| Library / Tipiṭaka / তিপিটক • Tipiṭaka / সংযুত্তনিকায (টীকা) • Saṃyuttanikāya (ṭīkā) |
৮. পিণ্ডোল্যসুত্তৰণ্ণনা
8. Piṇḍolyasuttavaṇṇanā
৮০. অপকরীযতি এতেনাতি অপকরণং, পদং। অপকরণং পকরণং কারণন্তি অত্থতো একং। তেনাহ ‘‘কিস্মিঞ্চিদেৰ কারণে’’তি। নীহরিত্ৰাতি অত্তনো সমীপচারভাৰতো অপনেত্ৰা। তথাকরণঞ্চ এৰমেতে এত্তকম্পি অপ্পটিরূপং অকত্ৰা আযতিং সম্মা পটিপজ্জিস্সন্তীতি। লদ্ধবলাতি লদ্ধঞাণবলা।
80. Apakarīyati etenāti apakaraṇaṃ, padaṃ. Apakaraṇaṃ pakaraṇaṃ kāraṇanti atthato ekaṃ. Tenāha ‘‘kismiñcideva kāraṇe’’ti. Nīharitvāti attano samīpacārabhāvato apanetvā. Tathākaraṇañca evamete ettakampi appaṭirūpaṃ akatvā āyatiṃ sammā paṭipajjissantīti. Laddhabalāti laddhañāṇabalā.
একদ্ৰীহিকাযাতি একেকস্স চেৰ দ্ৰিন্নং দ্ৰিন্নঞ্চ ঈহিকা গতি উপসঙ্কমনা একদ্ৰীহিকা। তেনাহ ‘‘একেকো চেৰ দ্ৰে দ্ৰে চ হুত্ৰা’’তি। পুথুজ্জনানং সমুদিতানং নাম কিরিযা তাদিসীপি সিযাতি ৰুত্তং ‘‘কেল়িম্পি করেয্যু’’ন্তি। পরিকপ্পনৰসেন সম্মাসম্বুদ্ধং উদ্দিস্স পেসলা ভিক্খূপি এৰং করোন্তীতি।
Ekadvīhikāyāti ekekassa ceva dvinnaṃ dvinnañca īhikā gati upasaṅkamanā ekadvīhikā. Tenāha ‘‘ekeko ceva dve dve ca hutvā’’ti. Puthujjanānaṃ samuditānaṃ nāma kiriyā tādisīpi siyāti vuttaṃ ‘‘keḷimpi kareyyu’’nti. Parikappanavasena sammāsambuddhaṃ uddissa pesalā bhikkhūpi evaṃ karontīti.
যুগন্ধরপব্বতাদীনং অন্তরে সীদন্তরং সমুদ্দং নাম। তত্থ কির ৰাতো ন ৰাযতি, পতিতং যং কিঞ্চিপি সীদন্তরনদিযং ৰিলীযন্তা সীদন্তেৰ, তস্মা তং পরিৰারেত্ৰা ঠিতা যুগন্ধরাদযোপি সীদপব্বতা নাম। তং সন্ধায ৰুত্তং ‘‘সীদন্তরে সন্নিসিন্নং মহাসমুদ্দং ৰিযা’’তি। আহারহেতূতি আমিসহেতু সপ্পিতেলাদিনিমিত্তং, তেসং পণামনা।
Yugandharapabbatādīnaṃ antare sīdantaraṃ samuddaṃ nāma. Tattha kira vāto na vāyati, patitaṃ yaṃ kiñcipi sīdantaranadiyaṃ vilīyantā sīdanteva, tasmā taṃ parivāretvā ṭhitā yugandharādayopi sīdapabbatā nāma. Taṃ sandhāya vuttaṃ ‘‘sīdantare sannisinnaṃ mahāsamuddaṃ viyā’’ti. Āhārahetūti āmisahetu sappitelādinimittaṃ, tesaṃ paṇāmanā.
