| Library / Tipiṭaka / တိပိဋက • Tipiṭaka / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) |
၅. ပိင္ဂိယာနီသုတ္တဝဏ္ဏနာ
5. Piṅgiyānīsuttavaṇṇanā
၁၉၅. ပဉ္စမေ နီလာတိ ဣဒံ သဗ္ဗသင္ဂာဟိကံ။ နီလဝဏ္ဏာတိအာဒိ တသ္သေဝ ဝိဘာဂဒသ္သနံ။ တတ္ထ န တေသံ ပကတိဝဏ္ဏော နီလော, နီလဝိလေပနဝိလိတ္တတ္တာ ပနေတံ ဝုတ္တံ။ နီလဝတ္ထာတိ ပဋဒုကူလကောသေယ္ယာဒီနိပိ တေသံ နီလာနေဝ ဟောန္တိ။ နီလာလင္ကာရာတိ နီလမဏီဟိ နီလပုပ္ဖေဟိ အလင္ကတာ, တေသံ ဟတ္ထာလင္ကာရ-အသ္သာလင္ကာရ-ရထာလင္ကာရ-သာဏိဝိတာနကဉ္စုကာပိ သဗ္ဗေ နီလာယေဝ ဟောန္တိ။ ဣမိနာ နယေန သဗ္ဗပဒေသု အတ္ထော ဝေဒိတဗ္ဗော။
195. Pañcame nīlāti idaṃ sabbasaṅgāhikaṃ. Nīlavaṇṇātiādi tasseva vibhāgadassanaṃ. Tattha na tesaṃ pakativaṇṇo nīlo, nīlavilepanavilittattā panetaṃ vuttaṃ. Nīlavatthāti paṭadukūlakoseyyādīnipi tesaṃ nīlāneva honti. Nīlālaṅkārāti nīlamaṇīhi nīlapupphehi alaṅkatā, tesaṃ hatthālaṅkāra-assālaṅkāra-rathālaṅkāra-sāṇivitānakañcukāpi sabbe nīlāyeva honti. Iminā nayena sabbapadesu attho veditabbo.
ပဒုမံ ယထာတိ ယထာ သတပတ္တံ ရတ္တပဒုမံ။ ကောကနဒန္တိ တသ္သေဝ ဝေဝစနံ။ ပာတောတိ ပဂေဝ သုရိယုဂ္ဂမနကာလေ ။ သိယာတိ ဘဝေယ္ယ။ အဝီတဂန္ဓန္တိ အဝိဂတဂန္ဓံ။ အင္ဂီရသန္တိ ဘဂဝတော အင္ဂမင္ဂေဟိ ရသ္မိယော နိစ္ဆရန္တိ, တသ္မာ အင္ဂီရသောတိ ဝုစ္စတိ။ တပန္တမာဒိစ္စမိဝန္တလိက္ခေတိ ဒ္ဝိသဟသ္သဒီပပရိဝာရေသု စတူသု မဟာဒီပေသု အာလောကကရဏဝသေန အန္တလိက္ခေ တပန္တံ အာဒိစ္စံ ဝိယ ဝိရောစမာနံ။ အင္ဂီရသံ ပသ္သာတိ အတ္တာနမေဝ ဝာ မဟာဇနံ ဝာ သန္ဓာယ ဧဝံ ဝဒတိ။
Padumaṃyathāti yathā satapattaṃ rattapadumaṃ. Kokanadanti tasseva vevacanaṃ. Pātoti pageva suriyuggamanakāle . Siyāti bhaveyya. Avītagandhanti avigatagandhaṃ. Aṅgīrasanti bhagavato aṅgamaṅgehi rasmiyo niccharanti, tasmā aṅgīrasoti vuccati. Tapantamādiccamivantalikkheti dvisahassadīpaparivāresu catūsu mahādīpesu ālokakaraṇavasena antalikkhe tapantaṃ ādiccaṃ viya virocamānaṃ. Aṅgīrasaṃ passāti attānameva vā mahājanaṃ vā sandhāya evaṃ vadati.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / အင္ဂုတ္တရနိကာယ • Aṅguttaranikāya / ၅. ပိင္ဂိယာနီသုတ္တံ • 5. Piṅgiyānīsuttaṃ
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / အင္ဂုတ္တရနိကာယ (ဋီကာ) • Aṅguttaranikāya (ṭīkā) / ၅. ပိင္ဂိယာနီသုတ္တဝဏ္ဏနာ • 5. Piṅgiyānīsuttavaṇṇanā
