| Library / Tipiṭaka / ཏིཔིཊཀ • Tipiṭaka / སཾཡུཏྟནིཀཱཡ (ཨཊྛཀཐཱ) • Saṃyuttanikāya (aṭṭhakathā) |
༨. པིཎྜོལྱསུཏྟཝཎྞནཱ
8. Piṇḍolyasuttavaṇṇanā
༨༠. ཨཊྛམེ ཀིསྨིཉྩིདེཝ པཀརཎེཏི ཀིསྨིཉྩིདེཝ ཀཱརཎེ། པཎཱམེཏྭཱཏི ནཱིཧརིཏྭཱ། ཀིསྨིཾ པན ཀཱརཎེ ཨེཏེ བྷགཝཏཱ པཎཱམིཏཱཏི? ཨེཀསྨིཉྷི ཨནྟོཝསྶེ བྷགཝཱ སཱཝཏྠིཡཾ ཝསིཏྭཱ ཝུཏྠཝསྶོ པཝཱརེཏྭཱ མཧཱབྷིཀྑུསངྒྷཔརིཝཱརོ སཱཝཏྠིཏོ ནིཀྑམིཏྭཱ ཛནཔདཙཱརིཀཾ ཙརནྟོ ཀཔིལཝཏྠུཾ པཏྭཱ ནིགྲོདྷཱརཱམཾ པཱཝིསི། སཀྱརཱཛཱནོ ‘‘སཏྠཱ ཨཱགཏོ’’ཏི སུཏྭཱ པཙྪཱབྷཏྟེ ཀཔྤིཡཱནི ཏེལམདྷུཕཱཎིཏཱདཱིནི ཙེཝ པཱནཀཱནི ཙ ཀཱཛསཏེཧི གཱཧཱཔེཏྭཱ ཝིཧཱརཾ གནྟྭཱ སངྒྷསྶ ནིཡྻཱཏེཏྭཱ སཏྠཱརཾ ཝནྡིཏྭཱ པཊིསནྠཱརཾ ཀརོནྟཱ ཨེཀམནྟེ ནིསཱིདིཾསུ། སཏྠཱ ཏེསཾ མདྷུརདྷམྨཀཐཾ ཀཐེནྟོ ནིསཱིདི། ཏསྨིཾ ཁཎེ ཨེཀཙྩེ བྷིཀྑཱུ སེནཱསནཾ པཊིཛགྒནྟི, ཨེཀཙྩེ མཉྩཔཱིཋཱདཱིནི པཉྙཱཔེནྟི, སཱམཎེརཱ ཨཔྤཧརིཏཾ ཀརོནྟི། བྷཱཛནཱིཡཊྛཱནེ སམྤཏྟབྷིཀྑཱུཔི ཨཏྠི, ཨསམྤཏྟབྷིཀྑཱུཔི ཨཏྠི། སམྤཏྟཱ ཨསམྤཏྟཱནཾ ལཱབྷཾ གཎྷནྟཱ, ‘‘ཨམྷཱཀཾ དེཐ, ཨམྷཱཀཾ ཨཱཙརིཡསྶ དེཐ ཨུཔཛ྄ཛྷཱཡསྶ དེཐཱ’’ཏི ཀཐེནྟཱ མཧཱསདྡམཀཾསུ། སཏྠཱ སུཏྭཱ ཐེརཾ པུཙྪི ‘‘ཀེ པན ཏེ, ཨཱནནྡ, ཨུཙྩཱསདྡཱ མཧཱསདྡཱ ཀེཝཊྚཱ མཉྙེ མཙྪཝིལོཔེ’’ཏི? ཐེརོ ཨེཏམཏྠཾ ཨཱརོཙེསི། སཏྠཱ སུཏྭཱ ‘‘ཨཱམིསཧེཏུ, ཨཱནནྡ, བྷིཀྑཱུ མཧཱསདྡཾ ཀརོནྟཱི’’ཏི ཨཱཧ། ‘‘ཨཱམ, བྷནྟེ’’ཏི། ‘‘ཨནནུཙྪཝིཀཾ, ཨཱནནྡ, ཨཔྤཏིརཱུཔཾ། ན ཧི མཡཱ ཀཔྤསཏསཧསྶཱདྷིཀཱནི ཙཏྟཱརི ཨསངྑྱེཡྻཱནི ཙཱིཝརཱདིཧེཏུ པཱརམིཡོ པཱུརིཏཱ, ནཱཔི ཨིམེ བྷིཀྑཱུ ཙཱིཝརཱདིཧེཏུ ཨགཱརསྨཱ ཨནགཱརིཡཾ པབྦཛིཏཱ, ཨརཧཏྟཧེཏུ པབྦཛིཏྭཱ ཨནཏྠཾ ཨཏྠསདིསཾ ཨསཱརཾ སཱརསདིསཾ ཀརོནྟི, གཙྪཱནནྡ, ཏེ བྷིཀྑཱུ པཎཱམེཧཱི’’ཏི།
80. Aṭṭhame kismiñcideva pakaraṇeti kismiñcideva kāraṇe. Paṇāmetvāti nīharitvā. Kismiṃ pana kāraṇe ete bhagavatā paṇāmitāti? Ekasmiñhi antovasse bhagavā sāvatthiyaṃ vasitvā vutthavasso pavāretvā mahābhikkhusaṅghaparivāro sāvatthito nikkhamitvā janapadacārikaṃ caranto kapilavatthuṃ patvā nigrodhārāmaṃ pāvisi. Sakyarājāno ‘‘satthā āgato’’ti sutvā pacchābhatte kappiyāni telamadhuphāṇitādīni ceva pānakāni ca kājasatehi gāhāpetvā vihāraṃ gantvā saṅghassa niyyātetvā satthāraṃ vanditvā paṭisanthāraṃ karontā ekamante nisīdiṃsu. Satthā tesaṃ madhuradhammakathaṃ kathento nisīdi. Tasmiṃ khaṇe ekacce bhikkhū senāsanaṃ paṭijagganti, ekacce mañcapīṭhādīni paññāpenti, sāmaṇerā appaharitaṃ karonti. Bhājanīyaṭṭhāne sampattabhikkhūpi atthi, asampattabhikkhūpi atthi. Sampattā asampattānaṃ lābhaṃ gaṇhantā, ‘‘amhākaṃ detha, amhākaṃ ācariyassa detha upajjhāyassa dethā’’ti kathentā mahāsaddamakaṃsu. Satthā sutvā theraṃ pucchi ‘‘ke pana te, ānanda, uccāsaddā mahāsaddā kevaṭṭā maññe macchavilope’’ti? Thero etamatthaṃ ārocesi. Satthā sutvā ‘‘āmisahetu, ānanda, bhikkhū mahāsaddaṃ karontī’’ti āha. ‘‘Āma, bhante’’ti. ‘‘Ananucchavikaṃ, ānanda, appatirūpaṃ. Na hi mayā kappasatasahassādhikāni cattāri asaṅkhyeyyāni cīvarādihetu pāramiyo pūritā, nāpi ime bhikkhū cīvarādihetu agārasmā anagāriyaṃ pabbajitā, arahattahetu pabbajitvā anatthaṃ atthasadisaṃ asāraṃ sārasadisaṃ karonti, gacchānanda, te bhikkhū paṇāmehī’’ti.
