| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
8. பிண்டொ³ல்யஸுத்தவண்ணனா
8. Piṇḍolyasuttavaṇṇanā
80. அட்ட²மே கிஸ்மிஞ்சிதே³வ பகரணேதி கிஸ்மிஞ்சிதே³வ காரணே. பணாமெத்வாதி நீஹரித்வா. கிஸ்மிங் பன காரணே ஏதே ப⁴க³வதா பணாமிதாதி? ஏகஸ்மிஞ்ஹி அந்தோவஸ்ஸே ப⁴க³வா ஸாவத்தி²யங் வஸித்வா வுத்த²வஸ்ஸோ பவாரெத்வா மஹாபி⁴க்கு²ஸங்க⁴பரிவாரோ ஸாவத்தி²தோ நிக்க²மித்வா ஜனபத³சாரிகங் சரந்தோ கபிலவத்து²ங் பத்வா நிக்³ரோதா⁴ராமங் பாவிஸி. ஸக்யராஜானோ ‘‘ஸத்தா² ஆக³தோ’’தி ஸுத்வா பச்சா²ப⁴த்தே கப்பியானி தேலமது⁴பா²ணிதாதீ³னி சேவ பானகானி ச காஜஸதேஹி கா³ஹாபெத்வா விஹாரங் க³ந்த்வா ஸங்க⁴ஸ்ஸ நிய்யாதெத்வா ஸத்தா²ரங் வந்தி³த்வா படிஸந்தா²ரங் கரொந்தா ஏகமந்தே நிஸீதி³ங்ஸு. ஸத்தா² தேஸங் மது⁴ரத⁴ம்மகத²ங் கதெ²ந்தோ நிஸீதி³. தஸ்மிங் க²ணே ஏகச்சே பி⁴க்கூ² ஸேனாஸனங் படிஜக்³க³ந்தி, ஏகச்சே மஞ்சபீடா²தீ³னி பஞ்ஞாபெந்தி, ஸாமணேரா அப்பஹரிதங் கரொந்தி. பா⁴ஜனீயட்டா²னே ஸம்பத்தபி⁴க்கூ²பி அத்தி², அஸம்பத்தபி⁴க்கூ²பி அத்தி². ஸம்பத்தா அஸம்பத்தானங் லாப⁴ங் க³ண்ஹந்தா, ‘‘அம்ஹாகங் தே³த², அம்ஹாகங் ஆசரியஸ்ஸ தே³த² உபஜ்ஜா²யஸ்ஸ தே³தா²’’தி கதெ²ந்தா மஹாஸத்³த³மகங்ஸு. ஸத்தா² ஸுத்வா தே²ரங் புச்சி² ‘‘கே பன தே, ஆனந்த³, உச்சாஸத்³தா³ மஹாஸத்³தா³ கேவட்டா மஞ்ஞே மச்ச²விலோபே’’தி? தே²ரோ ஏதமத்த²ங் ஆரோசேஸி. ஸத்தா² ஸுத்வா ‘‘ஆமிஸஹேது, ஆனந்த³, பி⁴க்கூ² மஹாஸத்³த³ங் கரொந்தீ’’தி ஆஹ. ‘‘ஆம, ப⁴ந்தே’’தி. ‘‘அனநுச்ச²விகங், ஆனந்த³, அப்பதிரூபங். ந ஹி மயா கப்பஸதஸஹஸ்ஸாதி⁴கானி சத்தாரி அஸங்க்²யெய்யானி சீவராதி³ஹேது பாரமியோ பூரிதா, நாபி இமே பி⁴க்கூ² சீவராதி³ஹேது அகா³ரஸ்மா அனகா³ரியங் பப்³ப³ஜிதா, அரஹத்தஹேது பப்³ப³ஜித்வா அனத்த²ங் அத்த²ஸதி³ஸங் அஸாரங் ஸாரஸதி³ஸங் கரொந்தி, க³ச்சா²னந்த³, தே பி⁴க்கூ² பணாமேஹீ’’தி.
