| Library / Tipiṭaka / திபிடக • Tipiṭaka / ஸுத்தனிபாத-அட்ட²கதா² • Suttanipāta-aṭṭhakathā |
16. பிங்கி³யஸுத்தவண்ணனா
16. Piṅgiyasuttavaṇṇanā
1127. ஜிண்ணோஹமஸ்மீதி பிங்கி³யஸுத்தங். தத்த² ஜிண்ணோஹமஸ்மி அப³லோ வீதவண்ணோதி ஸோ கிர ப்³ராஹ்மணோ ஜராபி⁴பூ⁴தோ வீஸவஸ்ஸஸதிகோ ஜாதியா, து³ப்³ப³லோ ச ‘‘இத⁴ பத³ங் கரிஸ்ஸாமீ’’தி அஞ்ஞத்தே²வ கரோதி, வினட்ட²புரிமச்ச²விவண்ணோ ச . தேனாஹ – ‘‘ஜிண்ணோஹமஸ்மி அப³லோ வீதவண்ணோ’’தி. மாஹங் நஸ்ஸங் மோமுஹோ அந்தராவாதி மாஹங் துய்ஹங் த⁴ம்மங் அஸச்சி²கத்வா அந்தராயேவ அவித்³வா ஹுத்வா அனஸ்ஸிங். ஜாதிஜராய இத⁴ விப்பஹானந்தி இதே⁴வ தவ பாத³மூலே பாஸாணகே வா சேதிய ஜாதிஜராய விப்பஹானங் நிப்³பா³னத⁴ம்மங் யமஹங் விஜஞ்ஞங், தங் மே ஆசிக்க².
1127.Jiṇṇohamasmīti piṅgiyasuttaṃ. Tattha jiṇṇohamasmi abalo vītavaṇṇoti so kira brāhmaṇo jarābhibhūto vīsavassasatiko jātiyā, dubbalo ca ‘‘idha padaṃ karissāmī’’ti aññattheva karoti, vinaṭṭhapurimacchavivaṇṇo ca . Tenāha – ‘‘jiṇṇohamasmi abalo vītavaṇṇo’’ti. Māhaṃ nassaṃ momuho antarāvāti māhaṃ tuyhaṃ dhammaṃ asacchikatvā antarāyeva avidvā hutvā anassiṃ. Jātijarāya idha vippahānanti idheva tava pādamūle pāsāṇake vā cetiya jātijarāya vippahānaṃ nibbānadhammaṃ yamahaṃ vijaññaṃ, taṃ me ācikkha.
1128. இதா³னி யஸ்மா பிங்கி³யோ காயே ஸாபெக்க²தாய ‘‘ஜிண்ணோஹமஸ்மீ’’தி கா³த²மாஹ தேனஸ்ஸ ப⁴க³வா காயே ஸினேஹப்பஹானத்த²ங் ‘‘தி³ஸ்வான ரூபேஸு விஹஞ்ஞமானே’’தி கா³த²மாஹ. தத்த² ரூபேஸூதி ரூபஹேது ரூபபச்சயா. விஹஞ்ஞமானேதி கம்மகாரணாதீ³ஹி உபஹஞ்ஞமானே. ருப்பந்தி ரூபேஸூதி சக்கு²ரோகா³தீ³ஹி ச ரூபஹேதுயேவ ஜனா ருப்பந்தி பா³தீ⁴யந்தி.
1128. Idāni yasmā piṅgiyo kāye sāpekkhatāya ‘‘jiṇṇohamasmī’’ti gāthamāha tenassa bhagavā kāye sinehappahānatthaṃ ‘‘disvānarūpesu vihaññamāne’’ti gāthamāha. Tattha rūpesūti rūpahetu rūpapaccayā. Vihaññamāneti kammakāraṇādīhi upahaññamāne. Ruppanti rūpesūti cakkhurogādīhi ca rūpahetuyeva janā ruppanti bādhīyanti.
1129-30. ஏவங் ப⁴க³வதா யாவ அரஹத்தங் தாவ கதி²தங் படிபத்திங் ஸுத்வாபி பிங்கி³யோ ஜராது³ப்³ப³லதாய விஸேஸங் அனதி⁴க³ந்த்வாவ புன ‘‘தி³ஸா சதஸ்ஸோ’’தி இமாய கா³தா²ய ப⁴க³வந்தங் தோ²மெந்தோ தே³ஸனங் யாசதி. அத²ஸ்ஸ ப⁴க³வா புனபி யாவ அரஹத்தங், தாவ படிபத³ங் த³ஸ்ஸெந்தோ ‘‘தண்ஹாதி⁴பன்னே’’தி கா³த²மாஹ. ஸேஸங் ஸப்³ப³த்த² பாகடமேவ.
1129-30. Evaṃ bhagavatā yāva arahattaṃ tāva kathitaṃ paṭipattiṃ sutvāpi piṅgiyo jarādubbalatāya visesaṃ anadhigantvāva puna ‘‘disā catasso’’ti imāya gāthāya bhagavantaṃ thomento desanaṃ yācati. Athassa bhagavā punapi yāva arahattaṃ, tāva paṭipadaṃ dassento ‘‘taṇhādhipanne’’ti gāthamāha. Sesaṃ sabbattha pākaṭameva.
இமம்பி ஸுத்தங் ப⁴க³வா அரஹத்தனிகூடேனேவ தே³ஸேஸி. தே³ஸனாபரியோஸானே ச பிங்கி³யோ அனாகா³மிப²லே பதிட்டா²ஸி. ஸோ கிர அந்தரந்தரா சிந்தேஸி – ‘‘ஏவங் விசித்ரபடிபா⁴னங் நாம தே³ஸனங் ந லபி⁴ மய்ஹங் மாதுலோ பா³வரீ ஸவனாயா’’தி. தேன ஸினேஹவிக்கே²பேன அரஹத்தங் பாபுணிதுங் நாஸக்கி². அந்தேவாஸினோ பனஸ்ஸ ஸஹஸ்ஸஜடிலா அரஹத்தங் பாபுணிங்ஸு. ஸப்³பே³வ இத்³தி⁴மயபத்தசீவரத⁴ரா ஏஹிபி⁴க்க²வோ அஹேஸுந்தி.
Imampi suttaṃ bhagavā arahattanikūṭeneva desesi. Desanāpariyosāne ca piṅgiyo anāgāmiphale patiṭṭhāsi. So kira antarantarā cintesi – ‘‘evaṃ vicitrapaṭibhānaṃ nāma desanaṃ na labhi mayhaṃ mātulo bāvarī savanāyā’’ti. Tena sinehavikkhepena arahattaṃ pāpuṇituṃ nāsakkhi. Antevāsino panassa sahassajaṭilā arahattaṃ pāpuṇiṃsu. Sabbeva iddhimayapattacīvaradharā ehibhikkhavo ahesunti.
பரமத்த²ஜோதிகாய கு²த்³த³க-அட்ட²கதா²ய
Paramatthajotikāya khuddaka-aṭṭhakathāya
ஸுத்தனிபாத-அட்ட²கதா²ய பிங்கி³யஸுத்தவண்ணனா நிட்டி²தா.
Suttanipāta-aṭṭhakathāya piṅgiyasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / ஸுத்தனிபாதபாளி • Suttanipātapāḷi / 16. பிங்கி³யமாணவபுச்சா² • 16. Piṅgiyamāṇavapucchā