པུབྦཎྷསམཡནྟི དུཏིཡདིཝསེ པུབྦཎྷསམཡཾ། བེལུཝལཊྛིཀཱཡ མཱུལེཏི ཏརུཎབེལུཝརུཀྑམཱུལེ། པབཱལ༹ྷོཏི པབཱཧིཏོ། པཝཱལ༹ྷོཏིཔི པཱཋོ, པཝཱཧིཏོཏི ཨཏྠོ། ཨུབྷཡམྤི ནཱིཧཊབྷཱཝམེཝ དཱིཔེཏི། སིཡཱ ཨཉྙཐཏྟནྟི པསཱདཉྙཐཏྟཾ ཝཱ བྷཱཝཉྙཐཏྟཾ ཝཱ བྷཝེཡྻ། ཀཐཾ? ‘‘སམྨཱསམྦུདྡྷེན མཡཾ ལཧུཀེ ཀཱརཎེ པཎཱམིཏཱ’’ཏི པསཱདཾ མནྡཾ ཀརོནྟཱནཾ པསཱདཉྙཐཏྟཾ ནཱམ ཧོཏི། སལིངྒེནེཝ ཏིཏྠཱཡཏནཾ པཀྐམནྟཱནཾ བྷཱཝཉྙཐཏྟཾ ནཱམ། སིཡཱ ཝིཔརིཎཱམོཏི ཨེཏྠ པན ‘‘མཡཾ སཏྠུ ཨཛ྄ཛྷཱསཡཾ གཎྷིཏུཾ སཀྑིསྶཱམཱཏི པབྦཛིཏཱ, ནཾ གཧེཏུཾ ཨསཀྐོནྟཱནཾ ཀིཾ ཨམྷཱཀཾ པབྦཛྫཱཡཱ’’ཏི? སིཀྑཾ པཙྩཀྑཱཡ ཧཱིནཱཡཱཝཏྟནཾ ཝིཔརིཎཱམོཏི ཝེདིཏབྦོ། ཝཙྪསྶཱཏི ཁཱིརཱུཔཀཝཙྪསྶ། ཨཉྙཐཏྟནྟི མིལཱཡནཨཉྙཐཏྟཾ། ཁཱིརཱུཔཀོ ཧི ཝཙྪོ མཱཏུ ཨདསྶནེན ཁཱིརཾ ཨལབྷནྟོ མིལཱཡཏི ཀམྤཏི པཝེདྷཏི། ཝིཔརིཎཱམོཏི མརཎཾ། སོ ཧི ཁཱིརཾ ཨལབྷམཱནོ ཁཱིརཔིཔཱསཱཡ སུསྶནྟོ པཏིཏྭཱ མརཏི།
Pubbaṇhasamayanti dutiyadivase pubbaṇhasamayaṃ. Beluvalaṭṭhikāya mūleti taruṇabeluvarukkhamūle. Pabāḷhoti pabāhito. Pavāḷhotipi pāṭho, pavāhitoti attho. Ubhayampi nīhaṭabhāvameva dīpeti. Siyā aññathattanti pasādaññathattaṃ vā bhāvaññathattaṃ vā bhaveyya. Kathaṃ? ‘‘Sammāsambuddhena mayaṃ lahuke kāraṇe paṇāmitā’’ti pasādaṃ mandaṃ karontānaṃ pasādaññathattaṃ nāma hoti. Saliṅgeneva titthāyatanaṃ pakkamantānaṃ bhāvaññathattaṃ nāma. Siyā vipariṇāmoti ettha pana ‘‘mayaṃ satthu ajjhāsayaṃ gaṇhituṃ sakkhissāmāti pabbajitā, naṃ gahetuṃ asakkontānaṃ kiṃ amhākaṃ pabbajjāyā’’ti? Sikkhaṃ paccakkhāya hīnāyāvattanaṃ vipariṇāmoti veditabbo. Vacchassāti khīrūpakavacchassa. Aññathattanti milāyanaaññathattaṃ. Khīrūpako hi vaccho mātu adassanena khīraṃ alabhanto milāyati kampati pavedhati. Vipariṇāmoti maraṇaṃ. So hi khīraṃ alabhamāno khīrapipāsāya sussanto patitvā marati.