80. Aṭṭhame kismiñcideva pakaraṇeti kismiñcideva kāraṇe. Paṇāmetvāti nīharitvā. Kismiṃ pana kāraṇe ete bhagavatā paṇāmitāti? Ekasmiñhi antovasse bhagavā sāvatthiyaṃ vasitvā vutthavasso pavāretvā mahābhikkhusaṅghaparivāro sāvatthito nikkhamitvā janapadacārikaṃ caranto kapilavatthuṃ patvā nigrodhārāmaṃ pāvisi. Sakyarājāno ‘‘satthā āgato’’ti sutvā pacchābhatte kappiyāni telamadhuphāṇitādīni ceva pānakāni ca kājasatehi gāhāpetvā vihāraṃ gantvā saṅghassa niyyātetvā satthāraṃ vanditvā paṭisanthāraṃ karontā ekamante nisīdiṃsu. Satthā tesaṃ madhuradhammakathaṃ kathento nisīdi. Tasmiṃ khaṇe ekacce bhikkhū senāsanaṃ paṭijagganti, ekacce mañcapīṭhādīni paññāpenti, sāmaṇerā appaharitaṃ karonti. Bhājanīyaṭṭhāne sampattabhikkhūpi atthi, asampattabhikkhūpi atthi. Sampattā asampattānaṃ lābhaṃ gaṇhantā, ‘‘amhākaṃ detha, amhākaṃ ācariyassa detha upajjhāyassa dethā’’ti kathentā mahāsaddamakaṃsu. Satthā sutvā theraṃ pucchi ‘‘ke pana te, ānanda, uccāsaddā mahāsaddā kevaṭṭā maññe macchavilope’’ti? Thero etamatthaṃ ārocesi. Satthā sutvā ‘‘āmisahetu, ānanda, bhikkhū mahāsaddaṃ karontī’’ti āha. ‘‘Āma, bhante’’ti. ‘‘Ananucchavikaṃ, ānanda, appatirūpaṃ. Na hi mayā kappasatasahassādhikāni cattāri asaṅkhyeyyāni cīvarādihetu pāramiyo pūritā, nāpi ime bhikkhū cīvarādihetu agārasmā anagāriyaṃ pabbajitā, arahattahetu pabbajitvā anatthaṃ atthasadisaṃ asāraṃ sārasadisaṃ karonti, gacchānanda, te bhikkhū paṇāmehī’’ti.
புப்³ப³ண்ஹஸமயந்தி து³தியதி³வஸே புப்³ப³ண்ஹஸமயங். பே³லுவலட்டி²காய மூலேதி தருணபே³லுவருக்க²மூலே. பபா³ள்ஹோதி பபா³ஹிதோ. பவாள்ஹோதிபி பாடோ², பவாஹிதோதி அத்தோ². உப⁴யம்பி நீஹடபா⁴வமேவ தீ³பேதி. ஸியா அஞ்ஞத²த்தந்தி பஸாத³ஞ்ஞத²த்தங் வா பா⁴வஞ்ஞத²த்தங் வா ப⁴வெய்ய. கத²ங்? ‘‘ஸம்மாஸம்பு³த்³தே⁴ன மயங் லஹுகே காரணே பணாமிதா’’தி பஸாத³ங் மந்த³ங் கரொந்தானங் பஸாத³ஞ்ஞத²த்தங் நாம ஹோதி. ஸலிங்கே³னேவ தித்தா²யதனங் பக்கமந்தானங் பா⁴வஞ்ஞத²த்தங் நாம. ஸியா விபரிணாமோதி எத்த² பன ‘‘மயங் ஸத்து² அஜ்ஜா²ஸயங் க³ண்ஹிதுங் ஸக்கி²ஸ்ஸாமாதி பப்³ப³ஜிதா, நங் க³ஹேதுங் அஸக்கொந்தானங் கிங் அம்ஹாகங் பப்³ப³ஜ்ஜாயா’’தி? ஸிக்க²ங் பச்சக்கா²ய ஹீனாயாவத்தனங் விபரிணாமோதி வேதி³தப்³போ³. வச்ச²ஸ்ஸாதி கீ²ரூபகவச்ச²ஸ்ஸ. அஞ்ஞத²த்தந்தி மிலாயனஅஞ்ஞத²த்தங். கீ²ரூபகோ ஹி வச்சோ² மாது அத³ஸ்ஸனேன கீ²ரங் அலப⁴ந்தோ மிலாயதி கம்பதி பவேத⁴தி. விபரிணாமோதி மரணங். ஸோ ஹி கீ²ரங் அலப⁴மானோ கீ²ரபிபாஸாய ஸுஸ்ஸந்தோ பதித்வா மரதி.
Pubbaṇhasamayanti dutiyadivase pubbaṇhasamayaṃ. Beluvalaṭṭhikāya mūleti taruṇabeluvarukkhamūle. Pabāḷhoti pabāhito. Pavāḷhotipi pāṭho, pavāhitoti attho. Ubhayampi nīhaṭabhāvameva dīpeti. Siyā aññathattanti pasādaññathattaṃ vā bhāvaññathattaṃ vā bhaveyya. Kathaṃ? ‘‘Sammāsambuddhena mayaṃ lahuke kāraṇe paṇāmitā’’ti pasādaṃ mandaṃ karontānaṃ pasādaññathattaṃ nāma hoti. Saliṅgeneva titthāyatanaṃ pakkamantānaṃ bhāvaññathattaṃ nāma. Siyā vipariṇāmoti ettha pana ‘‘mayaṃ satthu ajjhāsayaṃ gaṇhituṃ sakkhissāmāti pabbajitā, naṃ gahetuṃ asakkontānaṃ kiṃ amhākaṃ pabbajjāyā’’ti? Sikkhaṃ paccakkhāya hīnāyāvattanaṃ vipariṇāmoti veditabbo. Vacchassāti khīrūpakavacchassa. Aññathattanti milāyanaaññathattaṃ. Khīrūpako hi vaccho mātu adassanena khīraṃ alabhanto milāyati kampati pavedhati. Vipariṇāmoti maraṇaṃ. So hi khīraṃ alabhamāno khīrapipāsāya sussanto patitvā marati.
