| Library / Tipiṭaka / তিপিটক • Tipiṭaka / পেতৰত্থু-অট্ঠকথা • Petavatthu-aṭṭhakathā |
৪. পিট্ঠধীতলিকপেতৰত্থুৰণ্ণনা
4. Piṭṭhadhītalikapetavatthuvaṇṇanā
যং কিঞ্চারম্মণং কত্ৰাতি ইদং সত্থা সাৰত্থিযং জেতৰনে ৰিহরন্তো অনাথপিণ্ডিকস্স গহপতিনো দানং আরব্ভ কথেসি। অনাথপিণ্ডিকস্স কির গহপতিনো ধীতু ধীতায দারিকায ধাতি পিট্ঠধীতলিকং অদাসি ‘‘অযং তে ধীতা, ইমং গহেত্ৰা কীল়স্সূ’’তি। সা তত্থ ধীতুসঞ্ঞং উপ্পাদেসি। অথস্সা একদিৰসং তং গহেত্ৰা কীল়ন্তিযা পমাদেন পতিত্ৰা ভিজ্জি। ততো দারিকা ‘‘মম ধীতা মতা’’তি পরোদি। তং রোদন্তিং কোচিপি গেহজনো সঞ্ঞাপেতুং নাসক্খি। তস্মিঞ্চ সমযে সত্থা অনাথপিণ্ডিকস্স গহপতিনো গেহে পঞ্ঞত্তে আসনে নিসিন্নো হোতি, মহাসেট্ঠি চ ভগৰতো সমীপে নিসিন্নো অহোসি। ধাতি তং দারিকং গহেত্ৰা সেট্ঠিস্স সন্তিকং অগমাসি। সেট্ঠি তং দিস্ৰা ‘‘কিস্সাযং দারিকা রোদতী’’তি আহ। ধাতি তং পৰত্তিং সেট্ঠিস্স আরোচেসি। সেট্ঠি তং দারিকং অঙ্কে নিসীদাপেত্ৰা ‘‘তৰ ধীতুদানং দস্সামী’’তি সঞ্ঞাপেত্ৰা সত্থু আরোচেসি – ‘‘ভন্তে, মম নত্তুধীতরং পিট্ঠধীতলিকং উদ্দিস্স দানং দাতুকামো, তং মে পঞ্চহি ভিক্খুসতেহি সদ্ধিং স্ৰাতনায অধিৰাসেথা’’তি। অধিৰাসেসি ভগৰা তুণ্হীভাৰেন।
Yaṃ kiñcārammaṇaṃ katvāti idaṃ satthā sāvatthiyaṃ jetavane viharanto anāthapiṇḍikassa gahapatino dānaṃ ārabbha kathesi. Anāthapiṇḍikassa kira gahapatino dhītu dhītāya dārikāya dhāti piṭṭhadhītalikaṃ adāsi ‘‘ayaṃ te dhītā, imaṃ gahetvā kīḷassū’’ti. Sā tattha dhītusaññaṃ uppādesi. Athassā ekadivasaṃ taṃ gahetvā kīḷantiyā pamādena patitvā bhijji. Tato dārikā ‘‘mama dhītā matā’’ti parodi. Taṃ rodantiṃ kocipi gehajano saññāpetuṃ nāsakkhi. Tasmiñca samaye satthā anāthapiṇḍikassa gahapatino gehe paññatte āsane nisinno hoti, mahāseṭṭhi ca bhagavato samīpe nisinno ahosi. Dhāti taṃ dārikaṃ gahetvā seṭṭhissa santikaṃ agamāsi. Seṭṭhi taṃ disvā ‘‘kissāyaṃ dārikā rodatī’’ti āha. Dhāti taṃ pavattiṃ seṭṭhissa ārocesi. Seṭṭhi taṃ dārikaṃ aṅke nisīdāpetvā ‘‘tava dhītudānaṃ dassāmī’’ti saññāpetvā satthu ārocesi – ‘‘bhante, mama nattudhītaraṃ piṭṭhadhītalikaṃ uddissa dānaṃ dātukāmo, taṃ me pañcahi bhikkhusatehi saddhiṃ svātanāya adhivāsethā’’ti. Adhivāsesi bhagavā tuṇhībhāvena.
অথ ভগৰা দুতিযদিৰসে পঞ্চহি ভিক্খুসতেহি সদ্ধিং সেট্ঠিস্স ঘরং গন্ত্ৰা ভত্তকিচ্চং কত্ৰা অনুমোদনং করোন্তো –
Atha bhagavā dutiyadivase pañcahi bhikkhusatehi saddhiṃ seṭṭhissa gharaṃ gantvā bhattakiccaṃ katvā anumodanaṃ karonto –
১০.
