| Library / Tipiṭaka / ತಿಪಿಟಕ • Tipiṭaka / ಬುದ್ಧವಂಸಪಾಳಿ • Buddhavaṃsapāḷi |
೧೫. ಪಿಯದಸ್ಸೀಬುದ್ಧವಂಸೋ
15. Piyadassībuddhavaṃso
೧.
1.
ಸುಜಾತಸ್ಸ ಅಪರೇನ, ಸಯಮ್ಭೂ ಲೋಕನಾಯಕೋ।
Sujātassa aparena, sayambhū lokanāyako;
ದುರಾಸದೋ ಅಸಮಸಮೋ, ಪಿಯದಸ್ಸೀ ಮಹಾಯಸೋ॥
Durāsado asamasamo, piyadassī mahāyaso.
೨.
2.
ಸೋಪಿ ಬುದ್ಧೋ ಅಮಿತಯಸೋ, ಆದಿಚ್ಚೋವ ವಿರೋಚತಿ।
Sopi buddho amitayaso, ādiccova virocati;
ಸಬ್ಬಂ ತಮಂ ನಿಹನ್ತ್ವಾನ, ಧಮ್ಮಚಕ್ಕಂ ಪವತ್ತಯಿ॥
Sabbaṃ tamaṃ nihantvāna, dhammacakkaṃ pavattayi.
೩.
3.
ತಸ್ಸಾಪಿ ಅತುಲತೇಜಸ್ಸ, ಅಹೇಸುಂ ಅಭಿಸಮಯಾ ತಯೋ।
Tassāpi atulatejassa, ahesuṃ abhisamayā tayo;
ಕೋಟಿಸತಸಹಸ್ಸಾನಂ, ಪಠಮಾಭಿಸಮಯೋ ಅಹು॥
Koṭisatasahassānaṃ, paṭhamābhisamayo ahu.
೪.
4.
ಸುದಸ್ಸನೋ ದೇವರಾಜಾ, ಮಿಚ್ಛಾದಿಟ್ಠಿಮರೋಚಯಿ।
Sudassano devarājā, micchādiṭṭhimarocayi;
ತಸ್ಸ ದಿಟ್ಠಿಂ ವಿನೋದೇನ್ತೋ, ಸತ್ಥಾ ಧಮ್ಮಮದೇಸಯಿ॥
Tassa diṭṭhiṃ vinodento, satthā dhammamadesayi.
೫.
5.
ಜನಸನ್ನಿಪಾತೋ ಅತುಲೋ, ಮಹಾಸನ್ನಿಪತೀ ತದಾ।
Janasannipāto atulo, mahāsannipatī tadā;
ನವುತಿಕೋಟಿಸಹಸ್ಸಾನಂ, ದುತಿಯಾಭಿಸಮಯೋ ಅಹು॥
Navutikoṭisahassānaṃ, dutiyābhisamayo ahu.
೬.
6.
ಯದಾ ದೋಣಮುಖಂ ಹತ್ಥಿಂ, ವಿನೇಸಿ ನರಸಾರಥಿ।
Yadā doṇamukhaṃ hatthiṃ, vinesi narasārathi;
ಅಸೀತಿಕೋಟಿಸಹಸ್ಸಾನಂ, ತತಿಯಾಭಿಸಮಯೋ ಅಹು॥
Asītikoṭisahassānaṃ, tatiyābhisamayo ahu.
೭.
7.
ಸನ್ನಿಪಾತಾ ತಯೋ ಆಸುಂ, ತಸ್ಸಾಪಿ ಪಿಯದಸ್ಸಿನೋ।
Sannipātā tayo āsuṃ, tassāpi piyadassino;
ಕೋಟಿಸತಸಹಸ್ಸಾನಂ, ಪಠಮೋ ಆಸಿ ಸಮಾಗಮೋ॥
Koṭisatasahassānaṃ, paṭhamo āsi samāgamo.
೮.
8.
ತತೋ ಪರಂ ನವುತಿಕೋಟೀ, ಸಮಿಂಸು ಏಕತೋ ಮುನೀ।
Tato paraṃ navutikoṭī, samiṃsu ekato munī;
ತತಿಯೇ ಸನ್ನಿಪಾತಮ್ಹಿ, ಅಸೀತಿಕೋಟಿಯೋ ಅಹೂ॥
Tatiye sannipātamhi, asītikoṭiyo ahū.
೯.
9.
ಅಜ್ಝಾಯಕೋ ಮನ್ತಧರೋ, ತಿಣ್ಣಂ ವೇದಾನ ಪಾರಗೂ॥
Ajjhāyako mantadharo, tiṇṇaṃ vedāna pāragū.
೧೦.
10.