பீ³ஜானங் தருணானந்தி உத³கேன அனுக்³க³ஹேதப்³பா³னங் விரூள்ஹபீ³ஜானங். அஞ்ஞத²த்தந்தி மிலாயனஞ்ஞத²த்தமேவ. தானி ஹி உத³கங் அலப⁴ந்தானி மிலாயந்தி. விபரிணாமோதி வினாஸோ. தானி ஹி உத³கங் அலப⁴ந்தானி ஸுக்கி²த்வா வினஸ்ஸந்தி, பலாலமேவ ஹொந்தி. அனுக்³க³ஹிதோதி ஆமிஸானுக்³க³ஹேன சேவ த⁴ம்மானுக்³க³ஹேன ச அனுக்³க³ஹிதோ. அனுக்³க³ண்ஹெய்யந்தி த்³வீஹிபி ஏதேஹி அனுக்³க³ஹேஹி அனுக்³க³ண்ஹெய்யங். அசிரபப்³ப³ஜிதா ஹி ஸாமணேரா சேவ த³ஹரபி⁴க்கூ² ச சீவராதி³பச்சயவேகல்லே வா ஸதி கே³லஞ்ஞே வா ஸத்தா²ரா வா ஆசரியுபஜ்ஜா²யேஹி வா ஆமிஸானுக்³க³ஹேன அனநுக்³க³ஹிதா கிலமந்தா ந ஸக்கொந்தி ஸஜ்ஜா²யங் வா மனஸிகாரங் வா காதுங், த⁴ம்மானுக்³க³ஹேன அனநுக்³க³ஹிதா உத்³தே³ஸேன சேவ ஓவாதா³னுஸாஸனியா ச பரிஹாயமானா ந ஸக்கொந்தி அகுஸலங் பரிவஜ்ஜெத்வா குஸலங் பா⁴வேதுங். இமேஹி பன த்³வீஹி அனுக்³க³ஹேஹி அனுக்³க³ஹிதா காயேன அகிலமந்தா ஸஜ்ஜா²யமனஸிகாரே பவத்தித்வா யதா²னுஸிட்ட²ங் படிபஜ்ஜமானா அபரபா⁴கே³ தங் அனுக்³க³ஹங் அலப⁴ந்தாபி தேனேவ புரிமானுக்³க³ஹேன லத்³த⁴ப³லா ஸாஸனே பதிட்ட²ஹந்தி, தஸ்மா ப⁴க³வதோ ஏவங் பரிவிதக்கோ உத³பாதி³.
Bījānaṃ taruṇānanti udakena anuggahetabbānaṃ virūḷhabījānaṃ. Aññathattanti milāyanaññathattameva. Tāni hi udakaṃ alabhantāni milāyanti. Vipariṇāmoti vināso. Tāni hi udakaṃ alabhantāni sukkhitvā vinassanti, palālameva honti. Anuggahitoti āmisānuggahena ceva dhammānuggahena ca anuggahito. Anuggaṇheyyanti dvīhipi etehi anuggahehi anuggaṇheyyaṃ. Acirapabbajitā hi sāmaṇerā ceva daharabhikkhū ca cīvarādipaccayavekalle vā sati gelaññe vā satthārā vā ācariyupajjhāyehi vā āmisānuggahena ananuggahitā kilamantā na sakkonti sajjhāyaṃ vā manasikāraṃ vā kātuṃ, dhammānuggahena ananuggahitā uddesena ceva ovādānusāsaniyā ca parihāyamānā na sakkonti akusalaṃ parivajjetvā kusalaṃ bhāvetuṃ. Imehi pana dvīhi anuggahehi anuggahitā kāyena akilamantā sajjhāyamanasikāre pavattitvā yathānusiṭṭhaṃ paṭipajjamānā aparabhāge taṃ anuggahaṃ alabhantāpi teneva purimānuggahena laddhabalā sāsane patiṭṭhahanti, tasmā bhagavato evaṃ parivitakko udapādi.
ப⁴க³வதோ புரதோ பாதுரஹோஸீதி ஸத்து² சித்தங் ஞத்வா – ‘‘இமே பி⁴க்கூ² ப⁴க³வதா பணாமிதா, இதா³னி நேஸங் அனுக்³க³ஹங் காதுகாமோ ஏவங் சிந்தேஸி, காரணங் ப⁴க³வா சிந்தேஸி, அஹமெத்த² உஸ்ஸாஹங் ஜனெஸ்ஸாமீ’’தி புரதோ பாகடோ அஹோஸி. ஸந்தெத்த² பி⁴க்கூ²தி இத³ங் ஸோ மஹாப்³ரஹ்மா யதா² நாம ப்³யத்தோ ஸூதோ³ யதே³வ அம்பி³லக்³கா³தீ³ஸு ரஸஜாதங் ரஞ்ஞோ ருச்சதி, தங் அபி⁴ஸங்கா²ரேன ஸாது³தரங் கத்வா புனதி³வஸே உபனாமேதி, ஏவமேவ அத்தனோ ப்³யத்ததாய ப⁴க³வதா ஆஹடஉபமங்யேவ ஏவமேதங் ப⁴க³வாதிஆதி³வசனேஹி அபி⁴ஸங்க²ரித்வா ப⁴க³வந்தங் யாசந்தோ பி⁴க்கு²ஸங்க⁴ஸ்ஸ அனுக்³க³ஹகரணத்த²ங் வத³தி . தத்த² அபி⁴னந்த³தூதி ‘‘மம ஸந்திகங் பி⁴க்கு²ஸங்கோ⁴ ஆக³ச்ச²தூ’’தி. ஏவமஸ்ஸ ஆக³மனங் ஸம்பியாயமானோ அபி⁴னந்த³து. அபி⁴வத³தூதி ஆக³தஸ்ஸ ச ஓவாதா³னுஸாஸனிங் த³த³ந்தோ அபி⁴வத³து.