བཱིཛཱནཾ ཏརུཎཱནནྟི ཨུདཀེན ཨནུགྒཧེཏབྦཱནཾ ཝིརཱུལ༹ྷབཱིཛཱནཾ། ཨཉྙཐཏྟནྟི མིལཱཡནཉྙཐཏྟམེཝ། ཏཱནི ཧི ཨུདཀཾ ཨལབྷནྟཱནི མིལཱཡནྟི། ཝིཔརིཎཱམོཏི ཝིནཱསོ། ཏཱནི ཧི ཨུདཀཾ ཨལབྷནྟཱནི སུཀྑིཏྭཱ ཝིནསྶནྟི, པལཱལམེཝ ཧོནྟི། ཨནུགྒཧིཏོཏི ཨཱམིསཱནུགྒཧེན ཙེཝ དྷམྨཱནུགྒཧེན ཙ ཨནུགྒཧིཏོ། ཨནུགྒཎྷེཡྻནྟི དྭཱིཧིཔི ཨེཏེཧི ཨནུགྒཧེཧི ཨནུགྒཎྷེཡྻཾ། ཨཙིརཔབྦཛིཏཱ ཧི སཱམཎེརཱ ཙེཝ དཧརབྷིཀྑཱུ ཙ ཙཱིཝརཱདིཔཙྩཡཝེཀལླེ ཝཱ སཏི གེལཉྙེ ཝཱ སཏྠཱརཱ ཝཱ ཨཱཙརིཡུཔཛ྄ཛྷཱཡེཧི ཝཱ ཨཱམིསཱནུགྒཧེན ཨནནུགྒཧིཏཱ ཀིལམནྟཱ ན སཀྐོནྟི སཛ྄ཛྷཱཡཾ ཝཱ མནསིཀཱརཾ ཝཱ ཀཱཏུཾ, དྷམྨཱནུགྒཧེན ཨནནུགྒཧིཏཱ ཨུདྡེསེན ཙེཝ ཨོཝཱདཱནུསཱསནིཡཱ ཙ པརིཧཱཡམཱནཱ ན སཀྐོནྟི ཨཀུསལཾ པརིཝཛྫེཏྭཱ ཀུསལཾ བྷཱཝེཏུཾ། ཨིམེཧི པན དྭཱིཧི ཨནུགྒཧེཧི ཨནུགྒཧིཏཱ ཀཱཡེན ཨཀིལམནྟཱ སཛ྄ཛྷཱཡམནསིཀཱརེ པཝཏྟིཏྭཱ ཡཐཱནུསིཊྛཾ པཊིཔཛྫམཱནཱ ཨཔརབྷཱགེ ཏཾ ཨནུགྒཧཾ ཨལབྷནྟཱཔི ཏེནེཝ པུརིམཱནུགྒཧེན ལདྡྷབལཱ སཱསནེ པཏིཊྛཧནྟི, ཏསྨཱ བྷགཝཏོ ཨེཝཾ པརིཝིཏཀྐོ ཨུདཔཱདི།
Bījānaṃ taruṇānanti udakena anuggahetabbānaṃ virūḷhabījānaṃ. Aññathattanti milāyanaññathattameva. Tāni hi udakaṃ alabhantāni milāyanti. Vipariṇāmoti vināso. Tāni hi udakaṃ alabhantāni sukkhitvā vinassanti, palālameva honti. Anuggahitoti āmisānuggahena ceva dhammānuggahena ca anuggahito. Anuggaṇheyyanti dvīhipi etehi anuggahehi anuggaṇheyyaṃ. Acirapabbajitā hi sāmaṇerā ceva daharabhikkhū ca cīvarādipaccayavekalle vā sati gelaññe vā satthārā vā ācariyupajjhāyehi vā āmisānuggahena ananuggahitā kilamantā na sakkonti sajjhāyaṃ vā manasikāraṃ vā kātuṃ, dhammānuggahena ananuggahitā uddesena ceva ovādānusāsaniyā ca parihāyamānā na sakkonti akusalaṃ parivajjetvā kusalaṃ bhāvetuṃ. Imehi pana dvīhi anuggahehi anuggahitā kāyena akilamantā sajjhāyamanasikāre pavattitvā yathānusiṭṭhaṃ paṭipajjamānā aparabhāge taṃ anuggahaṃ alabhantāpi teneva purimānuggahena laddhabalā sāsane patiṭṭhahanti, tasmā bhagavato evaṃ parivitakko udapādi.
