| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය • Aṅguttaranikāya |
5. පිඞ්‌ගියානීසුත්‌තං
5. Piṅgiyānīsuttaṃ
195. එකං සමයං භගවා වෙසාලියං විහරති මහාවනෙ කූටාගාරසාලායං. තෙන ඛො පන සමයෙන පඤ්‌චමත්‌තානි ලිච්‌ඡවිසතානි භගවන්‌තං පයිරුපාසන්‌ති. අප්‌පෙකච්‌චෙ ලිච්‌ඡවී නීලා හොන්‌ති නීලවණ්‌ණා නීලවත්‌ථා නීලාලඞ්‌කාරා, අප්‌පෙකච්‌චෙ ලිච්‌ඡවී පීතා හොන්‌ති පීතවණ්‌ණා පීතවත්‌ථා පීතාලඞ්‌කාරා , අප්‌පෙකච්‌චෙ ලිච්‌ඡවී ලොහිතකා හොන්‌ති ලොහිතකවණ්‌ණා ලොහිතකවත්‌ථා ලොහිතකාලඞ්‌කාරා, අප්‌පෙකච්‌චෙ ලිච්‌ඡවී ඔදාතා හොන්‌ති ඔදාතවණ්‌ණා ඔදාතවත්‌ථා ඔදාතාලඞ්‌කාරා. ත්‍යස්‌සුදං භගවා අතිරොචති වණ්‌ණෙන චෙව යසසා ච.
195. Ekaṃ samayaṃ bhagavā vesāliyaṃ viharati mahāvane kūṭāgārasālāyaṃ. Tena kho pana samayena pañcamattāni licchavisatāni bhagavantaṃ payirupāsanti. Appekacce licchavī nīlā honti nīlavaṇṇā nīlavatthā nīlālaṅkārā, appekacce licchavī pītā honti pītavaṇṇā pītavatthā pītālaṅkārā , appekacce licchavī lohitakā honti lohitakavaṇṇā lohitakavatthā lohitakālaṅkārā, appekacce licchavī odātā honti odātavaṇṇā odātavatthā odātālaṅkārā. Tyassudaṃ bhagavā atirocati vaṇṇena ceva yasasā ca.
අථ ඛො පිඞ්‌ගියානී බ්‍රාහ්‌මණො උට්‌ඨායාසනා එකංසං උත්‌තරාසඞ්‌ගං කරිත්‌වා යෙන භගවා තෙනඤ්‌ජලිං පණාමෙත්‌වා භගවන්‌තං එතදවොච – ‘‘පටිභාති මං, භගවා, පටිභාති මං, සුගතා’’ති. ‘‘පටිභාතු තං පිඞ්‌ගියානී’’ති භගවා අවොච. අථ ඛො පිඞ්‌ගියානී බ්‍රාහ්‌මණො භගවතො සම්‌මුඛා සාරුප්‌පාය ගාථාය අභිත්‌ථවි –
Atha kho piṅgiyānī brāhmaṇo uṭṭhāyāsanā ekaṃsaṃ uttarāsaṅgaṃ karitvā yena bhagavā tenañjaliṃ paṇāmetvā bhagavantaṃ etadavoca – ‘‘paṭibhāti maṃ, bhagavā, paṭibhāti maṃ, sugatā’’ti. ‘‘Paṭibhātu taṃ piṅgiyānī’’ti bhagavā avoca. Atha kho piṅgiyānī brāhmaṇo bhagavato sammukhā sāruppāya gāthāya abhitthavi –
පාතො සියා ඵුල්‌ලමවීතගන්‌ධං;
Pāto siyā phullamavītagandhaṃ;
අඞ්‌ගීරසං පස්‌ස විරොචමානං,
Aṅgīrasaṃ passa virocamānaṃ,
තපන්‌තමාදිච්‌චමිවන්‌තලික්‌ඛෙ’’ති.
Tapantamādiccamivantalikkhe’’ti.
අථ ඛො තෙ ලිච්‌ඡවී පඤ්‌චහි උත්‌තරාසඞ්‌ගසතෙහි පිඞ්‌ගියානිං බ්‍රාහ්‌මණං අච්‌ඡාදෙසුං. අථ ඛො පිඞ්‌ගියානී බ්‍රාහ්‌මණො තෙහි පඤ්‌චහි උත්‌තරාසඞ්‌ගසතෙහි භගවන්‌තං අච්‌ඡාදෙසි .
Atha kho te licchavī pañcahi uttarāsaṅgasatehi piṅgiyāniṃ brāhmaṇaṃ acchādesuṃ. Atha kho piṅgiyānī brāhmaṇo tehi pañcahi uttarāsaṅgasatehi bhagavantaṃ acchādesi .
අථ ඛො භගවා තෙ ලිච්‌ඡවී එතදවොච – ‘‘පඤ්‌චන්‌නං, ලිච්‌ඡවී, රතනානං පාතුභාවො දුල්‌ලභො ලොකස්‌මිං. කතමෙසං පඤ්‌චන්‌නං? තථාගතස්‌ස අරහතො සම්‌මාසම්‌බුද්‌ධස්‌ස පාතුභාවො දුල්‌ලභො ලොකස්‌මිං. තථාගතප්‌පවෙදිතස්‌ස ධම්‌මවිනයස්‌ස දෙසෙතා පුග්‌ගලො දුල්‌ලභො ලොකස්‌මිං. තථාගතප්‌පවෙදිතස්‌ස ධම්‌මවිනයස්‌ස දෙසිතස්‌ස විඤ්‌ඤාතා පුග්‌ගලො දුල්‌ලභො ලොකස්‌මිං. තථාගතප්‌පවෙදිතස්‌ස ධම්‌මවිනයස්‌ස දෙසිතස්‌ස විඤ්‌ඤාතා ධම්‌මානුධම්‌මප්‌පටිපන්‌නො පුග්‌ගලො දුල්‌ලභො ලොකස්‌මිං. කතඤ්‌ඤූ කතවෙදී පුග්‌ගලො දුල්‌ලභො ලොකස්‌මිං. ඉමෙසං ඛො, ලිච්‌ඡවී, පඤ්‌චන්‌නං රතනානං පාතුභාවො දුල්‌ලභො ලොකස්‌මි’’න්‌ති 5. පඤ්‌චමං.
Atha kho bhagavā te licchavī etadavoca – ‘‘pañcannaṃ, licchavī, ratanānaṃ pātubhāvo dullabho lokasmiṃ. Katamesaṃ pañcannaṃ? Tathāgatassa arahato sammāsambuddhassa pātubhāvo dullabho lokasmiṃ. Tathāgatappaveditassa dhammavinayassa desetā puggalo dullabho lokasmiṃ. Tathāgatappaveditassa dhammavinayassa desitassa viññātā puggalo dullabho lokasmiṃ. Tathāgatappaveditassa dhammavinayassa desitassa viññātā dhammānudhammappaṭipanno puggalo dullabho lokasmiṃ. Kataññū katavedī puggalo dullabho lokasmiṃ. Imesaṃ kho, licchavī, pañcannaṃ ratanānaṃ pātubhāvo dullabho lokasmi’’nti 6. Pañcamaṃ.
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) / 5. පිඞ්‌ගියානීසුත්‌තවණ්‌ණනා • 5. Piṅgiyānīsuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 5. පිඞ්‌ගියානීසුත්‌තවණ්‌ණනා • 5. Piṅgiyānīsuttavaṇṇanā
