਿ ਪਨ ‘‘ਅਧਿਚਿਤ੍ਤਮਨੁਯੁਤ੍ਤੇਨ, ਭਿਕ੍ਖવੇ, ਭਿਕ੍ਖੁਨਾ ਕਾਲੇਨ ਕਾਲਂ ਤੀਣਿ ਨਿਮਿਤ੍ਤਾਨਿ ਮਨਸਿ ਕਾਤਬ੍ਬਾਨੀਤਿ ਏਤਸ੍ਮਿਂ ਅਧਿਚਿਤ੍ਤਸੁਤ੍ਤੇ (ਅ॰ ਨਿ॰ ੩.੧੦੩) વਿਯ ਸਮਥવਿਪਸ੍ਸਨਾਚਿਤ੍ਤਂ ਅਧਿਚਿਤ੍ਤਨ੍ਤਿ ਇਧਾਧਿਪ੍ਪੇਤ’’ਨ੍ਤਿ વਦਨ੍ਤਿ, ਤਂ ਨ ਸੁਨ੍ਦਰਂ। ਪੁਰਿਮੋਯੇવਤ੍ਥੋ ਗਹੇਤਬ੍ਬੋ।
Adhicittamanuyuttoti ettha aṭṭhasamāpattisampayogato arahattaphalasamāpattisampayogato vā cittassa adhicittabhāvo veditabbo, idha pana ‘‘arahattaphalacitta’’nti vadanti. Taṃtaṃsamāpattīsu samādhi eva adhicittaṃ, idha pana arahattaphalasamādhi veditabbo. Keci pana ‘‘adhicittamanuyuttena, bhikkhave, bhikkhunā kālena kālaṃ tīṇi nimittāni manasi kātabbānīti etasmiṃ adhicittasutte (a. ni. 3.103) viya samathavipassanācittaṃ adhicittanti idhādhippeta’’nti vadanti, taṃ na sundaraṃ. Purimoyevattho gahetabbo.
ਏਤਮਤ੍ਥਂ વਿਦਿਤ੍વਾਤਿ ਏਤਂ ਆਯਸ੍ਮਤੋ ਪਿਣ੍ਡੋਲਭਾਰਦ੍વਾਜਸ੍ਸ ਅਧਿਟ੍ਠਾਨਪਰਿਕ੍ਖਾਰਸਮ੍ਪਦਾਸਮ੍ਪਨ੍ਨਂ ਅਧਿਚਿਤ੍ਤਾਨੁਯੋਗਸਙ੍ਖਾਤਂ ਅਤ੍ਥਂ ਸਬ੍ਬਾਕਾਰਤੋ વਿਦਿਤ੍વਾ। ਏવਂ ‘‘ਅਧਿਚਿਤ੍ਤਾਨੁਯੋਗੋ ਮਮ ਸਾਸਨਾਨੁਟ੍ਠਾਨ’’ਨ੍ਤਿ ਦੀਪੇਨ੍ਤੋ ਇਮਂ ਉਦਾਨਂ ਉਦਾਨੇਸਿ।
Etamatthaṃviditvāti etaṃ āyasmato piṇḍolabhāradvājassa adhiṭṭhānaparikkhārasampadāsampannaṃ adhicittānuyogasaṅkhātaṃ atthaṃ sabbākārato viditvā. Evaṃ ‘‘adhicittānuyogo mama sāsanānuṭṭhāna’’nti dīpento imaṃ udānaṃ udānesi.
