| Library / Tipiṭaka / திபிடக • Tipiṭaka / விமானவத்து²-அட்ட²கதா² • Vimānavatthu-aṭṭhakathā |
9. பீதவிமானவண்ணனா
9. Pītavimānavaṇṇanā
பீதவத்தே² பீதத⁴ஜேதி பீதவிமானங். தஸ்ஸ கா உப்பத்தி? ப⁴க³வதி பரினிப்³பு³தே ரஞ்ஞா அஜாதஸத்துனா அத்தனா படிலத்³தா⁴ ப⁴க³வதோ ஸரீரதா⁴துயோ க³ஹெத்வா தூ²பே ச மஹே ச கதே ராஜக³ஹவாஸினீ அஞ்ஞதரா உபாஸிகா பாதோவ கதஸரீரபடிஜக்³க³னா ‘‘ஸத்து² தூ²பங் பூஜெஸ்ஸாமீ’’தி யதா²லத்³தா⁴னி சத்தாரி கோஸாதகீபுப்பா²னி க³ஹெத்வா ஸத்³தா⁴வேகே³ன ஸமுஸ்ஸாஹிதமானஸா மக்³க³பரிஸ்ஸயங் அனுபதா⁴ரெத்வாவ தூ²பாபி⁴முகீ² க³ச்ச²தி. அத² நங் தருணவச்சா² கா³வீ அபி⁴தா⁴வந்தீ வேகே³ன ஆபதித்வா ஸிங்கே³ன பஹரித்வா ஜீவிதக்க²யங் பாபேஸி. ஸா தாவதே³வ தாவதிங்ஸப⁴வனே நிப்³ப³த்தந்தீ ஸக்கஸ்ஸ தே³வரஞ்ஞோ உய்யானகீளாய க³ச்ச²ந்தஸ்ஸ பரிவாரபூ⁴தானங் அட்³ட⁴தியானங் நாடககோடீனங் மஜ்ஜே² அத்தனோ ஸரீரபபா⁴ய தா ஸப்³பா³ அபி⁴ப⁴வந்தீ ஸஹ ரதே²ன பாதுரஹோஸி. தங் தி³ஸ்வா ஸக்கோ தே³வராஜா விம்ஹிதசித்தோ அச்ச²ரியப்³பு⁴தஜாதோ ‘‘கீதி³ஸேன நு கோ² ஓளாரிகேன கம்முனா அயங் ஏதி³ஸிங் ஸுமஹதிங் தே³வித்³தி⁴முபாக³தா’’தி தங் இமாஹி கா³தா²ஹி புச்சி² –
Pītavatthepītadhajeti pītavimānaṃ. Tassa kā uppatti? Bhagavati parinibbute raññā ajātasattunā attanā paṭiladdhā bhagavato sarīradhātuyo gahetvā thūpe ca mahe ca kate rājagahavāsinī aññatarā upāsikā pātova katasarīrapaṭijagganā ‘‘satthu thūpaṃ pūjessāmī’’ti yathāladdhāni cattāri kosātakīpupphāni gahetvā saddhāvegena samussāhitamānasā maggaparissayaṃ anupadhāretvāva thūpābhimukhī gacchati. Atha naṃ taruṇavacchā gāvī abhidhāvantī vegena āpatitvā siṅgena paharitvā jīvitakkhayaṃ pāpesi. Sā tāvadeva tāvatiṃsabhavane nibbattantī sakkassa devarañño uyyānakīḷāya gacchantassa parivārabhūtānaṃ aḍḍhatiyānaṃ nāṭakakoṭīnaṃ majjhe attano sarīrapabhāya tā sabbā abhibhavantī saha rathena pāturahosi. Taṃ disvā sakko devarājā vimhitacitto acchariyabbhutajāto ‘‘kīdisena nu kho oḷārikena kammunā ayaṃ edisiṃ sumahatiṃ deviddhimupāgatā’’ti taṃ imāhi gāthāhi pucchi –
795.
795.
‘‘பீதவத்தே² பீதத⁴ஜே, பீதாலங்காரபூ⁴ஸிதே;
‘‘Pītavatthe pītadhaje, pītālaṅkārabhūsite;
பீதசந்த³னலித்தங்கே³, பீதஉப்பலமாலினீ.
Pītacandanalittaṅge, pītauppalamālinī.
796.
796.
