| Library / Tipiṭaka / तिपिटक • Tipiṭaka / अङ्गुत्तरनिकाय (अट्ठकथा) • Aṅguttaranikāya (aṭṭhakathā) |
५. पिङ्गियानीसुत्तवण्णना
5. Piṅgiyānīsuttavaṇṇanā
१९५. पञ्चमे नीलाति इदं सब्बसङ्गाहिकं। नीलवण्णातिआदि तस्सेव विभागदस्सनं। तत्थ न तेसं पकतिवण्णो नीलो, नीलविलेपनविलित्तत्ता पनेतं वुत्तं। नीलवत्थाति पटदुकूलकोसेय्यादीनिपि तेसं नीलानेव होन्ति। नीलालङ्काराति नीलमणीहि नीलपुप्फेहि अलङ्कता, तेसं हत्थालङ्कार-अस्सालङ्कार-रथालङ्कार-साणिवितानकञ्चुकापि सब्बे नीलायेव होन्ति। इमिना नयेन सब्बपदेसु अत्थो वेदितब्बो।
195. Pañcame nīlāti idaṃ sabbasaṅgāhikaṃ. Nīlavaṇṇātiādi tasseva vibhāgadassanaṃ. Tattha na tesaṃ pakativaṇṇo nīlo, nīlavilepanavilittattā panetaṃ vuttaṃ. Nīlavatthāti paṭadukūlakoseyyādīnipi tesaṃ nīlāneva honti. Nīlālaṅkārāti nīlamaṇīhi nīlapupphehi alaṅkatā, tesaṃ hatthālaṅkāra-assālaṅkāra-rathālaṅkāra-sāṇivitānakañcukāpi sabbe nīlāyeva honti. Iminā nayena sabbapadesu attho veditabbo.
पदुमं यथाति यथा सतपत्तं रत्तपदुमं। कोकनदन्ति तस्सेव वेवचनं। पातोति पगेव सुरियुग्गमनकाले । सियाति भवेय्य। अवीतगन्धन्ति अविगतगन्धं। अङ्गीरसन्ति भगवतो अङ्गमङ्गेहि रस्मियो निच्छरन्ति, तस्मा अङ्गीरसोति वुच्चति। तपन्तमादिच्चमिवन्तलिक्खेति द्विसहस्सदीपपरिवारेसु चतूसु महादीपेसु आलोककरणवसेन अन्तलिक्खे तपन्तं आदिच्चं विय विरोचमानं। अङ्गीरसं पस्साति अत्तानमेव वा महाजनं वा सन्धाय एवं वदति।
Padumaṃyathāti yathā satapattaṃ rattapadumaṃ. Kokanadanti tasseva vevacanaṃ. Pātoti pageva suriyuggamanakāle . Siyāti bhaveyya. Avītagandhanti avigatagandhaṃ. Aṅgīrasanti bhagavato aṅgamaṅgehi rasmiyo niccharanti, tasmā aṅgīrasoti vuccati. Tapantamādiccamivantalikkheti dvisahassadīpaparivāresu catūsu mahādīpesu ālokakaraṇavasena antalikkhe tapantaṃ ādiccaṃ viya virocamānaṃ. Aṅgīrasaṃ passāti attānameva vā mahājanaṃ vā sandhāya evaṃ vadati.
Related texts:
तिपिटक (मूल) • Tipiṭaka (Mūla) / सुत्तपिटक • Suttapiṭaka / अङ्गुत्तरनिकाय • Aṅguttaranikāya / ५. पिङ्गियानीसुत्तं • 5. Piṅgiyānīsuttaṃ
टीका • Tīkā / सुत्तपिटक (टीका) • Suttapiṭaka (ṭīkā) / अङ्गुत्तरनिकाय (टीका) • Aṅguttaranikāya (ṭīkā) / ५. पिङ्गियानीसुत्तवण्णना • 5. Piṅgiyānīsuttavaṇṇanā
