| Library / Tipiṭaka / ਤਿਪਿਟਕ • Tipiṭaka / ਸਂਯੁਤ੍ਤਨਿਕਾਯ (ਅਟ੍ਠਕਥਾ) • Saṃyuttanikāya (aṭṭhakathā) |
੮. ਪਿਣ੍ਡੋਲ੍ਯਸੁਤ੍ਤવਣ੍ਣਨਾ
8. Piṇḍolyasuttavaṇṇanā
੮੦. ਅਟ੍ਠਮੇ ਕਿਸ੍ਮਿਞ੍ਚਿਦੇવ ਪਕਰਣੇਤਿ ਕਿਸ੍ਮਿਞ੍ਚਿਦੇવ ਕਾਰਣੇ। ਪਣਾਮੇਤ੍વਾਤਿ ਨੀਹਰਿਤ੍વਾ। ਕਿਸ੍ਮਿਂ ਪਨ ਕਾਰਣੇ ਏਤੇ ਭਗવਤਾ ਪਣਾਮਿਤਾਤਿ? ਏਕਸ੍ਮਿਞ੍ਹਿ ਅਨ੍ਤੋવਸ੍ਸੇ ਭਗવਾ ਸਾવਤ੍ਥਿਯਂ વਸਿਤ੍વਾ વੁਤ੍ਥવਸ੍ਸੋ ਪવਾਰੇਤ੍વਾ ਮਹਾਭਿਕ੍ਖੁਸਙ੍ਘਪਰਿવਾਰੋ ਸਾવਤ੍ਥਿਤੋ ਨਿਕ੍ਖਮਿਤ੍વਾ ਜਨਪਦਚਾਰਿਕਂ ਚਰਨ੍ਤੋ ਕਪਿਲવਤ੍ਥੁਂ ਪਤ੍વਾ ਨਿਗ੍ਰੋਧਾਰਾਮਂ ਪਾવਿਸਿ। ਸਕ੍ਯਰਾਜਾਨੋ ‘‘ਸਤ੍ਥਾ ਆਗਤੋ’’ਤਿ ਸੁਤ੍વਾ ਪਚ੍ਛਾਭਤ੍ਤੇ ਕਪ੍ਪਿਯਾਨਿ ਤੇਲਮਧੁਫਾਣਿਤਾਦੀਨਿ ਚੇવ ਪਾਨਕਾਨਿ ਚ ਕਾਜਸਤੇਹਿ ਗਾਹਾਪੇਤ੍વਾ વਿਹਾਰਂ ਗਨ੍ਤ੍વਾ ਸਙ੍ਘਸ੍ਸ ਨਿਯ੍ਯਾਤੇਤ੍વਾ ਸਤ੍ਥਾਰਂ વਨ੍ਦਿਤ੍વਾ ਪਟਿਸਨ੍ਥਾਰਂ ਕਰੋਨ੍ਤਾ ਏਕਮਨ੍ਤੇ ਨਿਸੀਦਿਂਸੁ। ਸਤ੍ਥਾ ਤੇਸਂ ਮਧੁਰਧਮ੍ਮਕਥਂ ਕਥੇਨ੍ਤੋ ਨਿਸੀਦਿ। ਤਸ੍ਮਿਂ ਖਣੇ ਏਕਚ੍ਚੇ ਭਿਕ੍ਖੂ ਸੇਨਾਸਨਂ ਪਟਿਜਗ੍ਗਨ੍ਤਿ, ਏਕਚ੍ਚੇ ਮਞ੍ਚਪੀਠਾਦੀਨਿ ਪਞ੍ਞਾਪੇਨ੍ਤਿ, ਸਾਮਣੇਰਾ ਅਪ੍ਪਹਰਿਤਂ ਕਰੋਨ੍ਤਿ। ਭਾਜਨੀਯਟ੍ਠਾਨੇ ਸਮ੍ਪਤ੍ਤਭਿਕ੍ਖੂਪਿ ਅਤ੍ਥਿ, ਅਸਮ੍ਪਤ੍ਤਭਿਕ੍ਖੂਪਿ ਅਤ੍ਥਿ। ਸਮ੍ਪਤ੍ਤਾ ਅਸਮ੍ਪਤ੍ਤਾਨਂ ਲਾਭਂ ਗਣ੍ਹਨ੍ਤਾ, ‘‘ਅਮ੍ਹਾਕਂ ਦੇਥ, ਅਮ੍ਹਾਕਂ ਆਚਰਿਯਸ੍ਸ ਦੇਥ ਉਪਜ੍ਝਾਯਸ੍ਸ ਦੇਥਾ’’ਤਿ ਕਥੇਨ੍ਤਾ ਮਹਾਸਦ੍ਦਮਕਂਸੁ। ਸਤ੍ਥਾ ਸੁਤ੍વਾ ਥੇਰਂ ਪੁਚ੍ਛਿ ‘‘ਕੇ ਪਨ ਤੇ, ਆਨਨ੍ਦ, ਉਚ੍ਚਾਸਦ੍ਦਾ ਮਹਾਸਦ੍ਦਾ ਕੇવਟ੍ਟਾ ਮਞ੍ਞੇ ਮਚ੍ਛવਿਲੋਪੇ’’ਤਿ? ਥੇਰੋ ਏਤਮਤ੍ਥਂ ਆਰੋਚੇਸਿ। ਸਤ੍ਥਾ ਸੁਤ੍વਾ ‘‘ਆਮਿਸਹੇਤੁ, ਆਨਨ੍ਦ, ਭਿਕ੍ਖੂ ਮਹਾਸਦ੍ਦਂ ਕਰੋਨ੍ਤੀ’’ਤਿ ਆਹ। ‘‘ਆਮ, ਭਨ੍ਤੇ’’ਤਿ। ‘‘ਅਨਨੁਚ੍ਛવਿਕਂ, ਆਨਨ੍ਦ, ਅਪ੍ਪਤਿਰੂਪਂ। ਨ ਹਿ ਮਯਾ ਕਪ੍ਪਸਤਸਹਸ੍ਸਾਧਿਕਾਨਿ ਚਤ੍ਤਾਰਿ ਅਸਙ੍ਖ੍ਯੇਯ੍ਯਾਨਿ ਚੀવਰਾਦਿਹੇਤੁ ਪਾਰਮਿਯੋ ਪੂਰਿਤਾ, ਨਾਪਿ ਇਮੇ ਭਿਕ੍ਖੂ ਚੀવਰਾਦਿਹੇਤੁ ਅਗਾਰਸ੍ਮਾ ਅਨਗਾਰਿਯਂ ਪਬ੍ਬਜਿਤਾ, ਅਰਹਤ੍ਤਹੇਤੁ ਪਬ੍ਬਜਿਤ੍વਾ ਅਨਤ੍ਥਂ ਅਤ੍ਥਸਦਿਸਂ ਅਸਾਰਂ ਸਾਰਸਦਿਸਂ ਕਰੋਨ੍ਤਿ, ਗਚ੍ਛਾਨਨ੍ਦ, ਤੇ ਭਿਕ੍ਖੂ ਪਣਾਮੇਹੀ’’ਤਿ।
80. Aṭṭhame kismiñcideva pakaraṇeti kismiñcideva kāraṇe. Paṇāmetvāti nīharitvā. Kismiṃ pana kāraṇe ete bhagavatā paṇāmitāti? Ekasmiñhi antovasse bhagavā sāvatthiyaṃ vasitvā vutthavasso pavāretvā mahābhikkhusaṅghaparivāro sāvatthito nikkhamitvā janapadacārikaṃ caranto kapilavatthuṃ patvā nigrodhārāmaṃ pāvisi. Sakyarājāno ‘‘satthā āgato’’ti sutvā pacchābhatte kappiyāni telamadhuphāṇitādīni ceva pānakāni ca kājasatehi gāhāpetvā vihāraṃ gantvā saṅghassa niyyātetvā satthāraṃ vanditvā paṭisanthāraṃ karontā ekamante nisīdiṃsu. Satthā tesaṃ madhuradhammakathaṃ kathento nisīdi. Tasmiṃ khaṇe ekacce bhikkhū senāsanaṃ paṭijagganti, ekacce mañcapīṭhādīni paññāpenti, sāmaṇerā appaharitaṃ karonti. Bhājanīyaṭṭhāne sampattabhikkhūpi atthi, asampattabhikkhūpi atthi. Sampattā asampattānaṃ lābhaṃ gaṇhantā, ‘‘amhākaṃ detha, amhākaṃ ācariyassa detha upajjhāyassa dethā’’ti kathentā mahāsaddamakaṃsu. Satthā sutvā theraṃ pucchi ‘‘ke pana te, ānanda, uccāsaddā mahāsaddā kevaṭṭā maññe macchavilope’’ti? Thero etamatthaṃ ārocesi. Satthā sutvā ‘‘āmisahetu, ānanda, bhikkhū mahāsaddaṃ karontī’’ti āha. ‘‘Āma, bhante’’ti. ‘‘Ananucchavikaṃ, ānanda, appatirūpaṃ. Na hi mayā kappasatasahassādhikāni cattāri asaṅkhyeyyāni cīvarādihetu pāramiyo pūritā, nāpi ime bhikkhū cīvarādihetu agārasmā anagāriyaṃ pabbajitā, arahattahetu pabbajitvā anatthaṃ atthasadisaṃ asāraṃ sārasadisaṃ karonti, gacchānanda, te bhikkhū paṇāmehī’’ti.