10.
‘‘যং কিঞ্চারম্মণং কত্ৰা, দজ্জা দানং অমচ্ছরী।
‘‘Yaṃ kiñcārammaṇaṃ katvā, dajjā dānaṃ amaccharī;
পুব্বপেতে চ আরব্ভ, অথ ৰা ৰত্থুদেৰতা॥
Pubbapete ca ārabbha, atha vā vatthudevatā.
১১.
11.
‘‘চত্তারো চ মহারাজে, লোকপালে যসস্সিনে।
‘‘Cattāro ca mahārāje, lokapāle yasassine;
কুৰেরং ধতরট্ঠঞ্চ, ৰিরূপক্খং ৰিরূল়্হকং।
Kuveraṃ dhataraṭṭhañca, virūpakkhaṃ virūḷhakaṃ;
তে চেৰ পূজিতা হোন্তি, দাযকা চ অনিপ্ফলা॥
Te ceva pūjitā honti, dāyakā ca anipphalā.
১২.
12.
‘‘ন হি রুণ্ণং ৰা সোকো ৰা, যা চঞ্ঞা পরিদেৰনা।
‘‘Na hi ruṇṇaṃ vā soko vā, yā caññā paridevanā;
ন তং পেতস্স অত্থায, এৰং তিট্ঠন্তি ঞাতযো॥
Na taṃ petassa atthāya, evaṃ tiṭṭhanti ñātayo.
১৩.
13.
‘‘অযঞ্চ খো দক্খিণা দিন্না, সঙ্ঘম্হি সুপ্পতিট্ঠিতা।
‘‘Ayañca kho dakkhiṇā dinnā, saṅghamhi suppatiṭṭhitā;
দীঘরত্তং হিতাযস্স, ঠানসো উপকপ্পতী’’তি॥ – ইমা গাথা অভাসি।
Dīgharattaṃ hitāyassa, ṭhānaso upakappatī’’ti. – imā gāthā abhāsi;
১০. তত্থ যং কিঞ্চারম্মণং কত্ৰাতি মঙ্গলাদীসু অঞ্ঞতরং যং কিঞ্চি আরব্ভ উদ্দিস্স। দজ্জাতি দদেয্য। অমচ্ছরীতি অত্তনো সম্পত্তিযা পরেহি সাধারণভাৰাসহনলক্খণস্স মচ্ছেরস্স অভাৰতো অমচ্ছরী, পরিচ্চাগসীলো মচ্ছরিযলোভাদিচিত্তমলং দূরতো কত্ৰা দানং দদেয্যাতি অধিপ্পাযো। পুব্বপেতে চ আরব্ভাতি পুব্বকেপি পেতে উদ্দিস্স। ৰত্থুদেৰতাতি ঘরৰত্থুআদীসু অধিৰত্থা দেৰতা আরব্ভাতি যোজনা। অথ ৰাতি ইমিনা অঞ্ঞেপি দেৰমনুস্সাদিকে যে কেচি আরব্ভ দানং দদেয্যাতি দস্সেতি।
10. Tattha yaṃ kiñcārammaṇaṃ katvāti maṅgalādīsu aññataraṃ yaṃ kiñci ārabbha uddissa. Dajjāti dadeyya. Amaccharīti attano sampattiyā parehi sādhāraṇabhāvāsahanalakkhaṇassa maccherassa abhāvato amaccharī, pariccāgasīlo macchariyalobhādicittamalaṃ dūrato katvā dānaṃ dadeyyāti adhippāyo. Pubbapete ca ārabbhāti pubbakepi pete uddissa. Vatthudevatāti gharavatthuādīsu adhivatthā devatā ārabbhāti yojanā. Atha vāti iminā aññepi devamanussādike ye keci ārabbha dānaṃ dadeyyāti dasseti.