Bhagavato purato pāturahosīti satthu cittaṃ ñatvā – ‘‘ime bhikkhū bhagavatā paṇāmitā, idāni nesaṃ anuggahaṃ kātukāmo evaṃ cintesi, kāraṇaṃ bhagavā cintesi, ahamettha ussāhaṃ janessāmī’’ti purato pākaṭo ahosi. Santettha bhikkhūti idaṃ so mahābrahmā yathā nāma byatto sūdo yadeva ambilaggādīsu rasajātaṃ rañño ruccati, taṃ abhisaṅkhārena sādutaraṃ katvā punadivase upanāmeti, evameva attano byattatāya bhagavatā āhaṭaupamaṃyeva evametaṃ bhagavātiādivacanehi abhisaṅkharitvā bhagavantaṃ yācanto bhikkhusaṅghassa anuggahakaraṇatthaṃ vadati . Tattha abhinandatūti ‘‘mama santikaṃ bhikkhusaṅgho āgacchatū’’ti. Evamassa āgamanaṃ sampiyāyamāno abhinandatu. Abhivadatūti āgatassa ca ovādānusāsaniṃ dadanto abhivadatu.
படிஸல்லானாதி ஏகீபா⁴வா. இத்³தா⁴பி⁴ஸங்கா²ரங் அபி⁴ஸங்கா²ஸீதி இத்³தி⁴ங் அகாஸி. ஏகத்³வீஹிகாயாதி ஏகேகோ சேவ த்³வே த்³வே ச ஹுத்வா. ஸாரஜ்ஜமானரூபாதி ஒத்தப்பமானஸபா⁴வா பா⁴யமானா. கஸ்மா பன ப⁴க³வா தேஸங் ததா² உபஸங்கமனாய இத்³தி⁴மகாஸீதி? ஹிதபத்த²னாய. யதி³ ஹி தே வக்³க³வக்³கா³ ஹுத்வா ஆக³ச்செ²ய்யுங், ‘‘ப⁴க³வா பி⁴க்கு²ஸங்க⁴ங் பணாமெத்வா அரஞ்ஞங் பவிட்டோ² ஏகதி³வஸம்பி தத்த² வஸிதுங் நாஸக்கி², வேகே³னேவ ஆக³தோ’’தி கேளிம்பி கரெய்யுங். அத² நேஸங் நேவ பு³த்³த⁴கா³ரவங் பச்சுபட்ட²ஹெய்ய, ந த⁴ம்மதே³ஸனங் ஸம்படிச்சி²துங் ஸமத்தா² ப⁴வெய்யுங். ஸப⁴யானங் பன ஸஸாரஜ்ஜானங் ஏகத்³வீஹிகாய ஆக³ச்ச²ந்தானங் பு³த்³த⁴கா³ரவஞ்சேவ பச்சுபட்டி²தங் ப⁴விஸ்ஸதி, த⁴ம்மதே³ஸனஞ்ச ஸம்படிச்சி²துங் ஸக்கி²ஸ்ஸந்தீதி சிந்தெத்வா தேஸங் ஹிதபத்த²னாய ததா²ரூபங் இத்³தி⁴ங் அகாஸி.
Paṭisallānāti ekībhāvā. Iddhābhisaṅkhāraṃ abhisaṅkhāsīti iddhiṃ akāsi. Ekadvīhikāyāti ekeko ceva dve dve ca hutvā. Sārajjamānarūpāti ottappamānasabhāvā bhāyamānā. Kasmā pana bhagavā tesaṃ tathā upasaṅkamanāya iddhimakāsīti? Hitapatthanāya. Yadi hi te vaggavaggā hutvā āgaccheyyuṃ, ‘‘bhagavā bhikkhusaṅghaṃ paṇāmetvā araññaṃ paviṭṭho ekadivasampi tattha vasituṃ nāsakkhi, vegeneva āgato’’ti keḷimpi kareyyuṃ. Atha nesaṃ neva buddhagāravaṃ paccupaṭṭhaheyya, na dhammadesanaṃ sampaṭicchituṃ samatthā bhaveyyuṃ. Sabhayānaṃ pana sasārajjānaṃ ekadvīhikāya āgacchantānaṃ buddhagāravañceva paccupaṭṭhitaṃ bhavissati, dhammadesanañca sampaṭicchituṃ sakkhissantīti cintetvā tesaṃ hitapatthanāya tathārūpaṃ iddhiṃ akāsi.