བྷགཝཏོ པུརཏོ པཱཏུརཧོསཱིཏི སཏྠུ ཙིཏྟཾ ཉཏྭཱ – ‘‘ཨིམེ བྷིཀྑཱུ བྷགཝཏཱ པཎཱམིཏཱ, ཨིདཱནི ནེསཾ ཨནུགྒཧཾ ཀཱཏུཀཱམོ ཨེཝཾ ཙིནྟེསི, ཀཱརཎཾ བྷགཝཱ ཙིནྟེསི, ཨཧམེཏྠ ཨུསྶཱཧཾ ཛནེསྶཱམཱི’’ཏི པུརཏོ པཱཀཊོ ཨཧོསི། སནྟེཏྠ བྷིཀྑཱུཏི ཨིདཾ སོ མཧཱབྲཧྨཱ ཡཐཱ ནཱམ བྱཏྟོ སཱུདོ ཡདེཝ ཨམྦིལགྒཱདཱིསུ རསཛཱཏཾ རཉྙོ རུཙྩཏི, ཏཾ ཨབྷིསངྑཱརེན སཱདུཏརཾ ཀཏྭཱ པུནདིཝསེ ཨུཔནཱམེཏི, ཨེཝམེཝ ཨཏྟནོ བྱཏྟཏཱཡ བྷགཝཏཱ ཨཱཧཊཨུཔམཾཡེཝ ཨེཝམེཏཾ བྷགཝཱཏིཨཱདིཝཙནེཧི ཨབྷིསངྑརིཏྭཱ བྷགཝནྟཾ ཡཱཙནྟོ བྷིཀྑུསངྒྷསྶ ཨནུགྒཧཀརཎཏྠཾ ཝདཏི ། ཏཏྠ ཨབྷིནནྡཏཱུཏི ‘‘མམ སནྟིཀཾ བྷིཀྑུསངྒྷོ ཨཱགཙྪཏཱུ’’ཏི། ཨེཝམསྶ ཨཱགམནཾ སམྤིཡཱཡམཱནོ ཨབྷིནནྡཏུ། ཨབྷིཝདཏཱུཏི ཨཱགཏསྶ ཙ ཨོཝཱདཱནུསཱསནིཾ དདནྟོ ཨབྷིཝདཏུ།
Bhagavato purato pāturahosīti satthu cittaṃ ñatvā – ‘‘ime bhikkhū bhagavatā paṇāmitā, idāni nesaṃ anuggahaṃ kātukāmo evaṃ cintesi, kāraṇaṃ bhagavā cintesi, ahamettha ussāhaṃ janessāmī’’ti purato pākaṭo ahosi. Santettha bhikkhūti idaṃ so mahābrahmā yathā nāma byatto sūdo yadeva ambilaggādīsu rasajātaṃ rañño ruccati, taṃ abhisaṅkhārena sādutaraṃ katvā punadivase upanāmeti, evameva attano byattatāya bhagavatā āhaṭaupamaṃyeva evametaṃ bhagavātiādivacanehi abhisaṅkharitvā bhagavantaṃ yācanto bhikkhusaṅghassa anuggahakaraṇatthaṃ vadati . Tattha abhinandatūti ‘‘mama santikaṃ bhikkhusaṅgho āgacchatū’’ti. Evamassa āgamanaṃ sampiyāyamāno abhinandatu. Abhivadatūti āgatassa ca ovādānusāsaniṃ dadanto abhivadatu.
པཊིསལླཱནཱཏི ཨེཀཱིབྷཱཝཱ། ཨིདྡྷཱབྷིསངྑཱརཾ ཨབྷིསངྑཱསཱིཏི ཨིདྡྷིཾ ཨཀཱསི། ཨེཀདྭཱིཧིཀཱཡཱཏི ཨེཀེཀོ ཙེཝ དྭེ དྭེ ཙ ཧུཏྭཱ། སཱརཛྫམཱནརཱུཔཱཏི ཨོཏྟཔྤམཱནསབྷཱཝཱ བྷཱཡམཱནཱ། ཀསྨཱ པན བྷགཝཱ ཏེསཾ ཏཐཱ ཨུཔསངྐམནཱཡ ཨིདྡྷིམཀཱསཱིཏི? ཧིཏཔཏྠནཱཡ། ཡདི ཧི ཏེ ཝགྒཝགྒཱ ཧུཏྭཱ ཨཱགཙྪེཡྻུཾ, ‘‘བྷགཝཱ བྷིཀྑུསངྒྷཾ པཎཱམེཏྭཱ ཨརཉྙཾ པཝིཊྛོ ཨེཀདིཝསམྤི ཏཏྠ ཝསིཏུཾ ནཱསཀྑི, ཝེགེནེཝ ཨཱགཏོ’’ཏི ཀེལི༹མྤི ཀརེཡྻུཾ། ཨཐ ནེསཾ ནེཝ བུདྡྷགཱརཝཾ པཙྩུཔཊྛཧེཡྻ, ན དྷམྨདེསནཾ སམྤཊིཙྪིཏུཾ སམཏྠཱ བྷཝེཡྻུཾ། སབྷཡཱནཾ པན སསཱརཛྫཱནཾ ཨེཀདྭཱིཧིཀཱཡ ཨཱགཙྪནྟཱནཾ བུདྡྷགཱརཝཉྩེཝ པཙྩུཔཊྛིཏཾ བྷཝིསྶཏི, དྷམྨདེསནཉྩ སམྤཊིཙྪིཏུཾ སཀྑིསྶནྟཱིཏི ཙིནྟེཏྭཱ ཏེསཾ ཧིཏཔཏྠནཱཡ ཏཐཱརཱུཔཾ ཨིདྡྷིཾ ཨཀཱསི།
Paṭisallānāti ekībhāvā. Iddhābhisaṅkhāraṃ abhisaṅkhāsīti iddhiṃ akāsi. Ekadvīhikāyāti ekeko ceva dve dve ca hutvā. Sārajjamānarūpāti ottappamānasabhāvā bhāyamānā. Kasmā pana bhagavā tesaṃ tathā upasaṅkamanāya iddhimakāsīti? Hitapatthanāya. Yadi hi te vaggavaggā hutvā āgaccheyyuṃ, ‘‘bhagavā bhikkhusaṅghaṃ paṇāmetvā araññaṃ paviṭṭho ekadivasampi tattha vasituṃ nāsakkhi, vegeneva āgato’’ti keḷimpi kareyyuṃ. Atha nesaṃ neva buddhagāravaṃ paccupaṭṭhaheyya, na dhammadesanaṃ sampaṭicchituṃ samatthā bhaveyyuṃ. Sabhayānaṃ pana sasārajjānaṃ ekadvīhikāya āgacchantānaṃ buddhagāravañceva paccupaṭṭhitaṃ bhavissati, dhammadesanañca sampaṭicchituṃ sakkhissantīti cintetvā tesaṃ hitapatthanāya tathārūpaṃ iddhiṃ akāsi.