ਪੁਬ੍ਬਣ੍ਹਸਮਯਨ੍ਤਿ ਦੁਤਿਯਦਿવਸੇ ਪੁਬ੍ਬਣ੍ਹਸਮਯਂ। ਬੇਲੁવਲਟ੍ਠਿਕਾਯ ਮੂਲੇਤਿ ਤਰੁਣਬੇਲੁવਰੁਕ੍ਖਮੂਲੇ। ਪਬਾਲ਼੍ਹੋਤਿ ਪਬਾਹਿਤੋ। ਪવਾਲ਼੍ਹੋਤਿਪਿ ਪਾਠੋ, ਪવਾਹਿਤੋਤਿ ਅਤ੍ਥੋ। ਉਭਯਮ੍ਪਿ ਨੀਹਟਭਾવਮੇવ ਦੀਪੇਤਿ। ਸਿਯਾ ਅਞ੍ਞਥਤ੍ਤਨ੍ਤਿ ਪਸਾਦਞ੍ਞਥਤ੍ਤਂ વਾ ਭਾવਞ੍ਞਥਤ੍ਤਂ વਾ ਭવੇਯ੍ਯ। ਕਥਂ? ‘‘ਸਮ੍ਮਾਸਮ੍ਬੁਦ੍ਧੇਨ ਮਯਂ ਲਹੁਕੇ ਕਾਰਣੇ ਪਣਾਮਿਤਾ’’ਤਿ ਪਸਾਦਂ ਮਨ੍ਦਂ ਕਰੋਨ੍ਤਾਨਂ ਪਸਾਦਞ੍ਞਥਤ੍ਤਂ ਨਾਮ ਹੋਤਿ। ਸਲਿਙ੍ਗੇਨੇવ ਤਿਤ੍ਥਾਯਤਨਂ ਪਕ੍ਕਮਨ੍ਤਾਨਂ ਭਾવਞ੍ਞਥਤ੍ਤਂ ਨਾਮ। ਸਿਯਾ વਿਪਰਿਣਾਮੋਤਿ ਏਤ੍ਥ ਪਨ ‘‘ਮਯਂ ਸਤ੍ਥੁ ਅਜ੍ਝਾਸਯਂ ਗਣ੍ਹਿਤੁਂ ਸਕ੍ਖਿਸ੍ਸਾਮਾਤਿ ਪਬ੍ਬਜਿਤਾ, ਨਂ ਗਹੇਤੁਂ ਅਸਕ੍ਕੋਨ੍ਤਾਨਂ ਕਿਂ ਅਮ੍ਹਾਕਂ ਪਬ੍ਬਜ੍ਜਾਯਾ’’ਤਿ? ਸਿਕ੍ਖਂ ਪਚ੍ਚਕ੍ਖਾਯ ਹੀਨਾਯਾવਤ੍ਤਨਂ વਿਪਰਿਣਾਮੋਤਿ વੇਦਿਤਬ੍ਬੋ। વਚ੍ਛਸ੍ਸਾਤਿ ਖੀਰੂਪਕવਚ੍ਛਸ੍ਸ। ਅਞ੍ਞਥਤ੍ਤਨ੍ਤਿ ਮਿਲਾਯਨਅਞ੍ਞਥਤ੍ਤਂ। ਖੀਰੂਪਕੋ ਹਿ વਚ੍ਛੋ ਮਾਤੁ ਅਦਸ੍ਸਨੇਨ ਖੀਰਂ ਅਲਭਨ੍ਤੋ ਮਿਲਾਯਤਿ ਕਮ੍ਪਤਿ ਪવੇਧਤਿ। વਿਪਰਿਣਾਮੋਤਿ ਮਰਣਂ। ਸੋ ਹਿ ਖੀਰਂ ਅਲਭਮਾਨੋ ਖੀਰਪਿਪਾਸਾਯ ਸੁਸ੍ਸਨ੍ਤੋ ਪਤਿਤ੍વਾ ਮਰਤਿ।
Pubbaṇhasamayanti dutiyadivase pubbaṇhasamayaṃ. Beluvalaṭṭhikāya mūleti taruṇabeluvarukkhamūle. Pabāḷhoti pabāhito. Pavāḷhotipi pāṭho, pavāhitoti attho. Ubhayampi nīhaṭabhāvameva dīpeti. Siyā aññathattanti pasādaññathattaṃ vā bhāvaññathattaṃ vā bhaveyya. Kathaṃ? ‘‘Sammāsambuddhena mayaṃ lahuke kāraṇe paṇāmitā’’ti pasādaṃ mandaṃ karontānaṃ pasādaññathattaṃ nāma hoti. Saliṅgeneva titthāyatanaṃ pakkamantānaṃ bhāvaññathattaṃ nāma. Siyā vipariṇāmoti ettha pana ‘‘mayaṃ satthu ajjhāsayaṃ gaṇhituṃ sakkhissāmāti pabbajitā, naṃ gahetuṃ asakkontānaṃ kiṃ amhākaṃ pabbajjāyā’’ti? Sikkhaṃ paccakkhāya hīnāyāvattanaṃ vipariṇāmoti veditabbo. Vacchassāti khīrūpakavacchassa. Aññathattanti milāyanaaññathattaṃ. Khīrūpako hi vaccho mātu adassanena khīraṃ alabhanto milāyati kampati pavedhati. Vipariṇāmoti maraṇaṃ. So hi khīraṃ alabhamāno khīrapipāsāya sussanto patitvā marati.