১১. তত্থ দেৰেসু তাৰ একচ্চে পাকটে দেৰে দস্সেন্তো ‘‘চত্তারো চ মহারাজে’’তি ৰত্ৰা পুন তে নামতো গণ্হন্তো ‘‘কুৰের’’ন্তিআদিমাহ। তত্থ কুৰেরন্তি ৰেস্সৰণং। ধতরট্ঠন্তিআদীনি সেসানং তিণ্ণং লোকপালানং নামানি। তে চেৰ পূজিতা হোন্তীতি তে চ মহারাজানো পুব্বপেতৰত্থুদেৰতাযো চ উদ্দিসনকিরিযায পটিমানিকা হোন্তি। দাযকা চ অনিপ্ফলাতি যে দানং দেন্তি, তে দাযকা চ পরেসং উদ্দিসনমত্তেন ন নিপ্ফলা, অত্তনো দানফলস্স ভাগিনো এৰ হোন্তি।
11. Tattha devesu tāva ekacce pākaṭe deve dassento ‘‘cattāro ca mahārāje’’ti vatvā puna te nāmato gaṇhanto ‘‘kuvera’’ntiādimāha. Tattha kuveranti vessavaṇaṃ. Dhataraṭṭhantiādīni sesānaṃ tiṇṇaṃ lokapālānaṃ nāmāni. Te ceva pūjitā hontīti te ca mahārājāno pubbapetavatthudevatāyo ca uddisanakiriyāya paṭimānikā honti. Dāyakā ca anipphalāti ye dānaṃ denti, te dāyakā ca paresaṃ uddisanamattena na nipphalā, attano dānaphalassa bhāgino eva honti.
১২. ইদানি ‘‘যে অত্তনো ঞাতীনং মরণেন রোদন্তি পরিদেৰন্তি সোচন্তি, তেসং তং নিরত্থকং, অত্তপরিতাপনমত্তমেৰা’’তি দস্সেতুং ‘‘ন হি রুণ্ণং ৰা’’তি গাথমাহ। তত্থ রুণ্ণন্তি রুদিতং অস্সুমোচনং ন হি কাতব্বন্তি ৰচনসেসো। সোকোতি সোচনং চিত্তসন্তাপো, অন্তোনিজ্ঝানন্তি অত্থো। যা চঞ্ঞা পরিদেৰনাতি যা চ রুণ্ণসোকতো অঞ্ঞা পরিদেৰনা, ‘‘কহং একপুত্তকা’’তিআদিৰাচাৰিপ্পলাপো, সোপি ন কাতব্বোতি অত্থো। সব্বত্থ ৰা-সদ্দো ৰিকপ্পনত্থো । ন তং পেতস্স অত্থাযাতি যস্মা রুণ্ণং ৰা সোকো ৰা পরিদেৰনা ৰাতি সব্বম্পি তং পেতস্স কালকতস্স অত্থায উপকারায ন হোতি, তস্মা ন হি তং কাতব্বং, তথাপি এৰং তিট্ঠন্তি ঞাতযো অৰিদ্দসুনোতি অধিপ্পাযো।
12. Idāni ‘‘ye attano ñātīnaṃ maraṇena rodanti paridevanti socanti, tesaṃ taṃ niratthakaṃ, attaparitāpanamattamevā’’ti dassetuṃ ‘‘na hi ruṇṇaṃ vā’’ti gāthamāha. Tattha ruṇṇanti ruditaṃ assumocanaṃ na hi kātabbanti vacanaseso. Sokoti socanaṃ cittasantāpo, antonijjhānanti attho. Yā caññā paridevanāti yā ca ruṇṇasokato aññā paridevanā, ‘‘kahaṃ ekaputtakā’’tiādivācāvippalāpo, sopi na kātabboti attho. Sabbattha vā-saddo vikappanattho . Na taṃ petassa atthāyāti yasmā ruṇṇaṃ vā soko vā paridevanā vāti sabbampi taṃ petassa kālakatassa atthāya upakārāya na hoti, tasmā na hi taṃ kātabbaṃ, tathāpi evaṃ tiṭṭhanti ñātayo aviddasunoti adhippāyo.
