| Library / Tipiṭaka / திபிடக • Tipiṭaka / அபதா³ன-அட்ட²கதா² • Apadāna-aṭṭhakathā |
10. பியாலப²லதா³யகத்தே²ரஅபதா³னவண்ணனா
10. Piyālaphaladāyakattheraapadānavaṇṇanā
பரோத⁴கோ ததா³ ஆஸிந்திஆதி³கங் ஆயஸ்மதோ பியாலப²லதா³யகத்தே²ரஸ்ஸ அபதா³னங். அயம்பி புரிமபு³த்³தே⁴ஸு கதாதி⁴காரோ தத்த² தத்த² ப⁴வே விவட்டூபனிஸ்ஸயானி புஞ்ஞானி உபசினந்தோ ஸிகி²ஸ்ஸ ப⁴க³வதோ காலே நேஸாத³குலே நிப்³ப³த்தோ ஹிமவந்தே ஏகஸ்மிங் பப்³பா⁴ரே மிகே³ வதி⁴த்வா ஜீவிகங் கப்பெத்வா வஸதி. தஸ்மிங் காலே தத்த² க³தங் ஸிகி²ங் ப⁴க³வந்தங் தி³ஸ்வா பஸன்னமானஸோ ஸாயங் பாதங் நமஸ்ஸமானோ கஞ்சி தெ³ய்யத⁴ம்மங் அபஸ்ஸந்தோ மது⁴ரானி பியாலப²லானி உச்சினித்வா அதா³ஸி. ப⁴க³வா தானி பரிபு⁴ஞ்ஜி. ஸோ நேஸாதோ³ பு³த்³தா⁴ரம்மணாய பீதியா நிரந்தரங் பு²ட்ட²ஸரீரோ பாபகம்மே விரத்தசித்தோ மூலப²லாஹாரோ நசிரஸ்ஸேவ காலங் கத்வா தே³வலோகே நிப்³ப³த்தி.
Parodhakotadā āsintiādikaṃ āyasmato piyālaphaladāyakattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto sikhissa bhagavato kāle nesādakule nibbatto himavante ekasmiṃ pabbhāre mige vadhitvā jīvikaṃ kappetvā vasati. Tasmiṃ kāle tattha gataṃ sikhiṃ bhagavantaṃ disvā pasannamānaso sāyaṃ pātaṃ namassamāno kañci deyyadhammaṃ apassanto madhurāni piyālaphalāni uccinitvā adāsi. Bhagavā tāni paribhuñji. So nesādo buddhārammaṇāya pītiyā nirantaraṃ phuṭṭhasarīro pāpakamme virattacitto mūlaphalāhāro nacirasseva kālaṃ katvā devaloke nibbatti.
66. ஸோ தத்த² தி³ப்³ப³ஸம்பத்தியோ அனுப⁴வித்வா மனுஸ்ஸேஸு ச அனேகவித⁴ஸம்பத்தியோ அனுப⁴வித்வா இமஸ்மிங் பு³த்³து⁴ப்பாதே³ க³ஹபதிகுலே நிப்³ப³த்தோ விஞ்ஞுதங் பத்தோ க⁴ராவாஸங் ஸண்ட²பெத்வா தத்த² அனபி⁴ரதோ கே³ஹங் பஹாய ஸத்து² ஸந்திகே பப்³ப³ஜித்வா விபஸ்ஸனங் வட்³டெ⁴த்வா நசிரஸ்ஸேவ அரஹத்தங் பத்தோ அத்தனோ கதப²லதா³னகம்மங் ஸரித்வா ஸோமனஸ்ஸஜாதோ புப்³ப³சரிதாபதா³னங் பகாஸெந்தோ பரோத⁴கோ ததா³ ஆஸிந்திஆதி³மாஹ. தத்த² யதா³ அஹங் பியாலப²லங் த³த்வா சித்தங் பஸாதே³ஸிங், ததா³ அஹங் பரோத⁴கோ ஆஸிந்தி ஸம்ப³ந்தோ⁴. பரோத⁴கோதி பரஸத்தரோத⁴கோ விஹேஸகோ. ‘‘பரரோத⁴கோ’’தி வத்தப்³பே³ புப்³ப³ஸ்ஸ ர-காரஸ்ஸ லோபங் கத்வா ‘‘பரோத⁴கோ’’தி வுத்தங்.
66. So tattha dibbasampattiyo anubhavitvā manussesu ca anekavidhasampattiyo anubhavitvā imasmiṃ buddhuppāde gahapatikule nibbatto viññutaṃ patto gharāvāsaṃ saṇṭhapetvā tattha anabhirato gehaṃ pahāya satthu santike pabbajitvā vipassanaṃ vaḍḍhetvā nacirasseva arahattaṃ patto attano kataphaladānakammaṃ saritvā somanassajāto pubbacaritāpadānaṃ pakāsento parodhako tadā āsintiādimāha. Tattha yadā ahaṃ piyālaphalaṃ datvā cittaṃ pasādesiṃ, tadā ahaṃ parodhako āsinti sambandho. Parodhakoti parasattarodhako vihesako. ‘‘Pararodhako’’ti vattabbe pubbassa ra-kārassa lopaṃ katvā ‘‘parodhako’’ti vuttaṃ.
69. பரிசாரிங் வினாயகந்தி தங் நிப்³பா³னபாபகங் ஸத்தா²ரங், ‘‘ப⁴ந்தே , இமங் ப²லங் பரிபு⁴ஞ்ஜதா²’’தி பவாரிங் நிமந்தேஸிங் ஆராதே⁴ஸிந்தி அத்தோ². ஸேஸங் ஸுவிஞ்ஞெய்யமேவாதி.
69.Paricāriṃ vināyakanti taṃ nibbānapāpakaṃ satthāraṃ, ‘‘bhante , imaṃ phalaṃ paribhuñjathā’’ti pavāriṃ nimantesiṃ ārādhesinti attho. Sesaṃ suviññeyyamevāti.
பியாலப²லதா³யகத்தே²ரஅபதா³னவண்ணனா ஸமத்தா.
Piyālaphaladāyakattheraapadānavaṇṇanā samattā.
சுத்³த³ஸமவக்³க³வண்ணனா ஸமத்தா.
Cuddasamavaggavaṇṇanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / அபதா³னபாளி • Apadānapāḷi / 10. பியாலப²லதா³யகத்தே²ரஅபதா³னங் • 10. Piyālaphaladāyakattheraapadānaṃ