ਬੀਜਾਨਂ ਤਰੁਣਾਨਨ੍ਤਿ ਉਦਕੇਨ ਅਨੁਗ੍ਗਹੇਤਬ੍ਬਾਨਂ વਿਰੂਲ਼੍ਹਬੀਜਾਨਂ। ਅਞ੍ਞਥਤ੍ਤਨ੍ਤਿ ਮਿਲਾਯਨਞ੍ਞਥਤ੍ਤਮੇવ। ਤਾਨਿ ਹਿ ਉਦਕਂ ਅਲਭਨ੍ਤਾਨਿ ਮਿਲਾਯਨ੍ਤਿ। વਿਪਰਿਣਾਮੋਤਿ વਿਨਾਸੋ। ਤਾਨਿ ਹਿ ਉਦਕਂ ਅਲਭਨ੍ਤਾਨਿ ਸੁਕ੍ਖਿਤ੍વਾ વਿਨਸ੍ਸਨ੍ਤਿ, ਪਲਾਲਮੇવ ਹੋਨ੍ਤਿ। ਅਨੁਗ੍ਗਹਿਤੋਤਿ ਆਮਿਸਾਨੁਗ੍ਗਹੇਨ ਚੇવ ਧਮ੍ਮਾਨੁਗ੍ਗਹੇਨ ਚ ਅਨੁਗ੍ਗਹਿਤੋ। ਅਨੁਗ੍ਗਣ੍ਹੇਯ੍ਯਨ੍ਤਿ ਦ੍વੀਹਿਪਿ ਏਤੇਹਿ ਅਨੁਗ੍ਗਹੇਹਿ ਅਨੁਗ੍ਗਣ੍ਹੇਯ੍ਯਂ। ਅਚਿਰਪਬ੍ਬਜਿਤਾ ਹਿ ਸਾਮਣੇਰਾ ਚੇવ ਦਹਰਭਿਕ੍ਖੂ ਚ ਚੀવਰਾਦਿਪਚ੍ਚਯવੇਕਲ੍ਲੇ વਾ ਸਤਿ ਗੇਲਞ੍ਞੇ વਾ ਸਤ੍ਥਾਰਾ વਾ ਆਚਰਿਯੁਪਜ੍ਝਾਯੇਹਿ વਾ ਆਮਿਸਾਨੁਗ੍ਗਹੇਨ ਅਨਨੁਗ੍ਗਹਿਤਾ ਕਿਲਮਨ੍ਤਾ ਨ ਸਕ੍ਕੋਨ੍ਤਿ ਸਜ੍ਝਾਯਂ વਾ ਮਨਸਿਕਾਰਂ વਾ ਕਾਤੁਂ, ਧਮ੍ਮਾਨੁਗ੍ਗਹੇਨ ਅਨਨੁਗ੍ਗਹਿਤਾ ਉਦ੍ਦੇਸੇਨ ਚੇવ ਓવਾਦਾਨੁਸਾਸਨਿਯਾ ਚ ਪਰਿਹਾਯਮਾਨਾ ਨ ਸਕ੍ਕੋਨ੍ਤਿ ਅਕੁਸਲਂ ਪਰਿવਜ੍ਜੇਤ੍વਾ ਕੁਸਲਂ ਭਾવੇਤੁਂ। ਇਮੇਹਿ ਪਨ ਦ੍વੀਹਿ ਅਨੁਗ੍ਗਹੇਹਿ ਅਨੁਗ੍ਗਹਿਤਾ ਕਾਯੇਨ ਅਕਿਲਮਨ੍ਤਾ ਸਜ੍ਝਾਯਮਨਸਿਕਾਰੇ ਪવਤ੍ਤਿਤ੍વਾ ਯਥਾਨੁਸਿਟ੍ਠਂ ਪਟਿਪਜ੍ਜਮਾਨਾ ਅਪਰਭਾਗੇ ਤਂ ਅਨੁਗ੍ਗਹਂ ਅਲਭਨ੍ਤਾਪਿ ਤੇਨੇવ ਪੁਰਿਮਾਨੁਗ੍ਗਹੇਨ ਲਦ੍ਧਬਲਾ ਸਾਸਨੇ ਪਤਿਟ੍ਠਹਨ੍ਤਿ, ਤਸ੍ਮਾ ਭਗવਤੋ ਏવਂ ਪਰਿવਿਤਕ੍ਕੋ ਉਦਪਾਦਿ।
Bījānaṃ taruṇānanti udakena anuggahetabbānaṃ virūḷhabījānaṃ. Aññathattanti milāyanaññathattameva. Tāni hi udakaṃ alabhantāni milāyanti. Vipariṇāmoti vināso. Tāni hi udakaṃ alabhantāni sukkhitvā vinassanti, palālameva honti. Anuggahitoti āmisānuggahena ceva dhammānuggahena ca anuggahito. Anuggaṇheyyanti dvīhipi etehi anuggahehi anuggaṇheyyaṃ. Acirapabbajitā hi sāmaṇerā ceva daharabhikkhū ca cīvarādipaccayavekalle vā sati gelaññe vā satthārā vā ācariyupajjhāyehi vā āmisānuggahena ananuggahitā kilamantā na sakkonti sajjhāyaṃ vā manasikāraṃ vā kātuṃ, dhammānuggahena ananuggahitā uddesena ceva ovādānusāsaniyā ca parihāyamānā na sakkonti akusalaṃ parivajjetvā kusalaṃ bhāvetuṃ. Imehi pana dvīhi anuggahehi anuggahitā kāyena akilamantā sajjhāyamanasikāre pavattitvā yathānusiṭṭhaṃ paṭipajjamānā aparabhāge taṃ anuggahaṃ alabhantāpi teneva purimānuggahena laddhabalā sāsane patiṭṭhahanti, tasmā bhagavato evaṃ parivitakko udapādi.
