| Library / Tipiṭaka / ತಿಪಿಟಕ • Tipiṭaka / ಸಂಯುತ್ತನಿಕಾಯ (ಟೀಕಾ) • Saṃyuttanikāya (ṭīkā) |
೮. ಪಿಣ್ಡೋಲ್ಯಸುತ್ತವಣ್ಣನಾ
8. Piṇḍolyasuttavaṇṇanā
೮೦. ಅಪಕರೀಯತಿ ಏತೇನಾತಿ ಅಪಕರಣಂ, ಪದಂ। ಅಪಕರಣಂ ಪಕರಣಂ ಕಾರಣನ್ತಿ ಅತ್ಥತೋ ಏಕಂ। ತೇನಾಹ ‘‘ಕಿಸ್ಮಿಞ್ಚಿದೇವ ಕಾರಣೇ’’ತಿ। ನೀಹರಿತ್ವಾತಿ ಅತ್ತನೋ ಸಮೀಪಚಾರಭಾವತೋ ಅಪನೇತ್ವಾ। ತಥಾಕರಣಞ್ಚ ಏವಮೇತೇ ಏತ್ತಕಮ್ಪಿ ಅಪ್ಪಟಿರೂಪಂ ಅಕತ್ವಾ ಆಯತಿಂ ಸಮ್ಮಾ ಪಟಿಪಜ್ಜಿಸ್ಸನ್ತೀತಿ। ಲದ್ಧಬಲಾತಿ ಲದ್ಧಞಾಣಬಲಾ।
80. Apakarīyati etenāti apakaraṇaṃ, padaṃ. Apakaraṇaṃ pakaraṇaṃ kāraṇanti atthato ekaṃ. Tenāha ‘‘kismiñcideva kāraṇe’’ti. Nīharitvāti attano samīpacārabhāvato apanetvā. Tathākaraṇañca evamete ettakampi appaṭirūpaṃ akatvā āyatiṃ sammā paṭipajjissantīti. Laddhabalāti laddhañāṇabalā.
ಏಕದ್ವೀಹಿಕಾಯಾತಿ ಏಕೇಕಸ್ಸ ಚೇವ ದ್ವಿನ್ನಂ ದ್ವಿನ್ನಞ್ಚ ಈಹಿಕಾ ಗತಿ ಉಪಸಙ್ಕಮನಾ ಏಕದ್ವೀಹಿಕಾ। ತೇನಾಹ ‘‘ಏಕೇಕೋ ಚೇವ ದ್ವೇ ದ್ವೇ ಚ ಹುತ್ವಾ’’ತಿ। ಪುಥುಜ್ಜನಾನಂ ಸಮುದಿತಾನಂ ನಾಮ ಕಿರಿಯಾ ತಾದಿಸೀಪಿ ಸಿಯಾತಿ ವುತ್ತಂ ‘‘ಕೇಳಿಮ್ಪಿ ಕರೇಯ್ಯು’’ನ್ತಿ। ಪರಿಕಪ್ಪನವಸೇನ ಸಮ್ಮಾಸಮ್ಬುದ್ಧಂ ಉದ್ದಿಸ್ಸ ಪೇಸಲಾ ಭಿಕ್ಖೂಪಿ ಏವಂ ಕರೋನ್ತೀತಿ।
Ekadvīhikāyāti ekekassa ceva dvinnaṃ dvinnañca īhikā gati upasaṅkamanā ekadvīhikā. Tenāha ‘‘ekeko ceva dve dve ca hutvā’’ti. Puthujjanānaṃ samuditānaṃ nāma kiriyā tādisīpi siyāti vuttaṃ ‘‘keḷimpi kareyyu’’nti. Parikappanavasena sammāsambuddhaṃ uddissa pesalā bhikkhūpi evaṃ karontīti.