நிஸீதி³ங்ஸூதி தேஸு ஹி ஸாரஜ்ஜமானரூபேஸு ஆக³ச்ச²ந்தேஸு ஏகோ பி⁴க்கு² ‘‘மமங்யேவ ஸத்தா² ஓலோகேதி, மங்யேவ மஞ்ஞே நிக்³க³ண்ஹிதுகாமோ’’தி ஸணிகங் ஆக³ந்த்வா வந்தி³த்வா நிஸீதி³, அத²ஞ்ஞோ அத²ஞ்ஞோதி ஏவங் பஞ்சபி⁴க்கு²ஸதானி நிஸீதி³ங்ஸு. ஏவங் நிஸின்னங் பன பி⁴க்கு²ஸங்க⁴ங் ஸீத³ந்தரே ஸன்னிஸின்னங் மஹாஸமுத்³த³ங் விய நிவாதே பதீ³பங் விய ச நிச்சலங் தி³ஸ்வா ஸத்தா² சிந்தேஸி – ‘‘இமேஸங் பி⁴க்கூ²னங் கீதி³ஸீ த⁴ம்மதே³ஸனா வட்டதீ’’தி? அத²ஸ்ஸ ஏதத³ஹோஸி – ‘‘இமே ஆஹாரஹேது பணாமிதா, பிண்டி³யாலோபத⁴ம்மதே³ஸனாவ நேஸங் ஸப்பாயா, தங் த³ஸ்ஸெத்வா மத்த²கே திபரிவட்டதே³ஸனங் தே³ஸெஸ்ஸாமி, தே³ஸனாபரியோஸானே ஸப்³பே³ அரஹத்தங் பாபுணிஸ்ஸந்தீ’’தி. அத² நேஸங் தங் த⁴ம்மதே³ஸனங் தே³ஸெந்தோ அந்தமித³ங், பி⁴க்க²வேதிஆதி³மாஹ.
Nisīdiṃsūti tesu hi sārajjamānarūpesu āgacchantesu eko bhikkhu ‘‘mamaṃyeva satthā oloketi, maṃyeva maññe niggaṇhitukāmo’’ti saṇikaṃ āgantvā vanditvā nisīdi, athañño athaññoti evaṃ pañcabhikkhusatāni nisīdiṃsu. Evaṃ nisinnaṃ pana bhikkhusaṅghaṃ sīdantare sannisinnaṃ mahāsamuddaṃ viya nivāte padīpaṃ viya ca niccalaṃ disvā satthā cintesi – ‘‘imesaṃ bhikkhūnaṃ kīdisī dhammadesanā vaṭṭatī’’ti? Athassa etadahosi – ‘‘ime āhārahetu paṇāmitā, piṇḍiyālopadhammadesanāva nesaṃ sappāyā, taṃ dassetvā matthake tiparivaṭṭadesanaṃ desessāmi, desanāpariyosāne sabbe arahattaṃ pāpuṇissantī’’ti. Atha nesaṃ taṃ dhammadesanaṃ desento antamidaṃ, bhikkhavetiādimāha.
தத்த² அந்தந்தி பச்சி²மங் லாமகங். யதி³த³ங் பிண்டொ³ல்யந்தி யங் ஏவங் பிண்ட³பரியேஸனேன ஜீவிகங் கப்பெந்தஸ்ஸ ஜீவிதங். அயங் பனெத்த² பத³த்தோ² – பிண்டா³ய உலதீதி பிண்டோ³லோ, பிண்டோ³லஸ்ஸ கம்மங் பிண்டொ³ல்யங், பிண்ட³பரியேஸனேன நிப்பா²தி³தஜீவிதந்தி அத்தோ². அபி⁴ஸாபோதி அக்கோஸோ. குபிதா ஹி மனுஸ்ஸா அத்தனோ பச்சத்தி²கங் ‘‘சீவரங் நிவாஸெத்வா கபாலங் க³ஹெத்வா பிண்ட³ங் பரியேஸமானோ சரிஸ்ஸதீ’’தி அக்கோஸந்தி. அத² வா பன ‘‘கிங் துய்ஹங் அகாதப்³ப³ங் அத்தி², யோ த்வங் ஏவங் ப³லவா வீரியஸம்பன்னோபி ஹிரொத்தப்பங் பஹாய கபணோ விய பிண்டோ³லோ விசரஸி பத்தபாணீ’’தி? ஏவம்பி அக்கோஸந்தியேவ. தஞ்ச கோ² ஏதந்தி ஏவங் தங் அபி⁴ஸாபங் ஸமானம்பி பிண்டொ³ல்யங். குலபுத்தா உபெந்தி அத்த²வஸிகாதி மம ஸாஸனே ஜாதிகுலபுத்தா ச ஆசாரகுலபுத்தா ச அத்த²வஸிகா காரணவஸிகா ஹுத்வா காரணவஸங் படிச்ச உபெந்தி.