ਭਗવਤੋ ਪੁਰਤੋ ਪਾਤੁਰਹੋਸੀਤਿ ਸਤ੍ਥੁ ਚਿਤ੍ਤਂ ਞਤ੍વਾ – ‘‘ਇਮੇ ਭਿਕ੍ਖੂ ਭਗવਤਾ ਪਣਾਮਿਤਾ, ਇਦਾਨਿ ਨੇਸਂ ਅਨੁਗ੍ਗਹਂ ਕਾਤੁਕਾਮੋ ਏવਂ ਚਿਨ੍ਤੇਸਿ, ਕਾਰਣਂ ਭਗવਾ ਚਿਨ੍ਤੇਸਿ, ਅਹਮੇਤ੍ਥ ਉਸ੍ਸਾਹਂ ਜਨੇਸ੍ਸਾਮੀ’’ਤਿ ਪੁਰਤੋ ਪਾਕਟੋ ਅਹੋਸਿ। ਸਨ੍ਤੇਤ੍ਥ ਭਿਕ੍ਖੂਤਿ ਇਦਂ ਸੋ ਮਹਾਬ੍ਰਹ੍ਮਾ ਯਥਾ ਨਾਮ ਬ੍ਯਤ੍ਤੋ ਸੂਦੋ ਯਦੇવ ਅਮ੍ਬਿਲਗ੍ਗਾਦੀਸੁ ਰਸਜਾਤਂ ਰਞ੍ਞੋ ਰੁਚ੍ਚਤਿ, ਤਂ ਅਭਿਸਙ੍ਖਾਰੇਨ ਸਾਦੁਤਰਂ ਕਤ੍વਾ ਪੁਨਦਿવਸੇ ਉਪਨਾਮੇਤਿ, ਏવਮੇવ ਅਤ੍ਤਨੋ ਬ੍ਯਤ੍ਤਤਾਯ ਭਗવਤਾ ਆਹਟਉਪਮਂਯੇવ ਏવਮੇਤਂ ਭਗવਾਤਿਆਦਿવਚਨੇਹਿ ਅਭਿਸਙ੍ਖਰਿਤ੍વਾ ਭਗવਨ੍ਤਂ ਯਾਚਨ੍ਤੋ ਭਿਕ੍ਖੁਸਙ੍ਘਸ੍ਸ ਅਨੁਗ੍ਗਹਕਰਣਤ੍ਥਂ વਦਤਿ । ਤਤ੍ਥ ਅਭਿਨਨ੍ਦਤੂਤਿ ‘‘ਮਮ ਸਨ੍ਤਿਕਂ ਭਿਕ੍ਖੁਸਙ੍ਘੋ ਆਗਚ੍ਛਤੂ’’ਤਿ। ਏવਮਸ੍ਸ ਆਗਮਨਂ ਸਮ੍ਪਿਯਾਯਮਾਨੋ ਅਭਿਨਨ੍ਦਤੁ। ਅਭਿવਦਤੂਤਿ ਆਗਤਸ੍ਸ ਚ ਓવਾਦਾਨੁਸਾਸਨਿਂ ਦਦਨ੍ਤੋ ਅਭਿવਦਤੁ।
Bhagavato purato pāturahosīti satthu cittaṃ ñatvā – ‘‘ime bhikkhū bhagavatā paṇāmitā, idāni nesaṃ anuggahaṃ kātukāmo evaṃ cintesi, kāraṇaṃ bhagavā cintesi, ahamettha ussāhaṃ janessāmī’’ti purato pākaṭo ahosi. Santettha bhikkhūti idaṃ so mahābrahmā yathā nāma byatto sūdo yadeva ambilaggādīsu rasajātaṃ rañño ruccati, taṃ abhisaṅkhārena sādutaraṃ katvā punadivase upanāmeti, evameva attano byattatāya bhagavatā āhaṭaupamaṃyeva evametaṃ bhagavātiādivacanehi abhisaṅkharitvā bhagavantaṃ yācanto bhikkhusaṅghassa anuggahakaraṇatthaṃ vadati . Tattha abhinandatūti ‘‘mama santikaṃ bhikkhusaṅgho āgacchatū’’ti. Evamassa āgamanaṃ sampiyāyamāno abhinandatu. Abhivadatūti āgatassa ca ovādānusāsaniṃ dadanto abhivadatu.
ਪਟਿਸਲ੍ਲਾਨਾਤਿ ਏਕੀਭਾવਾ। ਇਦ੍ਧਾਭਿਸਙ੍ਖਾਰਂ ਅਭਿਸਙ੍ਖਾਸੀਤਿ ਇਦ੍ਧਿਂ ਅਕਾਸਿ। ਏਕਦ੍વੀਹਿਕਾਯਾਤਿ ਏਕੇਕੋ ਚੇવ ਦ੍વੇ ਦ੍વੇ ਚ ਹੁਤ੍વਾ। ਸਾਰਜ੍ਜਮਾਨਰੂਪਾਤਿ ਓਤ੍ਤਪ੍ਪਮਾਨਸਭਾવਾ ਭਾਯਮਾਨਾ। ਕਸ੍ਮਾ ਪਨ ਭਗવਾ ਤੇਸਂ ਤਥਾ ਉਪਸਙ੍ਕਮਨਾਯ ਇਦ੍ਧਿਮਕਾਸੀਤਿ? ਹਿਤਪਤ੍ਥਨਾਯ। ਯਦਿ ਹਿ ਤੇ વਗ੍ਗવਗ੍ਗਾ ਹੁਤ੍વਾ ਆਗਚ੍ਛੇਯ੍ਯੁਂ, ‘‘ਭਗવਾ ਭਿਕ੍ਖੁਸਙ੍ਘਂ ਪਣਾਮੇਤ੍વਾ ਅਰਞ੍ਞਂ ਪવਿਟ੍ਠੋ ਏਕਦਿવਸਮ੍ਪਿ ਤਤ੍ਥ વਸਿਤੁਂ ਨਾਸਕ੍ਖਿ, વੇਗੇਨੇવ ਆਗਤੋ’’ਤਿ ਕੇਲ਼ਿਮ੍ਪਿ ਕਰੇਯ੍ਯੁਂ। ਅਥ ਨੇਸਂ ਨੇવ ਬੁਦ੍ਧਗਾਰવਂ ਪਚ੍ਚੁਪਟ੍ਠਹੇਯ੍ਯ, ਨ ਧਮ੍ਮਦੇਸਨਂ ਸਮ੍ਪਟਿਚ੍ਛਿਤੁਂ ਸਮਤ੍ਥਾ ਭવੇਯ੍ਯੁਂ। ਸਭਯਾਨਂ ਪਨ ਸਸਾਰਜ੍ਜਾਨਂ ਏਕਦ੍વੀਹਿਕਾਯ ਆਗਚ੍ਛਨ੍ਤਾਨਂ ਬੁਦ੍ਧਗਾਰવਞ੍ਚੇવ ਪਚ੍ਚੁਪਟ੍ਠਿਤਂ ਭવਿਸ੍ਸਤਿ, ਧਮ੍ਮਦੇਸਨਞ੍ਚ ਸਮ੍ਪਟਿਚ੍ਛਿਤੁਂ ਸਕ੍ਖਿਸ੍ਸਨ੍ਤੀਤਿ ਚਿਨ੍ਤੇਤ੍વਾ ਤੇਸਂ ਹਿਤਪਤ੍ਥਨਾਯ ਤਥਾਰੂਪਂ ਇਦ੍ਧਿਂ ਅਕਾਸਿ।
Paṭisallānāti ekībhāvā. Iddhābhisaṅkhāraṃ abhisaṅkhāsīti iddhiṃ akāsi. Ekadvīhikāyāti ekeko ceva dve dve ca hutvā. Sārajjamānarūpāti ottappamānasabhāvā bhāyamānā. Kasmā pana bhagavā tesaṃ tathā upasaṅkamanāya iddhimakāsīti? Hitapatthanāya. Yadi hi te vaggavaggā hutvā āgaccheyyuṃ, ‘‘bhagavā bhikkhusaṅghaṃ paṇāmetvā araññaṃ paviṭṭho ekadivasampi tattha vasituṃ nāsakkhi, vegeneva āgato’’ti keḷimpi kareyyuṃ. Atha nesaṃ neva buddhagāravaṃ paccupaṭṭhaheyya, na dhammadesanaṃ sampaṭicchituṃ samatthā bhaveyyuṃ. Sabhayānaṃ pana sasārajjānaṃ ekadvīhikāya āgacchantānaṃ buddhagāravañceva paccupaṭṭhitaṃ bhavissati, dhammadesanañca sampaṭicchituṃ sakkhissantīti cintetvā tesaṃ hitapatthanāya tathārūpaṃ iddhiṃ akāsi.