পচ্ছিমন্তি নিহীনং। তেনাহ ‘‘লামক’’ন্তি, লামকন্তো ইধাধিপ্পেতো –
Pacchimanti nihīnaṃ. Tenāha ‘‘lāmaka’’nti, lāmakanto idhādhippeto –
‘‘মিগানং কোট্ঠুকো অন্তো, পক্খীনং পন ৰাযসো।
‘‘Migānaṃ koṭṭhuko anto, pakkhīnaṃ pana vāyaso;
এরণ্ডো অন্তো রুক্খানং, তযো অন্তা সমাগতা’’তি॥ –
Eraṇḍo anto rukkhānaṃ, tayo antā samāgatā’’ti. –
আদীসু (জা॰ ১.৩.১৩৫) ৰিয। উলতীতি অভিচরতি। অভিসপন্তি এতেনাতি অভিসাপো। অভিসাপৰত্থু পিণ্ডোল্যং। অত্থো ফলং ৰসো এতস্সাতি অত্থৰসং, কারণং, তম্পি তেসু অত্থি, তত্থ নিযুত্তাতি অত্থৰসিকা।
Ādīsu (jā. 1.3.135) viya. Ulatīti abhicarati. Abhisapanti etenāti abhisāpo. Abhisāpavatthu piṇḍolyaṃ. Attho phalaṃ vaso etassāti atthavasaṃ, kāraṇaṃ, tampi tesu atthi, tattha niyuttāti atthavasikā.
অন্তো হদযস্স অব্ভন্তরে অনুপৰিট্ঠা সোকৰত্থূহি।
Anto hadayassa abbhantare anupaviṭṭhā sokavatthūhi.
অভিজ্ঝাযিতাতি অভিজ্ঝাযনসীলো। অভিণ্হপ্পৰত্তিযা চেৰ বহুলভাৰেন চ বহুলরাগো। পূতিভাৰেনাতি কুথিতভাৰেন। ব্যাপাদো হি উপ্পজ্জমানো চিত্তং অপগন্ধং করোতি, ন সুচিমনুঞ্ঞভাৰং। ভত্তনিক্খিত্তকাকো ৰিযাতি ইদং ভত্তট্ঠানস্স অসরণেন কাকস্স নট্ঠসতিতা পঞ্ঞাযতীতি কত্ৰা ৰুত্তং, ন ভত্তনিক্খিত্ততায। অসণ্ঠিতোতি অসণ্ঠিতচিত্তো। কট্ঠত্থন্তি কট্ঠেন কত্তব্বকিচ্চং।
Abhijjhāyitāti abhijjhāyanasīlo. Abhiṇhappavattiyā ceva bahulabhāvena ca bahularāgo. Pūtibhāvenāti kuthitabhāvena. Byāpādo hi uppajjamāno cittaṃ apagandhaṃ karoti, na sucimanuññabhāvaṃ. Bhattanikkhittakāko viyāti idaṃ bhattaṭṭhānassa asaraṇena kākassa naṭṭhasatitā paññāyatīti katvā vuttaṃ, na bhattanikkhittatāya. Asaṇṭhitoti asaṇṭhitacitto. Kaṭṭhatthanti kaṭṭhena kattabbakiccaṃ.
পাপৰিতক্কেহি কতো, তস্মা তে অনৰসেসতো পহাতব্বাতি দস্সনত্থং। দ্ৰিন্নং ৰুত্তত্তা একো পুব্বভাগো, ইতরো মিস্সকোতি ৰত্তুং যুত্তন্তি অধিপ্পাযেন ‘‘এত্থ চা’’তিআদি ৰুত্তং। এৰং তং ভাৰেন্তস্স নিরুজ্ঝন্তি এৰাতি একেকমিস্সকতাৰসেন গহেতব্বন্তি পোরাণা। উপরি তিপরিৰট্টদেসনায অনিমিত্তসমাধিযেৰ দীপিতো। তেনাহ ‘‘যাৰঞ্চিদ’’ন্তি। নিদ্দোসোতি ৰীতরাগাদিনা নিদ্দোসো।
Pāpavitakkehi kato, tasmā te anavasesato pahātabbāti dassanatthaṃ. Dvinnaṃ vuttattā eko pubbabhāgo, itaro missakoti vattuṃ yuttanti adhippāyena ‘‘ettha cā’’tiādi vuttaṃ. Evaṃ taṃ bhāventassa nirujjhanti evāti ekekamissakatāvasena gahetabbanti porāṇā. Upari tiparivaṭṭadesanāya animittasamādhiyeva dīpito. Tenāha ‘‘yāvañcida’’nti. Niddosoti vītarāgādinā niddoso.
পিণ্ডোল্যসুত্তৰণ্ণনা নিট্ঠিতা।
Piṇḍolyasuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya / ৮. পিণ্ডোল্যসুত্তং • 8. Piṇḍolyasuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৮. পিণ্ডোল্যসুত্তৰণ্ণনা • 8. Piṇḍolyasuttavaṇṇanā