ནིསཱིདིཾསཱུཏི ཏེསུ ཧི སཱརཛྫམཱནརཱུཔེསུ ཨཱགཙྪནྟེསུ ཨེཀོ བྷིཀྑུ ‘‘མམཾཡེཝ སཏྠཱ ཨོལོཀེཏི, མཾཡེཝ མཉྙེ ནིགྒཎྷིཏུཀཱམོ’’ཏི སཎིཀཾ ཨཱགནྟྭཱ ཝནྡིཏྭཱ ནིསཱིདི, ཨཐཉྙོ ཨཐཉྙོཏི ཨེཝཾ པཉྩབྷིཀྑུསཏཱནི ནིསཱིདིཾསུ། ཨེཝཾ ནིསིནྣཾ པན བྷིཀྑུསངྒྷཾ སཱིདནྟརེ སནྣིསིནྣཾ མཧཱསམུདྡཾ ཝིཡ ནིཝཱཏེ པདཱིཔཾ ཝིཡ ཙ ནིཙྩལཾ དིསྭཱ སཏྠཱ ཙིནྟེསི – ‘‘ཨིམེསཾ བྷིཀྑཱུནཾ ཀཱིདིསཱི དྷམྨདེསནཱ ཝཊྚཏཱི’’ཏི? ཨཐསྶ ཨེཏདཧོསི – ‘‘ཨིམེ ཨཱཧཱརཧེཏུ པཎཱམིཏཱ, པིཎྜིཡཱལོཔདྷམྨདེསནཱཝ ནེསཾ སཔྤཱཡཱ, ཏཾ དསྶེཏྭཱ མཏྠཀེ ཏིཔརིཝཊྚདེསནཾ དེསེསྶཱམི, དེསནཱཔརིཡོསཱནེ སབྦེ ཨརཧཏྟཾ པཱཔུཎིསྶནྟཱི’’ཏི། ཨཐ ནེསཾ ཏཾ དྷམྨདེསནཾ དེསེནྟོ ཨནྟམིདཾ, བྷིཀྑཝེཏིཨཱདིམཱཧ།
Nisīdiṃsūti tesu hi sārajjamānarūpesu āgacchantesu eko bhikkhu ‘‘mamaṃyeva satthā oloketi, maṃyeva maññe niggaṇhitukāmo’’ti saṇikaṃ āgantvā vanditvā nisīdi, athañño athaññoti evaṃ pañcabhikkhusatāni nisīdiṃsu. Evaṃ nisinnaṃ pana bhikkhusaṅghaṃ sīdantare sannisinnaṃ mahāsamuddaṃ viya nivāte padīpaṃ viya ca niccalaṃ disvā satthā cintesi – ‘‘imesaṃ bhikkhūnaṃ kīdisī dhammadesanā vaṭṭatī’’ti? Athassa etadahosi – ‘‘ime āhārahetu paṇāmitā, piṇḍiyālopadhammadesanāva nesaṃ sappāyā, taṃ dassetvā matthake tiparivaṭṭadesanaṃ desessāmi, desanāpariyosāne sabbe arahattaṃ pāpuṇissantī’’ti. Atha nesaṃ taṃ dhammadesanaṃ desento antamidaṃ, bhikkhavetiādimāha.
ཏཏྠ ཨནྟནྟི པཙྪིམཾ ལཱམཀཾ། ཡདིདཾ པིཎྜོལྱནྟི ཡཾ ཨེཝཾ པིཎྜཔརིཡེསནེན ཛཱིཝིཀཾ ཀཔྤེནྟསྶ ཛཱིཝིཏཾ། ཨཡཾ པནེཏྠ པདཏྠོ – པིཎྜཱཡ ཨུལཏཱིཏི པིཎྜོལོ, པིཎྜོལསྶ ཀམྨཾ པིཎྜོལྱཾ, པིཎྜཔརིཡེསནེན ནིཔྥཱདིཏཛཱིཝིཏནྟི ཨཏྠོ། ཨབྷིསཱཔོཏི ཨཀྐོསོ། ཀུཔིཏཱ ཧི མནུསྶཱ ཨཏྟནོ པཙྩཏྠིཀཾ ‘‘ཙཱིཝརཾ ནིཝཱསེཏྭཱ ཀཔཱལཾ གཧེཏྭཱ པིཎྜཾ པརིཡེསམཱནོ ཙརིསྶཏཱི’’ཏི ཨཀྐོསནྟི། ཨཐ ཝཱ པན ‘‘ཀིཾ ཏུཡ྄ཧཾ ཨཀཱཏབྦཾ ཨཏྠི, ཡོ ཏྭཾ ཨེཝཾ བལཝཱ ཝཱིརིཡསམྤནྣོཔི ཧིརོཏྟཔྤཾ པཧཱཡ ཀཔཎོ ཝིཡ པིཎྜོལོ ཝིཙརསི པཏྟཔཱཎཱི’’ཏི? ཨེཝམྤི ཨཀྐོསནྟིཡེཝ། ཏཉྩ ཁོ ཨེཏནྟི ཨེཝཾ ཏཾ ཨབྷིསཱཔཾ སམཱནམྤི པིཎྜོལྱཾ། ཀུལཔུཏྟཱ ཨུཔེནྟི ཨཏྠཝསིཀཱཏི མམ སཱསནེ ཛཱཏིཀུལཔུཏྟཱ ཙ ཨཱཙཱརཀུལཔུཏྟཱ ཙ ཨཏྠཝསིཀཱ ཀཱརཎཝསིཀཱ ཧུཏྭཱ ཀཱརཎཝསཾ པཊིཙྩ ཨུཔེནྟི།
Tattha antanti pacchimaṃ lāmakaṃ. Yadidaṃ piṇḍolyanti yaṃ evaṃ piṇḍapariyesanena jīvikaṃ kappentassa jīvitaṃ. Ayaṃ panettha padattho – piṇḍāya ulatīti piṇḍolo, piṇḍolassa kammaṃ piṇḍolyaṃ, piṇḍapariyesanena nipphāditajīvitanti attho. Abhisāpoti akkoso. Kupitā hi manussā attano paccatthikaṃ ‘‘cīvaraṃ nivāsetvā kapālaṃ gahetvā piṇḍaṃ pariyesamāno carissatī’’ti akkosanti. Atha vā pana ‘‘kiṃ tuyhaṃ akātabbaṃ atthi, yo tvaṃ evaṃ balavā vīriyasampannopi hirottappaṃ pahāya kapaṇo viya piṇḍolo vicarasi pattapāṇī’’ti? Evampi akkosantiyeva. Tañca kho etanti evaṃ taṃ abhisāpaṃ samānampi piṇḍolyaṃ. Kulaputtā upenti atthavasikāti mama sāsane jātikulaputtā ca ācārakulaputtā ca atthavasikā kāraṇavasikā hutvā kāraṇavasaṃ paṭicca upenti.