ਨਿਸੀਦਿਂਸੂਤਿ ਤੇਸੁ ਹਿ ਸਾਰਜ੍ਜਮਾਨਰੂਪੇਸੁ ਆਗਚ੍ਛਨ੍ਤੇਸੁ ਏਕੋ ਭਿਕ੍ਖੁ ‘‘ਮਮਂਯੇવ ਸਤ੍ਥਾ ਓਲੋਕੇਤਿ, ਮਂਯੇવ ਮਞ੍ਞੇ ਨਿਗ੍ਗਣ੍ਹਿਤੁਕਾਮੋ’’ਤਿ ਸਣਿਕਂ ਆਗਨ੍ਤ੍વਾ વਨ੍ਦਿਤ੍વਾ ਨਿਸੀਦਿ, ਅਥਞ੍ਞੋ ਅਥਞ੍ਞੋਤਿ ਏવਂ ਪਞ੍ਚਭਿਕ੍ਖੁਸਤਾਨਿ ਨਿਸੀਦਿਂਸੁ। ਏવਂ ਨਿਸਿਨ੍ਨਂ ਪਨ ਭਿਕ੍ਖੁਸਙ੍ਘਂ ਸੀਦਨ੍ਤਰੇ ਸਨ੍ਨਿਸਿਨ੍ਨਂ ਮਹਾਸਮੁਦ੍ਦਂ વਿਯ ਨਿવਾਤੇ ਪਦੀਪਂ વਿਯ ਚ ਨਿਚ੍ਚਲਂ ਦਿਸ੍વਾ ਸਤ੍ਥਾ ਚਿਨ੍ਤੇਸਿ – ‘‘ਇਮੇਸਂ ਭਿਕ੍ਖੂਨਂ ਕੀਦਿਸੀ ਧਮ੍ਮਦੇਸਨਾ વਟ੍ਟਤੀ’’ਤਿ? ਅਥਸ੍ਸ ਏਤਦਹੋਸਿ – ‘‘ਇਮੇ ਆਹਾਰਹੇਤੁ ਪਣਾਮਿਤਾ, ਪਿਣ੍ਡਿਯਾਲੋਪਧਮ੍ਮਦੇਸਨਾવ ਨੇਸਂ ਸਪ੍ਪਾਯਾ, ਤਂ ਦਸ੍ਸੇਤ੍વਾ ਮਤ੍ਥਕੇ ਤਿਪਰਿવਟ੍ਟਦੇਸਨਂ ਦੇਸੇਸ੍ਸਾਮਿ, ਦੇਸਨਾਪਰਿਯੋਸਾਨੇ ਸਬ੍ਬੇ ਅਰਹਤ੍ਤਂ ਪਾਪੁਣਿਸ੍ਸਨ੍ਤੀ’’ਤਿ। ਅਥ ਨੇਸਂ ਤਂ ਧਮ੍ਮਦੇਸਨਂ ਦੇਸੇਨ੍ਤੋ ਅਨ੍ਤਮਿਦਂ, ਭਿਕ੍ਖવੇਤਿਆਦਿਮਾਹ।
Nisīdiṃsūti tesu hi sārajjamānarūpesu āgacchantesu eko bhikkhu ‘‘mamaṃyeva satthā oloketi, maṃyeva maññe niggaṇhitukāmo’’ti saṇikaṃ āgantvā vanditvā nisīdi, athañño athaññoti evaṃ pañcabhikkhusatāni nisīdiṃsu. Evaṃ nisinnaṃ pana bhikkhusaṅghaṃ sīdantare sannisinnaṃ mahāsamuddaṃ viya nivāte padīpaṃ viya ca niccalaṃ disvā satthā cintesi – ‘‘imesaṃ bhikkhūnaṃ kīdisī dhammadesanā vaṭṭatī’’ti? Athassa etadahosi – ‘‘ime āhārahetu paṇāmitā, piṇḍiyālopadhammadesanāva nesaṃ sappāyā, taṃ dassetvā matthake tiparivaṭṭadesanaṃ desessāmi, desanāpariyosāne sabbe arahattaṃ pāpuṇissantī’’ti. Atha nesaṃ taṃ dhammadesanaṃ desento antamidaṃ, bhikkhavetiādimāha.
ਤਤ੍ਥ ਅਨ੍ਤਨ੍ਤਿ ਪਚ੍ਛਿਮਂ ਲਾਮਕਂ। ਯਦਿਦਂ ਪਿਣ੍ਡੋਲ੍ਯਨ੍ਤਿ ਯਂ ਏવਂ ਪਿਣ੍ਡਪਰਿਯੇਸਨੇਨ ਜੀવਿਕਂ ਕਪ੍ਪੇਨ੍ਤਸ੍ਸ ਜੀવਿਤਂ। ਅਯਂ ਪਨੇਤ੍ਥ ਪਦਤ੍ਥੋ – ਪਿਣ੍ਡਾਯ ਉਲਤੀਤਿ ਪਿਣ੍ਡੋਲੋ, ਪਿਣ੍ਡੋਲਸ੍ਸ ਕਮ੍ਮਂ ਪਿਣ੍ਡੋਲ੍ਯਂ, ਪਿਣ੍ਡਪਰਿਯੇਸਨੇਨ ਨਿਪ੍ਫਾਦਿਤਜੀવਿਤਨ੍ਤਿ ਅਤ੍ਥੋ। ਅਭਿਸਾਪੋਤਿ ਅਕ੍ਕੋਸੋ। ਕੁਪਿਤਾ ਹਿ ਮਨੁਸ੍ਸਾ ਅਤ੍ਤਨੋ ਪਚ੍ਚਤ੍ਥਿਕਂ ‘‘ਚੀવਰਂ ਨਿવਾਸੇਤ੍વਾ ਕਪਾਲਂ ਗਹੇਤ੍વਾ ਪਿਣ੍ਡਂ ਪਰਿਯੇਸਮਾਨੋ ਚਰਿਸ੍ਸਤੀ’’ਤਿ ਅਕ੍ਕੋਸਨ੍ਤਿ। ਅਥ વਾ ਪਨ ‘‘ਕਿਂ ਤੁਯ੍ਹਂ ਅਕਾਤਬ੍ਬਂ ਅਤ੍ਥਿ, ਯੋ ਤ੍વਂ ਏવਂ ਬਲવਾ વੀਰਿਯਸਮ੍ਪਨ੍ਨੋਪਿ ਹਿਰੋਤ੍ਤਪ੍ਪਂ ਪਹਾਯ ਕਪਣੋ વਿਯ ਪਿਣ੍ਡੋਲੋ વਿਚਰਸਿ ਪਤ੍ਤਪਾਣੀ’’ਤਿ? ਏવਮ੍ਪਿ ਅਕ੍ਕੋਸਨ੍ਤਿਯੇવ। ਤਞ੍ਚ ਖੋ ਏਤਨ੍ਤਿ ਏવਂ ਤਂ ਅਭਿਸਾਪਂ ਸਮਾਨਮ੍ਪਿ ਪਿਣ੍ਡੋਲ੍ਯਂ। ਕੁਲਪੁਤ੍ਤਾ ਉਪੇਨ੍ਤਿ ਅਤ੍ਥવਸਿਕਾਤਿ ਮਮ ਸਾਸਨੇ ਜਾਤਿਕੁਲਪੁਤ੍ਤਾ ਚ ਆਚਾਰਕੁਲਪੁਤ੍ਤਾ ਚ ਅਤ੍ਥવਸਿਕਾ ਕਾਰਣવਸਿਕਾ ਹੁਤ੍વਾ ਕਾਰਣવਸਂ ਪਟਿਚ੍ਚ ਉਪੇਨ੍ਤਿ।
Tattha antanti pacchimaṃ lāmakaṃ. Yadidaṃ piṇḍolyanti yaṃ evaṃ piṇḍapariyesanena jīvikaṃ kappentassa jīvitaṃ. Ayaṃ panettha padattho – piṇḍāya ulatīti piṇḍolo, piṇḍolassa kammaṃ piṇḍolyaṃ, piṇḍapariyesanena nipphāditajīvitanti attho. Abhisāpoti akkoso. Kupitā hi manussā attano paccatthikaṃ ‘‘cīvaraṃ nivāsetvā kapālaṃ gahetvā piṇḍaṃ pariyesamāno carissatī’’ti akkosanti. Atha vā pana ‘‘kiṃ tuyhaṃ akātabbaṃ atthi, yo tvaṃ evaṃ balavā vīriyasampannopi hirottappaṃ pahāya kapaṇo viya piṇḍolo vicarasi pattapāṇī’’ti? Evampi akkosantiyeva. Tañca kho etanti evaṃ taṃ abhisāpaṃ samānampi piṇḍolyaṃ. Kulaputtā upenti atthavasikāti mama sāsane jātikulaputtā ca ācārakulaputtā ca atthavasikā kāraṇavasikā hutvā kāraṇavasaṃ paṭicca upenti.