Tattha antanti pacchimaṃ lāmakaṃ. Yadidaṃ piṇḍolyanti yaṃ evaṃ piṇḍapariyesanena jīvikaṃ kappentassa jīvitaṃ. Ayaṃ panettha padattho – piṇḍāya ulatīti piṇḍolo, piṇḍolassa kammaṃ piṇḍolyaṃ, piṇḍapariyesanena nipphāditajīvitanti attho. Abhisāpoti akkoso. Kupitā hi manussā attano paccatthikaṃ ‘‘cīvaraṃ nivāsetvā kapālaṃ gahetvā piṇḍaṃ pariyesamāno carissatī’’ti akkosanti. Atha vā pana ‘‘kiṃ tuyhaṃ akātabbaṃ atthi, yo tvaṃ evaṃ balavā vīriyasampannopi hirottappaṃ pahāya kapaṇo viya piṇḍolo vicarasi pattapāṇī’’ti? Evampi akkosantiyeva. Tañca kho etanti evaṃ taṃ abhisāpaṃ samānampi piṇḍolyaṃ. Kulaputtā upenti atthavasikāti mama sāsane jātikulaputtā ca ācārakulaputtā ca atthavasikā kāraṇavasikā hutvā kāraṇavasaṃ paṭicca upenti.
ராஜாபி⁴னீதாதிஆதீ³ஸு யே ரஞ்ஞோ ஸந்தகங் கா²தி³த்வா ரஞ்ஞா ப³ந்த⁴னாகா³ரே ப³ந்தா⁴பிதா பலாயித்வா பப்³ப³ஜந்தி, தே ராஜாபி⁴னீதா நாம. தே ஹி ரஞ்ஞா ப³ந்த⁴னங் அபி⁴னீதத்தா ராஜாபி⁴னீதா நாம. யே பன சோரேஹி அடவியங் க³ஹெத்வா ஏகச்சேஸு மாரியமானேஸு ஏகச்சே ‘‘மயங் ஸாமி தும்ஹேஹி விஸ்ஸட்டா² கே³ஹங் அனஜ்ஜா²வஸித்வா பப்³ப³ஜிஸ்ஸாம, தத்த² யங் யங் பு³த்³த⁴பூஜாதி³புஞ்ஞங் கரிஸ்ஸாம, ததோ தும்ஹாகங் பத்திங் த³ஸ்ஸாமா’’தி தேஹி விஸ்ஸட்டா² பப்³ப³ஜந்தி, தே சோராபி⁴னீதா நாம. தேபி ஹி சோரேஹி மாரேதப்³ப³தங் அபி⁴னீதாதி சோராபி⁴னீதா நாம. யே பன இணங் க³ஹெத்வா படிதா³துங் அஸக்கொந்தா பலாயித்வா பப்³ப³ஜந்தி, தே இணட்டா நாம, இணபீளிதாதி அத்தோ² . இணட்டா²திபி பாடோ², இணே டி²தாதி அத்தோ². யே ராஜசோரசா²தகரோக³ப⁴யானங் அஞ்ஞதரேன அபி⁴பூ⁴தா உபத்³து³தா பப்³ப³ஜந்தி, தே ப⁴யட்டா நாம, ப⁴யபீளிதாதி அத்தோ². ப⁴யட்டா²திபி பாடோ², ப⁴யே டி²தாதி அத்தோ². ஆஜீவிகாபகதாதி ஆஜீவிகாய உபத்³து³தா அபி⁴பூ⁴தா, புத்ததா³ரங் போஸேதுங் அஸக்கொந்தாதி அத்தோ². ஓதிண்ணாம்ஹாதி அந்தோ அனுபவிட்டா².
Rājābhinītātiādīsu ye rañño santakaṃ khāditvā raññā bandhanāgāre bandhāpitā palāyitvā pabbajanti, te rājābhinītā nāma. Te hi raññā bandhanaṃ abhinītattā rājābhinītā nāma. Ye pana corehi aṭaviyaṃ gahetvā ekaccesu māriyamānesu ekacce ‘‘mayaṃ sāmi tumhehi vissaṭṭhā gehaṃ anajjhāvasitvā pabbajissāma, tattha yaṃ yaṃ buddhapūjādipuññaṃ karissāma, tato tumhākaṃ pattiṃ dassāmā’’ti tehi vissaṭṭhā pabbajanti, te corābhinītā nāma. Tepi hi corehi māretabbataṃ abhinītāti corābhinītā nāma. Ye pana iṇaṃ gahetvā paṭidātuṃ asakkontā palāyitvā pabbajanti, te iṇaṭṭā nāma, iṇapīḷitāti attho . Iṇaṭṭhātipi pāṭho, iṇe ṭhitāti attho. Ye rājacorachātakarogabhayānaṃ aññatarena abhibhūtā upaddutā pabbajanti, te bhayaṭṭā nāma, bhayapīḷitāti attho. Bhayaṭṭhātipi pāṭho, bhaye ṭhitāti attho. Ājīvikāpakatāti ājīvikāya upaddutā abhibhūtā, puttadāraṃ posetuṃ asakkontāti attho. Otiṇṇāmhāti anto anupaviṭṭhā.
