| Library / Tipiṭaka / ཏིཔིཊཀ • Tipiṭaka / སུཏྟནིཔཱཏ-ཨཊྛཀཐཱ • Suttanipāta-aṭṭhakathā |
༡༦. པིངྒིཡསུཏྟཝཎྞནཱ
16. Piṅgiyasuttavaṇṇanā
༡༡༢༧. ཛིཎྞོཧམསྨཱིཏི པིངྒིཡསུཏྟཾ། ཏཏྠ ཛིཎྞོཧམསྨི ཨབལོ ཝཱིཏཝཎྞོཏི སོ ཀིར བྲཱཧྨཎོ ཛརཱབྷིབྷཱུཏོ ཝཱིསཝསྶསཏིཀོ ཛཱཏིཡཱ, དུབྦལོ ཙ ‘‘ཨིདྷ པདཾ ཀརིསྶཱམཱི’’ཏི ཨཉྙཏྠེཝ ཀརོཏི, ཝིནཊྛཔུརིམཙྪཝིཝཎྞོ ཙ ། ཏེནཱཧ – ‘‘ཛིཎྞོཧམསྨི ཨབལོ ཝཱིཏཝཎྞོ’’ཏི། མཱཧཾ ནསྶཾ མོམུཧོ ཨནྟརཱཝཱཏི མཱཧཾ ཏུཡ྄ཧཾ དྷམྨཾ ཨསཙྪིཀཏྭཱ ཨནྟརཱཡེཝ ཨཝིདྭཱ ཧུཏྭཱ ཨནསྶིཾ། ཛཱཏིཛརཱཡ ཨིདྷ ཝིཔྤཧཱནནྟི ཨིདྷེཝ ཏཝ པཱདམཱུལེ པཱསཱཎཀེ ཝཱ ཙེཏིཡ ཛཱཏིཛརཱཡ ཝིཔྤཧཱནཾ ནིབྦཱནདྷམྨཾ ཡམཧཾ ཝིཛཉྙཾ, ཏཾ མེ ཨཱཙིཀྑ།
1127.Jiṇṇohamasmīti piṅgiyasuttaṃ. Tattha jiṇṇohamasmi abalo vītavaṇṇoti so kira brāhmaṇo jarābhibhūto vīsavassasatiko jātiyā, dubbalo ca ‘‘idha padaṃ karissāmī’’ti aññattheva karoti, vinaṭṭhapurimacchavivaṇṇo ca . Tenāha – ‘‘jiṇṇohamasmi abalo vītavaṇṇo’’ti. Māhaṃ nassaṃ momuho antarāvāti māhaṃ tuyhaṃ dhammaṃ asacchikatvā antarāyeva avidvā hutvā anassiṃ. Jātijarāya idha vippahānanti idheva tava pādamūle pāsāṇake vā cetiya jātijarāya vippahānaṃ nibbānadhammaṃ yamahaṃ vijaññaṃ, taṃ me ācikkha.
༡༡༢༨. ཨིདཱནི ཡསྨཱ པིངྒིཡོ ཀཱཡེ སཱཔེཀྑཏཱཡ ‘‘ཛིཎྞོཧམསྨཱི’’ཏི གཱཐམཱཧ ཏེནསྶ བྷགཝཱ ཀཱཡེ སིནེཧཔྤཧཱནཏྠཾ ‘‘དིསྭཱན རཱུཔེསུ ཝིཧཉྙམཱནེ’’ཏི གཱཐམཱཧ། ཏཏྠ རཱུཔེསཱུཏི རཱུཔཧེཏུ རཱུཔཔཙྩཡཱ། ཝིཧཉྙམཱནེཏི ཀམྨཀཱརཎཱདཱིཧི ཨུཔཧཉྙམཱནེ། རུཔྤནྟི རཱུཔེསཱུཏི ཙཀྑུརོགཱདཱིཧི ཙ རཱུཔཧེཏུཡེཝ ཛནཱ རུཔྤནྟི བཱདྷཱིཡནྟི།
1128. Idāni yasmā piṅgiyo kāye sāpekkhatāya ‘‘jiṇṇohamasmī’’ti gāthamāha tenassa bhagavā kāye sinehappahānatthaṃ ‘‘disvānarūpesu vihaññamāne’’ti gāthamāha. Tattha rūpesūti rūpahetu rūpapaccayā. Vihaññamāneti kammakāraṇādīhi upahaññamāne. Ruppanti rūpesūti cakkhurogādīhi ca rūpahetuyeva janā ruppanti bādhīyanti.
