| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
5. பிங்கி³யானீஸுத்தவண்ணனா
5. Piṅgiyānīsuttavaṇṇanā
195. பஞ்சமே நீலாதி இத³ங் ஸப்³ப³ஸங்கா³ஹிகங். நீலவண்ணாதிஆதி³ தஸ்ஸேவ விபா⁴க³த³ஸ்ஸனங். தத்த² ந தேஸங் பகதிவண்ணோ நீலோ, நீலவிலேபனவிலித்தத்தா பனேதங் வுத்தங். நீலவத்தா²தி படது³கூலகோஸெய்யாதீ³னிபி தேஸங் நீலானேவ ஹொந்தி. நீலாலங்காராதி நீலமணீஹி நீலபுப்பே²ஹி அலங்கதா, தேஸங் ஹத்தா²லங்கார-அஸ்ஸாலங்கார-ரதா²லங்கார-ஸாணிவிதானகஞ்சுகாபி ஸப்³பே³ நீலாயேவ ஹொந்தி. இமினா நயேன ஸப்³ப³பதே³ஸு அத்தோ² வேதி³தப்³போ³.
195. Pañcame nīlāti idaṃ sabbasaṅgāhikaṃ. Nīlavaṇṇātiādi tasseva vibhāgadassanaṃ. Tattha na tesaṃ pakativaṇṇo nīlo, nīlavilepanavilittattā panetaṃ vuttaṃ. Nīlavatthāti paṭadukūlakoseyyādīnipi tesaṃ nīlāneva honti. Nīlālaṅkārāti nīlamaṇīhi nīlapupphehi alaṅkatā, tesaṃ hatthālaṅkāra-assālaṅkāra-rathālaṅkāra-sāṇivitānakañcukāpi sabbe nīlāyeva honti. Iminā nayena sabbapadesu attho veditabbo.
பது³மங் யதா²தி யதா² ஸதபத்தங் ரத்தபது³மங். கோகனத³ந்தி தஸ்ஸேவ வேவசனங். பாதோதி பகே³வ ஸுரியுக்³க³மனகாலே . ஸியாதி ப⁴வெய்ய. அவீதக³ந்த⁴ந்தி அவிக³தக³ந்த⁴ங். அங்கீ³ரஸந்தி ப⁴க³வதோ அங்க³மங்கே³ஹி ரஸ்மியோ நிச்ச²ரந்தி, தஸ்மா அங்கீ³ரஸோதி வுச்சதி. தபந்தமாதி³ச்சமிவந்தலிக்கே²தி த்³விஸஹஸ்ஸதீ³பபரிவாரேஸு சதூஸு மஹாதீ³பேஸு ஆலோககரணவஸேன அந்தலிக்கே² தபந்தங் ஆதி³ச்சங் விய விரோசமானங். அங்கீ³ரஸங் பஸ்ஸாதி அத்தானமேவ வா மஹாஜனங் வா ஸந்தா⁴ய ஏவங் வத³தி.
Padumaṃyathāti yathā satapattaṃ rattapadumaṃ. Kokanadanti tasseva vevacanaṃ. Pātoti pageva suriyuggamanakāle . Siyāti bhaveyya. Avītagandhanti avigatagandhaṃ. Aṅgīrasanti bhagavato aṅgamaṅgehi rasmiyo niccharanti, tasmā aṅgīrasoti vuccati. Tapantamādiccamivantalikkheti dvisahassadīpaparivāresu catūsu mahādīpesu ālokakaraṇavasena antalikkhe tapantaṃ ādiccaṃ viya virocamānaṃ. Aṅgīrasaṃ passāti attānameva vā mahājanaṃ vā sandhāya evaṃ vadati.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 5. பிங்கி³யானீஸுத்தங் • 5. Piṅgiyānīsuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 5. பிங்கி³யானீஸுத்தவண்ணனா • 5. Piṅgiyānīsuttavaṇṇanā
