| Library / Tipiṭaka / திபிடக • Tipiṭaka / மஜ்ஜி²மனிகாய (டீகா) • Majjhimanikāya (ṭīkā) |
7. பியஜாதிகஸுத்தவண்ணனா
7. Piyajātikasuttavaṇṇanā
353. பகதினியாமேனாதி யதா² ஸோகுப்பத்திதோ புப்³பே³ இதி கத்தப்³பே³ஸு அஸம்மோஹவஸேன சித்தங் பக்க²ந்த³தி, தானி சஸ்ஸ உபட்ட²ஹந்தி, ந ஏவங் ஸோகஸ்ஸ சித்தஸங்கோசஸபா⁴வதோ. தேன வுத்தங் ‘‘பகதினியாமேன பன ந படிப⁴ந்தீ’’தி. கேசி பன ‘‘ஸாமந்தா கதிபயே ந குடும்ப³ங் ஸந்தா⁴ரேதி. தேனாஹ ‘ந ஸப்³பே³ன ஸப்³ப³ங் படிப⁴ந்தீ’தி’’ வத³ந்தி. எத்தா²தி து³தியபதே³. அனேகத்த²த்தா தா⁴தூனங் ‘‘ந படிபா⁴தீ’’தி பத³ஸ்ஸ ‘‘ந ருச்சதீ’’தி அத்த²மாஹ. ந படிபா⁴தீதி வா பு⁴ஞ்ஜிதுகாமதாசித்தங் ந உபட்டி²தந்தி அத்தோ². பதிட்டி²தோகாஸந்தி இந்த்³ரியாவிட்ட²ட்டா²னங் வத³தி. பியாயிதப்³ப³தோ பியோ ஜாதி உப்பத்திட்டா²னங் ஏதேஸந்தி பியஜாதிகா. பியோ பபு⁴தி ஏதேஸந்தி பியப்பபு⁴திகாதி வத்தப்³பே³, உ-காரஸ்ஸ வ-காரங், த-காரஸ்ஸ ச லோபங் கத்வா ‘‘பியப்பபா⁴விகா’’தி வுத்தங். தேனாஹ ‘‘பியதோ பப⁴வந்தீ’’தி.
353.Pakatiniyāmenāti yathā sokuppattito pubbe iti kattabbesu asammohavasena cittaṃ pakkhandati, tāni cassa upaṭṭhahanti, na evaṃ sokassa cittasaṅkocasabhāvato. Tena vuttaṃ ‘‘pakatiniyāmena pana na paṭibhantī’’ti. Keci pana ‘‘sāmantā katipaye na kuṭumbaṃ sandhāreti. Tenāha ‘na sabbena sabbaṃ paṭibhantī’ti’’ vadanti. Etthāti dutiyapade. Anekatthattā dhātūnaṃ ‘‘na paṭibhātī’’ti padassa ‘‘na ruccatī’’ti atthamāha. Na paṭibhātīti vā bhuñjitukāmatācittaṃ na upaṭṭhitanti attho. Patiṭṭhitokāsanti indriyāviṭṭhaṭṭhānaṃ vadati. Piyāyitabbato piyo jāti uppattiṭṭhānaṃ etesanti piyajātikā. Piyo pabhuti etesanti piyappabhutikāti vattabbe, u-kārassa va-kāraṃ, ta-kārassa ca lopaṃ katvā ‘‘piyappabhāvikā’’ti vuttaṃ. Tenāha ‘‘piyato pabhavantī’’ti.
355. பர-ஸத்³தே³ன ஸமானத்த²ங் அஜ்ஜ²த்திகபா⁴வனிஸேத⁴னத்த²ங் ‘‘பிரே’’தி பத³ந்தி ஆஹ ‘‘அம்ஹாகங் பரே’’தி. பிரேதி வா ‘‘பரதோ’’தி இமினா ஸமானத்த²ங் நிபாதபத³ந்தி ஆஹ ‘‘சர பிரேதி பரதோ க³ச்சா²’’தி.