ਰਾਜਾਭਿਨੀਤਾਤਿਆਦੀਸੁ ਯੇ ਰਞ੍ਞੋ ਸਨ੍ਤਕਂ ਖਾਦਿਤ੍વਾ ਰਞ੍ਞਾ ਬਨ੍ਧਨਾਗਾਰੇ ਬਨ੍ਧਾਪਿਤਾ ਪਲਾਯਿਤ੍વਾ ਪਬ੍ਬਜਨ੍ਤਿ, ਤੇ ਰਾਜਾਭਿਨੀਤਾ ਨਾਮ। ਤੇ ਹਿ ਰਞ੍ਞਾ ਬਨ੍ਧਨਂ ਅਭਿਨੀਤਤ੍ਤਾ ਰਾਜਾਭਿਨੀਤਾ ਨਾਮ। ਯੇ ਪਨ ਚੋਰੇਹਿ ਅਟવਿਯਂ ਗਹੇਤ੍વਾ ਏਕਚ੍ਚੇਸੁ ਮਾਰਿਯਮਾਨੇਸੁ ਏਕਚ੍ਚੇ ‘‘ਮਯਂ ਸਾਮਿ ਤੁਮ੍ਹੇਹਿ વਿਸ੍ਸਟ੍ਠਾ ਗੇਹਂ ਅਨਜ੍ਝਾવਸਿਤ੍વਾ ਪਬ੍ਬਜਿਸ੍ਸਾਮ, ਤਤ੍ਥ ਯਂ ਯਂ ਬੁਦ੍ਧਪੂਜਾਦਿਪੁਞ੍ਞਂ ਕਰਿਸ੍ਸਾਮ, ਤਤੋ ਤੁਮ੍ਹਾਕਂ ਪਤ੍ਤਿਂ ਦਸ੍ਸਾਮਾ’’ਤਿ ਤੇਹਿ વਿਸ੍ਸਟ੍ਠਾ ਪਬ੍ਬਜਨ੍ਤਿ, ਤੇ ਚੋਰਾਭਿਨੀਤਾ ਨਾਮ। ਤੇਪਿ ਹਿ ਚੋਰੇਹਿ ਮਾਰੇਤਬ੍ਬਤਂ ਅਭਿਨੀਤਾਤਿ ਚੋਰਾਭਿਨੀਤਾ ਨਾਮ। ਯੇ ਪਨ ਇਣਂ ਗਹੇਤ੍વਾ ਪਟਿਦਾਤੁਂ ਅਸਕ੍ਕੋਨ੍ਤਾ ਪਲਾਯਿਤ੍વਾ ਪਬ੍ਬਜਨ੍ਤਿ, ਤੇ ਇਣਟ੍ਟਾ ਨਾਮ, ਇਣਪੀਲ਼ਿਤਾਤਿ ਅਤ੍ਥੋ । ਇਣਟ੍ਠਾਤਿਪਿ ਪਾਠੋ, ਇਣੇ ਠਿਤਾਤਿ ਅਤ੍ਥੋ। ਯੇ ਰਾਜਚੋਰਛਾਤਕਰੋਗਭਯਾਨਂ ਅਞ੍ਞਤਰੇਨ ਅਭਿਭੂਤਾ ਉਪਦ੍ਦੁਤਾ ਪਬ੍ਬਜਨ੍ਤਿ, ਤੇ ਭਯਟ੍ਟਾ ਨਾਮ, ਭਯਪੀਲ਼ਿਤਾਤਿ ਅਤ੍ਥੋ। ਭਯਟ੍ਠਾਤਿਪਿ ਪਾਠੋ, ਭਯੇ ਠਿਤਾਤਿ ਅਤ੍ਥੋ। ਆਜੀવਿਕਾਪਕਤਾਤਿ ਆਜੀવਿਕਾਯ ਉਪਦ੍ਦੁਤਾ ਅਭਿਭੂਤਾ, ਪੁਤ੍ਤਦਾਰਂ ਪੋਸੇਤੁਂ ਅਸਕ੍ਕੋਨ੍ਤਾਤਿ ਅਤ੍ਥੋ। ਓਤਿਣ੍ਣਾਮ੍ਹਾਤਿ ਅਨ੍ਤੋ ਅਨੁਪવਿਟ੍ਠਾ।
Rājābhinītātiādīsu ye rañño santakaṃ khāditvā raññā bandhanāgāre bandhāpitā palāyitvā pabbajanti, te rājābhinītā nāma. Te hi raññā bandhanaṃ abhinītattā rājābhinītā nāma. Ye pana corehi aṭaviyaṃ gahetvā ekaccesu māriyamānesu ekacce ‘‘mayaṃ sāmi tumhehi vissaṭṭhā gehaṃ anajjhāvasitvā pabbajissāma, tattha yaṃ yaṃ buddhapūjādipuññaṃ karissāma, tato tumhākaṃ pattiṃ dassāmā’’ti tehi vissaṭṭhā pabbajanti, te corābhinītā nāma. Tepi hi corehi māretabbataṃ abhinītāti corābhinītā nāma. Ye pana iṇaṃ gahetvā paṭidātuṃ asakkontā palāyitvā pabbajanti, te iṇaṭṭā nāma, iṇapīḷitāti attho . Iṇaṭṭhātipi pāṭho, iṇe ṭhitāti attho. Ye rājacorachātakarogabhayānaṃ aññatarena abhibhūtā upaddutā pabbajanti, te bhayaṭṭā nāma, bhayapīḷitāti attho. Bhayaṭṭhātipi pāṭho, bhaye ṭhitāti attho. Ājīvikāpakatāti ājīvikāya upaddutā abhibhūtā, puttadāraṃ posetuṃ asakkontāti attho. Otiṇṇāmhāti anto anupaviṭṭhā.