རཱཛཱབྷིནཱིཏཱཏིཨཱདཱིསུ ཡེ རཉྙོ སནྟཀཾ ཁཱདིཏྭཱ རཉྙཱ བནྡྷནཱགཱརེ བནྡྷཱཔིཏཱ པལཱཡིཏྭཱ པབྦཛནྟི, ཏེ རཱཛཱབྷིནཱིཏཱ ནཱམ། ཏེ ཧི རཉྙཱ བནྡྷནཾ ཨབྷིནཱིཏཏྟཱ རཱཛཱབྷིནཱིཏཱ ནཱམ། ཡེ པན ཙོརེཧི ཨཊཝིཡཾ གཧེཏྭཱ ཨེཀཙྩེསུ མཱརིཡམཱནེསུ ཨེཀཙྩེ ‘‘མཡཾ སཱམི ཏུམྷེཧི ཝིསྶཊྛཱ གེཧཾ ཨནཛ྄ཛྷཱཝསིཏྭཱ པབྦཛིསྶཱམ, ཏཏྠ ཡཾ ཡཾ བུདྡྷཔཱུཛཱདིཔུཉྙཾ ཀརིསྶཱམ, ཏཏོ ཏུམྷཱཀཾ པཏྟིཾ དསྶཱམཱ’’ཏི ཏེཧི ཝིསྶཊྛཱ པབྦཛནྟི, ཏེ ཙོརཱབྷིནཱིཏཱ ནཱམ། ཏེཔི ཧི ཙོརེཧི མཱརེཏབྦཏཾ ཨབྷིནཱིཏཱཏི ཙོརཱབྷིནཱིཏཱ ནཱམ། ཡེ པན ཨིཎཾ གཧེཏྭཱ པཊིདཱཏུཾ ཨསཀྐོནྟཱ པལཱཡིཏྭཱ པབྦཛནྟི, ཏེ ཨིཎཊྚཱ ནཱམ, ཨིཎཔཱིལི༹ཏཱཏི ཨཏྠོ ། ཨིཎཊྛཱཏིཔི པཱཋོ, ཨིཎེ ཋིཏཱཏི ཨཏྠོ། ཡེ རཱཛཙོརཚཱཏཀརོགབྷཡཱནཾ ཨཉྙཏརེན ཨབྷིབྷཱུཏཱ ཨུཔདྡུཏཱ པབྦཛནྟི, ཏེ བྷཡཊྚཱ ནཱམ, བྷཡཔཱིལི༹ཏཱཏི ཨཏྠོ། བྷཡཊྛཱཏིཔི པཱཋོ, བྷཡེ ཋིཏཱཏི ཨཏྠོ། ཨཱཛཱིཝིཀཱཔཀཏཱཏི ཨཱཛཱིཝིཀཱཡ ཨུཔདྡུཏཱ ཨབྷིབྷཱུཏཱ, པུཏྟདཱརཾ པོསེཏུཾ ཨསཀྐོནྟཱཏི ཨཏྠོ། ཨོཏིཎྞཱམྷཱཏི ཨནྟོ ཨནུཔཝིཊྛཱ།
Rājābhinītātiādīsu ye rañño santakaṃ khāditvā raññā bandhanāgāre bandhāpitā palāyitvā pabbajanti, te rājābhinītā nāma. Te hi raññā bandhanaṃ abhinītattā rājābhinītā nāma. Ye pana corehi aṭaviyaṃ gahetvā ekaccesu māriyamānesu ekacce ‘‘mayaṃ sāmi tumhehi vissaṭṭhā gehaṃ anajjhāvasitvā pabbajissāma, tattha yaṃ yaṃ buddhapūjādipuññaṃ karissāma, tato tumhākaṃ pattiṃ dassāmā’’ti tehi vissaṭṭhā pabbajanti, te corābhinītā nāma. Tepi hi corehi māretabbataṃ abhinītāti corābhinītā nāma. Ye pana iṇaṃ gahetvā paṭidātuṃ asakkontā palāyitvā pabbajanti, te iṇaṭṭā nāma, iṇapīḷitāti attho . Iṇaṭṭhātipi pāṭho, iṇe ṭhitāti attho. Ye rājacorachātakarogabhayānaṃ aññatarena abhibhūtā upaddutā pabbajanti, te bhayaṭṭā nāma, bhayapīḷitāti attho. Bhayaṭṭhātipi pāṭho, bhaye ṭhitāti attho. Ājīvikāpakatāti ājīvikāya upaddutā abhibhūtā, puttadāraṃ posetuṃ asakkontāti attho. Otiṇṇāmhāti anto anupaviṭṭhā.
