| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
5. பிங்கி³யானீஸுத்தவண்ணனா
5. Piṅgiyānīsuttavaṇṇanā
195. பஞ்சமே ஸப்³ப³ஸங்கா³ஹிகந்தி ஸரீரக³தஸ்ஸ சேவ வத்தா²லங்காரக³தஸ்ஸ சாதி ஸப்³ப³ஸ்ஸ நீலபா⁴வஸ்ஸ ஸங்கா³ஹகவசனங். தஸ்ஸேவாதி நீலாதி³ஸப்³ப³ஸங்கா³ஹிகவஸேன வுத்தஅத்த²ஸ்ஸேவ. விபா⁴க³த³ஸ்ஸனந்தி பபே⁴த³த³ஸ்ஸனங். யதா² தே லிச்ச²விராஜானோ அபீதாதி³வண்ணா ஏவ கேசி கேசி விலேபனவஸேன பீதாதி³வண்ணா கா²யிங்ஸு, ஏவங் அனீலாதி³வண்ணா ஏவ கேசி விலேபனவஸேன நீலாதி³வண்ணா கா²யிங்ஸு. தே கிர ஸுவண்ணவிசித்தேஹி மணிஓபா⁴ஸேஹி ஏகனீலா விய கா²யந்தி.
195. Pañcame sabbasaṅgāhikanti sarīragatassa ceva vatthālaṅkāragatassa cāti sabbassa nīlabhāvassa saṅgāhakavacanaṃ. Tassevāti nīlādisabbasaṅgāhikavasena vuttaatthasseva. Vibhāgadassananti pabhedadassanaṃ. Yathā te licchavirājāno apītādivaṇṇā eva keci keci vilepanavasena pītādivaṇṇā khāyiṃsu, evaṃ anīlādivaṇṇā eva keci vilepanavasena nīlādivaṇṇā khāyiṃsu. Te kira suvaṇṇavicittehi maṇiobhāsehi ekanīlā viya khāyanti.
கோகனத³ந்தி வா பது³மவிஸேஸனங் யதா² ‘‘கோகாஸக’’ந்தி. தங் கிர ப³ஹுபத்தங் வண்ணஸம்பன்னங் அதிவிய ஸுக³ந்த⁴ஞ்ச ஹோதி. அயஞ்ஹெத்த² அத்தோ² – யதா² கோகனத³ஸங்கா²தங் பது³மங் பாதோ ஸூரியுக்³க³மனவேலாய பு²ல்லங் விகஸிதங் அவீதக³ந்த⁴ங் ஸியா விரோசமானங், ஏவங் ஸரீரக³ந்தே⁴ன கு³ணக³ந்தே⁴ன ச ஸுக³ந்த⁴ங், ஸரத³காலே அந்தலிக்கே² ஆதி³ச்சமிவ அத்தனோ தேஜஸா தபந்தங், அங்கே³ஹி நிச்ச²ரந்தஜுதிதாய அங்கீ³ரஸங் ஸம்பு³த்³த⁴ங் பஸ்ஸாதி.
Kokanadanti vā padumavisesanaṃ yathā ‘‘kokāsaka’’nti. Taṃ kira bahupattaṃ vaṇṇasampannaṃ ativiya sugandhañca hoti. Ayañhettha attho – yathā kokanadasaṅkhātaṃ padumaṃ pāto sūriyuggamanavelāya phullaṃ vikasitaṃ avītagandhaṃ siyā virocamānaṃ, evaṃ sarīragandhena guṇagandhena ca sugandhaṃ, saradakāle antalikkhe ādiccamiva attano tejasā tapantaṃ, aṅgehi niccharantajutitāya aṅgīrasaṃ sambuddhaṃ passāti.
பிங்கி³யானீஸுத்தவண்ணனா நிட்டி²தா.
Piṅgiyānīsuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 5. பிங்கி³யானீஸுத்தங் • 5. Piṅgiyānīsuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 5. பிங்கி³யானீஸுத்தவண்ணனா • 5. Piṅgiyānīsuttavaṇṇanā