༡༡༢༩-༣༠. ཨེཝཾ བྷགཝཏཱ ཡཱཝ ཨརཧཏྟཾ ཏཱཝ ཀཐིཏཾ པཊིཔཏྟིཾ སུཏྭཱཔི པིངྒིཡོ ཛརཱདུབྦལཏཱཡ ཝིསེསཾ ཨནདྷིགནྟྭཱཝ པུན ‘‘དིསཱ ཙཏསྶོ’’ཏི ཨིམཱཡ གཱཐཱཡ བྷགཝནྟཾ ཐོམེནྟོ དེསནཾ ཡཱཙཏི། ཨཐསྶ བྷགཝཱ པུནཔི ཡཱཝ ཨརཧཏྟཾ, ཏཱཝ པཊིཔདཾ དསྶེནྟོ ‘‘ཏཎྷཱདྷིཔནྣེ’’ཏི གཱཐམཱཧ། སེསཾ སབྦཏྠ པཱཀཊམེཝ།
1129-30. Evaṃ bhagavatā yāva arahattaṃ tāva kathitaṃ paṭipattiṃ sutvāpi piṅgiyo jarādubbalatāya visesaṃ anadhigantvāva puna ‘‘disā catasso’’ti imāya gāthāya bhagavantaṃ thomento desanaṃ yācati. Athassa bhagavā punapi yāva arahattaṃ, tāva paṭipadaṃ dassento ‘‘taṇhādhipanne’’ti gāthamāha. Sesaṃ sabbattha pākaṭameva.
ཨིམམྤི སུཏྟཾ བྷགཝཱ ཨརཧཏྟནིཀཱུཊེནེཝ དེསེསི། དེསནཱཔརིཡོསཱནེ ཙ པིངྒིཡོ ཨནཱགཱམིཕལེ པཏིཊྛཱསི། སོ ཀིར ཨནྟརནྟརཱ ཙིནྟེསི – ‘‘ཨེཝཾ ཝིཙིཏྲཔཊིབྷཱནཾ ནཱམ དེསནཾ ན ལབྷི མཡ྄ཧཾ མཱཏུལོ བཱཝརཱི སཝནཱཡཱ’’ཏི། ཏེན སིནེཧཝིཀྑེཔེན ཨརཧཏྟཾ པཱཔུཎིཏུཾ ནཱསཀྑི། ཨནྟེཝཱསིནོ པནསྶ སཧསྶཛཊིལཱ ཨརཧཏྟཾ པཱཔུཎིཾསུ། སབྦེཝ ཨིདྡྷིམཡཔཏྟཙཱིཝརདྷརཱ ཨེཧིབྷིཀྑཝོ ཨཧེསུནྟི།
Imampi suttaṃ bhagavā arahattanikūṭeneva desesi. Desanāpariyosāne ca piṅgiyo anāgāmiphale patiṭṭhāsi. So kira antarantarā cintesi – ‘‘evaṃ vicitrapaṭibhānaṃ nāma desanaṃ na labhi mayhaṃ mātulo bāvarī savanāyā’’ti. Tena sinehavikkhepena arahattaṃ pāpuṇituṃ nāsakkhi. Antevāsino panassa sahassajaṭilā arahattaṃ pāpuṇiṃsu. Sabbeva iddhimayapattacīvaradharā ehibhikkhavo ahesunti.
པརམཏྠཛོཏིཀཱཡ ཁུདྡཀ-ཨཊྛཀཐཱཡ
Paramatthajotikāya khuddaka-aṭṭhakathāya
སུཏྟནིཔཱཏ-ཨཊྛཀཐཱཡ པིངྒིཡསུཏྟཝཎྞནཱ ནིཊྛིཏཱ།
Suttanipāta-aṭṭhakathāya piṅgiyasuttavaṇṇanā niṭṭhitā.
Related texts:
ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / ཁུདྡཀནིཀཱཡ • Khuddakanikāya / སུཏྟནིཔཱཏཔཱལི༹ • Suttanipātapāḷi / ༡༦. པིངྒིཡམཱཎཝཔུཙྪཱ • 16. Piṅgiyamāṇavapucchā
