| Library / Tipiṭaka / តិបិដក • Tipiṭaka / អង្គុត្តរនិកាយ (អដ្ឋកថា) • Aṅguttaranikāya (aṭṭhakathā) |
៥. បិង្គិយានីសុត្តវណ្ណនា
5. Piṅgiyānīsuttavaṇṇanā
១៩៥. បញ្ចមេ នីលាតិ ឥទំ សព្ពសង្គាហិកំ។ នីលវណ្ណាតិអាទិ តស្សេវ វិភាគទស្សនំ។ តត្ថ ន តេសំ បកតិវណ្ណោ នីលោ, នីលវិលេបនវិលិត្តត្តា បនេតំ វុត្តំ។ នីលវត្ថាតិ បដទុកូលកោសេយ្យាទីនិបិ តេសំ នីលានេវ ហោន្តិ។ នីលាលង្ការាតិ នីលមណីហិ នីលបុប្ផេហិ អលង្កតា, តេសំ ហត្ថាលង្ការ-អស្សាលង្ការ-រថាលង្ការ-សាណិវិតានកញ្ចុកាបិ សព្ពេ នីលាយេវ ហោន្តិ។ ឥមិនា នយេន សព្ពបទេសុ អត្ថោ វេទិតព្ពោ។
195. Pañcame nīlāti idaṃ sabbasaṅgāhikaṃ. Nīlavaṇṇātiādi tasseva vibhāgadassanaṃ. Tattha na tesaṃ pakativaṇṇo nīlo, nīlavilepanavilittattā panetaṃ vuttaṃ. Nīlavatthāti paṭadukūlakoseyyādīnipi tesaṃ nīlāneva honti. Nīlālaṅkārāti nīlamaṇīhi nīlapupphehi alaṅkatā, tesaṃ hatthālaṅkāra-assālaṅkāra-rathālaṅkāra-sāṇivitānakañcukāpi sabbe nīlāyeva honti. Iminā nayena sabbapadesu attho veditabbo.
បទុមំ យថាតិ យថា សតបត្តំ រត្តបទុមំ។ កោកនទន្តិ តស្សេវ វេវចនំ។ បាតោតិ បគេវ សុរិយុគ្គមនកាលេ ។ សិយាតិ ភវេយ្យ។ អវីតគន្ធន្តិ អវិគតគន្ធំ។ អង្គីរសន្តិ ភគវតោ អង្គមង្គេហិ រស្មិយោ និច្ឆរន្តិ, តស្មា អង្គីរសោតិ វុច្ចតិ។ តបន្តមាទិច្ចមិវន្តលិក្ខេតិ ទ្វិសហស្សទីបបរិវារេសុ ចតូសុ មហាទីបេសុ អាលោកករណវសេន អន្តលិក្ខេ តបន្តំ អាទិច្ចំ វិយ វិរោចមានំ។ អង្គីរសំ បស្សាតិ អត្តានមេវ វា មហាជនំ វា សន្ធាយ ឯវំ វទតិ។
Padumaṃyathāti yathā satapattaṃ rattapadumaṃ. Kokanadanti tasseva vevacanaṃ. Pātoti pageva suriyuggamanakāle . Siyāti bhaveyya. Avītagandhanti avigatagandhaṃ. Aṅgīrasanti bhagavato aṅgamaṅgehi rasmiyo niccharanti, tasmā aṅgīrasoti vuccati. Tapantamādiccamivantalikkheti dvisahassadīpaparivāresu catūsu mahādīpesu ālokakaraṇavasena antalikkhe tapantaṃ ādiccaṃ viya virocamānaṃ. Aṅgīrasaṃ passāti attānameva vā mahājanaṃ vā sandhāya evaṃ vadati.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / អង្គុត្តរនិកាយ • Aṅguttaranikāya / ៥. បិង្គិយានីសុត្តំ • 5. Piṅgiyānīsuttaṃ
ដីកា • Tīkā / សុត្តបិដក (ដីកា) • Suttapiṭaka (ṭīkā) / អង្គុត្តរនិកាយ (ដីកា) • Aṅguttaranikāya (ṭīkā) / ៥. បិង្គិយានីសុត្តវណ្ណនា • 5. Piṅgiyānīsuttavaṇṇanā