355. Para-saddena samānatthaṃ ajjhattikabhāvanisedhanatthaṃ ‘‘pire’’ti padanti āha ‘‘amhākaṃ pare’’ti. Pireti vā ‘‘parato’’ti iminā samānatthaṃ nipātapadanti āha ‘‘cara pireti parato gacchā’’ti.
356. த்³விதா⁴ செ²த்வாதி எத்த² யதி³ இத்தீ² தஸ்ஸ புரிஸஸ்ஸ பியா, கத²ங் த்³விதா⁴ சி²ந்த³தீதி ஆஹ ‘‘யதி³ ஹீ’’திஆதி³.
356.Dvidhā chetvāti ettha yadi itthī tassa purisassa piyā, kathaṃ dvidhā chindatīti āha ‘‘yadi hī’’tiādi.
357. கத²ங் கதெ²ய்யந்தி யதா² ப⁴க³வா ஏதஸ்ஸ ப்³ராஹ்மணஸ்ஸ கதே²ஸி, ஸோ ச மே கதே²ஸி, ததா² சாஹங் கதெ²ய்யங். மரணவஸேன விபரிணாமோ அத்தபா⁴வஸ்ஸ பரிவத்தத்தா. பலாயித்வா க³மனவஸேன அஞ்ஞதா²பா⁴வோ மித்தஸந்த²வஸ்ஸ ஸமாக³மஸ்ஸ ச அஞ்ஞதா²பூ⁴தத்தா.
357.Kathaṃ katheyyanti yathā bhagavā etassa brāhmaṇassa kathesi, so ca me kathesi, tathā cāhaṃ katheyyaṃ. Maraṇavasena vipariṇāmo attabhāvassa parivattattā. Palāyitvā gamanavasena aññathābhāvo mittasanthavassa samāgamassa ca aññathābhūtattā.
ச²ட்³டி³தபா⁴வேனாதி பரிவத்திதபா⁴வேன. ஹத்த²க³மனவஸேன அஞ்ஞதா²பா⁴வோ புப்³பே³ ஸவஸே வத்திதானங் இதா³னி வஸே அவத்தனபா⁴வேன.
Chaḍḍitabhāvenāti parivattitabhāvena. Hatthagamanavasena aññathābhāvo pubbe savase vattitānaṃ idāni vase avattanabhāvena.
ஆசமேஹீதி ஆசமனங் முக²விக்கா²லனங் காரேஹி. யஸ்மா முக²ங் விக்கா²லெந்தா ஹி ஹத்த²பாதே³ தோ⁴வித்வா விக்கா²லெந்தி, தஸ்மா ‘‘ஆசமித்வா’’தி வத்வா பச்சா²பி தஸ்ஸ அத்த²ங் த³ஸ்ஸெந்தோ ‘‘முக²ங் விக்கா²லெத்வா’’தி ஆஹ. ஸேஸங் ஸுவிஞ்ஞெய்யமேவ.
Ācamehīti ācamanaṃ mukhavikkhālanaṃ kārehi. Yasmā mukhaṃ vikkhālentā hi hatthapāde dhovitvā vikkhālenti, tasmā ‘‘ācamitvā’’ti vatvā pacchāpi tassa atthaṃ dassento ‘‘mukhaṃ vikkhāletvā’’ti āha. Sesaṃ suviññeyyameva.
பியஜாதிகஸுத்தவண்ணனாய லீனத்த²ப்பகாஸனா ஸமத்தா.
Piyajātikasuttavaṇṇanāya līnatthappakāsanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / மஜ்ஜி²மனிகாய • Majjhimanikāya / 7. பியஜாதிகஸுத்தங் • 7. Piyajātikasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / மஜ்ஜி²மனிகாய (அட்ட²கதா²) • Majjhimanikāya (aṭṭhakathā) / 7. பியஜாதிகஸுத்தவண்ணனா • 7. Piyajātikasuttavaṇṇanā