ਸੋ ਚ ਹੋਤਿ ਅਭਿਜ੍ਝਾਲੂਤਿ ਇਦਂ ਸੋ ਕੁਲਪੁਤ੍ਤੋ ‘‘ਦੁਕ੍ਖਸ੍ਸ ਅਨ੍ਤਂ ਕਰਿਸ੍ਸਾਮੀ’’ਤਿਆਦਿવਸੇਨ ਚਿਤ੍ਤਂ ਉਪ੍ਪਾਦੇਤ੍વਾ ਪਬ੍ਬਜਿਤੋ, ਅਪਰਭਾਗੇ, ਤਂ ਪਬ੍ਬਜ੍ਜਂ ਤਥਾਰੂਪਂ ਕਾਤੁਂ ਨ ਸਕ੍ਕੋਤਿ, ਤਂ ਦਸ੍ਸੇਤੁਂ વੁਤ੍ਤਂ। ਤਤ੍ਥ ਅਭਿਜ੍ਝਾਲੂਤਿ ਪਰਭਣ੍ਡਾਨਂ ਅਭਿਜ੍ਝਾਯਿਤਾ। ਤਿਬ੍ਬਸਾਰਾਗੋਤਿ ਬਹਲਰਾਗੋ। ਬ੍ਯਾਪਨ੍ਨਚਿਤ੍ਤੋਤਿ ਪੂਤਿਭਾવੇਨ વਿਪਨ੍ਨਚਿਤ੍ਤੋ। ਪਦੁਟ੍ਠਮਨਸਙ੍ਕਪ੍ਪੋਤਿ ਤਿਖਿਣਸਿਙ੍ਗੋ વਿਯ ਗੋਣੋ ਦੁਟ੍ਠਚਿਤ੍ਤੋ। ਮੁਟ੍ਠਸ੍ਸਤੀਤਿ ਭਤ੍ਤਨਿਕ੍ਖਿਤ੍ਤਕਾਕੋ વਿਯ ਨਟ੍ਠਸ੍ਸਤਿ, ਇਧ ਕਤਂ ਏਤ੍ਥ ਨਸ੍ਸਤਿ। ਅਸਮ੍ਪਜਾਨੋਤਿ ਨਿਪ੍ਪਞ੍ਞੋ। ਖਨ੍ਧਾਦਿਪਰਿਚ੍ਛੇਦਰਹਿਤੋ। ਅਸਮਾਹਿਤੋਤਿ ਚਣ੍ਡਸੋਤੇ ਬਦ੍ਧਨਾવਾ વਿਯ ਉਪਚਾਰਪ੍ਪਨਾਭਾવੇਨ ਅਸਣ੍ਠਿਤੋ। વਿਬ੍ਭਨ੍ਤਚਿਤ੍ਤੋਤਿ ਬਨ੍ਧਾਰੁਲ਼੍ਹਮਗੋ વਿਯ ਸਨ੍ਤਮਨੋ। ਪਾਕਤਿਨ੍ਦ੍ਰਿਯੋਤਿ ਯਥਾ ਗਿਹੀ ਪੁਤ੍ਤਧੀਤਰੋ ਓਲੋਕੇਨ੍ਤੋ ਅਸਂવੁਤਿਨ੍ਦ੍ਰਿਯੋ ਹੋਤਿ, ਏવਂ ਅਸਂવੁਤਿਨ੍ਦ੍ਰਿਯੋ।
So ca hoti abhijjhālūti idaṃ so kulaputto ‘‘dukkhassa antaṃ karissāmī’’tiādivasena cittaṃ uppādetvā pabbajito, aparabhāge, taṃ pabbajjaṃ tathārūpaṃ kātuṃ na sakkoti, taṃ dassetuṃ vuttaṃ. Tattha abhijjhālūti parabhaṇḍānaṃ abhijjhāyitā. Tibbasārāgoti bahalarāgo. Byāpannacittoti pūtibhāvena vipannacitto. Paduṭṭhamanasaṅkappoti tikhiṇasiṅgo viya goṇo duṭṭhacitto. Muṭṭhassatīti bhattanikkhittakāko viya naṭṭhassati, idha kataṃ ettha nassati. Asampajānoti nippañño. Khandhādiparicchedarahito. Asamāhitoti caṇḍasote baddhanāvā viya upacārappanābhāvena asaṇṭhito. Vibbhantacittoti bandhāruḷhamago viya santamano. Pākatindriyoti yathā gihī puttadhītaro olokento asaṃvutindriyo hoti, evaṃ asaṃvutindriyo.
ਛવਾਲਾਤਨ੍ਤਿ ਛવਾਨਂ ਦਡ੍ਢਟ੍ਠਾਨੇ ਅਲਾਤਂ। ਉਭਤੋਪਦਿਤ੍ਤਂ ਮਜ੍ਝੇ ਗੂਥਗਤਨ੍ਤਿ ਪਮਾਣੇਨ ਅਟ੍ਠਙ੍ਗੁਲਮਤ੍ਤਂ ਦ੍વੀਸੁ ਠਾਨੇਸੁ ਆਦਿਤ੍ਤਂ ਮਜ੍ਝੇ ਗੂਥਮਕ੍ਖਿਤਂ। ਨੇવ ਗਾਮੇਤਿ ਸਚੇ ਹਿ ਤਂ ਯੁਗਨਙ੍ਗਲਗੋਪਾਨਸਿਪਕ੍ਖਪਾਸਕਾਦੀਨਂ ਅਤ੍ਥਾਯ ਉਪਨੇਤੁਂ ਸਕ੍ਕਾ ਅਸ੍ਸ, ਗਾਮੇ ਕਟ੍ਠਤ੍ਥਂ ਫਰੇਯ੍ਯ। ਸਚੇ ਖੇਤ੍ਤਕੁਟਿਯਂ ਕਟ੍ਠਤ੍ਥਰਮਞ੍ਚਕਾਦੀਨਂ ਅਤ੍ਥਾਯ ਉਪਨੇਤੁਂ ਸਕ੍ਕਾ, ਅਰਞ੍ਞੇ ਕਟ੍ਠਤ੍ਥਂ ਫਰੇਯ੍ਯ। ਯਸ੍ਮਾ ਪਨ ਉਭਯਥਾਪਿ ਨ ਸਕ੍ਕਾ, ਤਸ੍ਮਾ ਏવਂ વੁਤ੍ਤਂ। ਗਿਹਿਭੋਗਾ ਚ ਪਰਿਹੀਨੋਤਿ ਯੋ ਅਗਾਰੇ વਸਨ੍ਤੇਹਿ ਗਿਹੀਹਿ ਦਾਯਜ੍ਜੇ ਭਾਜਿਯਮਾਨੇ ਭੋਗੋ ਲਦ੍ਧਬ੍ਬੋ ਅਸ੍ਸ, ਤਤੋ ਚ ਪਰਿਹੀਨੋ। ਸਾਮਞ੍ਞਤ੍ਥਞ੍ਚਾਤਿ ਆਚਰਿਯੁਪਜ੍ਝਾਯਾਨਂ ਓવਾਦੇ ਠਤ੍વਾ ਪਰਿਯਤ੍ਤਿਪਟਿવੇਧવਸੇਨ ਪਤ੍ਤਬ੍ਬਂ ਸਾਮਞ੍ਞਤ੍ਥਞ੍ਚ। ਇਮਞ੍ਚ ਪਨ ਉਪਮਂ ਸਤ੍ਥਾ ਨ ਦੁਸ੍ਸੀਲਸ੍ਸ વਸੇਨ ਆਹਰਿ, ਪਰਿਸੁਦ੍ਧਸੀਲਸ੍ਸ ਪਨ ਅਲਸਸ੍ਸ ਅਭਿਜ੍ਝਾਦੀਹਿ ਦੋਸੇਹਿ ਉਪਹਤਸ੍ਸ ਪੁਗ੍ਗਲਸ੍ਸ ਇਮਂ ਉਪਮਂ ਆਹਰਿ।
Chavālātanti chavānaṃ daḍḍhaṭṭhāne alātaṃ. Ubhatopadittaṃ majjhe gūthagatanti pamāṇena aṭṭhaṅgulamattaṃ dvīsu ṭhānesu ādittaṃ majjhe gūthamakkhitaṃ. Neva gāmeti sace hi taṃ yuganaṅgalagopānasipakkhapāsakādīnaṃ atthāya upanetuṃ sakkā assa, gāme kaṭṭhatthaṃ phareyya. Sace khettakuṭiyaṃ kaṭṭhattharamañcakādīnaṃ atthāya upanetuṃ sakkā, araññe kaṭṭhatthaṃ phareyya. Yasmā pana ubhayathāpi na sakkā, tasmā evaṃ vuttaṃ. Gihibhogā ca parihīnoti yo agāre vasantehi gihīhi dāyajje bhājiyamāne bhogo laddhabbo assa, tato ca parihīno. Sāmaññatthañcāti ācariyupajjhāyānaṃ ovāde ṭhatvā pariyattipaṭivedhavasena pattabbaṃ sāmaññatthañca. Imañca pana upamaṃ satthā na dussīlassa vasena āhari, parisuddhasīlassa pana alasassa abhijjhādīhi dosehi upahatassa puggalassa imaṃ upamaṃ āhari.