ஸோ ச ஹோதி அபி⁴ஜ்ஜா²லூதி இத³ங் ஸோ குலபுத்தோ ‘‘து³க்க²ஸ்ஸ அந்தங் கரிஸ்ஸாமீ’’திஆதி³வஸேன சித்தங் உப்பாதெ³த்வா பப்³ப³ஜிதோ, அபரபா⁴கே³, தங் பப்³ப³ஜ்ஜங் ததா²ரூபங் காதுங் ந ஸக்கோதி, தங் த³ஸ்ஸேதுங் வுத்தங். தத்த² அபி⁴ஜ்ஜா²லூதி பரப⁴ண்டா³னங் அபி⁴ஜ்ஜா²யிதா. திப்³ப³ஸாராகோ³தி ப³ஹலராகோ³. ப்³யாபன்னசித்தோதி பூதிபா⁴வேன விபன்னசித்தோ. பது³ட்ட²மனஸங்கப்போதி திகி²ணஸிங்கோ³ விய கோ³ணோ து³ட்ட²சித்தோ. முட்ட²ஸ்ஸதீதி ப⁴த்தனிக்கி²த்தகாகோ விய நட்ட²ஸ்ஸதி, இத⁴ கதங் எத்த² நஸ்ஸதி. அஸம்பஜானோதி நிப்பஞ்ஞோ. க²ந்தா⁴தி³பரிச்சே²த³ரஹிதோ. அஸமாஹிதோதி சண்ட³ஸோதே ப³த்³த⁴னாவா விய உபசாரப்பனாபா⁴வேன அஸண்டி²தோ. விப்³ப⁴ந்தசித்தோதி ப³ந்தா⁴ருள்ஹமகோ³ விய ஸந்தமனோ. பாகதிந்த்³ரியோதி யதா² கி³ஹீ புத்ததீ⁴தரோ ஓலோகெந்தோ அஸங்வுதிந்த்³ரியோ ஹோதி, ஏவங் அஸங்வுதிந்த்³ரியோ.
So ca hoti abhijjhālūti idaṃ so kulaputto ‘‘dukkhassa antaṃ karissāmī’’tiādivasena cittaṃ uppādetvā pabbajito, aparabhāge, taṃ pabbajjaṃ tathārūpaṃ kātuṃ na sakkoti, taṃ dassetuṃ vuttaṃ. Tattha abhijjhālūti parabhaṇḍānaṃ abhijjhāyitā. Tibbasārāgoti bahalarāgo. Byāpannacittoti pūtibhāvena vipannacitto. Paduṭṭhamanasaṅkappoti tikhiṇasiṅgo viya goṇo duṭṭhacitto. Muṭṭhassatīti bhattanikkhittakāko viya naṭṭhassati, idha kataṃ ettha nassati. Asampajānoti nippañño. Khandhādiparicchedarahito. Asamāhitoti caṇḍasote baddhanāvā viya upacārappanābhāvena asaṇṭhito. Vibbhantacittoti bandhāruḷhamago viya santamano. Pākatindriyoti yathā gihī puttadhītaro olokento asaṃvutindriyo hoti, evaṃ asaṃvutindriyo.
ச²வாலாதந்தி ச²வானங் த³ட்³ட⁴ட்டா²னே அலாதங். உப⁴தோபதி³த்தங் மஜ்ஜே² கூ³த²க³தந்தி பமாணேன அட்ட²ங்கு³லமத்தங் த்³வீஸு டா²னேஸு ஆதி³த்தங் மஜ்ஜே² கூ³த²மக்கி²தங். நேவ கா³மேதி ஸசே ஹி தங் யுக³னங்க³லகோ³பானஸிபக்க²பாஸகாதீ³னங் அத்தா²ய உபனேதுங் ஸக்கா அஸ்ஸ, கா³மே கட்ட²த்த²ங் ப²ரெய்ய. ஸசே கெ²த்தகுடியங் கட்ட²த்த²ரமஞ்சகாதீ³னங் அத்தா²ய உபனேதுங் ஸக்கா, அரஞ்ஞே கட்ட²த்த²ங் ப²ரெய்ய. யஸ்மா பன உப⁴யதா²பி ந ஸக்கா, தஸ்மா ஏவங் வுத்தங். கி³ஹிபோ⁴கா³ ச பரிஹீனோதி யோ அகா³ரே வஸந்தேஹி கி³ஹீஹி தா³யஜ்ஜே பா⁴ஜியமானே போ⁴கோ³ லத்³த⁴ப்³போ³ அஸ்ஸ, ததோ ச பரிஹீனோ. ஸாமஞ்ஞத்த²ஞ்சாதி ஆசரியுபஜ்ஜா²யானங் ஓவாதே³ ட²த்வா பரியத்திபடிவேத⁴வஸேன பத்தப்³ப³ங் ஸாமஞ்ஞத்த²ஞ்ச. இமஞ்ச பன உபமங் ஸத்தா² ந து³ஸ்ஸீலஸ்ஸ வஸேன ஆஹரி, பரிஸுத்³த⁴ஸீலஸ்ஸ பன அலஸஸ்ஸ அபி⁴ஜ்ஜா²தீ³ஹி தோ³ஸேஹி உபஹதஸ்ஸ புக்³க³லஸ்ஸ இமங் உபமங் ஆஹரி.