སོ ཙ ཧོཏི ཨབྷིཛ྄ཛྷཱལཱུཏི ཨིདཾ སོ ཀུལཔུཏྟོ ‘‘དུཀྑསྶ ཨནྟཾ ཀརིསྶཱམཱི’’ཏིཨཱདིཝསེན ཙིཏྟཾ ཨུཔྤཱདེཏྭཱ པབྦཛིཏོ, ཨཔརབྷཱགེ, ཏཾ པབྦཛྫཾ ཏཐཱརཱུཔཾ ཀཱཏུཾ ན སཀྐོཏི, ཏཾ དསྶེཏུཾ ཝུཏྟཾ། ཏཏྠ ཨབྷིཛ྄ཛྷཱལཱུཏི པརབྷཎྜཱནཾ ཨབྷིཛ྄ཛྷཱཡིཏཱ། ཏིབྦསཱརཱགོཏི བཧལརཱགོ། བྱཱཔནྣཙིཏྟོཏི པཱུཏིབྷཱཝེན ཝིཔནྣཙིཏྟོ། པདུཊྛམནསངྐཔྤོཏི ཏིཁིཎསིངྒོ ཝིཡ གོཎོ དུཊྛཙིཏྟོ། མུཊྛསྶཏཱིཏི བྷཏྟནིཀྑིཏྟཀཱཀོ ཝིཡ ནཊྛསྶཏི, ཨིདྷ ཀཏཾ ཨེཏྠ ནསྶཏི། ཨསམྤཛཱནོཏི ནིཔྤཉྙོ། ཁནྡྷཱདིཔརིཙྪེདརཧིཏོ། ཨསམཱཧིཏོཏི ཙཎྜསོཏེ བདྡྷནཱཝཱ ཝིཡ ཨུཔཙཱརཔྤནཱབྷཱཝེན ཨསཎྛིཏོ། ཝིབྦྷནྟཙིཏྟོཏི བནྡྷཱརུལ༹ྷམགོ ཝིཡ སནྟམནོ། པཱཀཏིནྡྲིཡོཏི ཡཐཱ གིཧཱི པུཏྟདྷཱིཏརོ ཨོལོཀེནྟོ ཨསཾཝུཏིནྡྲིཡོ ཧོཏི, ཨེཝཾ ཨསཾཝུཏིནྡྲིཡོ།
So ca hoti abhijjhālūti idaṃ so kulaputto ‘‘dukkhassa antaṃ karissāmī’’tiādivasena cittaṃ uppādetvā pabbajito, aparabhāge, taṃ pabbajjaṃ tathārūpaṃ kātuṃ na sakkoti, taṃ dassetuṃ vuttaṃ. Tattha abhijjhālūti parabhaṇḍānaṃ abhijjhāyitā. Tibbasārāgoti bahalarāgo. Byāpannacittoti pūtibhāvena vipannacitto. Paduṭṭhamanasaṅkappoti tikhiṇasiṅgo viya goṇo duṭṭhacitto. Muṭṭhassatīti bhattanikkhittakāko viya naṭṭhassati, idha kataṃ ettha nassati. Asampajānoti nippañño. Khandhādiparicchedarahito. Asamāhitoti caṇḍasote baddhanāvā viya upacārappanābhāvena asaṇṭhito. Vibbhantacittoti bandhāruḷhamago viya santamano. Pākatindriyoti yathā gihī puttadhītaro olokento asaṃvutindriyo hoti, evaṃ asaṃvutindriyo.
ཚཝཱལཱཏནྟི ཚཝཱནཾ དཌྜྷཊྛཱནེ ཨལཱཏཾ། ཨུབྷཏོཔདིཏྟཾ མཛ྄ཛྷེ གཱུཐགཏནྟི པམཱཎེན ཨཊྛངྒུལམཏྟཾ དྭཱིསུ ཋཱནེསུ ཨཱདིཏྟཾ མཛ྄ཛྷེ གཱུཐམཀྑིཏཾ། ནེཝ གཱམེཏི སཙེ ཧི ཏཾ ཡུགནངྒལགོཔཱནསིཔཀྑཔཱསཀཱདཱིནཾ ཨཏྠཱཡ ཨུཔནེཏུཾ སཀྐཱ ཨསྶ, གཱམེ ཀཊྛཏྠཾ ཕརེཡྻ། སཙེ ཁེཏྟཀུཊིཡཾ ཀཊྛཏྠརམཉྩཀཱདཱིནཾ ཨཏྠཱཡ ཨུཔནེཏུཾ སཀྐཱ, ཨརཉྙེ ཀཊྛཏྠཾ ཕརེཡྻ། ཡསྨཱ པན ཨུབྷཡཐཱཔི ན སཀྐཱ, ཏསྨཱ ཨེཝཾ ཝུཏྟཾ། གིཧིབྷོགཱ ཙ པརིཧཱིནོཏི ཡོ ཨགཱརེ ཝསནྟེཧི གིཧཱིཧི དཱཡཛྫེ བྷཱཛིཡམཱནེ བྷོགོ ལདྡྷབྦོ ཨསྶ, ཏཏོ ཙ པརིཧཱིནོ། སཱམཉྙཏྠཉྩཱཏི ཨཱཙརིཡུཔཛ྄ཛྷཱཡཱནཾ ཨོཝཱདེ ཋཏྭཱ པརིཡཏྟིཔཊིཝེདྷཝསེན པཏྟབྦཾ སཱམཉྙཏྠཉྩ། ཨིམཉྩ པན ཨུཔམཾ སཏྠཱ ན དུསྶཱིལསྶ ཝསེན ཨཱཧརི, པརིསུདྡྷསཱིལསྶ པན ཨལསསྶ ཨབྷིཛ྄ཛྷཱདཱིཧི དོསེཧི ཨུཔཧཏསྶ པུགྒལསྶ ཨིམཾ ཨུཔམཾ ཨཱཧརི།
Chavālātanti chavānaṃ daḍḍhaṭṭhāne alātaṃ. Ubhatopadittaṃ majjhe gūthagatanti pamāṇena aṭṭhaṅgulamattaṃ dvīsu ṭhānesu ādittaṃ majjhe gūthamakkhitaṃ. Neva gāmeti sace hi taṃ yuganaṅgalagopānasipakkhapāsakādīnaṃ atthāya upanetuṃ sakkā assa, gāme kaṭṭhatthaṃ phareyya. Sace khettakuṭiyaṃ kaṭṭhattharamañcakādīnaṃ atthāya upanetuṃ sakkā, araññe kaṭṭhatthaṃ phareyya. Yasmā pana ubhayathāpi na sakkā, tasmā evaṃ vuttaṃ. Gihibhogā ca parihīnoti yo agāre vasantehi gihīhi dāyajje bhājiyamāne bhogo laddhabbo assa, tato ca parihīno. Sāmaññatthañcāti ācariyupajjhāyānaṃ ovāde ṭhatvā pariyattipaṭivedhavasena pattabbaṃ sāmaññatthañca. Imañca pana upamaṃ satthā na dussīlassa vasena āhari, parisuddhasīlassa pana alasassa abhijjhādīhi dosehi upahatassa puggalassa imaṃ upamaṃ āhari.