‘‘பீதபாஸாத³ஸயனே, பீதாஸனே பீதபா⁴ஜனே;
‘‘Pītapāsādasayane, pītāsane pītabhājane;
பீதச²த்தே பீதரதே², பீதஸ்ஸே பீதபீ³ஜனே.
Pītachatte pītarathe, pītasse pītabījane.
797.
797.
‘‘கிங் கம்மமகரீ ப⁴த்³தே³, புப்³பே³ மானுஸகே ப⁴வே;
‘‘Kiṃ kammamakarī bhadde, pubbe mānusake bhave;
தே³வதே புச்சி²தாசிக்க², கிஸ்ஸ கம்மஸ்ஸித³ங் ப²ல’’ந்தி.
Devate pucchitācikkha, kissa kammassidaṃ phala’’nti.
ஸாபிஸ்ஸ இமாஹி கா³தா²ஹி ப்³யாகாஸி –
Sāpissa imāhi gāthāhi byākāsi –
798.
798.
‘‘கோஸாதகீ நாம லதத்தி² ப⁴ந்தே, தித்திகா அனபி⁴ச்சி²தா;
‘‘Kosātakī nāma latatthi bhante, tittikā anabhicchitā;
தஸ்ஸா சத்தாரி புப்பா²னி, தூ²பங் அபி⁴ஹரிங் அஹங்.
Tassā cattāri pupphāni, thūpaṃ abhihariṃ ahaṃ.
799.
799.
‘‘ஸத்து² ஸரீரமுத்³தி³ஸ்ஸ, விப்பஸன்னேன சேதஸா;
‘‘Satthu sarīramuddissa, vippasannena cetasā;
நாஸ்ஸ மக்³க³ங் அவெக்கி²ஸ்ஸங், ந தக்³க³மனஸா ஸதீ.
Nāssa maggaṃ avekkhissaṃ, na taggamanasā satī.
800.
800.
‘‘ததோ மங் அவதீ⁴ கா³வீ, தூ²பங் அபத்தமானஸங்;
‘‘Tato maṃ avadhī gāvī, thūpaṃ apattamānasaṃ;
தஞ்சாஹங் அபி⁴ஸஞ்செய்யங், பி⁴ய்யோ நூன இதோ ஸியா.
Tañcāhaṃ abhisañceyyaṃ, bhiyyo nūna ito siyā.
801.
801.
‘‘தேன கம்மேன தே³விந்த³, மக⁴வா தே³வகுஞ்ஜர;
‘‘Tena kammena devinda, maghavā devakuñjara;
பஹாய மானுஸங் தே³ஹங், தவ ஸஹப்³யமாக³தா’’தி.
Pahāya mānusaṃ dehaṃ, tava sahabyamāgatā’’ti.
795-6. தத்த² பீதசந்த³னலித்தங்கே³தி ஸுவண்ணவண்ணேன சந்த³னேன அனுலித்தஸரீரே. பீதபாஸாத³ஸயனேதி ஸப்³ப³ஸோவண்ணமயேன பாஸாதே³ன ஸுவண்ணபரிக்கி²த்தேஹி ஸயனேஹி ச ஸமன்னாக³தே. ஏவங் ஸப்³ப³த்த² ஹெட்டா² உபரி ச பீதஸத்³தே³ன ஸுவண்ணமேவ க³ஹிதந்தி த³ட்ட²ப்³ப³ங்.
795-6. Tattha pītacandanalittaṅgeti suvaṇṇavaṇṇena candanena anulittasarīre. Pītapāsādasayaneti sabbasovaṇṇamayena pāsādena suvaṇṇaparikkhittehi sayanehi ca samannāgate. Evaṃ sabbattha heṭṭhā upari ca pītasaddena suvaṇṇameva gahitanti daṭṭhabbaṃ.
798. லதத்தீ²தி லதா அத்தி². ப⁴ந்தேதி ஸக்கங் தே³வராஜானங் கா³ரவேன ஆலபதி. அனபி⁴ச்சி²தாதி ந அபி⁴கங்கி²தா.
798.Latatthīti latā atthi. Bhanteti sakkaṃ devarājānaṃ gāravena ālapati. Anabhicchitāti na abhikaṅkhitā.