ਤਤ੍ਥ ਅਨੂਪવਾਦੋਤਿ વਾਚਾਯ ਕਸ੍ਸਚਿਪਿ ਅਨੁਪવਦਨਂ। ਅਨੂਪਘਾਤੋਤਿ ਕਾਯੇਨ ਕਸ੍ਸਚਿ ਉਪਘਾਤਾਕਰਣਂ। ਪਾਤਿਮੋਕ੍ਖੇਤਿ ਏਤ੍ਥ ਪਾਤਿਮੋਕ੍ਖਪਦਸ੍ਸ ਅਤ੍ਥੋ ਹੇਟ੍ਠਾ ਨਾਨਪ੍ਪਕਾਰੇਹਿ વੁਤ੍ਤੋ, ਤਸ੍ਮਿਂ ਪਾਤਿਮੋਕ੍ਖੇ। ਸਤ੍ਤਨ੍ਨਂ ਆਪਤ੍ਤਿਕ੍ਖਨ੍ਧਾਨਂ ਅવੀਤਿਕ੍ਕਮਲਕ੍ਖਣੋ ਸਂવਰੋ। ਮਤ੍ਤਞ੍ਞੁਤਾਤਿ ਪਟਿਗ੍ਗਹਣਪਰਿਭੋਗવਸੇਨ ਪਮਾਣਞ੍ਞੁਤਾ। ਪਨ੍ਤਞ੍ਚ ਸਯਨਾਸਨਨ੍ਤਿ વਿવਿਤ੍ਤਂ ਸਙ੍ਘਟ੍ਟਨવਿਰਹਿਤਂ ਸੇਨਾਸਨਂ। ਅਧਿਚਿਤ੍ਤੇ ਚ ਆਯੋਗੋਤਿ ਅਟ੍ਠਨ੍ਨਂ ਸਮਾਪਤ੍ਤੀਨਂ ਅਧਿਗਮਾਯ ਭਾવਨਾਨੁਯੋਗੋ।
Tattha anūpavādoti vācāya kassacipi anupavadanaṃ. Anūpaghātoti kāyena kassaci upaghātākaraṇaṃ. Pātimokkheti ettha pātimokkhapadassa attho heṭṭhā nānappakārehi vutto, tasmiṃ pātimokkhe. Sattannaṃ āpattikkhandhānaṃ avītikkamalakkhaṇo saṃvaro. Mattaññutāti paṭiggahaṇaparibhogavasena pamāṇaññutā. Pantañca sayanāsananti vivittaṃ saṅghaṭṭanavirahitaṃ senāsanaṃ. Adhicitte ca āyogoti aṭṭhannaṃ samāpattīnaṃ adhigamāya bhāvanānuyogo.
ਅਪਰੋ ਨਯੋ – ਅਨੂਪવਾਦੋਤਿ ਕਸ੍ਸਚਿਪਿ ਉਪਰੁਜ੍ਝਨવਚਨਸ੍ਸ ਅવਦਨਂ। ਤੇਨ ਸਬ੍ਬਮ੍ਪਿ વਾਚਸਿਕਂ ਸੀਲਂ ਸਙ੍ਗਣ੍ਹਾਤਿ। ਅਨੂਪਘਾਤੋਤਿ ਕਾਯੇਨ ਕਸ੍ਸਚਿ ਉਪਘਾਤਸ੍ਸ ਪਰવਿਹੇਠਨਸ੍ਸ ਅਕਰਣਂ। ਤੇਨ ਸਬ੍ਬਮ੍ਪਿ ਕਾਯਿਕਂ ਸੀਲਂ ਸਙ੍ਗਣ੍ਹਾਤਿ। ਯਾਦਿਸਂ ਪਨਿਦਂ ਉਭਯਂ ਬੁਦ੍ਧਾਨਂ ਸਾਸਨਨ੍ਤੋਗਧਂ ਹੋਤਿ, ਤਂ ਦਸ੍ਸੇਤੁਂ – ‘‘ਪਾਤਿਮੋਕ੍ਖੇ ਚ ਸਂવਰੋ’’ਤਿ વੁਤ੍ਤਂ। ਚਸਦ੍ਦੋ ਨਿਪਾਤਮਤ੍ਤਂ। ਪਾਤਿਮੋਕ੍ਖੇ ਚ ਸਂવਰੋਤਿ ਪਾਤਿਮੋਕ੍ਖਸਂવਰਭੂਤੋ ਅਨੂਪવਾਦੋ ਅਨੂਪਘਾਤੋ ਚਾਤਿ ਅਤ੍ਥੋ।
Aparo nayo – anūpavādoti kassacipi uparujjhanavacanassa avadanaṃ. Tena sabbampi vācasikaṃ sīlaṃ saṅgaṇhāti. Anūpaghātoti kāyena kassaci upaghātassa paraviheṭhanassa akaraṇaṃ. Tena sabbampi kāyikaṃ sīlaṃ saṅgaṇhāti. Yādisaṃ panidaṃ ubhayaṃ buddhānaṃ sāsanantogadhaṃ hoti, taṃ dassetuṃ – ‘‘pātimokkhe ca saṃvaro’’ti vuttaṃ. Casaddo nipātamattaṃ. Pātimokkhe ca saṃvaroti pātimokkhasaṃvarabhūto anūpavādo anūpaghāto cāti attho.