ཏཡོམེ, བྷིཀྑཝེཏི ཀསྨཱ ཨཱརདྡྷཾ? ཨིམསྶ པུགྒལསྶ ཚཝཱལཱཏསདིསབྷཱཝོ ནེཝ མཱཏཱཔིཏཱུཧི ཀཏོ, ན ཨཱཙརིཡུཔཛ྄ཛྷཱཡེཧི, ཨིམེཧི པན པཱཔཝིཏཀྐེཧི ཀཏོཏི དསྶནཏྠཾ ཨཱརདྡྷཾ། ཨནིམིཏྟཾ ཝཱ སམཱདྷིནྟི ཝིཔསྶནཱསམཱདྷིཾ། སོ ཧི ནིཙྩནིམིཏྟཱདཱིནཾ སམུགྒྷཱཏནེན ཨནིམིཏྟོཏི ཝུཙྩཏི། ཨེཏྠ ཙ ཙཏྟཱརོ སཏིཔཊྛཱནཱ མིསྶཀཱ, ཨནིམིཏྟསམཱདྷི པུབྦབྷཱགོ། ཨནིམིཏྟསམཱདྷི ཝཱ མིསྶཀོ, སཏིཔཊྛཱནཱ པུབྦབྷཱགཱཏི ཝེདིཏབྦཱ།
Tayome, bhikkhaveti kasmā āraddhaṃ? Imassa puggalassa chavālātasadisabhāvo neva mātāpitūhi kato, na ācariyupajjhāyehi, imehi pana pāpavitakkehi katoti dassanatthaṃ āraddhaṃ. Animittaṃ vā samādhinti vipassanāsamādhiṃ. So hi niccanimittādīnaṃ samugghātanena animittoti vuccati. Ettha ca cattāro satipaṭṭhānā missakā, animittasamādhi pubbabhāgo. Animittasamādhi vā missako, satipaṭṭhānā pubbabhāgāti veditabbā.
དྭེམཱ, བྷིཀྑཝེ, དིཊྛིཡོཏི ཨིདཾ པན ན ཀེཝལཾ ཨནིམིཏྟསམཱདྷིབྷཱཝནཱ ཨིམེསཾཡེཝ ཏིཎྞཾ མཧཱཝིཏཀྐཱནཾ པཧཱནཱཡ སཾཝཏྟཏི, སསྶཏུཙྪེདདིཊྛཱིནམྤི པན སམུགྒྷཱཏཾ ཀརོཏཱིཏི དསྶནཏྠཾ ཝུཏྟཾ། ན ཝཛྫཝཱ ཨསྶནྟི ནིདྡོསོ བྷཝེཡྻཾ། སེསམེཏྠ ཨུཏྟཱནམེཝ། ཨིཏི བྷགཝཱ ཨིམསྨིམྤི སུཏྟེ དེསནཾ ཏཱིཧི བྷཝེཧི ཝིནིཝཏྟེཏྭཱ ཨརཧཏྟེན ཀཱུཊཾ གཎྷི། དེསནཱཝསཱནེ པཉྩསཏཱ བྷིཀྑཱུ སཧ པཊིསམྦྷིདཱཧི ཨརཧཏྟཾ པཱཔུཎིཾསཱུཏི། ཨཊྛམཾ།
Dvemā, bhikkhave, diṭṭhiyoti idaṃ pana na kevalaṃ animittasamādhibhāvanā imesaṃyeva tiṇṇaṃ mahāvitakkānaṃ pahānāya saṃvattati, sassatucchedadiṭṭhīnampi pana samugghātaṃ karotīti dassanatthaṃ vuttaṃ. Na vajjavā assanti niddoso bhaveyyaṃ. Sesamettha uttānameva. Iti bhagavā imasmimpi sutte desanaṃ tīhi bhavehi vinivattetvā arahattena kūṭaṃ gaṇhi. Desanāvasāne pañcasatā bhikkhū saha paṭisambhidāhi arahattaṃ pāpuṇiṃsūti. Aṭṭhamaṃ.
Related texts:
ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / སཾཡུཏྟནིཀཱཡ • Saṃyuttanikāya / ༨. པིཎྜོལྱསུཏྟཾ • 8. Piṇḍolyasuttaṃ
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / སཾཡུཏྟནིཀཱཡ (ཊཱིཀཱ) • Saṃyuttanikāya (ṭīkā) / ༨. པིཎྜོལྱསུཏྟཝཎྞནཱ • 8. Piṇḍolyasuttavaṇṇanā