799. ஸரீரந்தி ஸரீரபூ⁴தங் தா⁴துங். அவயவே சாயங் ஸமுதா³யவோஹாரோ யதா² ‘‘படோ ட³ட்³டோ⁴, ஸமுத்³தோ³ தி³ட்டோ²’’தி ச. அஸ்ஸாதி கோ³ரூபஸ்ஸ. மக்³க³ந்தி ஆக³மனமக்³க³ங். ந அவெக்கி²ஸ்ஸந்தி ந ஓலோகயிங். கஸ்மா? ந தக்³க³மனஸா ஸதீதி, தஸ்ஸங் கா³வியங் க³தமனா ட²பிதமனா ந ஹொந்தீ, அஞ்ஞத³த்து² ப⁴க³வதோ தூ²பக³தமனா ஏவ ஸமானாதி அத்தோ². ‘‘தத³ங்க³மனஸா ஸதீ’’தி ச பாடோ², தத³ங்கே³ தஸ்ஸ ப⁴க³வதோ தா⁴துயா அங்கே³ மனோ ஏதிஸ்ஸாதி தத³ங்க³மனஸா. ஏவங்பூ⁴தா அஹங் ததா³ தஸ்ஸா மக்³க³ங் நாவெக்கி²ஸ்ஸந்தி த³ஸ்ஸேதி.
799.Sarīranti sarīrabhūtaṃ dhātuṃ. Avayave cāyaṃ samudāyavohāro yathā ‘‘paṭo ḍaḍḍho, samuddo diṭṭho’’ti ca. Assāti gorūpassa. Magganti āgamanamaggaṃ. Na avekkhissanti na olokayiṃ. Kasmā? Na taggamanasā satīti, tassaṃ gāviyaṃ gatamanā ṭhapitamanā na hontī, aññadatthu bhagavato thūpagatamanā eva samānāti attho. ‘‘Tadaṅgamanasā satī’’ti ca pāṭho, tadaṅge tassa bhagavato dhātuyā aṅge mano etissāti tadaṅgamanasā. Evaṃbhūtā ahaṃ tadā tassā maggaṃ nāvekkhissanti dasseti.
800. தூ²பங் அபத்தமானஸந்தி தூ²பங் சேதியங் அஸம்பத்தஅஜ்ஜா²ஸயங், மனஸி ப⁴வோதி ஹி மானஸோ, அஜ்ஜா²ஸயோ மனோரதோ². ‘‘தூ²பங் உபக³ந்த்வா புப்பே²ஹி பூஜெஸ்ஸாமீ’’தி உப்பன்னமனோரத²ஸ்ஸ அஸம்புண்ணதாய ஏவங் வுத்தங். தூ²பங் சேதியங் பன புப்பே²ஹி பூஜனசித்தங் ஸித்³த⁴மேவ, யேன ஸா தே³வலோகே உப்பன்ன. தஞ்சாஹங் அபி⁴ஸஞ்செய்யந்தி தஞ்சே அஹங் அபி⁴ஸஞ்சினெய்யங், புப்ப²பூஜனேன ஹி புஞ்ஞங் அஹங் தூ²பங் அபி⁴க³ந்த்வா யதா²தி⁴ப்பாயங் பூஜனேன ஸம்மதே³வ சினெய்யங் உபசினெய்யந்தி அத்தோ². பி⁴ய்யோ நூன இதோ ஸியாதி இதோ யதா²லத்³த⁴ஸம்பத்திதோபி பி⁴ய்யோ உபரி உத்தரிதரா ஸம்பத்தி ஸியாதி மஞ்ஞேதி அத்தோ².
800.Thūpaṃ apattamānasanti thūpaṃ cetiyaṃ asampattaajjhāsayaṃ, manasi bhavoti hi mānaso, ajjhāsayo manoratho. ‘‘Thūpaṃ upagantvā pupphehi pūjessāmī’’ti uppannamanorathassa asampuṇṇatāya evaṃ vuttaṃ. Thūpaṃ cetiyaṃ pana pupphehi pūjanacittaṃ siddhameva, yena sā devaloke uppanna. Tañcāhaṃ abhisañceyyanti tañce ahaṃ abhisañcineyyaṃ, pupphapūjanena hi puññaṃ ahaṃ thūpaṃ abhigantvā yathādhippāyaṃ pūjanena sammadeva cineyyaṃ upacineyyanti attho. Bhiyyo nūna ito siyāti ito yathāladdhasampattitopi bhiyyo upari uttaritarā sampatti siyāti maññeti attho.