ತಸ್ಸ ಧಮ್ಮಂ ಸುಣಿತ್ವಾನ, ಪಸಾದಂ ಜನಯಿಂ ಅಹಂ।
Tassa dhammaṃ suṇitvāna, pasādaṃ janayiṃ ahaṃ;
ಕೋಟಿಸತಸಹಸ್ಸೇಹಿ, ಸಙ್ಘಾರಾಮಂ ಅಮಾಪಯಿಂ॥
Koṭisatasahassehi, saṅghārāmaṃ amāpayiṃ.
೧೧.
11.
ತಸ್ಸ ದತ್ವಾನ ಆರಾಮಂ, ಹಟ್ಠೋ ಸಂವಿಗ್ಗಮಾನಸೋ।
Tassa datvāna ārāmaṃ, haṭṭho saṃviggamānaso;
೧೨.
12.
ಸೋಪಿ ಮಂ ಬುದ್ಧೋ ಬ್ಯಾಕಾಸಿ, ಸಙ್ಘಮಜ್ಝೇ ನಿಸೀದಿಯ।
Sopi maṃ buddho byākāsi, saṅghamajjhe nisīdiya;
‘‘ಅಟ್ಠಾರಸೇ ಕಪ್ಪಸತೇ, ಅಯಂ ಬುದ್ಧೋ ಭವಿಸ್ಸತಿ॥
‘‘Aṭṭhārase kappasate, ayaṃ buddho bhavissati.
೧೩.
13.
‘‘ಪಧಾನಂ ಪದಹಿತ್ವಾನ…ಪೇ॰… ಹೇಸ್ಸಾಮ ಸಮ್ಮುಖಾ ಇಮಂ’’॥
‘‘Padhānaṃ padahitvāna…pe… hessāma sammukhā imaṃ’’.
೧೪.
14.
ತಸ್ಸಾಪಿ ವಚನಂ ಸುತ್ವಾ, ಭಿಯ್ಯೋ ಚಿತ್ತಂ ಪಸಾದಯಿಂ।
Tassāpi vacanaṃ sutvā, bhiyyo cittaṃ pasādayiṃ;
ಉತ್ತರಿಂ ವತಮಧಿಟ್ಠಾಸಿಂ, ದಸಪಾರಮಿಪೂರಿಯಾ॥
Uttariṃ vatamadhiṭṭhāsiṃ, dasapāramipūriyā.
೧೫.
15.
ಸುಧಞ್ಞಂ ನಾಮ ನಗರಂ, ಸುದತ್ತೋ ನಾಮ ಖತ್ತಿಯೋ।
Sudhaññaṃ nāma nagaraṃ, sudatto nāma khattiyo;
ಚನ್ದಾ ನಾಮಾಸಿ ಜನಿಕಾ, ಪಿಯದಸ್ಸಿಸ್ಸ ಸತ್ಥುನೋ॥
Candā nāmāsi janikā, piyadassissa satthuno.
೧೬.
16.
ನವವಸ್ಸಸಹಸ್ಸಾನಿ, ಅಗಾರಂ ಅಜ್ಝ ಸೋ ವಸಿ।
Navavassasahassāni, agāraṃ ajjha so vasi;
ಸುನಿಮ್ಮಲವಿಮಲಗಿರಿಗುಹಾ, ತಯೋ ಪಾಸಾದಮುತ್ತಮಾ॥
Sunimmalavimalagiriguhā, tayo pāsādamuttamā.
೧೭.
17.
ತೇತ್ತಿಂಸಸಹಸ್ಸಾನಿ ಚ, ನಾರಿಯೋ ಸಮಲಙ್ಕತಾ।
Tettiṃsasahassāni ca, nāriyo samalaṅkatā;
ವಿಮಲಾ ನಾಮ ನಾರೀ ಚ, ಕಞ್ಚನಾವೇಳೋ ನಾಮ ಅತ್ರಜೋ॥
Vimalā nāma nārī ca, kañcanāveḷo nāma atrajo.
೧೮.
18.
ನಿಮಿತ್ತೇ ಚತುರೋ ದಿಸ್ವಾ, ರಥಯಾನೇನ ನಿಕ್ಖಮಿ।
Nimitte caturo disvā, rathayānena nikkhami;
ಛಮಾಸಂ ಪಧಾನಚಾರಂ, ಅಚರೀ ಪುರಿಸುತ್ತಮೋ॥
Chamāsaṃ padhānacāraṃ, acarī purisuttamo.
೧೯.
19.
ಬ್ರಹ್ಮುನಾ ಯಾಚಿತೋ ಸನ್ತೋ, ಪಿಯದಸ್ಸೀ ಮಹಾಮುನಿ।
Brahmunā yācito santo, piyadassī mahāmuni;
ವತ್ತಿ ಚಕ್ಕಂ ಮಹಾವೀರೋ, ಉಸಭುಯ್ಯಾನೇ ಮನೋರಮೇ॥
Vatti cakkaṃ mahāvīro, usabhuyyāne manorame.
೨೦.
20.