১৩. এৰং রুণ্ণাদীনং নিরত্থকভাৰং দস্সেত্ৰা ইদানি যা পুব্বপেতাদিকে আরব্ভ দাযকেন সঙ্ঘস্স দক্খিণা দিন্না, তস্সা সাত্থকভাৰং দস্সেন্তো ‘‘অযঞ্চ খো দক্খিণা’’তি গাথমাহ। তত্থ অযন্তি দাযকেন তং দিন্নং দানং পচ্চক্খতো দস্সেন্তো ৰদতি। চ-সদ্দো ব্যতিরেকত্থো, তেন যথা রুণ্ণাদি পেতস্স ন কস্সচি অত্থায হোতি, ন এৰমযং, অযং পন দক্খিণা দীঘরত্তং হিতাযস্স হোতীতি ৰক্খমানমেৰ ৰিসেসং জোতেতি। খোতি অৰধারণে। দক্খিণাতি দানং। সঙ্ঘম্হি সুপ্পতিট্ঠিতাতি অনুত্তরে পুঞ্ঞক্খেত্তে সঙ্ঘে সুট্ঠু পতিট্ঠিতা। দীঘরত্তং হিতাযস্সাতি অস্স পেতস্স চিরকালং হিতায অত্থায। ঠানসো উপকপ্পতীতি তঙ্খণঞ্ঞেৰ নিপ্ফজ্জতি, ন কালন্তরেতি অত্থো। অযঞ্হি তত্থ ধম্মতা – যং পেতে উদ্দিস্স দানে দিন্নে পেতা চে অনুমোদন্তি, তাৰদেৰ তস্স ফলেন পেতা পরিমুচ্চন্তীতি।
13. Evaṃ ruṇṇādīnaṃ niratthakabhāvaṃ dassetvā idāni yā pubbapetādike ārabbha dāyakena saṅghassa dakkhiṇā dinnā, tassā sātthakabhāvaṃ dassento ‘‘ayañca kho dakkhiṇā’’ti gāthamāha. Tattha ayanti dāyakena taṃ dinnaṃ dānaṃ paccakkhato dassento vadati. Ca-saddo byatirekattho, tena yathā ruṇṇādi petassa na kassaci atthāya hoti, na evamayaṃ, ayaṃ pana dakkhiṇā dīgharattaṃ hitāyassa hotīti vakkhamānameva visesaṃ joteti. Khoti avadhāraṇe. Dakkhiṇāti dānaṃ. Saṅghamhi suppatiṭṭhitāti anuttare puññakkhette saṅghe suṭṭhu patiṭṭhitā. Dīgharattaṃ hitāyassāti assa petassa cirakālaṃ hitāya atthāya. Ṭhānaso upakappatīti taṅkhaṇaññeva nipphajjati, na kālantareti attho. Ayañhi tattha dhammatā – yaṃ pete uddissa dāne dinne petā ce anumodanti, tāvadeva tassa phalena petā parimuccantīti.
এৰং ভগৰা ধম্মং দেসেত্ৰা মহাজনং পেতে উদ্দিস্স দানাভিরতমানসং কত্ৰা উট্ঠাযাসনা পক্কামি। পুনদিৰসে সেট্ঠিভরিযা অৰসেসা চ ঞাতকা সেট্ঠিং অনুৰত্তন্তা এৰং তেমাসমত্তং মহাদানং পৰত্তেসুং। অথ রাজা পসেনদি কোসলো ভগৰন্তং উপসঙ্কমিত্ৰা ‘‘কস্মা, ভন্তে, ভিক্খূ মাসমত্তং মম ঘরং নাগমিংসূ’’তি পুচ্ছি। সত্থারা তস্মিং কারণে কথিতে রাজাপি সেট্ঠিং অনুৰত্তন্তো বুদ্ধপ্পমুখস্স ভিক্খুসঙ্ঘস্স মহাদানং পৰত্তেসি, তং দিস্ৰা নাগরা রাজানং অনুৰত্তন্তা মাসমত্তং মহাদানং পৰত্তেসুং। এৰং মাসদ্ৰযং পিট্ঠধীতলিকমূলকং মহাদানং পৰত্তেসুন্তি।
Evaṃ bhagavā dhammaṃ desetvā mahājanaṃ pete uddissa dānābhiratamānasaṃ katvā uṭṭhāyāsanā pakkāmi. Punadivase seṭṭhibhariyā avasesā ca ñātakā seṭṭhiṃ anuvattantā evaṃ temāsamattaṃ mahādānaṃ pavattesuṃ. Atha rājā pasenadi kosalo bhagavantaṃ upasaṅkamitvā ‘‘kasmā, bhante, bhikkhū māsamattaṃ mama gharaṃ nāgamiṃsū’’ti pucchi. Satthārā tasmiṃ kāraṇe kathite rājāpi seṭṭhiṃ anuvattanto buddhappamukhassa bhikkhusaṅghassa mahādānaṃ pavattesi, taṃ disvā nāgarā rājānaṃ anuvattantā māsamattaṃ mahādānaṃ pavattesuṃ. Evaṃ māsadvayaṃ piṭṭhadhītalikamūlakaṃ mahādānaṃ pavattesunti.
পিট্ঠধীতলিকপেতৰত্থুৰণ্ণনা নিট্ঠিতা।
Piṭṭhadhītalikapetavatthuvaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / পেতৰত্থুপাল়ি • Petavatthupāḷi / ৪. পিট্ঠধীতলিকপেতৰত্থু • 4. Piṭṭhadhītalikapetavatthu