801. மக⁴வா தே³வகுஞ்ஜராதி ஆலபனங். தத்த² தே³வகுஞ்ஜராதி ஸப்³ப³ப³லபரக்கமாதி³விஸேஸேஹி தே³வேஸு குஞ்ஜரஸதி³ஸோ. ஸஹப்³யந்தி ஸஹபா⁴வங்.
801.Maghavādevakuñjarāti ālapanaṃ. Tattha devakuñjarāti sabbabalaparakkamādivisesehi devesu kuñjarasadiso. Sahabyanti sahabhāvaṃ.
802.
802.
‘‘இத³ங் ஸுத்வா தித³ஸாதி⁴பதி, மக⁴வா தே³வகுஞ்ஜரோ;
‘‘Idaṃ sutvā tidasādhipati, maghavā devakuñjaro;
தாவதிங்ஸே பஸாதெ³ந்தோ, மாதலிங் ஏதத³ப்³ரவீ’’தி. –
Tāvatiṃse pasādento, mātaliṃ etadabravī’’ti. –
இத³ங் த⁴ம்மஸங்கா³ஹகவசனங். ததோ ஸக்கோ மாதலிபமுக²ஸ்ஸ தே³வக³ணஸ்ஸ இமாஹி கா³தா²ஹி த⁴ம்மங் தே³ஸேஸி –
Idaṃ dhammasaṅgāhakavacanaṃ. Tato sakko mātalipamukhassa devagaṇassa imāhi gāthāhi dhammaṃ desesi –
803.
803.
‘‘பஸ்ஸ மாதலி அச்சே²ரங், சித்தங் கம்மப²லங் இத³ங்;
‘‘Passa mātali accheraṃ, cittaṃ kammaphalaṃ idaṃ;
அப்பகம்பி கதங் தெ³ய்யங், புஞ்ஞங் ஹோதி மஹப்ப²லங்.
Appakampi kataṃ deyyaṃ, puññaṃ hoti mahapphalaṃ.
804.
804.
‘‘நத்தி² சித்தே பஸன்னம்ஹி, அப்பகா நாம த³க்கி²ணா;
‘‘Natthi citte pasannamhi, appakā nāma dakkhiṇā;
ததா²க³தே வா ஸம்பு³த்³தே⁴, அத² வா தஸ்ஸ ஸாவகே.
Tathāgate vā sambuddhe, atha vā tassa sāvake.
805.
805.
‘‘ஏஹி மாதலி அம்ஹேபி, பி⁴ய்யோ பி⁴ய்யோ மஹேமஸே;
‘‘Ehi mātali amhepi, bhiyyo bhiyyo mahemase;
ததா²க³தஸ்ஸ தா⁴துயோ, ஸுகோ² புஞ்ஞானமுச்சயோ.
Tathāgatassa dhātuyo, sukho puññānamuccayo.
806.
806.
‘‘திட்ட²ந்தே நிப்³பு³தே சாபி, ஸமே சித்தே ஸமங் ப²லங்;
‘‘Tiṭṭhante nibbute cāpi, same citte samaṃ phalaṃ;
சேதோபணிதி⁴ஹேதுஹி, ஸத்தா க³ச்ச²ந்தி ஸுக்³க³திங்.
Cetopaṇidhihetuhi, sattā gacchanti suggatiṃ.
807.
807.
‘‘ப³ஹூனங் வத அத்தா²ய, உப்பஜ்ஜந்தி ததா²க³தா;
‘‘Bahūnaṃ vata atthāya, uppajjanti tathāgatā;
யத்த² காரங் கரித்வான, ஸக்³க³ங் க³ச்ச²ந்தி தா³யகா’’தி.
Yattha kāraṃ karitvāna, saggaṃ gacchanti dāyakā’’ti.
802. தத்த² பஸாதெ³ந்தோதி பஸன்னே கரொந்தோ, ரதனத்தயே ஸத்³த⁴ங் உப்பாதெ³ந்தோதி அத்தோ².
802. Tattha pasādentoti pasanne karonto, ratanattaye saddhaṃ uppādentoti attho.
803. சித்தந்தி விசித்தங் அசிந்தெய்யங். கம்மப²லந்தி தெ³ய்யத⁴ம்மஸ்ஸ அனுளாரத்தேபி கெ²த்தஸம்பத்தியா ச சித்தஸம்பத்தியா ச உளாரஸ்ஸ புஞ்ஞகம்மஸ்ஸ ப²லங் பஸ்ஸாதி யோஜனா. அப்பகம்பி கதங் தெ³ய்யங், புஞ்ஞங் ஹோதி மஹப்ப²லந்தி எத்த² கதந்தி காரவஸேன ஸக்காரவஸேன ஆயதனே வினியுத்தங். தெ³ய்யந்தி தா³தப்³ப³வத்து²ங். புஞ்ஞந்தி ததா²பவத்தங் புஞ்ஞகம்மங்.