ಯುಗನ್ಧರಪಬ್ಬತಾದೀನಂ ಅನ್ತರೇ ಸೀದನ್ತರಂ ಸಮುದ್ದಂ ನಾಮ। ತತ್ಥ ಕಿರ ವಾತೋ ನ ವಾಯತಿ, ಪತಿತಂ ಯಂ ಕಿಞ್ಚಿಪಿ ಸೀದನ್ತರನದಿಯಂ ವಿಲೀಯನ್ತಾ ಸೀದನ್ತೇವ, ತಸ್ಮಾ ತಂ ಪರಿವಾರೇತ್ವಾ ಠಿತಾ ಯುಗನ್ಧರಾದಯೋಪಿ ಸೀದಪಬ್ಬತಾ ನಾಮ। ತಂ ಸನ್ಧಾಯ ವುತ್ತಂ ‘‘ಸೀದನ್ತರೇ ಸನ್ನಿಸಿನ್ನಂ ಮಹಾಸಮುದ್ದಂ ವಿಯಾ’’ತಿ। ಆಹಾರಹೇತೂತಿ ಆಮಿಸಹೇತು ಸಪ್ಪಿತೇಲಾದಿನಿಮಿತ್ತಂ, ತೇಸಂ ಪಣಾಮನಾ।
Yugandharapabbatādīnaṃ antare sīdantaraṃ samuddaṃ nāma. Tattha kira vāto na vāyati, patitaṃ yaṃ kiñcipi sīdantaranadiyaṃ vilīyantā sīdanteva, tasmā taṃ parivāretvā ṭhitā yugandharādayopi sīdapabbatā nāma. Taṃ sandhāya vuttaṃ ‘‘sīdantare sannisinnaṃ mahāsamuddaṃ viyā’’ti. Āhārahetūti āmisahetu sappitelādinimittaṃ, tesaṃ paṇāmanā.
ಪಚ್ಛಿಮನ್ತಿ ನಿಹೀನಂ। ತೇನಾಹ ‘‘ಲಾಮಕ’’ನ್ತಿ, ಲಾಮಕನ್ತೋ ಇಧಾಧಿಪ್ಪೇತೋ –
Pacchimanti nihīnaṃ. Tenāha ‘‘lāmaka’’nti, lāmakanto idhādhippeto –
‘‘ಮಿಗಾನಂ ಕೋಟ್ಠುಕೋ ಅನ್ತೋ, ಪಕ್ಖೀನಂ ಪನ ವಾಯಸೋ।
‘‘Migānaṃ koṭṭhuko anto, pakkhīnaṃ pana vāyaso;
ಏರಣ್ಡೋ ಅನ್ತೋ ರುಕ್ಖಾನಂ, ತಯೋ ಅನ್ತಾ ಸಮಾಗತಾ’’ತಿ॥ –
Eraṇḍo anto rukkhānaṃ, tayo antā samāgatā’’ti. –
ಆದೀಸು (ಜಾ॰ ೧.೩.೧೩೫) ವಿಯ। ಉಲತೀತಿ ಅಭಿಚರತಿ। ಅಭಿಸಪನ್ತಿ ಏತೇನಾತಿ ಅಭಿಸಾಪೋ। ಅಭಿಸಾಪವತ್ಥು ಪಿಣ್ಡೋಲ್ಯಂ। ಅತ್ಥೋ ಫಲಂ ವಸೋ ಏತಸ್ಸಾತಿ ಅತ್ಥವಸಂ, ಕಾರಣಂ, ತಮ್ಪಿ ತೇಸು ಅತ್ಥಿ, ತತ್ಥ ನಿಯುತ್ತಾತಿ ಅತ್ಥವಸಿಕಾ।
Ādīsu (jā. 1.3.135) viya. Ulatīti abhicarati. Abhisapanti etenāti abhisāpo. Abhisāpavatthu piṇḍolyaṃ. Attho phalaṃ vaso etassāti atthavasaṃ, kāraṇaṃ, tampi tesu atthi, tattha niyuttāti atthavasikā.
ಅನ್ತೋ ಹದಯಸ್ಸ ಅಬ್ಭನ್ತರೇ ಅನುಪವಿಟ್ಠಾ ಸೋಕವತ್ಥೂಹಿ।
Anto hadayassa abbhantare anupaviṭṭhā sokavatthūhi.