Chavālātanti chavānaṃ daḍḍhaṭṭhāne alātaṃ. Ubhatopadittaṃ majjhe gūthagatanti pamāṇena aṭṭhaṅgulamattaṃ dvīsu ṭhānesu ādittaṃ majjhe gūthamakkhitaṃ. Neva gāmeti sace hi taṃ yuganaṅgalagopānasipakkhapāsakādīnaṃ atthāya upanetuṃ sakkā assa, gāme kaṭṭhatthaṃ phareyya. Sace khettakuṭiyaṃ kaṭṭhattharamañcakādīnaṃ atthāya upanetuṃ sakkā, araññe kaṭṭhatthaṃ phareyya. Yasmā pana ubhayathāpi na sakkā, tasmā evaṃ vuttaṃ. Gihibhogā ca parihīnoti yo agāre vasantehi gihīhi dāyajje bhājiyamāne bhogo laddhabbo assa, tato ca parihīno. Sāmaññatthañcāti ācariyupajjhāyānaṃ ovāde ṭhatvā pariyattipaṭivedhavasena pattabbaṃ sāmaññatthañca. Imañca pana upamaṃ satthā na dussīlassa vasena āhari, parisuddhasīlassa pana alasassa abhijjhādīhi dosehi upahatassa puggalassa imaṃ upamaṃ āhari.
தயோமே, பி⁴க்க²வேதி கஸ்மா ஆரத்³த⁴ங்? இமஸ்ஸ புக்³க³லஸ்ஸ ச²வாலாதஸதி³ஸபா⁴வோ நேவ மாதாபிதூஹி கதோ, ந ஆசரியுபஜ்ஜா²யேஹி, இமேஹி பன பாபவிதக்கேஹி கதோதி த³ஸ்ஸனத்த²ங் ஆரத்³த⁴ங். அனிமித்தங் வா ஸமாதி⁴ந்தி விபஸ்ஸனாஸமாதி⁴ங். ஸோ ஹி நிச்சனிமித்தாதீ³னங் ஸமுக்³கா⁴தனேன அனிமித்தோதி வுச்சதி. எத்த² ச சத்தாரோ ஸதிபட்டா²னா மிஸ்ஸகா, அனிமித்தஸமாதி⁴ புப்³ப³பா⁴கோ³. அனிமித்தஸமாதி⁴ வா மிஸ்ஸகோ, ஸதிபட்டா²னா புப்³ப³பா⁴கா³தி வேதி³தப்³பா³.
Tayome, bhikkhaveti kasmā āraddhaṃ? Imassa puggalassa chavālātasadisabhāvo neva mātāpitūhi kato, na ācariyupajjhāyehi, imehi pana pāpavitakkehi katoti dassanatthaṃ āraddhaṃ. Animittaṃ vā samādhinti vipassanāsamādhiṃ. So hi niccanimittādīnaṃ samugghātanena animittoti vuccati. Ettha ca cattāro satipaṭṭhānā missakā, animittasamādhi pubbabhāgo. Animittasamādhi vā missako, satipaṭṭhānā pubbabhāgāti veditabbā.
த்³வேமா, பி⁴க்க²வே, தி³ட்டி²யோதி இத³ங் பன ந கேவலங் அனிமித்தஸமாதி⁴பா⁴வனா இமேஸங்யேவ திண்ணங் மஹாவிதக்கானங் பஹானாய ஸங்வத்ததி, ஸஸ்ஸதுச்சே²த³தி³ட்டீ²னம்பி பன ஸமுக்³கா⁴தங் கரோதீதி த³ஸ்ஸனத்த²ங் வுத்தங். ந வஜ்ஜவா அஸ்ஸந்தி நித்³தோ³ஸோ ப⁴வெய்யங். ஸேஸமெத்த² உத்தானமேவ. இதி ப⁴க³வா இமஸ்மிம்பி ஸுத்தே தே³ஸனங் தீஹி ப⁴வேஹி வினிவத்தெத்வா அரஹத்தேன கூடங் க³ண்ஹி. தே³ஸனாவஸானே பஞ்சஸதா பி⁴க்கூ² ஸஹ படிஸம்பி⁴தா³ஹி அரஹத்தங் பாபுணிங்ஸூதி. அட்ட²மங்.
Dvemā, bhikkhave, diṭṭhiyoti idaṃ pana na kevalaṃ animittasamādhibhāvanā imesaṃyeva tiṇṇaṃ mahāvitakkānaṃ pahānāya saṃvattati, sassatucchedadiṭṭhīnampi pana samugghātaṃ karotīti dassanatthaṃ vuttaṃ. Na vajjavā assanti niddoso bhaveyyaṃ. Sesamettha uttānameva. Iti bhagavā imasmimpi sutte desanaṃ tīhi bhavehi vinivattetvā arahattena kūṭaṃ gaṇhi. Desanāvasāne pañcasatā bhikkhū saha paṭisambhidāhi arahattaṃ pāpuṇiṃsūti. Aṭṭhamaṃ.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 8. பிண்டொ³ல்யஸுத்தங் • 8. Piṇḍolyasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 8. பிண்டொ³ல்யஸுத்தவண்ணனா • 8. Piṇḍolyasuttavaṇṇanā