ਅਥ વਾ ਪਾਤਿਮੋਕ੍ਖੇਤਿ ਅਧਿਕਰਣੇ ਭੁਮ੍ਮਂ। ਪਾਤਿਮੋਕ੍ਖੇ ਨਿਸ੍ਸਯਭੂਤੇ ਸਂવਰੋ। ਕੋ ਪਨ ਸੋਤਿ? ਅਨੂਪવਾਦੋ ਅਨੂਪਘਾਤੋ। ਉਪਸਮ੍ਪਦવੇਲਾਯਞ੍ਹਿ ਅવਿਸੇਸੇਨ ਪਾਤਿਮੋਕ੍ਖਸੀਲਂ ਸਮਾਦਿਨ੍ਨਂ ਨਾਮ ਹੋਤਿ, ਤਸ੍ਮਿਂ ਪਾਤਿਮੋਕ੍ਖੇ ਠਿਤਸ੍ਸ ਤਤੋ ਪਰਂ ਉਪવਾਦੂਪਘਾਤਾਨਂ ਅਕਰਣવਸੇਨ ਸਂવਰੋ, ਸੋ ਅਨੂਪવਾਦੋ ਅਨੂਪਘਾਤੋ ਚਾਤਿ વੁਤ੍ਤੋ।
Atha vā pātimokkheti adhikaraṇe bhummaṃ. Pātimokkhe nissayabhūte saṃvaro. Ko pana soti? Anūpavādo anūpaghāto. Upasampadavelāyañhi avisesena pātimokkhasīlaṃ samādinnaṃ nāma hoti, tasmiṃ pātimokkhe ṭhitassa tato paraṃ upavādūpaghātānaṃ akaraṇavasena saṃvaro, so anūpavādo anūpaghāto cāti vutto.
ਅਥ વਾ ਪਾਤਿਮੋਕ੍ਖੇਤਿ ਨਿਪ੍ਫਾਦੇਤਬ੍ਬੇ ਭੁਮ੍ਮਂ ਯਥਾ ‘‘ਚੇਤਸੋ ਅવੂਪਸਮੋ ਅਯੋਨਿਸੋਮਨਸਿਕਾਰਪਦਟ੍ਠਾਨ’’ਨ੍ਤਿ (ਸਂ॰ ਨਿ॰ ੫.੨੩੨)। ਤੇਨ ਪਾਤਿਮੋਕ੍ਖੇਨ ਸਾਧੇਤਬ੍ਬੋ ਅਨੂਪવਾਦੋ ਅਨੂਪਘਾਤੋ, ਪਾਤਿਮੋਕ੍ਖਸਂવਰਸਙ੍ਗਹਿਤੋ ਅਨੂਪવਾਦੋ ਅਨੂਪਘਾਤੋਇਚ੍ਚੇવ ਅਤ੍ਥੋ। ਸਂવਰੋਤਿ ਇਮਿਨਾ ਪਨ ਸਤਿਸਂવਰੋ , ਞਾਣਸਂવਰੋ, ਖਨ੍ਤਿਸਂવਰੋ, વੀਰਿਯਸਂવਰੋਤਿ ਇਮੇਸਂ ਚਤੁਨ੍ਨਂ ਸਂવਰਾਨਂ ਗਹਣਂ, ਪਾਤਿਮੋਕ੍ਖਸਾਧਨਂ ਇਦਂ ਸਂવਰਚਤੁਕ੍ਕਂ।
Atha vā pātimokkheti nipphādetabbe bhummaṃ yathā ‘‘cetaso avūpasamo ayonisomanasikārapadaṭṭhāna’’nti (saṃ. ni. 5.232). Tena pātimokkhena sādhetabbo anūpavādo anūpaghāto, pātimokkhasaṃvarasaṅgahito anūpavādo anūpaghātoicceva attho. Saṃvaroti iminā pana satisaṃvaro , ñāṇasaṃvaro, khantisaṃvaro, vīriyasaṃvaroti imesaṃ catunnaṃ saṃvarānaṃ gahaṇaṃ, pātimokkhasādhanaṃ idaṃ saṃvaracatukkaṃ.
