| Library / Tipiṭaka / তিপিটক • Tipiṭaka / মজ্ঝিমনিকায (টীকা) • Majjhimanikāya (ṭīkā) |
৭. পিযজাতিকসুত্তৰণ্ণনা
7. Piyajātikasuttavaṇṇanā
৩৫৩. পকতিনিযামেনাতি যথা সোকুপ্পত্তিতো পুব্বে ইতি কত্তব্বেসু অসম্মোহৰসেন চিত্তং পক্খন্দতি, তানি চস্স উপট্ঠহন্তি, ন এৰং সোকস্স চিত্তসঙ্কোচসভাৰতো। তেন ৰুত্তং ‘‘পকতিনিযামেন পন ন পটিভন্তী’’তি। কেচি পন ‘‘সামন্তা কতিপযে ন কুটুম্বং সন্ধারেতি। তেনাহ ‘ন সব্বেন সব্বং পটিভন্তী’তি’’ ৰদন্তি। এত্থাতি দুতিযপদে। অনেকত্থত্তা ধাতূনং ‘‘ন পটিভাতী’’তি পদস্স ‘‘ন রুচ্চতী’’তি অত্থমাহ। ন পটিভাতীতি ৰা ভুঞ্জিতুকামতাচিত্তং ন উপট্ঠিতন্তি অত্থো। পতিট্ঠিতোকাসন্তি ইন্দ্রিযাৰিট্ঠট্ঠানং ৰদতি। পিযাযিতব্বতো পিযো জাতি উপ্পত্তিট্ঠানং এতেসন্তি পিযজাতিকা। পিযো পভুতি এতেসন্তি পিযপ্পভুতিকাতি ৰত্তব্বে, উ-কারস্স ৰ-কারং, ত-কারস্স চ লোপং কত্ৰা ‘‘পিযপ্পভাৰিকা’’তি ৰুত্তং। তেনাহ ‘‘পিযতো পভৰন্তী’’তি।
353.Pakatiniyāmenāti yathā sokuppattito pubbe iti kattabbesu asammohavasena cittaṃ pakkhandati, tāni cassa upaṭṭhahanti, na evaṃ sokassa cittasaṅkocasabhāvato. Tena vuttaṃ ‘‘pakatiniyāmena pana na paṭibhantī’’ti. Keci pana ‘‘sāmantā katipaye na kuṭumbaṃ sandhāreti. Tenāha ‘na sabbena sabbaṃ paṭibhantī’ti’’ vadanti. Etthāti dutiyapade. Anekatthattā dhātūnaṃ ‘‘na paṭibhātī’’ti padassa ‘‘na ruccatī’’ti atthamāha. Na paṭibhātīti vā bhuñjitukāmatācittaṃ na upaṭṭhitanti attho. Patiṭṭhitokāsanti indriyāviṭṭhaṭṭhānaṃ vadati. Piyāyitabbato piyo jāti uppattiṭṭhānaṃ etesanti piyajātikā. Piyo pabhuti etesanti piyappabhutikāti vattabbe, u-kārassa va-kāraṃ, ta-kārassa ca lopaṃ katvā ‘‘piyappabhāvikā’’ti vuttaṃ. Tenāha ‘‘piyato pabhavantī’’ti.
৩৫৫. পর-সদ্দেন সমানত্থং অজ্ঝত্তিকভাৰনিসেধনত্থং ‘‘পিরে’’তি পদন্তি আহ ‘‘অম্হাকং পরে’’তি। পিরেতি ৰা ‘‘পরতো’’তি ইমিনা সমানত্থং নিপাতপদন্তি আহ ‘‘চর পিরেতি পরতো গচ্ছা’’তি।
355. Para-saddena samānatthaṃ ajjhattikabhāvanisedhanatthaṃ ‘‘pire’’ti padanti āha ‘‘amhākaṃ pare’’ti. Pireti vā ‘‘parato’’ti iminā samānatthaṃ nipātapadanti āha ‘‘cara pireti parato gacchā’’ti.
৩৫৬. দ্ৰিধা ছেত্ৰাতি এত্থ যদি ইত্থী তস্স পুরিসস্স পিযা, কথং দ্ৰিধা ছিন্দতীতি আহ ‘‘যদি হী’’তিআদি।
356.Dvidhā chetvāti ettha yadi itthī tassa purisassa piyā, kathaṃ dvidhā chindatīti āha ‘‘yadi hī’’tiādi.
৩৫৭. কথং কথেয্যন্তি যথা ভগৰা এতস্স ব্রাহ্মণস্স কথেসি, সো চ মে কথেসি, তথা চাহং কথেয্যং। মরণৰসেন ৰিপরিণামো অত্তভাৰস্স পরিৰত্তত্তা। পলাযিত্ৰা গমনৰসেন অঞ্ঞথাভাৰো মিত্তসন্থৰস্স সমাগমস্স চ অঞ্ঞথাভূতত্তা।
357.Kathaṃ katheyyanti yathā bhagavā etassa brāhmaṇassa kathesi, so ca me kathesi, tathā cāhaṃ katheyyaṃ. Maraṇavasena vipariṇāmo attabhāvassa parivattattā. Palāyitvā gamanavasena aññathābhāvo mittasanthavassa samāgamassa ca aññathābhūtattā.
ছড্ডিতভাৰেনাতি পরিৰত্তিতভাৰেন। হত্থগমনৰসেন অঞ্ঞথাভাৰো পুব্বে সৰসে ৰত্তিতানং ইদানি ৰসে অৰত্তনভাৰেন।
Chaḍḍitabhāvenāti parivattitabhāvena. Hatthagamanavasena aññathābhāvo pubbe savase vattitānaṃ idāni vase avattanabhāvena.
আচমেহীতি আচমনং মুখৰিক্খালনং কারেহি। যস্মা মুখং ৰিক্খালেন্তা হি হত্থপাদে ধোৰিত্ৰা ৰিক্খালেন্তি, তস্মা ‘‘আচমিত্ৰা’’তি ৰত্ৰা পচ্ছাপি তস্স অত্থং দস্সেন্তো ‘‘মুখং ৰিক্খালেত্ৰা’’তি আহ। সেসং সুৰিঞ্ঞেয্যমেৰ।
Ācamehīti ācamanaṃ mukhavikkhālanaṃ kārehi. Yasmā mukhaṃ vikkhālentā hi hatthapāde dhovitvā vikkhālenti, tasmā ‘‘ācamitvā’’ti vatvā pacchāpi tassa atthaṃ dassento ‘‘mukhaṃ vikkhāletvā’’ti āha. Sesaṃ suviññeyyameva.
পিযজাতিকসুত্তৰণ্ণনায লীনত্থপ্পকাসনা সমত্তা।
Piyajātikasuttavaṇṇanāya līnatthappakāsanā samattā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / মজ্ঝিমনিকায • Majjhimanikāya / ৭. পিযজাতিকসুত্তং • 7. Piyajātikasuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / মজ্ঝিমনিকায (অট্ঠকথা) • Majjhimanikāya (aṭṭhakathā) / ৭. পিযজাতিকসুত্তৰণ্ণনা • 7. Piyajātikasuttavaṇṇanā