ਤਯੋਮੇ, ਭਿਕ੍ਖવੇਤਿ ਕਸ੍ਮਾ ਆਰਦ੍ਧਂ? ਇਮਸ੍ਸ ਪੁਗ੍ਗਲਸ੍ਸ ਛવਾਲਾਤਸਦਿਸਭਾવੋ ਨੇવ ਮਾਤਾਪਿਤੂਹਿ ਕਤੋ, ਨ ਆਚਰਿਯੁਪਜ੍ਝਾਯੇਹਿ, ਇਮੇਹਿ ਪਨ ਪਾਪવਿਤਕ੍ਕੇਹਿ ਕਤੋਤਿ ਦਸ੍ਸਨਤ੍ਥਂ ਆਰਦ੍ਧਂ। ਅਨਿਮਿਤ੍ਤਂ વਾ ਸਮਾਧਿਨ੍ਤਿ વਿਪਸ੍ਸਨਾਸਮਾਧਿਂ। ਸੋ ਹਿ ਨਿਚ੍ਚਨਿਮਿਤ੍ਤਾਦੀਨਂ ਸਮੁਗ੍ਘਾਤਨੇਨ ਅਨਿਮਿਤ੍ਤੋਤਿ વੁਚ੍ਚਤਿ। ਏਤ੍ਥ ਚ ਚਤ੍ਤਾਰੋ ਸਤਿਪਟ੍ਠਾਨਾ ਮਿਸ੍ਸਕਾ, ਅਨਿਮਿਤ੍ਤਸਮਾਧਿ ਪੁਬ੍ਬਭਾਗੋ। ਅਨਿਮਿਤ੍ਤਸਮਾਧਿ વਾ ਮਿਸ੍ਸਕੋ, ਸਤਿਪਟ੍ਠਾਨਾ ਪੁਬ੍ਬਭਾਗਾਤਿ વੇਦਿਤਬ੍ਬਾ।
Tayome, bhikkhaveti kasmā āraddhaṃ? Imassa puggalassa chavālātasadisabhāvo neva mātāpitūhi kato, na ācariyupajjhāyehi, imehi pana pāpavitakkehi katoti dassanatthaṃ āraddhaṃ. Animittaṃ vā samādhinti vipassanāsamādhiṃ. So hi niccanimittādīnaṃ samugghātanena animittoti vuccati. Ettha ca cattāro satipaṭṭhānā missakā, animittasamādhi pubbabhāgo. Animittasamādhi vā missako, satipaṭṭhānā pubbabhāgāti veditabbā.
ਦ੍વੇਮਾ, ਭਿਕ੍ਖવੇ, ਦਿਟ੍ਠਿਯੋਤਿ ਇਦਂ ਪਨ ਨ ਕੇવਲਂ ਅਨਿਮਿਤ੍ਤਸਮਾਧਿਭਾવਨਾ ਇਮੇਸਂਯੇવ ਤਿਣ੍ਣਂ ਮਹਾવਿਤਕ੍ਕਾਨਂ ਪਹਾਨਾਯ ਸਂવਤ੍ਤਤਿ, ਸਸ੍ਸਤੁਚ੍ਛੇਦਦਿਟ੍ਠੀਨਮ੍ਪਿ ਪਨ ਸਮੁਗ੍ਘਾਤਂ ਕਰੋਤੀਤਿ ਦਸ੍ਸਨਤ੍ਥਂ વੁਤ੍ਤਂ। ਨ વਜ੍ਜવਾ ਅਸ੍ਸਨ੍ਤਿ ਨਿਦ੍ਦੋਸੋ ਭવੇਯ੍ਯਂ। ਸੇਸਮੇਤ੍ਥ ਉਤ੍ਤਾਨਮੇવ। ਇਤਿ ਭਗવਾ ਇਮਸ੍ਮਿਮ੍ਪਿ ਸੁਤ੍ਤੇ ਦੇਸਨਂ ਤੀਹਿ ਭવੇਹਿ વਿਨਿવਤ੍ਤੇਤ੍વਾ ਅਰਹਤ੍ਤੇਨ ਕੂਟਂ ਗਣ੍ਹਿ। ਦੇਸਨਾવਸਾਨੇ ਪਞ੍ਚਸਤਾ ਭਿਕ੍ਖੂ ਸਹ ਪਟਿਸਮ੍ਭਿਦਾਹਿ ਅਰਹਤ੍ਤਂ ਪਾਪੁਣਿਂਸੂਤਿ। ਅਟ੍ਠਮਂ।
Dvemā, bhikkhave, diṭṭhiyoti idaṃ pana na kevalaṃ animittasamādhibhāvanā imesaṃyeva tiṇṇaṃ mahāvitakkānaṃ pahānāya saṃvattati, sassatucchedadiṭṭhīnampi pana samugghātaṃ karotīti dassanatthaṃ vuttaṃ. Na vajjavā assanti niddoso bhaveyyaṃ. Sesamettha uttānameva. Iti bhagavā imasmimpi sutte desanaṃ tīhi bhavehi vinivattetvā arahattena kūṭaṃ gaṇhi. Desanāvasāne pañcasatā bhikkhū saha paṭisambhidāhi arahattaṃ pāpuṇiṃsūti. Aṭṭhamaṃ.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਸੁਤ੍ਤਪਿਟਕ • Suttapiṭaka / ਸਂਯੁਤ੍ਤਨਿਕਾਯ • Saṃyuttanikāya / ੮. ਪਿਣ੍ਡੋਲ੍ਯਸੁਤ੍ਤਂ • 8. Piṇḍolyasuttaṃ
ਟੀਕਾ • Tīkā / ਸੁਤ੍ਤਪਿਟਕ (ਟੀਕਾ) • Suttapiṭaka (ṭīkā) / ਸਂਯੁਤ੍ਤਨਿਕਾਯ (ਟੀਕਾ) • Saṃyuttanikāya (ṭīkā) / ੮. ਪਿਣ੍ਡੋਲ੍ਯਸੁਤ੍ਤવਣ੍ਣਨਾ • 8. Piṇḍolyasuttavaṇṇanā