ਮਤ੍ਤਞ੍ਞੁਤਾ ਚ ਭਤ੍ਤਸ੍ਮਿਨ੍ਤਿ ਪਰਿਯੇਸਨਪਟਿਗ੍ਗਹਣਪਰਿਭੋਗવਿਸ੍ਸਜ੍ਜਨਾਨਂ વਸੇਨ ਭੋਜਨੇ ਪਮਾਣਞ੍ਞੁਤਾ। ਪਨ੍ਤਞ੍ਚ ਸਯਨਾਸਨਨ੍ਤਿ ਭਾવਨਾਨੁਕੂਲਂ ਅਰਞ੍ਞਰੁਕ੍ਖਮੂਲਾਦਿવਿવਿਤ੍ਤਸੇਨਾਸਨਂ। ਅਧਿਚਿਤ੍ਤੇ ਚ ਆਯੋਗੋਤਿ ਸਬ੍ਬਚਿਤ੍ਤਾਨਂ ਅਧਿਕਤ੍ਤਾ ਉਤ੍ਤਮਤ੍ਤਾ ਅਧਿਚਿਤ੍ਤਸਙ੍ਖਾਤੇ ਅਰਹਤ੍ਤਫਲਚਿਤ੍ਤੇ ਸਾਧੇਤਬ੍ਬੇ ਤਸ੍ਸ ਨਿਪ੍ਫਾਦਨਤ੍ਥਂ ਸਮਥવਿਪਸ੍ਸਨਾਭਾવਨਾવਸੇਨ ਆਯੋਗੋ। ਏਤਂ ਬੁਦ੍ਧਾਨ ਸਾਸਨਨ੍ਤਿ ਏਤਂ ਪਰਸ੍ਸ ਅਨੂਪવਦਨਂ, ਅਨੂਪਘਾਤਨਂ, ਪਾਤਿਮੋਕ੍ਖਸਂવਰੋ , ਪਰਿਯੇਸਨਪਟਿਗ੍ਗਹਣਾਦੀਸੁ ਮਤ੍ਤਞ੍ਞੁਤਾ, વਿવਿਤ੍ਤવਾਸੋ, ਯਥਾવੁਤ੍ਤਅਧਿਚਿਤ੍ਤਾਨੁਯੋਗੋ ਚ ਬੁਦ੍ਧਾਨਂ ਸਾਸਨਂ ਓવਾਦੋ ਅਨੁਸਿਟ੍ਠੀਤਿ ਅਤ੍ਥੋ। ਏવਂ ਇਮਾਯ ਗਾਥਾਯ ਤਿਸ੍ਸੋ ਸਿਕ੍ਖਾ ਕਥਿਤਾਤਿ વੇਦਿਤਬ੍ਬਾ।
Mattaññutā ca bhattasminti pariyesanapaṭiggahaṇaparibhogavissajjanānaṃ vasena bhojane pamāṇaññutā. Pantañca sayanāsananti bhāvanānukūlaṃ araññarukkhamūlādivivittasenāsanaṃ. Adhicitte ca āyogoti sabbacittānaṃ adhikattā uttamattā adhicittasaṅkhāte arahattaphalacitte sādhetabbe tassa nipphādanatthaṃ samathavipassanābhāvanāvasena āyogo. Etaṃ buddhāna sāsananti etaṃ parassa anūpavadanaṃ, anūpaghātanaṃ, pātimokkhasaṃvaro , pariyesanapaṭiggahaṇādīsu mattaññutā, vivittavāso, yathāvuttaadhicittānuyogo ca buddhānaṃ sāsanaṃ ovādo anusiṭṭhīti attho. Evaṃ imāya gāthāya tisso sikkhā kathitāti veditabbā.
ਛਟ੍ਠਸੁਤ੍ਤવਣ੍ਣਨਾ ਨਿਟ੍ਠਿਤਾ।
Chaṭṭhasuttavaṇṇanā niṭṭhitā.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਸੁਤ੍ਤਪਿਟਕ • Suttapiṭaka / ਖੁਦ੍ਦਕਨਿਕਾਯ • Khuddakanikāya / ਉਦਾਨਪਾਲ਼ਿ • Udānapāḷi / ੬. ਪਿਣ੍ਡੋਲਸੁਤ੍ਤਂ • 6. Piṇḍolasuttaṃ