803.Cittanti vicittaṃ acinteyyaṃ. Kammaphalanti deyyadhammassa anuḷārattepi khettasampattiyā ca cittasampattiyā ca uḷārassa puññakammassa phalaṃ passāti yojanā. Appakampi kataṃ deyyaṃ, puññaṃ hoti mahapphalanti ettha katanti kāravasena sakkāravasena āyatane viniyuttaṃ. Deyyanti dātabbavatthuṃ. Puññanti tathāpavattaṃ puññakammaṃ.
804. இதா³னி யத்த² அப்பகம்பி கதங் புஞ்ஞங் மஹப்ப²லங் ஹோதி, தங் பாகடங் கத்வா த³ஸ்ஸெந்தோ ‘‘நத்தி² சித்தே பஸன்னம்ஹீ’’தி கா³த²மாஹ. தங் ஸுவிஞ்ஞெய்யமேவ.
804. Idāni yattha appakampi kataṃ puññaṃ mahapphalaṃ hoti, taṃ pākaṭaṃ katvā dassento ‘‘natthi citte pasannamhī’’ti gāthamāha. Taṃ suviññeyyameva.
805-6. அம்ஹேபீதி மயம்பி. மஹேமஸேதி மஹாமஸே பூஜாமஸே. சேதோபணிதி⁴ஹேது ஹீதி அத்தனோ சித்தஸ்ஸ ஸம்மதே³வ ட²பனநிமித்தங், அத்தஸம்மாபணிதா⁴னேனாதி அத்தோ². தேனாஹ ப⁴க³வா –
805-6.Amhepīti mayampi. Mahemaseti mahāmase pūjāmase. Cetopaṇidhihetu hīti attano cittassa sammadeva ṭhapananimittaṃ, attasammāpaṇidhānenāti attho. Tenāha bhagavā –
‘‘ந தங் மாதாபிதா கயிரா, அஞ்ஞே வாபி ச ஞாதகா;
‘‘Na taṃ mātāpitā kayirā, aññe vāpi ca ñātakā;
ஸம்மா பணிஹிதங் சித்தங், ஸெய்யஸோ நங் ததோ கரே’’தி. (த⁴॰ ப॰ 43);
Sammā paṇihitaṃ cittaṃ, seyyaso naṃ tato kare’’ti. (dha. pa. 43);
ஏவஞ்ச பன வத்வா ஸக்கோ தே³வானமிந்தோ³ உய்யானகீளாய உஸ்ஸாஹங் படிப்பஸ்ஸம்பெ⁴த்வா ததோவ படினிவத்தித்வா அத்தனா அபி⁴ண்ஹங் பூஜனெய்யட்டா²னபூ⁴தே சூளாமணிசேதியே ஸத்தாஹங் பூஜங் அகாஸி. அத² அபரேன ஸமயேன தே³வசாரிகங் க³தஸ்ஸ ஆயஸ்மதோ நாரத³த்தே²ரஸ்ஸ தங் பவத்திங் கா³தா²ஹேவ கதே²ஸி, தே²ரோ த⁴ம்மஸங்கா³ஹகானங் ஆரோசேஸி, தே ததா² நங் ஸங்க³ஹங் ஆரோபேஸுந்தி.
Evañca pana vatvā sakko devānamindo uyyānakīḷāya ussāhaṃ paṭippassambhetvā tatova paṭinivattitvā attanā abhiṇhaṃ pūjaneyyaṭṭhānabhūte cūḷāmaṇicetiye sattāhaṃ pūjaṃ akāsi. Atha aparena samayena devacārikaṃ gatassa āyasmato nāradattherassa taṃ pavattiṃ gāthāheva kathesi, thero dhammasaṅgāhakānaṃ ārocesi, te tathā naṃ saṅgahaṃ āropesunti.
பீதவிமானவண்ணனா நிட்டி²தா.
Pītavimānavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / விமானவத்து²பாளி • Vimānavatthupāḷi / 9. பீதவிமானவத்து² • 9. Pītavimānavatthu