ಪಾಲಿತೋ ಸಬ್ಬದಸ್ಸೀ ಚ, ಅಹೇಸುಂ ಅಗ್ಗಸಾವಕಾ।
Pālito sabbadassī ca, ahesuṃ aggasāvakā;
ಸೋಭಿತೋ ನಾಮುಪಟ್ಠಾಕೋ, ಪಿಯದಸ್ಸಿಸ್ಸ ಸತ್ಥುನೋ॥
Sobhito nāmupaṭṭhāko, piyadassissa satthuno.
೨೧.
21.
ಸುಜಾತಾ ಧಮ್ಮದಿನ್ನಾ ಚ, ಅಹೇಸುಂ ಅಗ್ಗಸಾವಿಕಾ।
Sujātā dhammadinnā ca, ahesuṃ aggasāvikā;
ಬೋಧಿ ತಸ್ಸ ಭಗವತೋ, ಕಕುಧೋತಿ ಪವುಚ್ಚತಿ॥
Bodhi tassa bhagavato, kakudhoti pavuccati.
೨೨.
22.
ಸನ್ಧಕೋ ಧಮ್ಮಕೋ ಚೇವ, ಅಹೇಸುಂ ಅಗ್ಗುಪಟ್ಠಕಾ।
Sandhako dhammako ceva, ahesuṃ aggupaṭṭhakā;
ವಿಸಾಖಾ ಧಮ್ಮದಿನ್ನಾ ಚ, ಅಹೇಸುಂ ಅಗ್ಗುಪಟ್ಠಿಕಾ॥
Visākhā dhammadinnā ca, ahesuṃ aggupaṭṭhikā.
೨೩.
23.
ಸೋಪಿ ಬುದ್ಧೋ ಅಮಿತಯಸೋ, ದ್ವತ್ತಿಂಸವರಲಕ್ಖಣೋ।
Sopi buddho amitayaso, dvattiṃsavaralakkhaṇo;
ಅಸೀತಿಹತ್ಥಮುಬ್ಬೇಧೋ, ಸಾಲರಾಜಾವ ದಿಸ್ಸತಿ॥
Asītihatthamubbedho, sālarājāva dissati.
೨೪.
24.
ಅಗ್ಗಿಚನ್ದಸೂರಿಯಾನಂ, ನತ್ಥಿ ತಾದಿಸಿಕಾ ಪಭಾ।
Aggicandasūriyānaṃ, natthi tādisikā pabhā;
ಯಥಾ ಅಹು ಪಭಾ ತಸ್ಸ, ಅಸಮಸ್ಸ ಮಹೇಸಿನೋ॥
Yathā ahu pabhā tassa, asamassa mahesino.
೨೫.
25.
ತಸ್ಸಾಪಿ ದೇವದೇವಸ್ಸ, ಆಯು ತಾವತಕಂ ಅಹು।
Tassāpi devadevassa, āyu tāvatakaṃ ahu;
ನವುತಿವಸ್ಸಸಹಸ್ಸಾನಿ, ಲೋಕೇ ಅಟ್ಠಾಸಿ ಚಕ್ಖುಮಾ॥
Navutivassasahassāni, loke aṭṭhāsi cakkhumā.
೨೬.
26.
ಸೋಪಿ ಬುದ್ಧೋ ಅಸಮಸಮೋ, ಯುಗಾನಿಪಿ ತಾನಿ ಅತುಲಿಯಾನಿ।
Sopi buddho asamasamo, yugānipi tāni atuliyāni;
ಸಬ್ಬಂ ತಮನ್ತರಹಿತಂ, ನನು ರಿತ್ತಾ ಸಬ್ಬಸಙ್ಖಾರಾ॥
Sabbaṃ tamantarahitaṃ, nanu rittā sabbasaṅkhārā.
೨೭.
27.
ಪಿಯದಸ್ಸೀ ಮುನಿವರೋ, ಅಸ್ಸತ್ಥಾರಾಮಮ್ಹಿ ನಿಬ್ಬುತೋ।
Piyadassī munivaro, assatthārāmamhi nibbuto;
ತತ್ಥೇವಸ್ಸ ಜಿನಥೂಪೋ, ತೀಣಿಯೋಜನಮುಗ್ಗತೋತಿ॥
Tatthevassa jinathūpo, tīṇiyojanamuggatoti.
ಪಿಯದಸ್ಸಿಸ್ಸ ಭಗವತೋ ವಂಸೋ ತೇರಸಮೋ।
Piyadassissa bhagavato vaṃso terasamo.
Footnotes:
Related texts:
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಖುದ್ದಕನಿಕಾಯ (ಅಟ್ಠಕಥಾ) • Khuddakanikāya (aṭṭhakathā) / ಬುದ್ಧವಂಸ-ಅಟ್ಠಕಥಾ • Buddhavaṃsa-aṭṭhakathā / ೧೫. ಪಿಯದಸ್ಸೀಬುದ್ಧವಂಸವಣ್ಣನಾ • 15. Piyadassībuddhavaṃsavaṇṇanā
