| Library / Tipiṭaka / තිපිටක • Tipiṭaka / සුත්‌තනිපාතපාළි • Suttanipātapāḷi |
16. පිඞ්‌ගියමාණවපුච්‌ඡා
16. Piṅgiyamāṇavapucchā
1126.
1126.
‘‘ජිණ්‌ණොහමස්‌මි අබලො වීතවණ්‌ණො, (ඉච්‌චායස්‌මා පිඞ්‌ගියො)
‘‘Jiṇṇohamasmi abalo vītavaṇṇo, (iccāyasmā piṅgiyo)
නෙත්‌තා න සුද්‌ධා සවනං න ඵාසු;
Nettā na suddhā savanaṃ na phāsu;
මාහං නස්‌සං මොමුහො අන්‌තරාව
Māhaṃ nassaṃ momuho antarāva
ආචික්‌ඛ ධම්‌මං යමහං විජඤ්‌ඤං;
Ācikkha dhammaṃ yamahaṃ vijaññaṃ;
ජාතිජරාය ඉධ විප්‌පහානං’’.
Jātijarāya idha vippahānaṃ’’.
1127.
1127.
‘‘දිස්‌වාන රූපෙසු විහඤ්‌ඤමානෙ, (පිඞ්‌ගියාති භගවා)
‘‘Disvāna rūpesu vihaññamāne, (piṅgiyāti bhagavā)
රුප්‌පන්‌ති රූපෙසු ජනා පමත්‌තා;
Ruppanti rūpesu janā pamattā;
තස්‌මා තුවං පිඞ්‌ගිය අප්‌පමත්‌තො,
Tasmā tuvaṃ piṅgiya appamatto,
ජහස්‌සු රූපං අපුනබ්‌භවාය’’.
Jahassu rūpaṃ apunabbhavāya’’.
1128.
1128.
‘‘දිසා චතස්‌සො විදිසා චතස්‌සො, උද්‌ධං අධො දස දිසා ඉමායො;
‘‘Disā catasso vidisā catasso, uddhaṃ adho dasa disā imāyo;
ආචික්‌ඛ ධම්‌මං යමහං විජඤ්‌ඤං, ජාතිජරාය ඉධ විප්‌පහානං’’.
Ācikkha dhammaṃ yamahaṃ vijaññaṃ, jātijarāya idha vippahānaṃ’’.
1129.
1129.
‘‘තණ්‌හාධිපන්‌නෙ මනුජෙ පෙක්‌ඛමානො, (පිඞ්‌ගියාති භගවා)
‘‘Taṇhādhipanne manuje pekkhamāno, (piṅgiyāti bhagavā)
සන්‌තාපජාතෙ ජරසා පරෙතෙ;
Santāpajāte jarasā parete;
තස්‌මා තුවං පිඞ්‌ගිය අප්‌පමත්‌තො, ජහස්‌සු තණ්‌හං අපුනබ්‌භවායා’’ති.
Tasmā tuvaṃ piṅgiya appamatto, jahassu taṇhaṃ apunabbhavāyā’’ti.
පිඞ්‌ගියමාණවපුච්‌ඡා සොළසමා නිට්‌ඨිතා.
Piṅgiyamāṇavapucchā soḷasamā niṭṭhitā.
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / ඛුද්‌දකනිකාය (අට්‌ඨකථා) • Khuddakanikāya (aṭṭhakathā) / සුත්‌තනිපාත-අට්‌ඨකථා • Suttanipāta-aṭṭhakathā / 16. පිඞ්‌ගියසුත්‌තවණ්‌ණනා • 16. Piṅgiyasuttavaṇṇanā