ಅಭಿಜ್ಝಾಯಿತಾತಿ ಅಭಿಜ್ಝಾಯನಸೀಲೋ। ಅಭಿಣ್ಹಪ್ಪವತ್ತಿಯಾ ಚೇವ ಬಹುಲಭಾವೇನ ಚ ಬಹುಲರಾಗೋ। ಪೂತಿಭಾವೇನಾತಿ ಕುಥಿತಭಾವೇನ। ಬ್ಯಾಪಾದೋ ಹಿ ಉಪ್ಪಜ್ಜಮಾನೋ ಚಿತ್ತಂ ಅಪಗನ್ಧಂ ಕರೋತಿ, ನ ಸುಚಿಮನುಞ್ಞಭಾವಂ। ಭತ್ತನಿಕ್ಖಿತ್ತಕಾಕೋ ವಿಯಾತಿ ಇದಂ ಭತ್ತಟ್ಠಾನಸ್ಸ ಅಸರಣೇನ ಕಾಕಸ್ಸ ನಟ್ಠಸತಿತಾ ಪಞ್ಞಾಯತೀತಿ ಕತ್ವಾ ವುತ್ತಂ, ನ ಭತ್ತನಿಕ್ಖಿತ್ತತಾಯ। ಅಸಣ್ಠಿತೋತಿ ಅಸಣ್ಠಿತಚಿತ್ತೋ। ಕಟ್ಠತ್ಥನ್ತಿ ಕಟ್ಠೇನ ಕತ್ತಬ್ಬಕಿಚ್ಚಂ।
Abhijjhāyitāti abhijjhāyanasīlo. Abhiṇhappavattiyā ceva bahulabhāvena ca bahularāgo. Pūtibhāvenāti kuthitabhāvena. Byāpādo hi uppajjamāno cittaṃ apagandhaṃ karoti, na sucimanuññabhāvaṃ. Bhattanikkhittakāko viyāti idaṃ bhattaṭṭhānassa asaraṇena kākassa naṭṭhasatitā paññāyatīti katvā vuttaṃ, na bhattanikkhittatāya. Asaṇṭhitoti asaṇṭhitacitto. Kaṭṭhatthanti kaṭṭhena kattabbakiccaṃ.
ಪಾಪವಿತಕ್ಕೇಹಿ ಕತೋ, ತಸ್ಮಾ ತೇ ಅನವಸೇಸತೋ ಪಹಾತಬ್ಬಾತಿ ದಸ್ಸನತ್ಥಂ। ದ್ವಿನ್ನಂ ವುತ್ತತ್ತಾ ಏಕೋ ಪುಬ್ಬಭಾಗೋ, ಇತರೋ ಮಿಸ್ಸಕೋತಿ ವತ್ತುಂ ಯುತ್ತನ್ತಿ ಅಧಿಪ್ಪಾಯೇನ ‘‘ಏತ್ಥ ಚಾ’’ತಿಆದಿ ವುತ್ತಂ। ಏವಂ ತಂ ಭಾವೇನ್ತಸ್ಸ ನಿರುಜ್ಝನ್ತಿ ಏವಾತಿ ಏಕೇಕಮಿಸ್ಸಕತಾವಸೇನ ಗಹೇತಬ್ಬನ್ತಿ ಪೋರಾಣಾ। ಉಪರಿ ತಿಪರಿವಟ್ಟದೇಸನಾಯ ಅನಿಮಿತ್ತಸಮಾಧಿಯೇವ ದೀಪಿತೋ। ತೇನಾಹ ‘‘ಯಾವಞ್ಚಿದ’’ನ್ತಿ। ನಿದ್ದೋಸೋತಿ ವೀತರಾಗಾದಿನಾ ನಿದ್ದೋಸೋ।
Pāpavitakkehi kato, tasmā te anavasesato pahātabbāti dassanatthaṃ. Dvinnaṃ vuttattā eko pubbabhāgo, itaro missakoti vattuṃ yuttanti adhippāyena ‘‘ettha cā’’tiādi vuttaṃ. Evaṃ taṃ bhāventassa nirujjhanti evāti ekekamissakatāvasena gahetabbanti porāṇā. Upari tiparivaṭṭadesanāya animittasamādhiyeva dīpito. Tenāha ‘‘yāvañcida’’nti. Niddosoti vītarāgādinā niddoso.
ಪಿಣ್ಡೋಲ್ಯಸುತ್ತವಣ್ಣನಾ ನಿಟ್ಠಿತಾ।
Piṇḍolyasuttavaṇṇanā niṭṭhitā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಸಂಯುತ್ತನಿಕಾಯ • Saṃyuttanikāya / ೮. ಪಿಣ್ಡೋಲ್ಯಸುತ್ತಂ • 8. Piṇḍolyasuttaṃ
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಸಂಯುತ್ತನಿಕಾಯ (ಅಟ್ಠಕಥಾ) • Saṃyuttanikāya (aṭṭhakathā) / ೮. ಪಿಣ್ಡೋಲ್ಯಸುತ್ತವಣ್ಣನಾ • 8. Piṇḍolyasuttavaṇṇanā
